Pramāṇa · Search · About · API

Abdadidhiti 2.p65

Abdadīdhiti 2.p65

Language
Sanskrit

2.p65.1

asyāmevārabhya mahālakṣmīvratamuktaṃ madanaratne skānde-skanda uvāca | saubhāgyajananaṃ strīṇāṃ daurbhāgyaparikṛntanam | paramaiśvaryajananaṃ tadvrataṃ brūhi śaṃkara | śrīśaṃkara uvāca | sādhu sādhu mahābāho yatpṛṣṭo'haṃ tvayānagha | tatte'haṃ saṃpravakṣyāmi vratānāmuttamaṃ vratam | yena cīrṇena na naro durgatiṃ yāti karhicit | subhagā durbhagā vāpi striyo na vidhavā gṛhe | asti devyā vrataṃ puṇyaṃ mahālakṣm‍yāḥ ṣaḍānana | nārīṇāṃ ca narāṇāṃ ca sarvaduḥkhāpahnaṃ tathā | skanda uvāca | devyāścaritamāhātmyaṃ mayena kena prakāśitam | vidhānaṃ kīdṛśaṃ brūhi vratasyāsya mahāvibho | śaṃkara uvāca | devāsuramabhūdyuddhaṃ pūrṇamabdaśataṃ purā | vṛtre surāṇāmadhipe devāṃnāṃ ca purandare | tatra devairmahāvīryairnārāyaṇabalāśrayāt | asurā nirjitāḥ sarve pātālatalamāyayuḥ | kecillaṅkāṃ gatāḥ kecitpraviṣṭā varuṇālayam | giridurga samāśritya kecittasthurmahābalāḥ | tatra kolāsuro nāma mahāvīryo mahābalaḥ | gomantaṃ durgamaṃ durge girimāśritya nirbhayaḥ | yā rājakanyā kā loke rūpavatyo mahāguṇāḥ | ānīya giridurgastho ramayāmāsa sarvaśaḥ | ānītā nyakṣipattatra kāmarūpī vihaṅgamaḥ | etasminneva kāle tu āgatau munisattamau | śrutaprabhāvasaṃpannau pulastyo gautamaḥ saha | tīrthayātrāprasaṅgena śrutvā'ārtiṃ ca janasya tām | kolāsureṇa janitāṃ kanyāhetoḥ śikhidhvaja | tāvūcaturjanaṃ sarvamagastyo'sti mahāmuniḥ | yena toyanidhiḥ pīto vindhyādriśca nipātitaḥ | vātāpīlvalanāmānau daityau yena vināśitau | taṃ gacchāmo vayaṃ sarve kolāsuravadhāptaye | ityāmantrya janāḥ sarve gatvā tamabhivādya ca |

2.p65.2

ūcuḥ sarve yathāvṛttaṃ kolāsuraviceṣṭitam | tacchrutvā bhagavānprāha maitrāvaruṇimagraṇīḥ | sṛṣṭisthitivināśānāṃ kāraṇaṃ bhaktavatsalāḥ | rāmasyādrau tapasyanti brahmaviṣṇumaheśvarāḥ | tisraḥ saṃdhyā mūrtimatyasteṣāṃ śuśrūṣaṇe ratāḥ | praviśya tā mahālakṣmīḥ śaktirūpeṇa saṃsthitā | sarvaśaktiyutā devī lokānāṃ hitakāmyayā | ityuktvā tvaritaṃ gatvā kolāsuravadhāptaye | nivedya nikhilaṃ tebhyastasthuḥ prāñjalayo janāḥ | tacchrutvā nikhilaṃ tebhyo brahmaviṣṇumaheśvarāḥ | saṃdhyātrayaṃ samāhūya vācaṃ procurajaneśvarāḥ | mandārusuravṛndendramaulimāṇikyamaṇḍalā | haniṣyati mahālakṣmīryuddhe kolāsuraṃ ripum | bhagavatyo mūrtimatyo daṇḍaśūlādibhirghanaiḥ | āyudhairvividhaiḥ kṛtvā jayamāpsyatha saṃyuge | yuṣmākaṃ ca sahāyo'sau yuṣmatkrodhasamudbhavaḥ | bhūtanātho'bhūtapūrvaḥ sahāyo vai bhaviṣyati | ityuktvā tvaritaṃ gatvā rurudhuḥ kolarākṣasam | nirudhya ca purīṃ devyo jagarjurrladasvanāḥ | bhindantyaśca diśāṃ vṛndaṃ vardhayantyaśca tatkrodham | kolāsuro'pi tacchrutvā protpapāta mahāsanāt | roṣaṇaḥ krodharaktākṣo meroriva gajāntakaḥ | hastyaśvarathapādātacaturaṅgabalānvitaḥ | niryayau pṛtanā yoddhuṃ kālikāyā ivāśaniḥ | sakuṇḍalaśirastrāṇaḥ kavacī dhṛtabāṇadhiḥ | baddhagodhāṅgulitrāṇaḥ kruddho vṛtra ivāparaḥ | tato rākṣasasainyaṃ tadbhūtanāthena saṃgatam | devatārirmaholkābhiryuddhaṃ cakre'tibhīṣaṇam | carmāṃravairbhīmaghoṣairbāṇakeṅkāraniḥsvanaiḥ | niśānaninadaiścaiva lokaḥ śabdamayo'bhavat | jahi bhindhīti vadatāṃ dhāvatāmitaretaram | vavṛdhe samare ghoraṃ muṣṭāmuṣṭi kacākaci |

2.p65.3

uddhate rākṣasabale bhūtanātho mahābalaḥ | mamarda rākṣasānīkaṃ śarairatividāraṇaiḥ | hataṃ dṛṣṭvā'surabalaṃ kruddhaḥ kolāsuro raṇe | abhidrutya gadāpāṇistāḍayāmāsa bhairavam | yayau mūrcchāṃ mahāvīryastenābhihatamastakaḥ | tato devyo'tivegena hyabhidruvuruddhatam | triśūlairabhibhindyustaṃ paṭṭiśaiśca vyadārayan | muṣṭibhistāḍayāmāsurnakharaiśca vyadārayan | pādāghātaiḥ samājaghnuḥ siṃhaḥ karivaraṃ yathā | sakuṇḍalaśirastrāṇo daṣṭoṣṭho raktalocanaḥ | kṛtabhrukuṭicakro'sau rākṣasastāṃ muhurmuhuḥ | gadayā tāḍayāmāsa śiraḥkaṇṭhāṃsakukṣiṣu | babhañjustāṃ gadāṃ tāstu hasantyaḥ saṃmadākulāḥ | tato dhanurdharo bhūtvā bāṇajālamavākirat | tāsāṃ śarīramarmāṇi bhindanñcharapurogamaiḥ | nanāda baddhavairo'sau hṛdaye cābhinaccharaiḥ | tataḥ kruddhatarāstāstu taṃ pāde jagṛhurbhṛśam | ākāśe bhrāmayitvā taṃ vikṣipurgagane krudhā | kolāsuro nipatito yāvadutthātumicchati | tāvannirgatya lakṣmīstaṃ pādābhyāṃ pratyapīḍayat | tatpādapīḍitaṃ rakṣo vidrutya nayane bhṛśam | muktakaṇṭhasvanaṃ kṛtvā tato mohamupeyivān | tato devāḥ sagandharvā manuṣyā ṛṣayastathā | astuvandevanāryaśca nananduḥ saṃmadākulāḥ | devadundubhayo neduḥ puṣpavṛṣṭiḥ papāta ha | diśaḥ prasedurmaruto vavurmandaṃ sthiraṃ jagat | surāsuraśiroratnacañcatpādā mahābalāḥ | devyo divyena yānena yānti kolāsuraṃ prati | āyāntīṃ padmajāṃ vīkṣya muktapādāgniśṛṅkhalām | tuṣṭuvuḥ parayā bhaktyā rājakanyā manomudā | rājakanyā ūcuḥ | vandāruvīrasuravṛndakirīṭakoṭirocicchaṭānikarakalpitaratnadīpam |

2.p65.4

devi tvadīyacaraṇaṃ śaraṇaṃ janānāṃ sevāmahe sakalamaṅgalavardhanāya 1 utphullakairavadalāyatalocanāyai gaṇḍollasaccaṭulakuṇḍalamaṇḍitāyai | rākāśaśipratibhaṭānanakomalāyai tasmai namaḥ kamalalocanavallabhāyai 2 sañcatkalpalatikāṃ harikaṇṭhabhūṣāṃ keyūrahemakaṭakojjvalakaṅkaṇāṅgām | saṃsārasāgaramukhe patato mamādya dehi tvadīyakarayaṣṭimanaṅgamātaḥ 3 dṛṣṭvā devi janāstvayāpi vividhā brahmādhipatyaṃ gatā viṣṇorvakṣasi yā cakāra taralā līlābjamālābhramam | kleśāgniprahataṃ tvadīyacaraṇadvandābjasevārataṃ kāruṇyāmṛtasārapūritadṛśā māmadya paśyeśvari 4 mallīpraphullakusumojvalamadhyabhāgadhammillabhārajitatārakacitritāmrā | uttaptahemanikaṣojvalakāyakāntirlakṣmīḥ svayaṃ praṇamatāṃ śriyamātanotu 5 iti stutā mahālakṣmīrbhaktānāmiṣṭadāyinī | yoginyo'dya bhaviṣyadhvamiti tāsāṃ varaṃ dadau | dṛṣṭvā tāstu mudā devī sārūpyaṃ tāsvadāpayat | tābhirniṣevitā devī varaṃ varyaṃ dadau mudā | rājakanyāstataḥ sarvā muktāḥ svapuramāyayuḥ | tataḥprabhṛti loke'sminpūjyāstāḥ sarvakāmadāḥ | tāścatuḥṣaṣṭiyoginyo mahālakṣmīparigrahāt | nṛtyanti nivahaistatra gītavāditraniḥsvanaiḥ | pure devyo mahā lakṣyā karahāṭapure niśi | evaṃprabhāvā sā devī viṣṇurāmā ṣaḍānana | vratasyāsya vidhānaṃ ca śṛṇu matto hyaśeṣataḥ | māsi bhādrapade śuklapakṣe jyeṣṭhāyutāṣṭamī | ārabdhavyaṃ vrataṃ tatra mahālakṣmyā yatātmabhiḥ | kariṣyāmi vrataṃ devi tvadbhaktastatparāyaṇaḥ | tadavighnena me yātu samāptiṃ tvatprasādataḥ | ityuccārya tato badhvā dorakaṃ dakṣiṇe kare | ṣoḍaśagranthisahitaṃ guṇaiḥ ṣoḍaśabhiryutam |

2.p65.5

tato'nvahaṃ mahālakṣmīṃ pūjayenniyatātmavān | gandhapuṣpaiḥ sanaivedyairyāvatkṛṣṇāṣṭamīdinam | tasmindine tu saṃprāpte kuryādudyāpanaṃ vratī | vastramaṇḍapikāṃ kṛtvā mālyaratnopaśobhitām | tribhūmikāṃ tāṃ suślakṣṇāṃ nānādīpairalaṃkṛtām | catasraḥ pratimāḥ kṛtvā sauvarṇīstatsvarūpiṇīḥ | snapanaṃ kārayettāsāṃ pañcāmṛtavidhānataḥ | ṣoḍaśairupacāraiśca dhūpadīpādibhistathā | jāgaraṇaṃ ca kartavyaṃ gītavāditraniḥsvanaiḥ | tato niśīthe saṃprāpte'bhyudite'mṛtadīdhitau | kṛtvā tu sthaṇḍile padmaṃ saṣaḍaṅgaṃ prapūjayet | dadyādarghyaṃ ca rāgeṇa vratī tasmai samāhitaḥ |pīnonnatapayodharāḥ 9 hārakaṅkaṇakeyūranūpurālaṃkṛtāḥ śubhāḥ | pūjayantyo mahālakṣmīvratarūpaṃ ca sādarāḥ 10 tavalluko'pi papraccha kimidaṃ kathyatāmiti 11 striya ūcuḥ | mahālakṣmīvratamidaṃ sarvakāmaphalapradam | kriyate'smābhirekāgramanobhistatra bhaktitaḥ 12 tatralluko'pi tacchrutvā vrataṃ jagrāha bhaktimān | tadanujñāṃ gṛhītvātha jalamādāya satvaram 13 ājagāma jalaṃ tasmai datvā prāñjalirāsa ha | jalaṃ pītvā nṛpastasya dṛṣṭavāndorakaṃ kare 14 kimidaṃ dorakaṃ vidvankiṃ vrataṃ kṛtavānasi | rājñā pṛṣṭastavalluko'pi kathayāmāsa tadvratam 15 tacchrutvā rājaśārdūlo vrataṃ jagrāha bhaktimān | tavallukena sahito rājā svapuramāyayau 16 padmāvatīgṛhaṃ gatvā tayā rantuṃ gataḥ saha | ramamāṇātha sā devī tena rājñā priyeṇa vai | taṃ dṛṣṭvā dorakaṃ haste kupitā sātikopanā 17 kayā tvaṃ vañcito brūhi kare baddhvā sudorakam | māvādīranyathā hyetallakṣmīvratamanuttamam 18 ityuktāpi priyeṇāsau haste ciccheda dorakam |

2.p65.6

jvālāmālākule vahnau kṣiptavatyatikopanā 19 hā hā kaṣṭamidaṃ pāpaṃ kṛtaṃ mūḍhatayā iti | nirbhartsya tāṃ tato rājā tatyāja vanagahvare 20 sā ca hāniṃ yayau pāpā na ca hāniṃ yayau nṛpaḥ 21 mahālakṣmyapacāreṇa sā'raṇye jalavarjite | bhramamāṇā vane tasminna kvacidratimāpa sā 22 vicarantī vane tatra ṛṣeḥ kasyacidāśramam | dadarśa mṛgasaṃkīrṇaṃ śāntaṃ kṛṣṇamṛgānvitam 23 tatrāpaśyadvane ramye vasiṣṭhaṃ munipuṅgavam | vavande caraṇau tasya visaṃjñā duḥkhakarśitā 24 ciraṃ dhyātvā munistasyā jñātavānduḥkhakāraṇam | mahālakṣmyapacāreṇa jātaṃ hi jñānavarjanāt 25 tadvrataṃ kārayāmāsa tayā duḥkhopaśāntaye | tadduḥkhaṃ tatkṣaṇādeva vinaṣṭamabhavattadā 26 punaśca mṛgayāsakto bhūpālo vanamāviśat | kaṃcinmṛgaṃ samāvidhya bāṇenaikena bāhumān | anvagacchanmṛgapadaṃ tasyāṃ bhuvi dayāgamaḥ 27 varaṃ muniṃ dadarśāgre vasiṣṭhaṃ vītakalmaṣam | kṛtātithyakriyo dṛṣṭvā carantīṃ bahirantikāt 28 hāvabhāvavilāsādyairharantīṃ hariṇekṣaṇām | tadā nirgatya nṛpatiḥ provāca madhuraṃ vacaḥ 29 vāmoru kāsi kalyāṇi kimarthaṃ carase vane | kiṃnarī mānuṣī vā tvaṃ yakṣiṇī cāruhāsini 30 kimatra bahunoktena bhajamānaṃ bhajasva mām | nṛpeṇa tena bhaktyoktā sasmitaṃ vākyamabravīt 31 punarbhajāmi cāhaṃ tvāmavehi mahiṣīṃ tava | mahālakṣmyapacāreṇa tvayā hīnā vasāmyaham | munīndrasyāśrame ramye tarugulmopaśobhite 32 mamopari kṛpāviṣṭo mahālakṣmīvratottamam | kārayāmāsa vidhivatsarvavighnopaśāntaye 33 tayoktaṃ vacanaṃ śrutvā sa cotphullavilocanaḥ |

2.p65.7

ṛṣeranujñāma hisādāya priyāmādāya satvaraḥ 34 hṛṣṭapuṣṭajanairjuṣṭaṃ patākādhvajaśobhitam | puraṃ svalaṃkṛtaṃ divyaṃ hemaprākāraśobhitam 35 praviveśa tayā sārdhaṃ sa paurairabhivanditaḥ 36 mahālakṣmīvrataṃ bhūyastayā saha cakāra ha | bhuktveha bhogānakhilānputraiḥ pautraiḥ samāvṛtaḥ 37 bhūpālaḥ sa ca bhūpo'bhūttavallo'mātyatāṃ yayau | mahālakṣmīprasādena saṃnidhiḥ sarvasaṃpadām 38 evaṃbhāvā sā devī narāṇāmiṣṭadāyinī | sarvapāpaharā devī sarvaduḥkhāpahāriṇī 39 evaṃ ṣoḍaśavarṣe tu kartavyaṃ vratamuttamam | yā kariṣyati tāṃ bhaktyā svayaṃ siddhirupāsate | lokapālāśca puṣṇanti diśanti ca manorathān 40 nārī vā puruṣaḥ kariṣyati mudā bhaktyā vrataṃ yatnataḥ sevante harirudrapadmajasurāḥ puṣyanti tasya priyam | tatpādau parirañjayanti manujā mauliprabhāmaṇḍalaistatsnigdheva kuṭumbinī vasati sā lakṣmīḥ svayaṃ viṣṇunā 41 sadbhaktyā vāpyabhaktyā vā kurvantaṃ vratamuttamam | antakāle svayaṃ viṣṇuḥ saṃsārātparirakṣati 42 ya idaṃ śṛṇuyānnityaṃ śrāvayedvā samāhitaḥ | na santyajati taṃ lakṣmīralakṣmīrnaiva kāmayet | sarvapāpavinirmuktaḥ svargaloke mahīyate 43 iti mahālakṣmīvratakathā samāptā

Linked texts (7)