[Pramāṇa](https://indike.org/pramana/) › [Indian literature](https://indike.org/pramana/in) › [Polity, Pleasure & Law](https://indike.org/pramana/in.niti) › [Law and Social-Religious Duty](https://indike.org/pramana/in.niti.dharma) › [Legal Digests](https://indike.org/pramana/in.niti.dharma.nibandha) › [Decisions and rulings](https://indike.org/pramana/in.niti.dharma.nibandha.nirnaya) › [Nirnayasindhu](https://indike.org/pramana/in.niti.dharma.nibandha.nirnaya.nirnayasindhu) › 23.2-4 # Nirnayasindhu 23.2-4 Nirṇayasindhu 23.2-4 - **Language:** Sanskrit ### [23.2-4](https://indike.org/pramana/in.niti.dharma.nibandha.nirnaya.nirnayasindhu.23.2-4) iti || tathā-“ gṛhītvā sākṣatāmārdrā śamīmūlagatāṃ mṛdam | gītavāditranirghoṣairānayetsvagṛhaṃ prati | tato bhūṣaṇavastrādi dhārayetsvajanaiḥ saha” iti balinīrājanam atraiva balinīrājanamuktaṃ kṛtyaratane || tatra maṃtraḥ-“caturaṅgabalaṃ mahyaṃ nirariṣṭaṃ vrajatviha sarvatra vijayo me'stu tvatprasādātsureśvari ” iti || gauḍanibandhe jyotiṣe-“kṛtvā nīrājanaṃ rājā balavṛddhyai yathākramam | śobhanaṃ khañjanaṃ paśyejjalasandhau ”|| asya phalāni śubhāśubhadeśāśca tatraiva jñeyāḥ āśvinapaurṇamāsīnirṇayaḥ āśvinapaurṇamāsī parā grāhyā | ‘sāvitrīvratamantareṇa bhavato'māpaurṇamāsyau pare’ iti dīpikokteḥ || atra viśeṣastithitattve laiṅge | “āśvine paurṇamāsyāṃ tu carejjāgaraṇaṃ niśi | kaumudī sā samākhyātā kāryā lokairvibhūtaye || kaumudyāṃ pūjayellakṣmīmindramairāvatasthitam | sugandhinaiiśi sadmeṣu akṣairjāgaraṇaṃ caret ” ### [23.2-4.p1](https://indike.org/pramana/in.niti.dharma.nibandha.nirnaya.nirnayasindhu.23.2-4.p1) tathā-“niśīthe varadā lakṣmīḥ ko jāgartīti bhāṣiṇī | tasmai vittaṃ prayacchāmi akṣaiḥ krīḍāṃ karoti yaḥ ” iti || atraivāśvayujīkarmoktamāśvalāyanena-‘āśvayujyāmāśvayujīkarma’ iti taccheṣaparvaṇi kāryam | vikṛtitvāttatra pūrvāhnavyāpinī grāhyā | daivakarmatvāt | āgrayaṇaṃ tu parvaṇi kāryam ‘śaradyāgrayaṇaṃ nāma parvaṇi syāttaducyate ’ iti śaunakokteḥ || tatrāpi śeṣaparvaṇi kāryamiti prāguktam || tacca-“vrīhibhiriṣṭvā vrīhibhireva yajeta yavebhyo yavairiṣṭvā yavaireva yajeta vrīhibhyaḥ ” iti śrutyā darśapūrṇamāsayorekakarmatvenaikadravyaniyamāddarśaṣṭāḥ paraṃ paurṇamāseṣṭyāśca prāgbhavatīti hemādryādayaḥ 'darśeścāḥ paramuktamāgrayaṇakaṃ prākpaurṇamāsācca tad iti dīpikokteśca | taccāgrayaṇaṃ tredhā vrīhyāgrayaṇaṃ yavāgrayaṇaṃ śyāmākāgrayaṇaṃ ceti || eṣāṃ kālaḥ śrutau-“gṛhamedhī vrīhiyavābhyāṃ śaradsantayoryajeta śyāmākairnīvārairvarṣāsvāpatkālenānyena purāṇairvā” iti || āpastambopi-‘varṣāsu śyāmākairyajeta śaradi vrīhibhirvasante yavairyathartuveṇuyavaiḥ' iti tatrāpi śyāmākāgrayaṇamanityam, itare tu anāhitāgnernitye yavāgrayaṇaṃ ca kāryamiti smārtavṛttāvuktatvāt | sūtre vrīhiyavadevatāsaṃbaddhānāmatra mantrāṇāmāmnānācca | āhitāgnestu yavāgrayaṇasyāpyanityatvam | 'api vā kriyā yaveṣu' iti sūtrāt | yadvā vrīhyāgrayaṇena samānatantratā | śyāmākaistu prastaraṃ kuryānnāgrayaṇam | yadi vā tadapi samānatantramityādinārāyaṇavṛttau pariśramavatāṃ sulabhamityalam idaṃ ca parvābhāve śuklapakṣe devanakṣatre kṛttikādviviśākhānte kāryamiti smṛtyarthasāre uktam || baudhāyanīye keśavasvāmināpyevamuktam || pariśiṣṭe-“śyāmākairvīhibhiścaiva yavaiścānyonyakālataḥ| prāgyaṣṭuṃ yujyate'vaśyaṃ na hyatrāgrayaṇānyayaḥ ||” trikāṇḍamaṇḍanopyevam | yadā tvetadāśvinapaurṇamāsyāṃ kriyate tadaikakālatvādāśvayujīkarmaṇo'sya ca samānatantratā bhavati tadetadvṛttikṛtā- 'ekabarhirdhmājya' iti sūtre spaṣṭamuktam || asyākaraṇe prāyaścittamuktaṃ smṛticandrikāyāṃ kātyāyanena- "nitye yajñātyaye caiva vaiśvadevadvayasya ca aniṣvā navayajñena navānnaprāśane tathā || bhojane patitānnasya carurvaiśvānaro bhavet" kārikāpi - "akṛtāgrayaṇo'śnīyānnavānnaṃ yadi vai naraḥ | vaiśvānarāya kartavyaścaruḥ pūrṇāhatistu vā" iti || ṛgvidhāne tu- "samindrarāyā mantraṃ ca varṣevarṣe japecchatam | āgrayaṇaṃ yadā nyūnaṃ tadā sampūrṇameti tat" ityuktam || etaccāpadi malamāse kāryamanyathā neti prāguktam || anyopyāhitāgnyādiviśeṣaḥ śaunakāderjñeyaḥ ityalaṃ bahunā iti śrī kamalākarabhaṭṭakṛte nirṇayasindhau āśvinamāsaḥ samāptaḥ atha kārttikamāsaḥ tulāsaṃkrame prāgaparā daśa ghaṭikāḥ puṇyāḥ | rātrau tu prāguktam ## Linked texts (3) - [Varṣakriyākaumudī](https://indike.org/pramana/in.niti.dharma.kala.varsakrtya.varsakriyakaumudi.5.p287) — Govindānanda Kavikaṅkaṇa 1510, Sanskrit - [Kriyākaumudī (Govindānanda)](https://indike.org/pramana/in.niti.dharma.nibandha.krtya.kriyakaumudi.5.p108) — Govindānanda 1500, Sanskrit - [Jayasīṃhakalpadruma](https://indike.org/pramana/in.niti.dharma.nibandha.mahanibandha.jayasimhakalpadruma.13.p11.2) — Ratnākara 1688, Sanskrit --- Source: [https://indike.org/pramana/in.niti.dharma.nibandha.nirnaya.nirnayasindhu.23.2-4](https://indike.org/pramana/in.niti.dharma.nibandha.nirnaya.nirnayasindhu.23.2-4) · Pramāṇa