Tirthakanda 5
Tīrthakāṇḍa 5
- Language
- Sanskrit
5.p1
īśvara uvāca—
5.p2
tatra sthāne tu ye siddhāstān pravakṣyāmyahaṃ punaḥ| mahāpāśupatā śreṣṭhā mama putrā mahaujasaḥ || ananyamanasaḥ śuddhāḥ sevito'haṃ purā sadā| śītātapavinirmuktaṃ prāsādairupaśobhitam || kailāsapṛṣṭhe devasya yādṛgdevi gṛhaṃ śubham| tadabhyadhikarūpaṃ tu kṛtvā devasya mandiram || sevyate siddhatulyaistu sarvasiddhānukampibhiḥ| tadā siddhiranuprāptā nirvāṇāyā gatiḥ purā || kapileśvarasya caivāgre liṅgaṃ paścānmukhaṃ smṛtam| uddālaka ṛṣistatra siddhiṃ paramikāṃ gataḥ || anyat paścānmukhaṃ liṅgaṃ sthitaṃ tatra tathottare| tasmim̐lliṅge tu saṃsiddhaḥ pārāśaryo mahāmuniḥ || anyattatraiva saṃlagne sthitaṃ paścānmukhaṃ śubham | tasminnāyatane siddho mahājñānī hi vāṣkaliḥ || tasyaiva tu samīpasthaṃ sthitaṃ pūrvāmukhaṃ priye | tatra pāśupataḥ siddho bhāvavṛttastu vai muniḥ || tasyaiva paścime devi mukhaliṅgaṃ tu tiṣṭhati | tatra siddhiṃ parāṃ prāpta aruṇirnāma nāmataḥ || paścime aruṇīśāsya anyaliṅgaṃ tu tiṣṭhati | asmin pāśupatācāryo yogasiddho mahāmuniḥ || anyattatraiva saṃlagnaṃ dakṣiṇe liṅgamuttamam | tatra siddhiṃ gato devi kaustubho nāma vai ṛṣiḥ || tasya dakṣiṇapārśve tu liṅgaṃ pūrvāmukhaṃ sthitam | mahāpāśupataḥ siddhaḥ sāvarṇistatra vai muniḥ || tasyāgye tu mahāliṅgaṃ sthitaṃ pūrvāmukhaṃ śubham | asmiṃliṅge śivaḥ sākṣāt svayameva vyavasthitaḥ || oṅkāramūrtimāsthāya sthito'haṃ tatra suvrate | catvāro munayaḥ siddhāstasmiṃlliṅge yaśasvini || vāmadevastu sāvarṇiraghoraḥ kapilastathā | tasmiṃlliṅge tu saṃsiddhā nandīśāsya prabhāvataḥ || tasya devasya cā'dhastādguhā siddhaistu vanditā | śrīmukhī nāma sā jñeyā yogasiddhaistu sevitā || tatra pāśupatāḥ śreṣṭhā mama liṅgārcane ratāḥ | teṣāṃ caiva nivāsārthaṃ sā guhā nirmitā mayā || tasya dvāre tu suśroṇi siddha aghoro mahāmuniḥ | anenaiva śarīreṇa rudratvaṃ gatavān muniḥ || tatra gatvā trirātraṃ tu kṣapayedekamānasaḥ | naro vā yadi vā nārī saṃsāraṃ na viśet punaḥ || aghoreśvaradevasya cottare kūpamuttamam | tasyopasparśanāddevi vājapeyaṃ ca vindati
5.p3
iti śrīliṅgapurāṇe guhyāyatanavarṇanaṃ nāma ṣannamo'dhyāyaḥ
Linked texts (1)
- Prabhāsakṣetramāhātmyam — Sanskrit