[Pramāṇa](https://indike.org/pramana/) › [Indian literature](https://indike.org/pramana/in) › [Polity, Pleasure & Law](https://indike.org/pramana/in.niti) › [Law and Social-Religious Duty](https://indike.org/pramana/in.niti.dharma) › [Legal Digests](https://indike.org/pramana/in.niti.dharma.nibandha) › [Decisions and rulings](https://indike.org/pramana/in.niti.dharma.nibandha.nirnaya) › [Nirnayasindhu](https://indike.org/pramana/in.niti.dharma.nibandha.nirnaya.nirnayasindhu) › 6.3-7 # Nirnayasindhu 6.3-7 Nirṇayasindhu 6.3-7 - **Language:** Sanskrit ### [6.3-7](https://indike.org/pramana/in.niti.dharma.nibandha.nirnaya.nirnayasindhu.6.3-7) tithitattve"dadāti yo hi meṣādau saktūnkuṃbhaghaṭānvitān | pitṝnuddiśya viprebhyaḥ sarvapāpaiḥ pramucyate ” || iti tathā-“vaiśākhe yo ghaṭaṃ pūrṇa sabhojyaṃ vai dvijanmane | dadāti surarājendra sa yāti paramāṃ gatim || ” evaṃ saṃpūrṇasnānāśaktau tryahaṃ vā snāyāt || taduktaṃ tatraiva pādme-“trayodaśyāṃ caturdaśyāṃ vaiśākhyāṃ vā dinatrayam | api samyagvidhānena nārī vā puruṣopi vā || prātaḥ snātaḥ saniyamaḥ sarvapāpaiḥ pramucyate malamāsepi snānanirṇayaḥ yadā tu vaiśākho malamāso bhavati tadā kāmyānāṃ tatra samāptiniṣedhāt māsadvayaṃ snānaṃ tanniyamāśca karttavyāḥ | māsopavāsacāṃdrāyaṇādi tu malamāse eva samāpayet | taduktaṃ dīpikāyām-“niyatatriṃśaddinatvācchuddhe māsyārabhya samāpayet | maline māsopavāsavratam ” iti || atra dānaviśeṣa ukto'parārke vāmanapurāṇe-“gandhāśca mālyāni tathā vaiśākhe surabhīṇi ca | deyāni dvijamukhyebhyo madhusūdanatuṣṭaye ||” evaṃ snāne kṛte tasyodyāpanaṃ kāryam | taduktaṃ tatraivaudyāpanavidhinirṇayaḥ “māsamevaṃ bahiḥ snātvā nayādau vimale jale || ekādaśyāṃ ca dvādaśyāṃ paurṇamāsyāmathāpi vā || upoṣya niyato bhūtvā kuryādudyāpanaṃ budhaḥ | maṃḍapaṃ kārayedādau kalaśaṃ tatra vinyaset || niṣkeṇa vā tadarthena tadadhārdhena vā punaḥ | śaktyā vā kārayeddevaṃ sauvarṇaṃ lakṣaṇānvitam || lakṣmīyuktaṃ jagannāthaṃ pūjayedāsane budhaḥ | bhūṣaṇaiścandanaiḥ puṣpairdīpairnaivedyasaṃcayaiḥ || evaṃ saṃpūjya vidhivadrātrau jāgaraṇaṃ caret | śvobhūte kṛtamaitrotha grahavedyāṃ grahānyajet || homaṃ kuryātprayatnena pāyasena vicakṣaṇaḥ | tilājyena yavairvāpi sarvairvāpi svaśaktitaḥ || aṣṭottarasahasraṃ vā śatamaṣṭottaraṃ tu vā | pratadviṣṇuranenaiva idaṃ viṣṇuranena vā || vratasaṃpūrtisiddhyarthaṃ dhenumekāṃ payasvinīm | pādukopānahau chatraṃ gurave vyajanaṃ tathā śayyāṃ sopaskarāṃ dadyāddīṣikāṃ darpaṇaṃ tathā | brāhmaṇān bhojayettriṃśattebhyo dadyācca dakṣiṇām || kalaśāñjalasampūrṇānstebhyo dadyādyavāṃstathā| evaṃ kṛte mādhavasya codyāpanavidhau śubhe || phalamāpnoti sakalaṃ viṣṇusāyujyamāpnuyāt” || evāvatyaśaktau tatraivoktam“vaiśākhyāṃ vidhinā snātvā bhojayed brāhmaṇān daśa | kṛsaraṃ sarvapāpebhyo mucyate nātra saṃśayaḥ” || iti vaiśākhaśuklatṛtīyānirṇayaḥ vaiśākhaśuklatṛtīyā akṣayatṛtīyeocyate | sā pūrvāhṇavyāpinī grāhyā | dinadvayepi tadvyāptau paraiva | taduktaṃ nirṇayāmṛte nāradīye-“vaiśākhe śuklapakṣe tu tṛtīyā rohiṇīyutā || durlabhā budhavāreṇa somenāpi yutā tathā || rohiṇībudhayuktāpi pūrvaviddhāvivarjitā || bhaktyā kṛtāpi māṃdhātaḥ puṇyaṃ haṃti purākṛtam || gaurī vināyakopetā rohiṇībudhasaṃyutā vināpi rohiṇīyogātpuṇyakoṭimadā sadā ### [6.3-7.p1](https://indike.org/pramana/in.niti.dharma.nibandha.nirnaya.nirnayasindhu.6.3-7.p1) iti yugādinirṇayaḥ iyaṃ yugādirapi sā coktā ratnamālāyām-“māghe paṃcadaśī kṛṣṇā nabhasye ca trayodaśī tṛtīyā mādhave śuklā navamyūrje yugādayaḥ ” iti || yattu gauḍāḥ-‘māghasya paurṇamāsyāṃ tu ghoraṃ kaliyugaṃ smṛtam ’ iti brāhmokteḥ || “vaiśākhamāsasya ca yā tṛtīyā navamyasau kārttikaśuklapakṣe | nabhasyamāsasya tamisrapakṣe trayodaśī pañcadaśī ca māghe ||” iti viṣṇupurāṇe | cakāreṇa tamisrapakṣānuṣaṅgepi pūrvānurodhāt paurṇamāsyeva jñeyā | dve śukle ityādikaṃ tu nirmūlamityāhuḥ || tanna || 'darśaṃ tu māghamāsasya pravṛttaṃ dvāparaṃ yugam' iti bhaviṣyavirodhāt || etena brāhmānusārāt pūrṇimāyāmeva yugādiśrāddhaṃ vadan śūlapāṇiḥ parāstaḥ tena kalpabhedādvyavastheti tattvam || etena-‘kārtika navamī śuklā māghamāse ca pūrṇimā' ### [6.3-7.p2](https://indike.org/pramana/in.niti.dharma.nibandha.nirnaya.nirnayasindhu.6.3-7.p2) iti bṛhannāradīye vyākhyātam || nirmūlatvoktirnāradīyajñānakṛtā || tatra śrāddhanirṇayaḥ ## Linked texts (6) - [Padmapurāṇa](https://indike.org/pramana/in.purana.padma.5.98.99) — Vyāsa, Sanskrit - [Pratāpārka](https://indike.org/pramana/in.niti.dharma.nibandha.mahanibandha.prataparka.13.p3) — Viśveśvarabhaṭṭa 1766, Sanskrit - [Smṛtikaustubha](https://indike.org/pramana/in.niti.dharma.nibandha.mahanibandha.smrtikaustubha.5.2-2.12) — Anantadeva 1638, Sanskrit - [Saṃvatsaradīdhiti](https://indike.org/pramana/in.niti.dharma.kala.varsakrtya.samvatsaradidhiti.2.2-2.10) — Anantadeva 1650, Sanskrit - [Abdadīdhiti](https://indike.org/pramana/in.niti.dharma.nibandha.krtya.abdadidhiti.1.p47.4) — Anantadeva 1645, Sanskrit - [Nirṇayakautuka](https://indike.org/pramana/in.niti.dharma.nibandha.nirnaya.nirnayakautuka.2.p9) — Viśveśvarabhaṭṭa, Sanskrit --- Source: [https://indike.org/pramana/in.niti.dharma.nibandha.nirnaya.nirnayasindhu.6.3-7](https://indike.org/pramana/in.niti.dharma.nibandha.nirnaya.nirnayasindhu.6.3-7) · Pramāṇa