[Pramāṇa](https://indike.org/pramana/) › [Indian literature](https://indike.org/pramana/in) › [Polity, Pleasure & Law](https://indike.org/pramana/in.niti) › [Law and Social-Religious Duty](https://indike.org/pramana/in.niti.dharma) › [Legal Digests](https://indike.org/pramana/in.niti.dharma.nibandha) › [Great comprehensive digests](https://indike.org/pramana/in.niti.dharma.nibandha.mahanibandha) › [Jayasimhakalpadruma](https://indike.org/pramana/in.niti.dharma.nibandha.mahanibandha.jayasimhakalpadruma) › 4.p19.5 # Jayasimhakalpadruma 4.p19.5 Jayasīṃhakalpadruma 4.p19.5 - **Language:** Sanskrit ### [4.p19.5](https://indike.org/pramana/in.niti.dharma.nibandha.mahanibandha.jayasimhakalpadruma.4.p19.5) vaidhavyaṃ daurbhāgyatvaṃ ca bhartṛtyāgaṃ ca sattama | nāpnoti janmatritayemetatkṛtvā mahāvatam | ityeṣā kathitā rājandvitīyā tithiruttamā | yāmupoṣya naro rājannṛddhiṃ khalu svayaṃ vrajet|' ityaśūnyaśayanādvitīyāvratam | athāśvinaśukladvitīyākṛtyam | skandapurāṇe-‘āśvine māsi vai puṇyā dvitīyāśuklapakṣagā | dānaṃ pradattametasyāmanantaphalamucyate |' kārtikaśukladvitīyā yamadvitīyā | sā cāparāhvavyāpinī grāhyetyuktaṃ nirṇayāmṛtādau | madhyāhnavyāpinī pūrvaviddhā ceti hemādriḥ | iyaṃ yā karmakālavyāpinī saiva grāhyā | dinadvaye karmakālavyāptāvavyāptau vā dvitīyāsāmānyanirṇayo draṣṭavyaḥ iti madanaḥ | aṣṭadhā vibhaktadinapañcamabhāgavyāpinī grāhyeti smārtaḥ | aparāhnaśabdena dvedhāvibhaktadinottaravibhāgo grāhya iti tu yuktamiti kṛtyagnāvalyām | atra kṛtyamuktaṃ skānde-‘ūrje śukladvitīyāyāmaparāhne'rcayedyamam | snānaṃ kṛtvā bhānujāyāṃ yamalokaṃ na paśyati | ūrje śukladvitīyāyāṃ pūjitastarpito yamaḥ | mahiṣāsanamārūḍho daṇḍamudgaradhāribhiḥ | veṣṭitaḥ kiṃkarairhṛṣṭaistasminyacchati vāñchitam|’yamunāyāṃ snānaṃ kṛtvā yamaṃ pūjayettarpayecca | asyāṃ bhaginībhirbhrātṛpūjanaṃ kāryam | tathā ca liṅgapurāṇe-‘kārtike tu dvitīyāyāṃ śuklāyāṃ bhrātṛpūjanam | yā na kuryāddinaśyanti bhrātaraḥ saptajanmasu |' tasyā iti śeṣaḥ | bhaviṣyottare'pi-‘kārtike śuklapakṣe tu dvitīyāyāṃ yudhiṣṭhira | yamo yamunayā pūrvaṃ bhojitāḥ svagṛhe svayam | ato yamadvitīyā sā proktā loke yudhiṣṭhira | asyāṃ nijagṛhe pārtha na bhoktavyamato budhaiḥ | yatnena bhaginīhastādbhoktavyaṃ puṣṭivardhanam | - [Previous: 4.p19.4](https://indike.org/pramana/in.niti.dharma.nibandha.mahanibandha.jayasimhakalpadruma.4.p19.4) - [Next: 4.p19.6](https://indike.org/pramana/in.niti.dharma.nibandha.mahanibandha.jayasimhakalpadruma.4.p19.6) - [Up: 4.p19](https://indike.org/pramana/in.niti.dharma.nibandha.mahanibandha.jayasimhakalpadruma.4.p19) ## Linked texts (1) - [Nāradapurāṇa](https://indike.org/pramana/in.purana.narada.1.111.17) — Vyāsa, Sanskrit --- Source: [https://indike.org/pramana/in.niti.dharma.nibandha.mahanibandha.jayasimhakalpadruma.4.p19.5](https://indike.org/pramana/in.niti.dharma.nibandha.mahanibandha.jayasimhakalpadruma.4.p19.5) · Pramāṇa