[Pramāṇa](https://indike.org/pramana/) › [Indian literature](https://indike.org/pramana/in) › [Polity, Pleasure & Law](https://indike.org/pramana/in.niti) › [Law and Social-Religious Duty](https://indike.org/pramana/in.niti.dharma) › [Legal Digests](https://indike.org/pramana/in.niti.dharma.nibandha) › [Great comprehensive digests](https://indike.org/pramana/in.niti.dharma.nibandha.mahanibandha) › [Gadadharapaddhati](https://indike.org/pramana/in.niti.dharma.nibandha.mahanibandha.gadadharapaddhati) › 21.p183 # Gadadharapaddhati 21.p183 Gadādharapaddhati 21.p183 - **Language:** Sanskrit ### [21.p183](https://indike.org/pramana/in.niti.dharma.nibandha.mahanibandha.gadadharapaddhati.21.p183) hārītaḥ,– āyurddaḥ prathamaḥ piṇḍo dvitīyaḥ putradaḥ smṛtaḥ | ṛddhipradastṛtīyo vai tasmānmadhyamamāśayet || yā patnī putrakāmā syāt madhyamaṃ piṇḍamaśnīyāt | prājāpatyena vidhinā sa tasmāt putradaḥ smṛtaḥ || “prājāpatyovidhireṣāṃ tvoṣadhīnāṃ rasaṃ prāśnāyanībhūtaṃ garbhaṃ dhatsva” iti madhyamaṃ piṇḍaṃ patnyai prayacchati | ādhatta pitaro garbhaṃ kumāraṃ puṣkarasrajam | yatheha puruṣo'saditi taṃ patnī prāśnāti iti āpastambokteḥ | manuḥ,– evaṃ nirvapaṇaṃ kṛtvā piṇḍāṃstāṃstadanantaram | gāṃ vipramajamagniṃ vā prāśayedapsu vā kṣipet || piṇḍanirvapaṇaṃ kecit purastādeva kurvate | vayobhiḥ khādayantyetān prakṣipantyanile'psu vā || pativratā dharmapatnī pitṛpūjanatatparā | madhyamaṃ tu tataḥ piṇḍamadyāt samyaksutārthinī || āyuṣmantaṃ sutaṃ vidyāt yaśovidyāsamanvitam | dhanavantaṃ prajāvantaṃ dhārmikaṃ sātvikaṃ tathā || prakṣipantītyādi pūrvoktajalānilayoranuvādaḥ pakṣiṣyādividhānārthaḥ| bṛhaspatiḥ,– anyadeśagatā patnī garbhiṇī rogiṇī tathā | tayā taṃ jīrṇavṛṣabhacchāgo vā bhoktumarhati || taṃ madhyamaṃ piṇḍaṃ | vāyavīye,–prārthayan dīrghamāyuśca vāyasebhyaḥ prayacchati | ityuktatvāt manuktapakṣipadaṃ vāyasaram | dakṣiṇā brāhme,– suvarṇarūpyapātrāṇi manojñāni śubhāni ca | hastyaśvarathayānāni samṛddhāni gṛhāṇi ca || upānatpādukākūrcacāmarāṇyajināni ca | yajñeṣu dakṣiṇāṃ pūṣṇāmiti sañcintayan hṛdi || daridro'pi yathāśakti dadyādvipreṣu dakṣiṇām | bṛhaspatiḥ,– hatamaśrotriyaṃ śrāddhaṃ hatā yajñāstvadakṣiṇāḥ | tasmāttṛṇaṃ kākinīṃ vā phalaṃ puṣpamathāpi vā || pradadyāt dakṣiṇāṃ yajñe tayā samaphalo bhavet || nanu,– yatibrāhmaṇakaśrāddhe kathaṃ dakṣiṇādānaṃ, kṣetraṃ gāvo hiraṇyañca yateryasya pratigrahaḥ | tādṛśaṃ kalmaṣaṃ dṛṣṭvā pretāśaucaṃ samācaret || iti yateḥ pratigrahādhikārābhāvāt iti cet satyaṃ | śrāddhadakṣiṇāyāṃ suvarṇaṃ rajataṃ vā na niyamyate | tasmāt phalādidānasya asādguṇyasampādakatvāt harītakyādiphalamātrasya ārdrakamūlasya kaupīnayogyavastrasya vā dāne pratigrahe ca na kaścit virodhaḥ | "aghorāḥ pitaro naḥ santu, dātāro no hi varddhatāṃ,” ityāśīrvādāstu niyamena śrāddhāṅgatvena āmantraṇasvīkāravidhinaiva teṣāṃ svīkṛtā iti | āśīrvādākaraṇasya puruṣārthatvena durbalatvāt āśīrvādasya kratvarthatvena balavattvāt niyuktairyatibhirapi niyamenāśīrvādāḥ kāryā eva | iti sāmpradāyikāḥ | iti - [Previous: 21.p182](https://indike.org/pramana/in.niti.dharma.nibandha.mahanibandha.gadadharapaddhati.21.p182) - [Next: 21.p184](https://indike.org/pramana/in.niti.dharma.nibandha.mahanibandha.gadadharapaddhati.21.p184) - [Up: 21](https://indike.org/pramana/in.niti.dharma.nibandha.mahanibandha.gadadharapaddhati.21) ## Linked texts (6) - [Mānava Dharmaśāstra](https://indike.org/pramana/in.niti.dharma.manu.3.262) — Manu & Bhṛgu, Sanskrit - [Bārhaspatyasaṃhitā (Aṅgiras)](https://indike.org/pramana/in.astro.samhita.rsi.barhaspatyasamhita.31.122) — Aṅgiras, Sanskrit - [Śrāddhakaumudī](https://indike.org/pramana/in.niti.dharma.sraddha.mithila_bengal.sraddhakaumudi.6.p7) — Govindānanda 1500, Sanskrit - [Kālasāra](https://indike.org/pramana/in.astro.muhurta.kala.kalasara.18.p194) — Nārāyaṇa Jyotirvit, Sanskrit - [Kālasāra](https://indike.org/pramana/in.niti.dharma.kala.kalasara.18.p194) — Gadādhara (Pāraskara commentator), Sanskrit - [Śrāddhadīpa](https://indike.org/pramana/in.niti.dharma.sraddha.sraddhadipa.8.545) — Divyasiṃha Mahāpātra 1640, Sanskrit --- Source: [https://indike.org/pramana/in.niti.dharma.nibandha.mahanibandha.gadadharapaddhati.21.p183](https://indike.org/pramana/in.niti.dharma.nibandha.mahanibandha.gadadharapaddhati.21.p183) · Pramāṇa