Tirthakanda 14
Tīrthakāṇḍa 14
- Language
- Sanskrit
14.p1
³īśvara uvāca— anyacaiva pravakṣyāmi hariścandreśvaraṃ śubham | yatra siddho mahātmā vai hariścandro mahābalaḥ || taṃ dṛṣṭvā mānavo devi rudrasya padamāpnuyāt | pūrvābhimukhaṃ tu talliṅgaṃ svargalokapradāyakam || hariścandreśvarādevi anyaliṅgaṃ tu paścime⁴ | pūrvābhimukhaṃ tu taṃ devi nānnā vai nairṛteśvaram || tasya sandarśanādevi kaivalyaṃ jñānamāpnuyāt | tasyaiva dakṣiṇe liṅgaṃ pūrvābhimukhamavasthitam || nāmnā hyāṅgiraseśāṃ tadvairāgyasukhadāyakam | tasyaiva dakṣiṇe devi kṣemeśvaramanuttamam
14.p2
[¹tasya dakṣiṇādigbhāge kedāraṃ nāma viśrutam | taṃ dṛṣṭvā manujo devi rudrasyā'nucaro bhavet || kedārāddakṣiṇe caiva liṅgaṃ pūrvāmukhaṃ sthitam | nīlakaṇṭheti nāmānaṃ suralokapradāyakam || tasyaiva vāyave koṇe ambarīṣeśvaraṃ śubham |] tasya dakṣiṇādigbhāge liṅgaṃ vai dakṣiṇāmukham || nāmnā kālañjaraṃ² devaṃ sarvapātakanāśanam | tasyaiva dakṣiṇe bhāge lolārko nāma vai raviḥ³ || tasya darśanamātreṇa sūryalokamavāpnuyāt | lolārkāt paścime bhāge durgādevī ca tiṣṭhati || mānavānāṃ hitārthāya kūṭe kṣetrasya⁴ dakṣiṇe | durgāyāḥ paścime devi liṅgaṃ pūrvāmukhaṃ sthitam || asitena ca taddevi bhaktyā vai saṃpratiṣṭhitam | śuṣkanyāstu ⁵nāmnā vai śuṣkeśvaramiti smṛtam
14.p3
śuṣkeśvarāt paścimena nāmnā tu janakeśvaram | janakena mahābhāge bhaktyā cā'pi pratiṣṭhitam || paścānmukhaṃ tu talliṅgaṃ darśanādavyathaḥ śubhe | tasyaiva cottare bhāge nātidūre yaśasvini || śāṅkukarṇeśvaraṃ nāma liṅgaṃ tatraiva tiṣṭhati | tasya darśanamātreṇa vratasiddhirbhavennṛṇām || śuṣkeśvarācottareṇa liṅgaṃ paścānmukhaṃ sthitam | siddheśvareti nāmānaṃ kuṇḍasyaiva taṭasthitam || tatra kuṇḍe naraḥ snātvā dṛṣṭvā siddheśvaraṃ tu vai | sarvāsāmeva siddhīnāṃ pāraṃ gacchati mānavaḥ || vāyavye tu diśābhāge śāṅkukarṇeśvarasya tu | māṇḍavyeśvaramiti khyātaṃ surasiddhaistu vanditam || tasya caiva samīpe tu svayaṃ devaśca tiṣṭhati | gaṇaiḥ parivṛto devi¹ devyā saha mahāprabhuḥ || dvāre sve tiṣṭhate devi svayaṃ kṣetraṃ ca rakṣati | devasya cottare bhāge nātidūre vyavasthitam || mukhaliṅgaṃ tu tatraiva liṅgaṃ pūrvāmukhaṃ śubhe | tasyaiva cottare pārśve² chāgaleśvarasaṃjñitam || paścānmukhaṃ tu talliṅgaṃ sarvasiddhipradāyakam | anyadāyatanaṃ devi paścimena yaśasvini || kapardīśvaranāmānamuttamaṃ sarvadāyakam
14.p4
tasya pūrveṇa suśroṇi liṅgaṃ pūrvāmukhaṃ sthitam | ¹hariteśvaranāmānaṃ sarvapāpakṣayaṅkaram || kātyāyaneśvaraṃ nāma tasya dakṣiṇataḥ sthitam | tena dṛṣṭena manujaḥ sarvayajñaphalaṃ labhet || anyattasyaiva pārśve tu aṅgāreśvarasaṃjñitam | taḍāgaṃ cā'pi tatrasthamaṅgāreśvarasaṃjñitam || tasya ²dakṣiṇadigbhāge nātidūre vyavasthitam | ³sukureśvaranāmānaṃ sarvayātrāphalapradam || pāścimābhimukhaṃ liṅgaṃ kuṇḍasya purataḥ sthitam | tasya kuṇḍasya pārśve tu chāgaleśvarasaṃjñitam || tasya darśanamātreṇa yogaiśvaryaṃ pravartate | anyāni santi liṅgāni rātaśo'tha sahasraśaḥ || na mayā tāni coktāni bahutvānnāmadheyataḥ | saptakoṭyastu liṅgāni asmin sthāne sthitā śuci || teṣāṃ⁴ darśanamātreṇa jñānaṃ cotpadyate kṣaṇāt | uddeśamātraṃ kathitaṃ mayā tubhyaṃ varānane || na śakyaṃ vistarādvaktuṃ varṣakoṭiśatairapi | etāni siddhaliṅgāni kūpāḥ ⁵puṇyā hadāstathā || vāpyo nadyo'tha kuṇḍāni mayā te parikīrtitāḥ | eteṣu caiva yaḥ snānaṃ kariṣyati samāhitaḥ || liṅgāni sparśayitvā ca saṃsāre na viśet punaḥ | pṛthivyāṃ yāni tīrthāni antarikṣacarāṇi
14.p5
teṣāṃ madhye tu ye śreṣṭhā mayā te kathitā śubhe | tīrthayātrā varārohe kathitā pāpanāśinī || yena caiṣā kṛtā devi so'vaśyaṃ muktibhāgbhavet
14.p6
iti śrīliṅgapurāṇe ¹vārāṇasīmāhātmye guhyāyatanavarṇanaṃ nāma ṣoḍaśo'dhyāyaḥ
Linked texts (1)
- Tristhalīsetu (Nārāyaṇa) — Nārāyaṇa (Mahiṣamaṅgalam) 1513, Sanskrit