[Pramāṇa](https://indike.org/pramana/) › [Indian literature](https://indike.org/pramana/in) › [Polity, Pleasure & Law](https://indike.org/pramana/in.niti) › [Law and Social-Religious Duty](https://indike.org/pramana/in.niti.dharma) › [Legal Digests](https://indike.org/pramana/in.niti.dharma.nibandha) › [Decisions and rulings](https://indike.org/pramana/in.niti.dharma.nibandha.nirnaya) › [Nirnayasindhu](https://indike.org/pramana/in.niti.dharma.nibandha.nirnaya.nirnayasindhu) › 26.2-5 # Nirnayasindhu 26.2-5 Nirṇayasindhu 26.2-5 - **Language:** Sanskrit ### [26.2-5](https://indike.org/pramana/in.niti.dharma.nibandha.nirnaya.nirnayasindhu.26.2-5) tatra vṛṣotsarganirṇayaḥ atra vṛṣotsargotipraśastaḥ | taduktaṃ mātsye - "kārttikyāṃ yo vṛṣotsargaṃ kṛtvā naktaṃ samācaret | śaivaṃ padamavāpnoti śivavratamidaṃ smṛtam” iti kārttikeyadarśanam atra kārttikeyadarśanamuktaṃ kāśīkhaṇḍe-“kārttikyāṃ kṛttikāyoge yaḥ kuryātsvāmidarśanam saptajanma bhavedvipro dhanāḍhyo vedapāragaḥ” || iti śrīkamalākarabhaṭṭakṛte nirṇayasindhau dvitīyaparicchede kārttikamāsaḥ atha mārgaśīrṣamāsaḥ tatra vṛścikasaṃkrāṃtinirṇayaḥ vṛścike pūrvāḥ ṣoḍaśa ghaṭikāḥ puṇyāḥ | śeṣaṃ prāgvat kālāṣṭamīnirṇayaḥ mārgaśīrṣasitāṣṭamī kālāṣṭamī, sā ca rātrivyāpinī grāhyā || “mārgaśīrṣasitāṣṭamyāṃ kālabhairavasaṃnidhau | upoṣya jāgaraṃ kurvansarvapāpaiḥ pramucyate” || iti kāśīkhaṇḍāt rātrivratatvāvagateḥ ‘rudravrateṣu sarveṣu kartavyā saṃmukhī tithiḥ' iti brahmavaivartāca || dinadvaye'ṃśato rātrivyāptāvuttaraiva || bhairavotpatteḥ pradoṣakālīnatvāditi kecit | tanna | śivarahasye madhyāhne bhairavotpatteḥ śravaṇāt | tathā ca tatraiva-‘nityayātrādikaṃ kṛtvā madhyāhne saṃsthite ravau' ityupakramya brahmaṇā rudre'vajñāte uktaṃ-“tadograrūpādandhānmattaḥ śrīkālabhairavaḥ | āvirāsīttadā lokānbhīṣayannakhilānapi” iti tatropavāsanirṇayaḥ atropavāsa eva pradhānamityuktaṃ tatraiva-“upoṣaṇasyāṅgabhūtamarghyadānamiha smṛtam | tathā jāgaraṇaṃ rātrau pūjā yāmacatuṣṭaye ||” sandhyāyāmapi pūjaivoktā tena madhyāhnavyāpinī yuktā | dinadvaye'ṃśataḥ sampūrṇāyāṃ vā tadvyāptau pūrvaiva | pūrvoktavacanāt | pāraṇā tu prātareva-'yāmatrayordhvagāminyāṃ prātareva hi pāraṇā' iti vacanāt kālabhairavapūjānirṇayaḥ atra ca kālabhairavapūjoktā tristhalīsetau-"kṛtvā ca vividhāṃ pūjāṃ mahāsaṃbhāravistaraiḥ naro mārgasitāṣṭamyāṃ vārṣikaṃ vighnamutsṛjet ||" tathā-"tīrthe kālodake snātvā kṛtvā tarpaṇamatvaraḥ | vilokya kālarājānaṃ nirayāduddharetpitṝn" iti || iyaṃ ca kārttikyanantarā gauṇacāndrābhiprāyeṇa mārgaśīrṣaśuddhapañcamī ( nāgapañcamī ) nirṇayaḥ mārgaśīrṣaśuklapañcamyāṃ nāgapūjoktā hemādrau skāṃde-"śuklā mārgaśire puṇyā śrāvaṇe yā ca pañcamī | snānadānairbahuphalā nāgalokapradāyinī" iti || iyaṃ nāgapūjāyāṃ ṣaṣṭhīyutaiva grāhyā-"pañcamī nāgapūjāyāṃ kāryā ṣaṣṭhīsamanvitā | tasyāṃ tu tuṣitā nāgā itarā sacaturthikā" iti madanaratne vacanāt mārgaśīrṣaśuklaṣaṣṭhī ( campāṣaṣṭhī ) nirṇayaḥ mārgaśīrṣaśuklaṣaṣṭhī campāṣaṣṭhīti mahārāṣṭreṣu prasiddhā | sottarayutā grāhyā 'ṣaṇmunyoḥ' iti yugmavākyāt | 'pūrvāhne daivikaṃ kuryād' iti vacanādasya ca devakarmatvāt | iyameva yogaviśeṣeṇa campeṭyucyate | taduktaṃ brahmāṇḍapurāṇe malhārimāhātmye-"mārge bhādrapade śuklā ṣaṣṭhī vaidhṛtisaṃyutā | ravivāreṇa saṃyuktā sā campetīha kīrttitā' iti 'viśākhābhaumayogena sā campetīha kīrttitā' iti madanaratne pāṭhaḥ | "mārgaśīrṣemale pakṣe ṣaṣṭhyā vāre'ṃśumālinaḥ | śatatārāgate candre liṅgaṃ syādṛṣṭigocaram" iti | iyaṃ ca yogavaśena pūrvā parā vā kāryā | campāṣaṣṭhī saptamīyuteti divodāsaḥ skandaṣaṣṭhīnirṇayaḥ iyameva skandaṣaṣṭhī | “kṛṣṇāṣṭamī skandaṣaṣṭhī śivarātriścaturdaśī | etāḥ pūrvayutāḥ kāryāstithyanta pāraṇaṃ bhavet” iti bhṛgūkteḥ pare'hni rātrāvādyayāmamadhye pāraṇāsambhave idam anyathotttaraiveti divodāsaḥ| abdaparyantaṣaṣṭhīṣu | “senāvidāraka skanda mahāsena mahābala rudromāgnija ṣaḍvaktra gaṅgāgarbha namostu te” iti rajataṃ skandaṃ pūjya viprāya dadyāditi divodāsaḥ mārgaśīrṣaśuklacaturdaśīnirṇayaḥ mārgaśīrṣaśuklacaturdaśyāṃ piśācavimocanītīrthe śrāddhaṃ tristhalīsetau bhaṭṭacaraṇairuktam tasya prāptapaiśācyasvapitrādyuddeśyakapārbaṇatvādaparāhṇavyāpinī grāhyā ajñātanāmapiśācādyuddeśyakatve tvekoddiṣṭatvāt madhyāhnavyāpinīti || kuladharmavratādau tūttaraiva | 'caitranabhogatetarāṃsitā syādūrdhvā' iti dīpikokteḥ dattajayantī mārgaśīrṣapaurṇamāsyāṃ dattātreyotpattiḥ || taduktaṃ skānde sahyādrikhaṇḍe-“mārgaśīrṣe tathā māsi daśamehni sunirmale | mṛgaśīrṣayute paurṇamāsyāṃ yajñasya vāsare || janayāmāsa dedīpyamānaṃ putraṃ satī śubham | taṃ viṣṇumāgataṃ jñātvā atrirnāmākarotsvayam || dattavānsvasya putratvādattātreya itīśvaraḥ” - [Previous: 26.2-4](https://indike.org/pramana/in.niti.dharma.nibandha.nirnaya.nirnayasindhu.26.2-4) - [Next: 26.2-6](https://indike.org/pramana/in.niti.dharma.nibandha.nirnaya.nirnayasindhu.26.2-6) - [Up: 26](https://indike.org/pramana/in.niti.dharma.nibandha.nirnaya.nirnayasindhu.26) ## Linked texts (4) - [Varṣakriyākaumudī](https://indike.org/pramana/in.niti.dharma.kala.varsakrtya.varsakriyakaumudi.5.p402) — Govindānanda Kavikaṅkaṇa 1510, Sanskrit - [Kālamayūkha](https://indike.org/pramana/in.niti.dharma.kala.bhatta.kalamayukha.11.p13) — Nīlakaṇṭha Dīkṣita, Sanskrit - [Dharmapradīpa (Bhairavadatta Dvivedin)](https://indike.org/pramana/in.niti.dharma.nibandha.kalajyotisa.dharmapradipa.16.p11) — Bhairavadatta Dvivedin, Sanskrit - [Dharmapradīpa](https://indike.org/pramana/in.niti.dharma.nibandha.dharmapradipa.16.p11) — Bhoja, Sanskrit --- Source: [https://indike.org/pramana/in.niti.dharma.nibandha.nirnaya.nirnayasindhu.26.2-5](https://indike.org/pramana/in.niti.dharma.nibandha.nirnaya.nirnayasindhu.26.2-5) · Pramāṇa