Tirthakanda 16
Tīrthakāṇḍa 16
- Language
- Sanskrit
16.p1
viṣṇuruvāca— etacchrutvā vaco devī vismayotphullalocanā | oṅkāradarśanārthaṃ vai kapileśamupāgatā || tasmāttvamapi deveśaṃ pūjayasva sadāśivam | etatparamānandaṃ prāpsyate paramaṃ padam || etacchrutvā paraṃ guhyaṃ sakāśāccakrapāṇinaḥ | oṅkāramarcayeddevaṃ sadā tadgatamānasaḥ || sūrya uvāca— tasmāttvamapi durdharṣamārādhaya sureśvaram | tena tatpadamāpnoṣi yadanyairapi durlabham || sūryasya vacanaṃ śrutvā vārāṇasyāmupāgataḥ | tatra devi tadoṅkāraṃ dṛṣṭvā caiva praṇamya ca || ārādhanaparo bhūtvā liṅgaṃ sthāpya caturmukham | devadevasakāśādvai kṛtakṛtyo bhavecchuciḥ
16.p2
yaḥ saṃprāpya mahattattvamīśvare kṛtaniścayaḥ | tasmāttvamapi gārgyeya¹ yadi śreyo'bhivāñchasi || ārādhayasva deveśaṃ manasaḥ sthairyamātmanaḥ
16.p3
tathā—
16.p4
tasmiṃstu yaḥ śivaḥ sākṣādoṅkāreśvarasaṃjñitaḥ || etadguhyasya māhātmyaṃ tava snehānmahāmune | akāraṃ ca ukāraṃ ca makāraṃ ca prakīrtitaḥ || asmim̐lliṅge tu saṃsiddho munikālikavṛkṣayaḥ (?) | akārastatra vijñeyo viṣṇulokagatipradaḥ || tasya dakṣiṇapārśve tu oṅkārākhyeti kīrtitaḥ | tatra siddhiṃ parāṃ prāpto devācāryo bṛhaspatiḥ || ukāraṃ tatra vijñeyaṃ brahmaṇaḥ padamavyayam | tasya cottaradigbhāge makāraṃ viṣṇusaṃjñakam || tasmim̐lliṅge ca saṃsiddhaḥ kapilarṣirmahāmuniḥ | tasmāttvamapi gārgeya manassthairyaṃ yadīcchasi || liṅgasyā''rādhane yatnaṃ kuruṣva niyatavrataḥ | vidyāṃ pāśupatīṃ prāpya tasmin stutye vyapāśrayaḥ || nirmamo nirahaṅkāraḥ padamāpnoṣi śāśvatam | etacchrutvā vacaḥ stutvā² yājñavalkyasya darśitāḥ || vārāṇasīṃ samabhyetya paścāyatanamuttamam | ārādhyamāno deveśastasmin sthāne sthitaḥ sadā || tasmādanye'pi ye kecilliṅgasyā''rādhane ratāḥ | teṣāṃ vai paścime kāle jñānamutpadyate sadā
16.p5
evaṃ jñātvā tu yo martyaḥ sadā liṅgārcane rataḥ | na tasya punarāvṛttiḥ kalpakoṭiśatairapi || tasmādvai saṃpradāyāc¹ arcitavyaṃ prayatnataḥ | mānuṣyaṃ durlabhaṃ prāpya vidyutsaṃpātacañcalam || liṅgaṃ yo'rcayate vipra ātmānaṃ sa samuddharet | ātmānaṃ ghātayenmityaṃ yo na liṅgaṃ samarcayet
16.p6
iti śrīliṅgapurāṇe vārāṇasīmāhātmye guhyāyatanavarṇanaṃ nāmāṣṭādaśo'dhyāyaḥ