Ashtadashasmriti 28

Aṣṭādaśasmṛti 28

oṃ sarvaśāstrārthatattvajñaḥ sarvavedavidāṃ varaḥ | pāragaḥ sarvavidyānāṃ dakṣo nāma prajāpatiḥ

brahmacārī gṛhasthaśca vānaprastho yatistathā | eteṣāṃ tu hitārthāya dharmaśāstramakalpayat

jātamātraḥ śiśustāvadyāvadaṣṭau samā vayaḥ | sa hi garbhasamo jñeyo jātimātrapradarśakaḥ

bhakṣyābhakṣye tathā peye vācyāvācye tathā'nṛte | asminbāle na doṣaḥ syātsa yāvannopanīyate

upanīte tu doṣo'sti kriyamāṇairvigarhitaiḥ | aprāptavyavahāro'sau bālaḥ ṣoḍaśavārṣikaḥ

svī karoti yadā vedaṃ dhatte vedavratāni ca | brahmacārī bhavettāvadūrdhvaṃ snāto gṛhī bhavet

dvividho brahmacārī syāddādyo hyupakurvāṇakaḥ | dvitīyo naiṣṭhikaścaiva tasminneva vrate sthitaḥ

trayāṇāmānulomyena prātilomyena vo punaḥ | pratilomaṃ vrataṃ yasya sa bhavetpāpakṛttamaḥ

yo gṛhāśramamāsthāya brahmacārī bhavetpunaḥ | na yatirna vanasthaśca sa sarvāśramavarjitaḥ

anāśramī na tiṣṭhecca kṣaṇamekamapi dvijaḥ | āśrameṇa vinā tiṣṭhanprāyaścittīyate hi saḥ

jape home tathā dāne svādhyāye ca rataḥ sadā | nāsau phalamavāpnoti kurvāṇo'pyāśramāccyutaḥ

mekhalājinadaṇḍaiśca brahmacārīti lakṣyate | gṛhastho yaṣṭivedādyai rnakhalomairvanāśramī

tridaṇḍena yatiścaivaṃ lakṣaṇāni pṛthakpṛthak | yasyaitallakṣaṇaṃ nāsti prāyaścittī na cā''śramī

uktaṃ karma krameṇaiva yaḥ kāla ṛṣibhiḥ smṛtaḥ | dvijānāṃ tu hitārthāya dattastu svayamabravīt

iti dātte dharmaśāstre prathamo'dhyāyaḥ ||1

Linked texts (6)