Pramāṇa · Search · About · API

Baudhayanaprayogamala 13

Baudhāyanaprayogamālā 13

Language
Sanskrit

13.1

atha pañcaśāntiḥ || oṃ bha̱draṃ karṇe̍bhiḥ śṛṇuyāma̍ devāḥ || bha̱draṃ pa̍śyemā̱kṣabhi̱ryaja̍trāḥ || sthi̱rairaṅgai॓stuṣṭuvām̐sa̍sta̱nūbhi̍ḥ || vyaśe̍ma de̱vahi̍taṃ
yadāyu̍ḥ || sva̱sti na̱ indro̍ vṛ̱ddhaśra̍vāḥ || sva̱sti na̍ḥ pū̱ṣā vi̱śvave̍dāḥ || sva̱sti na̱stārkṣyo ari̍ṣṭanemiḥ || sva̱sti no̱ bṛha̱spati̍rdadhātu || oṃ
śānti̱ḥ śānti̱ḥ śānti̍ḥ

13.2

oṃ namo̱ brahma̍ṇe̱ namo̍ astva̱gnaye̱ nama̍ḥ pṛthi̱vyai nama̱ oṣa̍dhībhyaḥ || namo̍ vā̱ce namo̍ vā̱caspata̍ye̱ namo̱ viṣṇa̍ve
bṛ̱hate ka̍romi || oṃ śānti̱ḥ śānti̱ḥ śānti̍ḥ

13.3

oṃ taccha̱ṃyorāvṛ̍ṇīmahe || gā̱tuṃ ya̱jñāya̍ || gā̱tuṃ ya̱jñapa̍taye || daivī॓ḥ sva̱stira̍stu naḥ
sva̱stirmā̍nu̱ṣebhya̍ḥ || ū̱rdhvaṃ ji̍gātu bheṣa̱jam || śanno̍ astu dvipade̍ || śaṃ catu̍ṣpade || oṃ śānti̱ḥ śānti̱ḥ śānti̍ḥ

13.4

oṃ namo̍ vā̱ce yā co̍di̱tā
yā cānu̍ditā̱ tasyai̍ vā̱ce namo̱ namo̍ vā̱ce namo̍ vā̱caspata̍ye̱ nama̱ ṛṣi̍bhyo mantra̱kṛdbhyo̍ mantra̱pati̍bhyo̱ mā māmṛṣa̍yo mantra̱kṛto̍ mantra̱pata̍yaḥ parā̍du̱rmāhamṛṣī̍nmantra̱kṛto̍ mantra̱patī̱nparā̍dāṃ vaiśvade̱vīṃ vāca̍mudyāsam̐śi̱vāmada̍stāṃ juṣṭā̍ṃ de̱vebhya̍ḥ śarma̍ me̱ dyauḥ śarma̍ pṛthi̱vī śarma̱ viśva̍mi̱daṃ jaga̍t || śarma̍ ca̱ndraśca̍
sūrya̍śca̱ śarma̍ brahmaprajāpa̱tī || bhū̱taṃ va̍diṣye̱ bhuva̍naṃ vadiṣye̱ tejo̍ vadiṣye̱ yaśo̍ vadiṣye̱ tapo̍ vadiṣye̱ brahma̍ vadiṣye sa̱tyaṃ va̍diṣye̱ tasmā̍ a̱hami̱damupa̍staraṇa̱mupa̍stṛṇa upa̱staraṇa̍ṃ me pra̱jāyai̍ paśū̱nāṃ bhū̍yādupa̱staraṇa̍mahaṃ pra̱jāyai̍ paśū̱nāṃ bhū̍yāsaṃ prāṇāpānau mṛ̱tyormāṃ pā̱taṃ prāṇā̍pānau̱ māmā̍hāsiṣṭa̱ṃ madhu̍ maniṣye
madhu̍ janiṣye̱ madhu̍ vakṣyāmi̱ madhu̍ vadiṣyāmi̱ madhu̍matīṃ de̱vebhyo̱ vāca̍mudyāsam̐śuśrūṣe̱ṇyā̍ṃ manu̱ṣye॓bhya̱stammā̍ de̱vā a̍vantu śo̱bhāyai̍ pi̱taro̱'nu̍madantu
oṃ śāntiḥ śāntiḥ śāntiḥ

13.2-2

oṃ śanno̱ vāta̍ḥ pavatāṃ mā̱tariśvā̱ śanna̍stapatu sūrya̍: || ahā̍ni̱ śaṃ bha̍vantu na̱: śam̐rātrī̱: prati̍dhīyatām
śamu̱ṣā no̱ vyu̍cchatu śamā̍di̱tya ude̍tu naḥ || śi̱vā na̍ḥ: śa̱ntamā̍ bhava sumṛ̱ḍīkā̱ sara̍svati || mā te̱ vyoma̍ sandṛ̱śi || iḍā̍yai vāsto̱ṣpati̍ ma̱dvāstu̍manto bhūyāsm mā vāsto̱cchitthsma̱hyavā̍stuḥ sabhūṃyā̱dyo'smāndveṣṭi̱ yaṃ ca̍ va̱yaṃ dvi̱ṣmaḥ || pra̱ti̱ṣṭhāsi̍ pratiṣṭhā̱vanto̍ bhūyāsma̱ mā pra̍ti̱ṣṭhāyā̍cchitthsma̱hyapra̍tiṣṭhaḥ sambhūyā̱dyo'smāndveṣṭi̱ yaṃ ca̍ va̱yaṃ dvi̱ṣmaḥ || āvā̍tavāhi bheṣa̱jaṃ vivā̍ṃtavāhi yadrapa̍: !: tvam̐hi vi̱śvarbheṣajo de̱vānā̍m̐ dūta īya̍se
dvāvi̱mau vātau̍ vāta̱ āsindho̱rāpa̍rā̱vata̍: || dakṣa̍ me a̱nya ā̱vātu̱ parā̱nyo vā̍tu yadrapa̍: || yada̱do vā̍ta te gṛ̱he'mṛta̍sya ni̱dhirhita̍: || tato̍ no
dehi jī̱vase̱ tato̍ no dhehi bheṣa̱jam || tato̍ no̱ maha̱ ārvaha̱ vāta̱ āvā̍tu bheṣa̱jam || śa̱mbhūmam̐yobhūno̍ hṛ̱de praṇa̱ āyū̍m̐ṣi tāriṣat || indra̍sya
gṛ̱hoṃsi̱ taṃ tvā̱ prapa̍ṃdye̱ sa1sāśva̍: || saha̱ yanme̱ asti̱ tena̍ṃ || bhūḥ prapa̍dye̱ bhuva̍: prapa̍dye̱ suva̍: prapa̍dye̱ bhūrbhuva̍:suva̍: prapa̍dye vā̱yuṃ pra̍padye'nārtām̐ de̱vatā̍ṃ
prapa̱dye'smā̍namākha̱ṇaṃ prapa̍dye pra̱jāpa̍terbrahmako̱śaṃ brahma̱ prapa̍dya̱ oṃ prapa̍dye || a̱ntari̍kṣaṃ ma u̱rva̍ntaram̐ bṛha̱dgamaya̍: parva̍tāśca yayā̱ vāta̍svastyā sva̍sti̱māṃ tathā̍
sva̱styā sva̍stimāna̍sāni || prā̱ṇā̍pānau mṛtyormā̍ pā̱taṃ prāṇā̍pānau mā māṃhāsiṣṭa̱ṃ mayi̍ me̱dhāṃ mayi̍ pra̱jāṃ mayya̱gnistejo̍ dadhātu̱ mayi̍ me̱dhāṃ mayi̍
pra̱jāṃ mayīndra̍ indri̱yaṃ da̍dhātu̱ mayi̍ me̱dhāṃ mayi̍ pra̱jāṃ mayi̱ sūryo̱ bhrājo̍ dadhātu

13.3-2

dyubhi̍ra̱ktubhi̱: pari̍pāta̱masmānara̍ṣṭebhiraśvinā̱ saubha̍gebhiḥ
tanno̍ mi̱tro varu̍ṇo māmahantā̱madi̍ti̱: sindhu̍: pṛthi̱vī u̱tadyauḥ || kayā̍ naści̱tra ābhu̍vadū̱tī sa̱dā vṛ̱dhaḥ sakhā̍ || kayā̱ śaci̍ṣṭhayā vṛ̱tā || kastvā̍
sa̱tyo madā̍nā̱ṃ mam̐hi̍ṣṭhomathsa̱dandha̍saḥ || dṛ̱ḍhā ci̍dā̱ruje̱vasu̍ || a̱bhīṣuṇa̍: sakhī̍nāmavi̱tā ja̍ritṝ̱ṇām || śa̱taṃ bha̍vāsyū̱tibhi̍: || va̱yaṃḥ supa̱rṇā
upa̍sedurindra̱ma̍ priyame̍dhā̱ ṛṣa̍yo̱ nārdha̍mānāḥ || apa̍dhvāntamūrṇa̱hi pū̱rdhi cakṣu̍rmumu̱gdhya̍smānni̱dhaye̍va ba̱ddhān

13.4-2

śaṃ no̍ de̱vīra̱bhiṣṭa̍ya̱ āpo̍ bhavantu
pī̱taye̍ || śaṃ yora̱bhisra̍vantu naḥ || īśā̍nā̱vāryā̍ṇā̱ṃ kṣaya̍ntīścarṣaṇī̱nām || a̱po yā̍cāmi bheṣa̱jam || su̱mi̱trā na̱ āpa̱ oṣa̍dhayaḥ santu durmi̱trāstasmai̍
bhūyāsuryo̍'smān dveṣṭi̱ yaṃ ca̍ va̱yaṃ dviṣmaḥ || āpo̱hiṣṭhā ma̍yo̱bhuva̱stāna̍ ū̱rje da̍dhātana || ma̱heraṇā̍ya̱ cakṣa̍se || yo va̍ḥ śi̱vata̍mo̱ rasa̱stasya̍ bhājaya̱teha
na̍ḥ || u̱śa̱tīri̍va mā̱tara̍ḥ || tasmā̱ ara̍ṃṅgamāmavo̱ yasya̱ kṣayā̍ya̱ jinva̍tha || āpo̍ ja̱naya̍thā ca naḥ

13.5

pṛthi̱vī śāntā sā'gninā̍ śāntā
sā meṃ śāntā śuca̍ṃśamayatu || a̱ntari̍kṣaṃ śāntaṃ tadvāyunā̍ śāntaṃ tanme̍ śāntaṃ śuca̍ṃśamayatu || dyauḥ śāntā sā''di̱tyena̍ śāntā sā meṃ
śāntā śuca̍ṃśamayatu || pṛthi̱vī śānti̍rantari̍kṣaṃ śānti̱rdyauḥ śānti̱rdiśa̍ḥ śānti̍ravāntaradiśa̍ḥ śānti̍ra̱gniḥ śānti̍rvā̱yuḥ śānti̍rādi̱tyaḥ śānti̍śca̱ndramā̍ḥ śānti̱rnakṣa̍trāṇi̱ śānti̱rāpa̍ḥ śānti̱roṣa̍dhayaḥ śānti̱rvana̱spata̍yaḥ śānti̱rgauḥ śānti̍ra̱jāḥ śānti̱raśva̍ḥ śānti̱ḥ puru̍ṣaḥ śānti̱rbrahma̱ śānti̍rbrāhma̱ṇaḥ
śānti̱ḥ śānti̍reva śānti̍ḥ śānti̍rme astu̱ śānti̍ḥ || tayā̱'haṃ śāntyā sarva̍śāntyā̱ mahyaṃ dvipade̱ catu̍ṣpade ca̱ śāntiṃ karomi̱ śānti̍rme astu
śānti̍ḥ || ehra̱ śrīśca̱ hrīśca̱ dhṛti̍śca̱ tapo̍ me̱dhā pra̍ti̱ṣṭhā śraddhā sa̱tyaṃ dharma̍ścaitāni̱ motti̍ṣṭhantamanūtti̍ṣṭhantu māmā̱'śrīśca̱ hrīśca̱ dhṛti̍śca̱ tapo̍ me̱dhā pra̍ti̱ṣṭhā
śra̱ddhā sa̱tyaṃ dharma̍ścaitāni̍ mā̱ mā hā̍siṣuḥ || udāyu̍ṣā svāyuṣo doṣa̍dhīnā̱ꣲ rasenotparjanya̍sya̱ śuṣme̱ṇoda̍sthāma̱mṛtā̱ꣲ anu̍ || taccakṣu̍rde̱vahi̍taṃ pu̱rastā̍cchu̱kramuccara̍t || paśye̍ma śa̱rada̍ḥ śa̱taṃ jīve̍ma śa̱rada̍ḥ śa̱taṃ nandā̍ma śa̱rada̍ḥ śa̱taṃ modā̍ma śa̱rada̍ḥ śa̱taṃ bhavā̍ma śa̱rada̍ḥ śa̱taṃ śṛṇavā̍ma śa̱rada̍ḥ śa̱taṃ prabra̍vāma
śa̱rada̍ḥ śa̱tamajī̍tāsyāma śa̱rada̍ḥ śa̱taṃ jyok ca̱ sūrya̍ dṛ̱śe || ya uda̍gānmaha̱to'rṇavā̍dvi̱bhrāja̍mānaḥ sari̱rasya̱ madhyā̱tsamā̍vṛṣa̱bho lo̍hitā̱kṣaḥ sūryo̍ vipa̱ścinmana̍sā punātu || bra̱hma̱ṇa̱ścota̍nyasi̱ brahma̍ṇa ā̱ṇīstho brahma̍ṇa ā̱vapa̍namasi dhāri̱teyaṃ pṛ̍thi̱vī brahma̍ṇā ma̱hī dhā̍ri̱tame̍nena ma̱hada̱ntari̍kṣaṃ di̱vaṃ dādhāra
pṛthi̱vīm̐sadaivāṃ yada̱haṃ veda̱ tada̱haṃ dhā̍rayā̱ṇi̱ mā madredo'dhi̱visraṃsat || me̱dhā̱ma̱nī̱ṣe mā vi̍śatā̱m̐sa̱mīcī̍bhūtasya̱ bhavya̱syāva̍ruddhyai̱ sarva̱māyu̍rayāṇi̱ sarva̱māyu̍rayāṇi || ā̱bhirgīrbhiryadato̍ na ū̱namāpyā̍yaya harivo vardha̍mānaḥ || ya̱dā sto̱tṛbhyo̱ mahi̍go̱trā ru̱jāsi̍ bhūyiṣṭha̱bhājo̱ ardha̍te syāma || brahma̍
grā̱vādi̱mya̱ tanno̱ māhā̍sīt || oṃ śānti̱ḥ śānti̱ḥ śānti̍ḥ

Linked texts (5)