[Pramāṇa](https://indike.org/pramana/) › [Indian literature](https://indike.org/pramana/in) › [Polity, Pleasure & Law](https://indike.org/pramana/in.niti) › [Law and Social-Religious Duty](https://indike.org/pramana/in.niti.dharma) › [Legal Digests](https://indike.org/pramana/in.niti.dharma.nibandha) › [Decisions and rulings](https://indike.org/pramana/in.niti.dharma.nibandha.nirnaya) › [Nirnayasindhu](https://indike.org/pramana/in.niti.dharma.nibandha.nirnaya.nirnayasindhu) › 8.2-6 # Nirnayasindhu 8.2-6 Nirṇayasindhu 8.2-6 - **Language:** Sanskrit ### [8.2-6](https://indike.org/pramana/in.niti.dharma.nibandha.nirnaya.nirnayasindhu.8.2-6) iti skāndokteḥ || pūrvāparavibhāgeneti makarakarkabhinnasaṃkrāntiparam | vakṣyamāṇavacovirodhādityuktaṃ madanaratne || tenāyamarthaḥ-rātrau pūrvabhāge makare udaye pañca nāḍyaḥ puṇyakālaḥ | rātrāvaparabhāge karkaṭe dinānte pañca nāḍyaḥ puṇyakālaḥ | viṣuvatostu pūrvadine paścāparādine ca pañceti vākyāntarānurodhāt | tena hemādrimādhavayoḥ sarvavacanānāṃ cāvirodhaḥ | mādhavamate tu ardharātre tadūrdhvaṃ vā saṃkrāntau dakṣiṇāyane | pūrvameva dinaṃ grāhyaṃ yāvannodayate raviḥ ||' iti vṛddhagārgyokteḥ | "mithunātkarkasaṃkrāntiryadi syādaṃśumālinaḥ | prabhāte vā niśīthe vā tadā puṇyaṃ tu pūrvataḥ ||" iti bhaviṣyokteśca pūrvadine eva puṇyaṃ dākṣiṇātyāstvetadevādriyante atra rātrāvapi snānādi bhavatītyuktaṃ prāk | atra dānopavāsādi pūrvamuktam | tathā karke keśādikartanaṃ niṣiddham | "kumbhe karkaṭake vāpi kanyāyāṃ kārmuke ravau | romakhaṇḍaṃ gṛhasthasya pitṝn prāśayate yamaḥ" || iti sumantuvacanādityuktaṃ jīvatpitṛkanirṇaye gurubhiḥ nadīnāṃ rajodoṣanirṇayaḥ atha nadīnāṃ rajodoṣaḥ || hemādrāvatriḥ-“siṃhakarkaṭayormadhye sarvā nadyo rajasvalāḥ | na snānādīni karmāṇi tāsu kurvīta mānavaḥ ||” idaṃ ca kṣudranadīṣu | “siṃhakarkaṭayormadhye sarvā nadyo rajasvalāḥ | tāsu snānaṃ na kurvīta varjayitvā samudragāḥ” iti vyāghrokteḥ mātsye tvagastyodayāvadhitvamuktam | “yāvannodeti bhagavān dakṣiṇāśāvibhūṣaṇaḥ tāvadrajo mahānadyaḥ karatoyāḥ prakīrttitāḥ-”karatoyā alpatoyāḥ | tathā kātyāyanaḥ“yāḥ śoṣamupagacchanti grīṣme kusarito bhuvi | tāsu prāvṛṣi na snāyādapūrṇe daśavāsare ||” idaṃ cāpadi | smṛtisaṃgrahe-“dhanuḥ sahasrāṇyaṣṭau tu gatiryāsāṃ na vidyate | na tā nadīśabdavahā garttāstāḥ parikīrttitāḥ ||” mahānadīṣu viśeṣaḥ mahānadīṣu tu bhaviṣye uktam-“ādau tu karkaṭe devi mahānadyo rajasvalāḥ | tridinaṃ ca caturthehni śuddhā syurjāhnavī yathā ||” mahānadīnāṃ nāmāni mahānadyaśca brāhme-“godāvarī bhīmarathī tuṅgabhadrā ca veṇikā | tāpī payoṣṇī vindhyasya dakṣiṇe tu prakīrtitāḥ-bhāgīrathī narmadā ca yamunā ca sarasvatī | viśokā ca vihastā ca vindhyasyottarasaṃsthitāḥ || dvādaśaitā mahānadyo devarṣikṣetrasaṃbhavāḥ” - [Previous: 8.2-5](https://indike.org/pramana/in.niti.dharma.nibandha.nirnaya.nirnayasindhu.8.2-5) - [Next: 8.2-7](https://indike.org/pramana/in.niti.dharma.nibandha.nirnaya.nirnayasindhu.8.2-7) - [Up: 8](https://indike.org/pramana/in.niti.dharma.nibandha.nirnaya.nirnayasindhu.8) ## Linked texts (1) - [Āhnikaprakāśa](https://indike.org/pramana/in.niti.dharma.acara.ahnika.ahnikaprakasa.1.p384) — Mitramiśra, Sanskrit --- Source: [https://indike.org/pramana/in.niti.dharma.nibandha.nirnaya.nirnayasindhu.8.2-6](https://indike.org/pramana/in.niti.dharma.nibandha.nirnaya.nirnayasindhu.8.2-6) · Pramāṇa