Tirthakanda 3
Tīrthakāṇḍa 3
- Language
- Sanskrit
3.p1
īśvara uvāca—
3.p2
vāyavye tu diśābhāge tasya pīṭhasya sundari | sagareṇa purā devi tasmin deśo pratiṣṭhitam || caturmukhaṃ tu talliṅgaṃ sarvapāpapraṇāśanam | tasyaivottarapūrveṇa nāmnā vālīśvaraṃ śubham || vālinā sthāpitaṃ liṅgaṃ kapinā sumahātmanā | taṃ dṛṣṭvā mānavo devi tiryagyoniṃ na gacchati | ¹tasya cottaradigbhāge sugrīvasya mahātmanaḥ || liṅgaṃ tasya² śubhaṃ bhadre sarvakilbiṣanāśanam | tathā hanumatā''traiva sthāpitaṃ liṅgamuttamam
3.p3
sagarātpaścimenaiva liṅgaṃ tatra pratiṣṭhitam | mama bhaktyā ca suśroṇi aśvibhyāṃ parameśvari || tasyaivottarapārśve tu bhadradohamiti smṛtam | gavāṃ kṣīreṇa sajjātaṃ sarvapātakanāśanam || kapilānāṃ sahasrasya samyagdattasya yatphalam | tatphalaṃ labhate martyaḥ snātastatra na saṃśayaḥ || pūrvabhādrapadāyuktā paurṇamāsī yadā bhavet | tadā puṇyatamaḥ kālo hyaśvamedhaphalapradaḥ || hṛdasya paścime tīre bhadreśvaramiti sthitam | taṃ dṛṣṭvā mānavo bhadre golokaṃ labhate dhruvam || bhadreśvarasya digbhāge nairṛte tu yaśasvini | upaśāntaśivaṃ nāma khyātaṃ sarvasurāsuraiḥ || upaśāntasya devasya uttare varavarṇini | cakreśvaramiti khyātaṃ sarvadevanamaskṛtam || paścimābhimukhaṃ devi hṛdastasyaiva cā'grataḥ | tasmin hṛde naraḥ snātvā [pūjayitvā¹] maheśvaram || śivalokamavāpnoti bhāvitenāntarātmanā | tasya paścimadigbhāge śūleśvaramiti sthitam || śūlayantraṃ purā nyastaṃ snānārthaṃ varavarṇini | hṛdastatra samutpanno devadevasya cā'grataḥ || snānaṃ kṛtvā hṛde tasmin dṛṣṭvā śūleśvaraṃ prabhum | rudralokamavāpnoti tyaktvā saṃsārasāgaram || śūleśvarasya pūrveṇa anyadāyatanaṃ śubham | tatra tatra tapastīvraṃ nāradena surarṣiṇā
3.p4
sthāpitaṃ mama liṅgatu kuṇḍasya purataḥ śubham | tasmin kuṇḍe naraḥ snātvā dṛṣṭvā vai nāradeśvaram || ¹saṃsāramāyā yā ghorā tāṃ tarennātra saṃśayaḥ | nāradeśasya pūrveṇa nāmnā dharmeśvaraṃ śubham || sthāpitaṃ mama liṅgaṃ tu kuṇḍasya purataḥ śubhe | vāyavye tu diśābhāge tasya devasya sundari || vināyakamiti khyātaṃ kuṇḍaṃ tatra śubhodakam | tasmin kuṇḍe naraḥ snātvā dṛṣṭvā caiva vināyakam || sarvavighnavinirmukto hyasmin kṣetre vasecciram | vināyakasya saṃlagna uttareṇa yaśasvini || hṛdastatra suvikhyāto'marako nāma nāmataḥ | dakṣiṇena tu kuṇḍasya mukhaliṅgaṃ tu tiṣṭhati || tasmin kuṇḍe naraḥ snātvā dṛṣṭvā ²cāmarakeśvaram | ajñānācaiva yatkiñcidiha kṣetre tu yatkṛtam || vilayaṃ yāti tatsarvaṃ dṛṣṭvā talliṅgamuttamam | tasya cottaradigbhāge nātidūre yaśasvini || varaṇāyāstaṭe śuddhe liṅgaṃ tatraiva saṃsthitam | varaṇeśvaraṃ tu vikhyātaṃ paścimābhimukhaṃ sthitam || tasmin pāśupataḥ siddha aśvapādo yaśasvini | anenaiva śarīreṇa śāśvatīṃ siddhimāgataḥ
3.p5
mamā'pi tatra sānnidhyaṃ tasmim̐lliṅge yaśasvini | tena dṛṣṭena suśroṇi gandharvatvaṃ ca vindati || tasya paścimadigbhāge nāmnā sauleśvaraṃ śubham | taṃ dṛṣṭvā mānavo devi pūrvoktaṃ labhate phalam || dakṣiṇe cāpi tasyaiva koṭīśvaramiti sthitam | yatra sā dṛśyate devi ¹viśrutā bhīṣmacaṇḍikā || bībhatsavikṛte bhīme śmaśāne vasate sadā | tena sā procyate devi viśrutā bhīṣmacaṇḍikā || koṭitīrtheṣu yaḥ snātvā koṭīśvaramathārcayet | gavāṃ koṭipradānena yatphalaṃ labhate naraḥ || tatphalaṃ sakalaṃ tasya snānenaikena sundari | koṭīśvarasya pūrveṇa ṛṣisaṅghaiḥ pratiṣṭhitam || tena liṅgena dṛṣṭena dṛṣṭaṃ syāt sacarācaram
3.p6
iti śrīliṅgapurāṇe guhyāyatanavarṇane pañcamo'dhyāyaḥ