[Pramāṇa](https://indike.org/pramana/) › [Indian literature](https://indike.org/pramana/in) › [Polity, Pleasure & Law](https://indike.org/pramana/in.niti) › [Law and Social-Religious Duty](https://indike.org/pramana/in.niti.dharma) › [Legal Digests](https://indike.org/pramana/in.niti.dharma.nibandha) › [Decisions and rulings](https://indike.org/pramana/in.niti.dharma.nibandha.nirnaya) › [Nirnayasindhu](https://indike.org/pramana/in.niti.dharma.nibandha.nirnaya.nirnayasindhu) › 57.2-5 # Nirnayasindhu 57.2-5 Nirṇayasindhu 57.2-5 - **Language:** Sanskrit ### [57.2-5](https://indike.org/pramana/in.niti.dharma.nibandha.nirnaya.nirnayasindhu.57.2-5) etacca sapiṇḍīkaraṇavarjyaṃ jñeyam 'na tvevaikaṃ sarveṣāṃ kāmamannādye' ityāśvalāyanokteḥ asyārtha ukto nārāyaṇavṛttau-'ādyaṃ sapiṇḍīkaraṇaṃ tadvarjyeṣu śrāddheṣu kāmaṃ trayāṇāmekaṃ bhojayet || sapiṇḍīkaraṇe tu niyataṃ tribhirbhavitavyamiti || annādye pārvaṇavarjite vā abhojane āmahemaśrāddhādau vā | annābhāve ceti vyākhyāntaraṃ tatraiva jñeyam || kārikāpi-'daive pitrye'thavaikaikaṃ sapiṇḍīkaraṇaṃ vinā' iti || atraikavipre sāgnerviśeṣamāha pṛthvīcaṃdrodaye pracetāḥ-"ekasmin brāhmaṇe daive sāgneragnirbhavetsadā | anagneḥ kuśamuṣṭiḥ syācchrāddhāṅgakarmaṇi sarvadā ||” sarvathā viprālābhe tatraiva hemādrau ca satyavrataḥ-“nidhāya darbhanicayamāsaneṣu samāhitaḥ | praiṣānupreṣasaṃyuktaṃ sarvaṃ śrāddhaṃ prakalpayet ||” atra prāptyabhāvātsatre iva ṛtvikāryaṃ yajamānavidhau na dakṣiṇe' iti kecit | tanna adṛṣṭārthāyāḥ dakṣiṇāyāḥ prāpteḥ | 'sarvaṃ tantrirjaṭe tubhyaṃ yacca śrāddhamadakṣiṇam' iti pādmāt || “vidadhyāddhotramanyaścedakṣiṇārdhaharo bhavet | svayaṃ cedubhayaṃ kuryādanyasmai pratipādayet” iti chandogapariśiṣṭācca || evaṃ yatiśrāddhepi kātyāyanaḥ-“yajñavastuni muṣṭau ca stambhe darbhavaṭau tathā | darbhasaṃkhyā na vihitā viṣṭarāstaraṇeṣu ca ||” mātṛśrāddhe tu viprālābhe suvāsinyopi bhojanīyā ityāhāparārke vṛddhavasiṣṭhaḥ-“mātṛśrāddhe tu viprāṇāmalābhe pūjayedapi | patiputrānvitā bhavyā yoṣitoṣṭau kulodbhavāḥ||” iti || aṣṭāviti vṛddhiśrāddhaviṣayam pādme uttarakhaṇḍe-“sakṛdabhyarcitaṃ liṅgaṃ śālagrāmaśilāṃ ca yaḥ | pīṭhe saṃsthāpayitvā tu śrāddhaṃ ca kurute naraḥ || pitarastasya tiṣṭhanti kalpakoṭiśataṃ divi ||” candrikāyāṃ mātsye-“paṭhannimantrya niyamān śrāvayetpaitṛkān budhaḥ | akrodhanaiḥ śaucaparaiḥ satataṃ brahmacāribhiḥ || bhavitavyaṃ bhavadbhiśca mayā ca śrāddhakāriṇā ||” yattu manuḥ-“sarvāyāsavinirmuktaiḥ kāmakrodhavivarjitaiḥ | bhavitavyaṃ bhavadbhirnaḥ śvobhūte śrāddhakarmaṇi ||” iti tatpūrvedyurnimantraṇaparaṃ na tadahaḥ || tatraiva devalaḥ-“asaṃbhave paredyurvā brāhmaṇāṃstānnimantrayet | ajñātīnasamānārṣānayugmānātmaśaktitaḥ ||” kātyāyanaḥ-“anindyenāmantrito nāpakrāmetketanaṃ gṛhya śaktaḥ ||” atha śrāddhakartṛbhoktṛniyamāḥ tatra nimantritavipratyāge'parārke yamaḥ-“ketanaṃ kārayitvā tu yotipātayati dvijam brahmahatyāmavāpnoti śūdrayonau ca jāyate || āmantrya brāhmaṇaṃ yastu yathānyāyaṃ na pūjayet | atikṛcchrāsu ghorāsu tiryagyoniṣu jāyate - [Previous: 57.2-4](https://indike.org/pramana/in.niti.dharma.nibandha.nirnaya.nirnayasindhu.57.2-4) - [Next: 57.4](https://indike.org/pramana/in.niti.dharma.nibandha.nirnaya.nirnayasindhu.57.4) - [Up: 57](https://indike.org/pramana/in.niti.dharma.nibandha.nirnaya.nirnayasindhu.57) ## Linked texts (7) - [Viṣṇupurāṇa (critical edition)](https://indike.org/pramana/in.purana.visnu*crit.3.15.54) — Sanskrit - [Satyavratasmṛti (fragments)](https://indike.org/pramana/in.niti.dharma.uddhrta.satyavratasmrti*fragments.1.12) — Sanskrit - [Smṛticandrikā](https://indike.org/pramana/in.niti.dharma.nibandha.mahanibandha.smrticandrika.12.p36) — Devaṇṇabhaṭṭa, Sanskrit - [Kālasāra](https://indike.org/pramana/in.astro.muhurta.kala.kalasara.18.p60) — Nārāyaṇa Jyotirvit, Sanskrit - [Kālasāra](https://indike.org/pramana/in.niti.dharma.kala.kalasara.18.p60) — Gadādhara (Pāraskara commentator), Sanskrit - [Nityācārapaddhati (Vidyākara vājapeyin)](https://indike.org/pramana/in.niti.dharma.acara.ahnika.nityacarapaddhati-vidyakara-vajapeyin.4.p48) — Vidyākara vājapeyin, Sanskrit - [Śrāddhadīpa](https://indike.org/pramana/in.niti.dharma.sraddha.sraddhadipa.8.425) — Divyasiṃha Mahāpātra 1640, Sanskrit --- Source: [https://indike.org/pramana/in.niti.dharma.nibandha.nirnaya.nirnayasindhu.57.2-5](https://indike.org/pramana/in.niti.dharma.nibandha.nirnaya.nirnayasindhu.57.2-5) · Pramāṇa