Pramāṇa · Search · About · API

Abdadidhiti 2.p45

Abdadīdhiti 2.p45

Language
Sanskrit

2.p45.1

83 tena vrataprabhāveṇa saubhāgyaṃ prāptavatyasi | tadādivratarājastu na kasyāpi niveditaḥ 84 vratarājasya nāmedaṃ śṛṇu devi yathā'bhavat | haritālīti nāmeda manvarthamabhavaddrutam 85 ālibhirharitā yasmāttasmātsā haritālikā | tvameva mukhyā devyatra tena tvannāmakavratam 86 devyuvāca | nāmedaṃ kathitaṃ deva vidhiṃ vada mama prabho | kiṃ puṇyaṃ kiṃ phalaṃ cāsya kena vā vidhinā caret 87 īśvara uvāca | śṛṇu devi vidhiṃ vakṣye nārīṇāṃ vratamuttamam | kartavyaṃ tu prayatnena yadi saubhāgyamicchati 88 toraṇādi prakartavyaṃ kadalīstambhamaṇḍitam | ācchādya paṭṭavastraistu nānāvarṇairvicitritam 89 candanādisugandhena lepayedgṛhamaṇḍapam | śaṅkhabherīmṛdaṅgaiśca vāditrairbahubhirvaraiḥ 90 nānāmaṅgalayogastu kartavyo mama sadmani | sthāpanaṃ tatra kartavyaṃ pārvatyā sahitasya me 91 pūjayedbahubhiḥ puṣpairgandhadhūpairmanoharaiḥ | upoṣya pūjayedbhaktyā kuryājāgaraṇaṃ niśi 92 nārikelaiśca jambīrairanyaiśca vividhaiḥ phalaiḥ | ṛtudeśodbhavaiḥ sarvairnaivedyaiḥ kusumairnavaiḥ 93 sugandhairdhūpadīpaiśca mantreṇānena pūjayet | namaḥ śivāya śāntāya pañcavaktrāya śūline 94 nandibhṛṅgimahākālagaṇayuktāya śaṃbhave | śivāyai śivarūpāyai maṅgalāyai maheśvari 95 śive sarvārthade devi śivarūpe namostu te | namaste sarvarūpiṇyai jagaddhātryai namonamaḥ 96 saṃsārabhītisaṃtrastaṃ trāhi māṃ siṃhavāhini | mayāpi yena kāmena pūjitāsi maheśvari 97 rājyaṃ dehi ca saubhāgyaṃ prasannā bhava pārvati | mantreṇānena māṃ devi pūjayedumayā saha 98 tataḥ kathāṃ samākarṇya śaktyā dadyācca dakṣiṇām |

2.p45.2

brāhmaṇāya pradātavyaṃ vastradhenuhiraṇyakam 99 anyeṣāṃ dīyate dānaṃ strīṇāṃ bhadrādikaṃ tathā | kathāṃ śrutvaikacittena dampatībhyāṃ sahaiva tu 100 saṃkalpaṃ ca tataḥ kuryādgandhadhupyādipūjanaiḥ | yā karoti mahādevi vratarājaṃ vidhānataḥ 101 saubhāgyaṃ rājyamāyuṣyaṃ pāpakṣayamavāpnuyāt | tṛtīyāyāṃ tu yā nārī kila bhojanamācaret 102 janmajanma bhavedvandhyā vidhavā ca punaḥ punaḥ | dāridryaṃ putraśokaṃ ca karkaśā duḥkhabhāginī 103 yāti sā narakaṃ ghoramupavāsaṃ na yā caret | kāñcanaṃ rukmapātraṃ ca tāmrakaṃ vā tathaiva ca 104 veṇumṛnmayapātrāṇi pūrṇāni vividhaiḥ phalaiḥ | evaṃ ṣoḍaśasaṃkhyāni brāhmaṇebhyaḥ pradāpayet 105 yadvā brāhmaṇayoṣidbhyaḥ pāraṇaṃ tadanantaram | aśvamedhasahasrāṇi vājapeyaśatāni ca | kṛtvā yatpuṇyamāpnoti tatkathāśravaṇādapi 106 etatte kathitaṃ devi vratānāmuttamaṃ vratam | tena māṃ tvaṃ prapannāsi mama dehārdhatāṃ tathā 107 evaṃ vidhiṃ yā kurute ca nārī tvayā samānā ramate ca bhartrā | vināśakāle mama tulyarūpaṃ sāyujyamuktiṃ labhate ca yugmam 108 gobhūratnasuvarṇādi vastradānaṃ punaḥ punaḥ | tadā yoge prakartavyaṃ sarvakāmārthasiddhaye 109 iti śrībhaviṣyottarapurāṇe haritālikāvratakathā samāptā | athodyāpanam | yudhiṣṭhira uvāca | udyāpanavidhiṃ brūhi tṛtīyāyāḥ sureśvara | bhaktitaḥ śrotumicchāmi vratasaṃpūrṇahetave | śrīkṛṣṇa uvāca | udyāpanavidhiṃ vakṣye sāvadhānena vai śṛṇu | triṃśaddaṇḍapramāṇena pramitaṃ dakṣiṇottare | pratyakprāgapi rājendra tadgocarma samiṣyate | gocarmamātraṃ lepyaṃ tadgomayena vicakṣaṇaḥ |

2.p45.3

maṇḍalaṃ kārayettatra nānāvarṇaṃ suśobhanam | grahamaṇḍalapārśve tu padmamaṣṭadalaṃ likhet | tanmadhye sthāpayetkumbhamavraṇaṃ mṛnmayaṃ śubham | tāmrapātraṃ prakurvīta palaiḥ ṣoḍaśabhistathā | tadardhārdhena vā kuryādvittaśāṭhyaṃ vivarjayet | karṣamātrasuvarṇena pratimāṃ kārayedbudhaḥ | tadardhe madhyamaṃ proktaṃ tadardhe tu kaniṣṭhakam | kṛtvā rūpaṃ prayatnena pārvatyāśca harasya ca | atha tāmramaye pātre pratimāṃ tatra vinyaset | śvetavastrayugacchannāṃ śvetayajñopavītakām | bhājanaṃ ca tilaiḥ pūrṇaṃ kalaśasyopari nyaset | pārvatyāstu yugaṃ dadyātsthāpayitvā vidhānataḥ | vedoktena pratiṣṭhāpya kartavyārcātha sūriṇā | pañcāmṛtena snapanaṃ kṛtvā devasya cottamam | snānaṃ ca kārayetpaścāttataḥ pūjāṃ samācaret | dhūpaṃ ca vibhave dadyāccandanāgarusaṃyuktam | nānāprakārairnaivedyaistathā dīpaṃ ca kārayet | arcāṃnte pūjayedbhaktyā gandhapuṣpaiḥ phalākṣataiḥ | āvāhanādi kartavyaṃ purāṇāgamasaṃbhavaiḥ | kāryā vidhānataḥ pūjā bhaktiśraddhāparairnaraiḥ | pūrvoktavatpūjāṃ kṛtvā | tataḥ prabhāte vimale kṛtvā snānādikarma ca | pūrvavaccārcayeddevaṃ pañcāddhomaṃ ca kārayet | svagṛhyoktena vidhinā kṛtvāgnisthāpanaṃ tataḥ | prārabheśca tato homaṃ navagrahapuraḥsaram | tilāṃśca yavasaṃmiśrānājyena ca pariplutān | juhuyādrudramantreṇa gaurīmantreṇa vedavit | aṣṭottaraśataṃ vāpi aṣṭāviṃśatisaṃkhyayā | evaṃ samāpya homaṃ tu tatrācāryaṃ prapūjayet | arghyapuṣpapradānaiśca vastrālaṃkārabhūṣaṇaiḥ | śayyāṃ sulakṣaṇāṃ kuryātprakāraistadvataiścitām | dhenuṃ sulakṣaṇāṃ dadyātsuśīlāṃ ca payasvinīm |

2.p45.4

svarṇaśṛṅgīṃ raupyakhurāṃ kāṃsyadohanasaṃyutām | savatsāmavraṇayutāṃ dhenuṃ dadyātprayatnataḥ | suvarṇena samopetāṃ sadācārāya sādhave | prayatnena ca kartavyaṃ pakvānnaṃ ṣoḍaśonmitam | ṣoḍaśapramitairyuktaṃ brāhmaṇāya nivedayet | vaṃśapātraṃ prayatnena pakvānnairvā phalaiḥ śubhaiḥ | anyebhyo vipravaryebhyo dakṣiṇāṃ ca prayatnataḥ | annaṃ ca parayā bhaktyā pradadyādanusārataḥ | bandhubhiḥ saha bhuñjīta niyataśca pare'hani | evaṃ kṛte bhavetpārtha paripūrṇavratī yataḥ | iti śrībhaviṣyottarapurāṇe haritālikātṛtīyādyāpanam

Linked texts (5)