Tirthaprakasha 4.p136
Tīrthaprakāśa 4.p136
- Language
- Sanskrit
4.p136.1
tathā, pūrvajanmakṛtaṃ pāpaṃ tapasāpi viśuddhyati | tatkṣaṇānnaśyate pāpaṃ tasya liṅgasya darśanāt || iti | atha ratneśvaraḥ | skānde, yāni brahmāṇḍamadhye'tra santi liṅgāni pārvati ! | tairarcitāni sarvāṇi ratneśo yaiḥ samarcitāḥ || tathā, ratneśvaro'rcito dadyanmahāratnāni bhaktitaḥ | ratnaiḥ samarcca talliṅgaṃ strīratnādi labhennaraḥ || iti | atha madhyameśvaraḥ | laiṅge, mandākinījale snātvā dṛṣṭvā vai madhyameśvaram | ekaviṃśakulopeto rudraloke vasecciram || snānaṃ dānaṃ japo homaḥ svādhyāyaḥ pitṛtarpaṇam | piṇḍanirvapaṇaṃ caiva sarvaṃ bhavati cākṣayam || tathā, mandākinīmupaspṛśya rāhugraste divākare | yatphalaṃ labhate martyastasmāddaśaguṇaṃ tviha || iti | atha vṛddhakāleśaḥ | kāśīkhaṇḍe, vṛddhakāleśvaraṃ nāma liṅgametanmahīpate ! | tathā, darśanātsparśanāttasya pūjanācchravaṇāttathā || vṛddhakāleśaliṅgasya sarvaṃ prāpnoti vāñchitam | kūpaḥ kālodako nāma jarāvyādhivighātakṛt || tadīyajalapānena na mātuḥ stanyapānavān | na punarjāyata ityarthaḥ | kṛtakūpodakasnānaḥ kṛtvaitalliṅgapūjanam | varṣeṇa siddhimāpnoti manobhilaṣitāṃ naraḥ || na ca kuṣṭhaṃ na visphoṭā na vandhyā na vicarcikā | pītāt spṛṣṭāt pratiṣṭhanti kaphāḥ kālodakodakāt || nāgnimāndyaṃ naiva śūlaṃ na moho na pravāhikā | na mūtrakṛcchraṃ no pāmā pānīyasyāsya sevanāt || bhūtajvarāśca ye kecit ye kecidviṣamajvarāḥ | te kṣipramupaśāmyanti hyetatkūpodasevanāt || vṛddhakāleśvare liṅge sevite na daridratā | nopasargā na vā rogā na pāpaṃ nāghajaṃ phalam || aghajaṃ phalaṃ, duḥkham |
4.p136.2
uttare kṛttivāsasya vārāṇasyāṃ prayatnataḥ | vṛddhakāleśvaraṃ liṅgaṃ draṣṭavyaṃ siddhikāmukaiḥ || laiṅge, tasya devasya cāgre tatkūpaṃ tiṣṭhati vai śubham | tatra kālodakaṃ nāma udakaṃ devi ! tiṣṭhati || tasyaiva prāśanāddevi ! pūto bhavati mānavaḥ | iti | athāpamṛtyuhareśvaraḥ | kāśīkhaṇḍe, kāleśvarasamīpe tu dakṣiṇe varavarṇini ! | mṛtyunā sthāpitaṃ liṅgaṃ sarvarogavināśanam || iti | atha ghaṇṭākarṇahrada-vyāseśvarau | tatra laiṅge, snānaṃ kṛtvā hrade tasmin vyāseśasya ca darśanāt | yatra tatra mṛto vāpi vārāṇasyāṃ mṛto bhavet | kāśīkhaṇḍe, ghaṇṭākarṇe mahātīrthe śrāddhaṃ kṛtvā vidhānataḥ | api durgatimāpannānuddharetsapta pūrvajān || iti | atha parāśareśvaraḥ | kāśīkhaṇḍe, parāśareśvaraṃ liṅgaṃ jyeṣṭheśāduttare mahat | tasya darśanamātreṇa nirmalaṃ jñānamāpyate || iti | atha vyāghreśvaraḥ | kāśīkhaṇḍe, vyāghreśvarasya ye bhaktāstebhyo bibhyati kiṅkarāḥ | yāmyā api mahākrūrā jaya jīveti vādinaḥ || laiṅge, vyāghreśvarati vikhyātaṃ sarvadevaiḥ stutaṃ śubhe ! | tena dṛṣṭena labhate uttamaṃ padamavyayam || iti | atha jyeṣṭheśvaraḥ | laiṅge, tena liṅgena dṛṣṭena pūjitena stutena ca | kṛtakṛtyo bhaveddevi ! saṃsāre na punaviśetū || pūrvāmukhaṃ tu talliṅgaṃ jyeṣṭhasthānāmidaṃ śubham | mānavānāṃ hitārthāya tatra sthāne sthito'smyaham || tathā, jyeṣṭhavāpyāṃ naraḥ snātvā tarpayitvā pitāmahān | jyeṣṭheśvaraṃ samālokya na bhūyo jāyate bhuvi || tathā, jyeṣṭheśvaro'rcyaḥ prathamaṃ kāśyāṃ śreyo'rthibhiḥ sthitaiḥ | jyeṣṭhā gaurī tato'bhyarcya sarvajyaiṣṭhayamabhīpsubhiḥ || iti |
4.p136.3
athāgnīśvaraḥ | laiṅge, tathāgnīśvaranāmānaṃ sarvapāpakṣayaṅkaram | taṃ dṛṣṭvā mānavo devi ! agniloke tu gacchati || iti | atha jaigīṣavyeśvaraḥ | laiṅge, tasmāttatsaṃskṛtaṃ liṅgaṃ pūjayiṣyanti ye narāḥ | jñānaṃ teṣāṃ dhruvaṃ devi ! na cirādeva jāyate || trirātraṃ tatra kṛtvā vai yo naraḥ pūjayiṣyati | guhāṃ praviśate caiva jñānayukto bhavennaraḥ | tathā, jaigīṣavyeśvaraṃ nāma liṅgaṃ kāśyāṃ sudurlabham | trīṇi varṣāṇi saṃsevya labhedayogaṃ na saṃśayaḥ || iti | atha kapardīśvaraḥ | kāśīkhaṇḍe, kapardīnāma gaṇapaḥ śambhoratyantavallabhaḥ | pitṝṇāmuttare bhāge liṅgaṃ saṃsthāpya śāmbhavam || kuṇḍaṃ cakhāna tasyāgre vimalodakasaṃjñakam | yasya toyasya saṃsparśādvimalo jāyate naraḥ || tathā, kapardīśaṃ samabhyarcya na naro nirayaṃ vrajet | na piśācatvamāpnoti kṛtvātrāpyaghamutkaṭam || iti | kaurmye, idaṃ devasya talliṅgaṃ kapardīśvaramuttamam | smṛtyaiva śeṣapāpaughaṃ kṣipramasya vimuñcati || kāmakrodhādayo doṣā varaṇāsīnivāsinām | vighnāḥ sarve vinaśyanti kapardīśvarapūjanāt || iti | athāpsaraseśvaraḥ | kāśīkhaṇḍe, jyeṣṭheśāddakṣiṇe bhāge liṅgamapsarasāṃ śubham | tatraivāpsarasaḥ kūpaḥ bhāgyodakasaṃjñakaḥ || tatkūpajalasusnāto vilokyāpsaraseśvaram | na daurbhāgyamavāpnoti nārī vā puruṣo'tha vā || iti | atha trilocanaḥ | kāśīkhaṇḍe, yatrāsti tanmahāliṅgaṃ vārāṇasyāṃ trilocanam | tīrthaṃ pilippilākhyaṃ tat bhuvanyambhasi viśrutam || sarvatīrthamayaṃ tīrthaṃ tat kāśyāṃ parigīyate | tathā, snātvā pilippilātīrthe triviṣṭapasamīpataḥ | dṛṣṭvā trilocanaṃ liṅgaṃ kiṃ bhūyaḥ pariśocati ||
4.p136.4
iti | tathā, trilocanasya liṅgasya mahimānaṃ na kaścana | samyagvetti maheśāni ! mayaiva parigopitam | iti | atha trilocanaprācyāṃ mahādevaḥ | brahmavaivartte, vārāṇasyāṃ mahādevaṃ samabhyarcya sakṛnnaraḥ | ābhūtasamplavaṃ yāvacchivaloke vasetsadā || iti | atha kāmeśaḥ | laiṅge kāmakuṇḍaprakaraṇe, tasmādanye'pi ye kecittīrthe tasmin samāśritāḥ | ārādhayanto deveśaṃ kāmeśaṃ caiva sarvadā || yo yasya manasā kāmastaṃ tamāpnoti niścitam | dakṣiṇena sthitaṃ liṅgaṃ rudrāvāsasya sundari ! || kāmeśvaramiti khyātaṃ sarvakāmaphalapradam | tathā, gandhadhūpanamaskārairmukhavādyaiśca sarvadā | yo māmarcayate tatra tasya tuṣyāmyahaṃ sadā || dadāmi sarvakāmāṃśca dharma mokṣaṃ tathaiva ca | iti | athoṅkāreśvaraḥ| kalpatarau liṅge, oṅkāreśvaranāmānaṃ devānāmāpa durlabham | vāmadevastu sāvarṇiraghorakapilastathā || tatra siddhiṃ parāṃ prāptā yoge pāśupate sthitāḥ | anye ca ṛṣayo devā yakṣagandharvaguhyakāḥ || kalau yuge gamiṣyanti tasmin sthāne sthitāḥ sadā | devyā hi sā parā mūrttiḥ kapileśvarasaṃjñitā || kadācidasya devasya darśane jāhnavī priye ! | matsyodarī samāyāti tatra snānaṃ tu mokṣadam || ārādhya kapileśaṃ tu trailokye pālanakṣamāḥ | bhavanti puruṣā devi ! mama nityaṃ ca vallabhāḥ || oṅkāraṃ tatparaṃ brahma sakalaṃ niṣkalaṃ śubham | rudralokasya tat dvāraṃ rahasyaṃ parikīrttitam || tathā, anyacca te pravakṣyāmi tasmin kṣetre sureśvari ! | tisro nadyastu tatrasthā vahanti ca śubhodakāḥ || tāsāṃ darśanamātreṇa brahmahatyā nivarttate | ekāpi tasya trisrotā mandākinī tathāparā ||
4.p136.5
matsyodarī tṛtīyā ca etāstisrastu puṇyadāḥ | mandākinī tathā puṇyā madhyameśvarasaṃsthitā || pitāmahasrotikā ca avimukte tu puṇyadā | matsyodarī tu oṅkāre puṇyadā sarvadaiva hi || tasmin sthāne yadā gaṅgā āgamiṣyati bhāmini ! | tadā puṇyatamaḥ kālo devānāmāpa durlabhaḥ
Linked texts (1)
- Kūrmapurāṇa — Vyāsa, Sanskrit