Pramāṇa · Search · About · API

Baudhayanaprayogamala 12.26

Baudhāyanaprayogamālā 12.26

Language
Sanskrit

Contents

12.26

āḍhyā putravatī mānyā suprasannā patipriyā
bandhupūjyā dharmavatyāhirbuddhye prathamārtavā

12.26.p1.1

dṛḍhavratā dharmavatī putrasaukhyārthasaṃyutā || vikhyātā guṇasampannā pauṣṇabhe prathamārtavā ||27||'
iti nakṣatraphalam || atha yogaphalam 'vajre vayaṃgiyoge ca vyāghāte vaidhṛtau tathā || parighasyaṃ tu pūrvārdhaḥ ṣaṭ ṣaṭ gaṇḍātigaṇḍayoḥ
vyāghāte nava śūle tu nāḍyaḥ paścartudarśane || vaidhavyamarthanāśaṃ ca sutanāśaṃ mahadbhayam || vaidhavyaṃ śatruvṛddhiṃ ca dāridryaṃ kṣīṇajīvanam
tejohānimavāpnoti sadā puṣpavatī kramāt ||' iti yogaphalam || atha rāśiphalam 'meṣe savyabhicārā syādṛṣabhe parabhoginī
mithune dhanabhogāḍhyā karkaṭe vyabhicāriṇī || putrāḍhyā siṃharāśau tu kanyāyāṃ śrīmatī tathā || vilakṣaṇā tulāyāṃ tu vṛścike tu pativratā
duścāriṇī dhanuḥ pūrve tvapare tu pativratā || makare mānahīnā ca kumbhe nirdhanavandhyatā || mīne vilakṣaṇā lagne grahaṃsaṃsthā vivāhavat ||' iti
rāśiphalam || atha grahaphalam 'vaidhavyamaṣṭame'rke'rke candre kṣīṇarucā bhavet || aṅgārake bhartṛhīnāṃ budhe cedanapatyatā || daurbhāgyamindrasacitre sāpattyaṃ bhārgave bhavet || pravrajyā sūryaputre tu rāhau tu kalahaḥ sadā || aśubhaṃ ketāvanye tu jāmitre śubhadāḥ śubhāḥ ||'
nṛsiṃho'pi 'lagnasya saptamasthāne sūryo vaidhavyakārakaḥ || putrahānikarastvāre budhaḥ satputrado bhavet || bṛhaspatirdhanāyuṣyaṃ śukraḥ sāpattyameva
ca || śanaiścare tu vandhyā syādrādvau tu maraṇaṃ dhruvam || ādityabhaumamandānāṃ vāravargodayekṣaṇaiḥ || maraṇaṃ garbhanāśaśca kulaṭatvaṃ yathākramam

12.26.p1.2

saumyabhārgavajīvānāṃ vāravargodayekṣaṇaiḥ || satputrasukhamārogyaṃ dīrghamāyuḥ kramādbhavet ||' manuḥ 'bhāskaraṃsyodaye mṛtyuścandre strīmātṛkā
bhavet || garbhasrāvaḥ kuje caiva budhe putravatī bhavet || āyuḥ śrīḥ prītirārogyamudaye guruśukrayoḥ || mandodaye virodhaḥ syātkleśaḥ
syāttāmasodaye ||' iti grahaphalam || atha hastasthitapātralakṣaṇam || devarātaḥ 'sammārjanī kāṣṭha tṛṇāni śūrpān haste dadhānā kulaṭā
tadā syāt || talpopabhoge tapanī sthitā cedūdṛṣṭaṃ rajo bhāgyavatī tadā syāt ||' nṛsiṃhaḥ 'muktau talpe ca yāne ca tapanīye ca dhārmike
śubhopakaraṇaiḥ yukte śubhe deśe śubhaiḥ yute || śubhaṃ syādanukūlarkṣe rāśau satsaṅgasaṃyute ||' kaśyapasaṃhitāyām 'nindite dinavārarkṣe nācarettatra
maṅgalam || tasmātsamyagvicāryaitattato maṅgalamācaret ||' iti || smṛticandrikāyām 'prathamatau tu puṣpiṇyāḥ patiputravatīstriyaḥ
akṣatairāsanaṃ kṛtvā tasmiṃstāmupaveśayet || haridrāgandhapuṣpādivadyāttāmbūlakaṃ srajam || āśiṣovācayeyustāḥ patiputravatī bhava || dīpairnīrājanaṃ
kuryātsadīpāṃ vāsayedgṛhe || tāḥ sarvāḥ pūjayetpaścādgandhapuṣpākṣatādibhiḥ || lavaṇāpūpamudgādidadyāttābhyaḥ svaśaktitaḥ ||' iti || atha

12.26.p1.3

rajasvalā niyamaḥ || añjanābhyañjane snānaṃ pravāsaṃ dantadhāvanam || na kuryātsārtavā nārī grahāṇāmīkṣaṇaṃ tathā || nakhānāṃ kṛntanaṃ rajjutālapatrādibandhanam || dagdhe śarāve bhuñjīta peyaṃ cāñjalinā pivet ||' atriḥ 'gandhaṃ mālyaṃ divāsvāpaṃ tāmbūlaṃ cāsyaśodhanam || pāṇipātrajanasparśapādaśaucādi varjayet ||' athānyonyasambhāṣaṇasparśanaprāyaścittam || smṛtau 'sambhāṣetāṃ spṛśetāṃ vā brāhmaṇyau ca rajasvale
asnānakālaṃ nāśnītāmubhematyāmithaḥ kvacit || snātopavāsaṃ kuryātāṃ pañcagavyena śuddhayataḥ || upavāse tvaśaktā cettatsamaṃ dānamācaret ||'
atha naimittikasnānam || smṛtyarthasāre 'snāne naimittike prāpte rajo dṛṣṭau pātrāntaritatoyena snātvā'dbhiḥ siktamātrā sāṅgopāṅgavastrapīḍanaṃ
anyadvastradhāraṇaṃ ca kṛtvā vrataṃ caret' iti || punārajodarśane kaśyapaḥ 'trayodaśadinādūrdhvaṃ rajo dṛṣṭavatī yadā || aṣṭādaśāhātprāgvā'pi
trirātramiti niścayaḥ || ekādaśāhe tvekāhaṃ dvirātraṃ dvādaśe'hani || ūrdhvaṃ trirātraṃ vijñeyamiti kuṇḍalicoditam' iti || kṛṣṇo'pi
'rajasvalā mṛtirvā'pi prasūtirvā bhavedyadi || rātriṃ tribhāgaṃ kurvīta dvau bhāgau pūrvamanyathā' iti || atha snānam || smṛtisaṅgrahe
'rajasvalā caturthe'hni prakṣālyāṅgodbhavānmalān || dantānāṃ dhāvanaṃ kṛtvā saṅgave snānamācaret || āturā cedrutumanī tasyāḥ snānaṃ kathaṃ bhavet
spṛṣṭvā tu tāṃ parā snāyādaśakṛtvo hyanāturā || vāsobhirdaśabhiścaiva paridhāpya yathākramam || brāhmaṇānmojayitvātha puṇyāhena viśuddhyati

12.26.p1.4

āturāṇāṃ tu sarveṣāmevaṃ śuddhividhīyate' iti || atha snānānantaraṃ kṛtyamāha vivasvān 'ṛtusnātā bhavennārī dhṛtvā śuklāmbaraṃ śubham
ācamyālaṅkṛtā bhūtvā puṣpādyaiḥ sūryamarcayet || ṛtusnātā satī nārī yaṃ snehānnaramīkṣate || tādṛśaṃ janayetputraṃ tasmātpaśyennijaṃ patim ||'
nāradīye 'ojarāśyaṃśage candre lagne puṅgrahavīkṣite || ayugmadivase bhāryāṃ kanyārthī kāmayetpatiḥ ||' skānde 'dvādaśāṣṭacaturthasthe candre
vaināśikarkṣage || upavītī yugmatithau na nagnaḥ kāmayetstriyam || putrārthī puruṣastyaktvā pauṣṇamūlāhipaitṛbham || yugmarkṣabhe śaśāṅke ca lagne
strīgrahavīkṣite || vaidhṛtau ca vyatīpāte maghāyāṃ mūlabhe tathā || gaṇḍātigaṇḍaparighaśūlayogeṣu varjayet || evaṃ niyamamāśritya niṣekī puruṣo
bhuvi || labhate santatiṃ yogyāmihāmutra ca śarmaṇe || śāstroktadivase śuddhā kṣāmā rātrau pativratā || patimeva hariṃ matvā svayameva rameta ca ||'
bṛhaspatiḥ 'niśā ṣoḍaśakaṃ nārī saṃjñitartumatīti sā || tāvadyogyā prajāsthāne vinā''dyāhacatuṣṭayam' iti || yadyapi ṛtāveva gamanaṃ
tathā'pi kāmayamānāmaṛtāvapi gacchedityāhācāryaḥ 'patnīmapyanṛtau neyādiyādvābhyarthitastayā' iti || atha tithyādinirṇayaḥ
śrīdharīye 'ṣaṣṭyaṣṭamīṃ pañcadaśīṃ caturthīṃ caturdaśīmapyubhayatra hitvā || śeṣāḥ śubhāḥ syustithayo niṣeke vārāḥ sitācāyyaśaśīndujānām'

12.26.p1.5

kālanirṇaye 'riktā parvāṣṭamī ṣaṣṭhī divā janmatrayaṃ tathā || pāpagrahāṇāṃ vārāśca tyājyāścaivānṛtau gatiḥ' || atha nakṣatrāṇi 'viṣṇuprajeśaravimitrasamīrapauṣṇamūlottarāvaruṇabhāni niṣedhakārye || pūjyāni puṣyavasuśītakarāśvicitrādityāśca madhyamaphalā viphalāḥ syuranyāḥ'
atra janmatrayamapi varjyamāha bṛhaspatiḥ 'śrāddhaṃ pitryaṃ cikitsāṃ ca maithunābhyañjane tathā || caulopanayanādīni varjayetriṣu janmasu'
atha rāśayaḥ 'vṛṣabhamithunakakasiṃhakanyātulādharacāpajhaṣāḥ śubhā bhavanti || yadi śubhabalaśālino'nukūlā nidhanaśuddhiyutā niṣedhakārye'
tatraitikartavyatāmāha śrīmatiḥ 'vedāgamoktasamaye rucire pradeśe vājīkṛtena jitaroṣabhayena puṃsā || mantrauṣadhapravaratīrthajalo'vaveleṣu kāntājaneṣvatha
niṣekavidhirvidheyaḥ' || (vājīkṛtena śukravatetyarthaḥ) iti kālanirṇayaḥ || atha patiniyamaḥ 'atha yadi strī rajasvalā bhavati tayā saha
na sambhāṣeta saha nopaviśet || nāsyā upabhogaṃ kuryāt tatra jātaḥ patito bhavati || yāṃ snātāmapyaraṇye gacchati tata utpannasteno bhavati yā
snāti tasyāṃ jāta udake mriyate yā'bhyaṅge tatra jāto duścarmā || yā likhati tatra duṣṭaḥ, yā āṅkte tatrāndhakaḥ, yā dantadhāvanaṃ karoti
tasyāṃ krimidantaḥ, yā nakhanikṛntanaṃ karoti tasyāṃ kunakhī, yā prāṇino hanti tasyāṃ napuṃsakaḥ, yā rajjuṃ sṛjati tasyāṃ jāta udvandhanena mriyate,

12.26.p1.6

yā parṇe bhuṅkte tasyāmunmatto jāyate, yā hrasvapātre bhuṅkte pibati vā tasyāṃ hrasvo jāyate || ata ityetatsarvaṃ varjayitvā vrataṃ caret' || 'divāsvāpamalaṅkāraṃ krīḍāṃ śilpaṃkriyāṃ tathā || gṛhakarmāṇi tāmbūlamadhvānaṃ rātribhojanam || jyotiṣāṃ darśanaṃ sparśamagnermāṃsāśanaṃ tathā || hasanaṃ
śayanaṃ talpe prajāniśreyasārthinī ||' etatsarvaṃ varjayediti śeṣaḥ || caturthadine snānānantaraṃ patiṃ paśyetsūryaṃ vā iti rajasvalāniyamaḥ
tatrādau grahaśāntiṃ ṛtuśāntiṃ samānatantreṇa bhinnatantreṇa vā kuryāt || tathā ca prayogamañjaryām 'karmāṇi tulyapākāni vidhīyante
svabhāvataḥ || yānyekabarhirdhmājyasviṣṭakṛntīha tāni tu ||' granthāntare 'yatraikasminkāle tattannimittānurodhena yugapatpravṛttānāmanekapākayajñānāṃ tantrāvṛttirasti na vetyāśaṅkāyāmāha- aneke pākayajñāḥ syurekasminkāla eva cet, samānatantrakāḥ kāryā na tantrāvṛttiriṣyate'
pākayajño nāma carupūvoṃ yajñaḥ pākayajñaḥ || ata eva śāntikapauṣṭikādīnāmapi yajñatvamiti viṣṇubhaṭṭokteśca || prayogaratne'pi 'evaṃ
vighnaṃ tu sampūjya grahāṃścaiva vidhānataḥ || karmaṇāṃ phalamāpnoti yājñavalkyena bhāṣitam' iti phalasiddhāvavighnārthatvena grahayajñasyāvaśyakatvokteḥ
śaunakaḥ 'ārtavānāṃ tu nārīṇāṃ śāntiṃ vakṣyāmi śaunakaḥ' ityupakramya 'grahātithyapurassaram' iti prakaraṇokteḥ 'āvaśyakatvādekakālakartṛkāṇāṃ
ca viśeṣatantravacanābhāve tantreṇa kartavyatvādgrahamakhapūrvakaṃ tantreṇa śāntiprayoga ucyate' iti

12.26.p1.7

athartuśāntiprayogaḥ || strīṇāṃ prathamarajodarśanakāle māsatithivāranakṣatrayogakaraṇalagnānāṃ madhye'nyatamasya duṣṭatvāttaddoṣaparihārārthamṛtuśāntiṃ kuryāt || yathā- caturthe pañcame'nyasminvā śubhe dine prātasnānādinityakarma kṛtvā vaiśvadevaṃ hutvā snānapavanādimantraprokṣaṇāntaṃ kṛtvā
punarācamanaprāṇāyāmau kṛtvā deśakālau saṅkīrtya nāndīsamārādhanaṃ kartuṃ gaṇapatipūjanaṃ svastipuṇyāhavācanaṃ kariṣye iti saṅkalpya tatkṛtvā punaḥ
prāṇānāyamya grahaśāntiṛtuśāntigarbhādhānākhyaṃ karma kartuṃ svastipuṇyāhavācanākhyaṃ karma kariṣye iti saṅkalpya tatkṛtvā ādityādinavagrahāḥ
śrīyantāṃ savitā prīyatāṃ vedhāḥ prīyatāmiti viśeṣaḥ || atha prokṣaṇāntaṃ kṛtvā''cāryādīn vṛtvā punaḥ prāṇānāyamya deśakālau saṅkīrtya mama
bhāryāyāḥ prathamarajòdarśanakāle māsatithivāranakṣatrayogakaraṇadoṣaśāntyarthamṛtuśāntiṃ kariṣye iti saṅkalpya || śvetamṛdbhiraṣṭadalapadmaṃ vilikhya
tadupari prasthāṣṭabhirdhānyaistadarthaṃ taṇḍulaistadarthaṃ tilaiścāratnimātraṃ samacaturasraṃ sthaṇḍilaṃ kṛtvā taduparyaṣṭadalapadmaṃ vilikhya tasmintantuveṣṭitaṃ sudhūpitaṃ kalaśaṃ
brahmajajñānamiti nidhāya prokṣya tasmin kūrcamantardhāya || oṃ āpo̱ vā i̱dam̐sarva̱ṃ viśvā̍ bhū̱tānyāpa̍ḥ prā̱ṇā vā āpa̍ḥ pa̱śava̱ āpo'nna̱māpo'
mṛta̱māpa̍ḥ sa̱mrāḍāpo̍ vi̱rāḍāpa̍ḥ sva̱rāḍāpa̱śchandā̱m̐syāpo̱ jyotī̱m̐ṣyāpo̱ yajū̱m̐ṣyāpa̍ḥ sa̱tyamāpa̱ḥ sarvā̍ de̱vatā̱ āpo̱ bhūrbhuva̱ssuva̱rāpa̱ oṃ

12.26.p1.8

āpohiṣṭheti tisṛbhiśca kalaśamudakaiḥ pūrayitvā pañcatvakpañcapallavāṃśca nikṣipya yugmena navavastreṇācchādya bilvapallavaiścūtapallavaiścāvakīrya kūrcamantardhāya
nārikelaphalenāpidhāya puruṣaṃ puṇḍarīkākṣaṃ dhyātvā ṛtuśāntisūktapaṭhanārthaṃ pūrvasyāṃ diśi ṛtvijaṃ tvāmahaṃ vṛṇe || evaṃ dakṣiṇasyāṃ diśi ṛtvijaṃ,
paścimāyāṃ diśi ṛtvijaṃ, uttarasyāṃ diśi ṛtvijaṃ tvāmahaṃ vṛṇe || iti caturdikṣu caturo'ṣṭau ṣaḍvā ṛtvijo varayitvā gandhādibhirabhyarcya
paristīrya mahīdyauḥpṛthivīcana ityādibhiḥ kalaśasthāpanādipūjāntaṃ kṛtvā || oṃ bhūḥ puruṣamāvāhayāmi, oṃ bhuvaḥ puruṣaṃ0, om̐suvaḥ puruṣaṃ0,
oṃ bhūrbhuvaḥsuvaḥ puruṣamāvāhayāmi ityāvāhya ṣoḍaśopacārān kṛtvā || kalaśasya mukhe viṣṇurityādibhiḥ kalaśaṃ dhyātvā tataḥ sarve kumbhamanvārabhya
japanti || oṃ nā̱rāya̱ṇāya̍ vi̱dmahe̍ vāsude̱vāya̍ dhīmahi || tanno̍ viṣṇuḥ praco̱dayā̍t || iti vaiṣṇavīṃ gāyatrīṃ sahasrāṣṭakaṃ śatāṣṭakaṃ vā
japitvā vedādīn japati || oṃ a̱gnimī̍ḷe pu̱rohi̍taṃ ya̱jñasya̍ de̱vamṛtvija̍m || hotā̍raṃ ratna̱dhāta̍mam || oṃ iṣe0 oṃ yajñasya̍0 oṃ śundha̍dhvam0

12.26.p2

iti triranuvākān || oṃ agna ā̱yā̍hi0, oṃ śanno̍ de̱vīḥ0 iti dvau pratīkau || oṃ āpo̱hiṣṭhā0 iti tisraḥ || oṃ hira̍ṇyavarṇā0 iti catasraḥ || oṃ pavamānaḥ suvarjanaḥ0 ityekamanuvākam || varuṇasūktam, śrīsūktam || oṃ sa̱hasra̍śīrṣā puru̍ṣaḥ0 ityekamanuvākam

Linked texts (9)