[Pramāṇa](https://indike.org/pramana/) › [Indian literature](https://indike.org/pramana/in) › [Polity, Pleasure & Law](https://indike.org/pramana/in.niti) › [Law and Social-Religious Duty](https://indike.org/pramana/in.niti.dharma) › [Legal Digests](https://indike.org/pramana/in.niti.dharma.nibandha) › [Great comprehensive digests](https://indike.org/pramana/in.niti.dharma.nibandha.mahanibandha) › [Smriticandrika](https://indike.org/pramana/in.niti.dharma.nibandha.mahanibandha.smrticandrika) › 3.p13 # Smriticandrika 3.p13 Smṛticandrikā 3.p13 - **Language:** Sanskrit ### [3.p13](https://indike.org/pramana/in.niti.dharma.nibandha.mahanibandha.smrticandrika.3.p13) na nirvapati yaśśrāddhaṃ pramītapitṛko dvijaḥ | indukṣaye māsi māsi prāyaścittīyate tu saḥ || iti vyāghreṇākaraṇe prāyaścittavidhānācca | tathā 'yathā kathañcinnityāni kuryādindukṣayādiṣu' iti hārītena nityatvābhidhānāt | ato yatkaiściduktaṃ—'amāvāsyāśrāddhamāparapakṣikaśrāddhena vikalpyate' iti, tadapāstam | aparapakṣe punarāpastambokto viśeṣaḥ | 'māsimāsi kāryamaparapakṣasyāparāhṇaḥ śreyāṃstathā'parapakṣasya jaghanyānyahāni' iti | jaghanyāni daśamyādīni | ata eva manuḥ— kṛṣṇapakṣe daśamyādau varjayitvā caturdaśīm | śrāddhe praśastāstithayo yathaitā na tathetarāḥ || iti | daśamyāditithiṣu caturdaśīṃ varjayitvetyarthaḥ | caturdaśī tu śastrahatānāmeva | yathā''ha yājñavalkyaḥ— pratipatprabhṛti hyetā varjayitvā caturdaśīm | śastreṇa tu hatā ye vai tebhyastatra pradīyate || iti | śastragrahaṇaṃ viṣāderapi pradarśanārtham | ata eva marīciḥ— viṣaśastraśvāpadāhitairyagbrāhmaṇaghātinām | caturdaśyāṃ kriyā kāryā anyeṣāṃ tu vigarhitā || pracetā api— vṛkṣārohaṇalohādyaiḥ vidyujjalaviṣādibhiḥ | nakhidaṃṣṭrivipannānāṃ teṣāṃ śastā caturdaśī || iti | atra viśeṣamāha gargaḥ— caturdaśyāṃ tu yacchrāddhaṃ sapiṇḍīkaraṇātparam | ekoddiṣṭavidhānena tatkāryaṃ śastraghātine || iti | śastraghātine yadā''parapakṣikaśrāddhaṃ caturdaśyāṃ kriyate tadaikoddiṣṭavidhānena nānyathetyarthaḥ | ata eva sumantuḥ— ekāpiṇḍīkṛtānāṃ tu pṛthaktvaṃ nopapadyate | sapiṇḍīkaraṇādūrdhvaṃ ṛte kṛṣṇacaturdaśīm || iti | yattu mārkaṇḍeyapurāṇe— pratipaddhanalābhāya dvitīyā dvipadapradā | parārthināṃ tṛtīyā tu caturthī śatrunāśinī || pañcamyāṃ śriyamāpnoti ṣaṣṭhyāṃ pūjyo bhavennaraḥ | gāṇādhipatyaṃ saptamyāmaṣṭamyāmṛddhimūttamām || śriyo navamyāmāpnoti daśamyāṃ pūrṇakāmatām | vedāṃstathā''pnuyātsarvānnekādaśyāṃ kriyāparaḥ || dvādaśyāṃ jayalābhaṃ ca prāpnoti pitṛpūjakaḥ | prajāmiṣṭāṃ paśūn medhyān svātantryaṃ buddhimuttamām || dīrghamāyustathaiśvaryaṃ kurvāṇastu trayodaśīm | avāpnoti na sandehaḥ śrāddhaṃ śrāddhaparo naraḥ || yuvānaḥ pitaro yasya mṛtāśśastreṇa vā hatāḥ | tena kāryaṃ caturdaśyāṃ teṣāṃ siddhimabhīpsatā || śrāddhaṃ kurvannamāvāsyāṃ yatnena puruṣaśśuciḥ | sarvānkāmānavāpnoti svargaṃ cānantamaśnute - [Previous: 3.p12](https://indike.org/pramana/in.niti.dharma.nibandha.mahanibandha.smrticandrika.3.p12) - [Next: 3.p14](https://indike.org/pramana/in.niti.dharma.nibandha.mahanibandha.smrticandrika.3.p14) - [Up: 3](https://indike.org/pramana/in.niti.dharma.nibandha.mahanibandha.smrticandrika.3) ## Linked texts (3) - [Marīcismṛti (fragments)](https://indike.org/pramana/in.niti.dharma.uddhrta.maricismrti*fragments.1.1) — Sanskrit - [Pracetassmṛti (fragments)](https://indike.org/pramana/in.niti.dharma.uddhrta.pracetassmrti*fragments.1.20) — Sanskrit - [Śrāddhadīpa](https://indike.org/pramana/in.niti.dharma.sraddha.sraddhadipa.3.160) — Divyasiṃha Mahāpātra 1640, Sanskrit --- Source: [https://indike.org/pramana/in.niti.dharma.nibandha.mahanibandha.smrticandrika.3.p13](https://indike.org/pramana/in.niti.dharma.nibandha.mahanibandha.smrticandrika.3.p13) · Pramāṇa