Tirthaprakasha 4.p140
Tīrthaprakāśa 4.p140
- Language
- Sanskrit
4.p140.1
tathā, gaṅgākeśavasaṃjñaṃ ca sarvapātakanāśanam | tatra me śubhadāṃ mūrtti mune tattīrthasaṃjñikām || sampūjya śraddhayā dhīmān mama loke mahīyate | tathā, śukreśvarasya ye bhaktāḥ śukraloke vasanti te | viśveśvarāddakṣiṇataḥ śukreśo'sti parantapa ! || kāśīkhaṇḍe maṇikarṇīśamabhidhāya— tataḥ pāśupataṃ tīrthamavācyāṃ maṇikarṇitaḥ | kṛtodakakriyastatra paśyetpaśupatīśvaram || yatra pāśupato yoga upadiṣṭaḥ pinākinā | mamāpi vidhimukhyānāṃ surāṇāṃ paśupāśakṛt || dhruveśvaraṃ samabhyarcya dhruvakuṇḍe kṛtodakaḥ | dhruvalokamavāpnoti naro bhogasamanvitaḥ || tathā'gastyaṃ prati skandaḥ— tava tatra tu yatkuṇḍamagastīśvarasannidhau | tatra snātvā ca pītvā ca kṛtasarvodakakriyaḥ || pitṝn piṇḍaiḥ samabhyarcya śraddhāśrāddhavidhānataḥ | kṛtakṛtyo bhavejjanturvāraṇasyāḥ phalaṃ labhet || īśāneśaṃ samabhyarcya kāśyāṃ deśāntareṣvapi | vipannāstena puṇyena jāyante'tra purohitāḥ || laiṅge, dhruveśasyāgrato devi ! mukhyaliṅgaṃ ca tiṣṭhati | paścānmukhaṃ tu talliṅgaṃ tīre kuṇḍasya bhāmini ! || vaidyanāthaṃ tu taṃ vidyātsarvasaukhyapradāyakam | agastyeśāddakṣiṇato liṅgaṃ pūrvamukhaṃ sthitam || pulastyeśvaranāmānaṃ sarvarogyavivarddhanam | tasya dakṣiṇadigbhāge liṅgamanyacca tiṣṭhati || puṣpadanteśvaraṃ nāma sarvasiddhipradāyakam | iti | atha dharmeśaḥ | kāśīkhaṇḍe, dharmeśvaraṃ yaḥ sakṛdeva martyo vilokayiṣyatyavadātabuddhiḥ | snātvā purastatra ca dharmatīrthe na tasya dūre puruṣārthasiddhiḥ || idaṃ dharmaṃ prati śivenoktam | tathā, yadatra dāsyanti hi dharmapīṭhe narā hyanardhyā kṛtamajjanāśca|
4.p140.2
tadakṣayaṃ bhāviyugāntareṣvapi kṛtapraṇāmāstava dharmaliṅge || atha dharmakūpaḥ| brahmavaivartte, dharmakūpe naraḥ snātvā paritarpya pitāmahān | gayāṃ gatvā kimadhikaṃ karttā pitṛmudāvaham || yathā gayāyāṃ tṛptāḥ syuḥ piṇḍadāne pitāmahāḥ | dharmatīrthe tathaiva syurna nyūnaṃ naiva cādhikam || tatkūpe svaṃ nirīkṣyāpi śrāddhadānaphalaṃ labhet | tatrāpi kākinīmātraṃ yacchet pitṛmude naraḥ || akṣayaṃ phalamāpnoti dharmapīṭhaprabhāvataḥ | tatra yo bhojayedviprān yatino'tha tapasvinaḥ || sikthe sikthe labhetso'tha vājapeyaphalaṃ sphuṭam | tatra vaṭo'pi mahāphalastatra darśitaḥ | tathā, ta eva viśvabhoktāro viśvamānyāsta eva hi | ye tvāṃ viśvabhujāmatra pūjayiṣyanti mānavāḥ | viśvabhujāṃ viśvabāhuketikhyātām | atha vīreśaḥ | siddhaiḥ saṃsevitaṃ liṅgaṃ sarvasiddhikaraṃ param | darśanātsparśanādyasya mano nirvṛttibhāgbhavet || pāñcamudre mahāpīṭhe siddhide sarvajantuṣu | yatra sā vikaṭā devī prasiddhā siddhirūpiṇī || tilāntarāpi no kāśyāṃ bhūmarliṅgaṃ vinā kvacit | paraṃ vīreśasadṛśaṃ na liṅgaṃ tvāśu siddhidam || dharmadaṃ mokṣadaṃ samyak kāmadaṃ sukhadaṃ tathā | yathā vīreśvaraṃ liṅgaṃ kāśyāṃ nānyattathā dhruvam || asaṃkhyātāḥ sahasrāṇi siddhāḥ siddhimito gatāḥ | siddhaliṅgamitikhyātaṃ tasmādvīreśvaraṃ param || laiṅge, candreśvarasya pūrveṇa liṅgaṃ vīreśvaraṃ śubham | labhedvaidyādharaṃ lokaṃ tasya liṅgasya darśanāt || tathā, yastu vīreśvaraṃ liṅgaṃ naktamabhyarcayiṣyati | tena trikoṭisaṅkhyāni liṅgānīhārcitāni vai || ekāmapyāhutiṃ dattvā vīreśvarasamīpataḥ |
4.p140.3
koṭihomaphalaṃ samyaṅ nātra kāryā vicāraṇā || apyekaṃ yo mahārudraṃ japedvīreśasannidhau | jāpayedvā bhavettasya koṭirudraphalaṃ dhruvam || vratotsargādi vīreśe yat kṛtaṃ vratibhirnṛbhiḥ | tanna koṭiguṇasaṅkhyākaṃ bhavatyeva na saṃśayaḥ || ityādi kāśīkhaṇḍe draṣṭavyam | brahmapurāṇe, pāśvamudre mahāpīṭhe vīreśvarasamīpataḥ | vikaṭākhyā mahādevī pūjanīyā hitepsubhiḥ || laiṅge hariścandreśvaraṃ prakṛtya— yatra siddho mahātmā vai hariścandro mahābalaḥ | taṃ dṛṣṭvā mānavo devi ! rudrasya padamāpnuyāt || pūrvāmukhaṃ tu talliṅgaṃ svarlokasya pradāyakam | mokṣeśvaraṃ ca tatraiva svargeśvaramataḥ param || etau dṛṣṭvā sureśāni ! svargaṃ mokṣaṃ ca vindati | vāsukīśvaranāmānaṃ tayoścottaraḥ sthitam || skānde, candreśvaraṃ samabhyarcya yadyanyatrāpi saṃsthitaḥ | adyaughapaṭalīṃ bhittvā somalokamavāpsyati || kalau candreśamahimā nābhāgyairiha gamyate | siddhayogeśvarīpīṭhametat sādhakasiddhidam || ṣaṇmāsaṃ niyatāhāro dhyāyanviśveśvarīmiha | candreśvarārcanāyātān siddhān paśyati so'gragān || siddhayogeśvarī sākṣādvaradā tasya jāyate | santi pīṭhānyanekāni kṣitau sādhakasiddhaye || paraṃ yogeśvarīpīṭhāddūṣṭe nāśusiddhidam | yatra candreśvaraṃ liṅgaṃ tvayedaṃ sthāpitaṃ śaśin ! || idameva hi tatpīṭhamadṛśyamakṛtātmabhiḥ || siddhayogeśvarī, siddheśvarītikhyātā | brahmavaivartte, candreśvarāddakṣiṇato vīreśānnairṛte sthitam | ārādhya dhiṣaṇeśaṃ vai guruloke mahīyate || dhiṣaṇeśo, bṛhaspatīśvaraḥ | tathā, candreśvarātpūrvabhāge dṛṣṭvā liṅgaṃ budheśvaram |
4.p140.4
na buddhyā hīyate janturantakāle'pi jātucit || tathā, svargadvāraṃ viśeyurye vigāhya maṇikarṇikām | teṣāṃ vidhūtapāpānāṃ kvāpi svargo'na dūrataḥ || tathā, prabhāsatīrthaṃ vikhyātaṃ tato'pi śubhadaṃ nṛṇām | someśvarasya puratastatra snāto na garbhabhāk || jarāsandheśatīrthaṃ ca jarāsandheśasannidhau | saṃsārajvarapīḍābhistatra snāto na muhyati || laiṅge, tasyaiva dakṣiṇe bhāge jarāsandhyeśvaraṃ sthitam | caturmukhaṃ tu talliṅgaṃ dṛṣṭaṃ devi ! phalapradam || brahmavaivartte, vārāṇasyāṃ viśālākṣī kṣetrasya parameṣṭhadā ! viśālatīrthaṃ gaṅgāyāṃ kṛtvā pṛṣṭhe vyavasthitā || snātvā viśālatīrthe vai viśālākṣīṃ praṇamya ca | viśālāṃ labhate lakṣmīṃ paratreha ca śarmadām || tathā, tato'nyallalitātīrthaṃ gaṅgākeśavasannidhau | tatrāsti lalitā gaurī kṣetrarakṣākarī parā || sā ca pūjyā prayatnena sarvasampatsamṛddhaye | lalitāpūjakānāṃ ca jātu vighno na jāyate || anyāsti kāśyāṃ vārāhī kratuvārāhasannidhau | tāṃ praṇamya naro bhaktyā vipadabdhau na majjati || citrakūpe naraḥ snātvā vicitraphalade nṛṇām | citragupteśvaraṃ vīkṣya citraghaṇṭāṃ praṇamya ca || na citraguptalekhyaḥ syāccitraghaṇṭārcako naraḥ | santi pīṭhānyanekāni kāśyāṃ siddhipradānyapi || mahālakṣmīpīṭhasamaṃ nānyallakṣmīkaraṃ param | snātvā śrīkuṇḍatīrthe tu samarcya jagadambikām || dattvā dānāni vidhivanna lakṣmyā parimucyate | bhīmacaṇḍīṃ naro dṛṣṭvā bhīmakuṇḍe kṛtodakaḥ || bhīmākṛtīnna vai paśyedyāmyān bhūtān kvacitkṛtī | kāśīkhaṇḍe, agnīśvaraṃ samabhyarcya kāśyāṃ sarvasamṛddhidam |
4.p140.5
anyatrāpi mṛto daivādagniloke mahīyate || tataḥ kāśīṃ samāsādya kalpānte mokṣamāpnuyāt | laiṅge, anyadāyatanaṃ vakṣye vārāṇasyāṃ sureśvari ! | rāmeṇa sthāpitaṃ liṅgaṃ laṅkāyāmāgatena ha || tasya dakṣiṇapārśve tu liṅgaṃ pūrvamukhaṃ sthitam | tripurāntakaraṃ nāma sarvapāpapraṇāśanam | tasyaiva dakṣiṇe liṅgaṃ dattātreyapratiṣṭhitam || jñānaṃ cotpadyate devi ! tasya liṅgasya darśanāt | tasya paścimadigbhāge harikeśeśvaraṃ śubham || tatraivārādhito devi ! harikeśena suvrate ! | harikeśeśvaro devaḥ sarvakilbiṣanāśanaḥ || iti | athā''dityāḥ | tatra kāśīkhaṇḍe, lolārka uttarārkaśca sāmbādityastathaiva ca | caturtho drupadādityo mayūkhāditya eva ca || khakholkaścāruṇādityo vṛddhakeśavasaṃjñakau | daśamo vimalādityo gaṅgādityastathaiva ca || dvādaśaśca yamādityaḥ kāśipuryāṃ ghaṭodbhava ! | iti | tatrādau lolā̱rkaḥ | kāśīkhaṇḍe, lolārkastvasisambhede dakṣiṇasyāṃ diśi sthitaḥ | yogakṣemaṃ sadā kuryāt kāśīvāsijanasya ca || mārgaśīrṣasya saptamyāṃ ṣaṣṭhyāṃ vā ravivāsare | vidhāya vārṣikīṃ yātrāṃ naraḥ pāpaiḥ pramucyate || kṛtāni yāni pāpāni naraiḥ saṃvatsarāvadhi | naśyanti kṣaṇatastāni ṣaṣṭhyarke loladarśanāt
Linked texts (3)
- Prabhāsakṣetramāhātmyam — Sanskrit
- Kāśīpurāṇa — Sanskrit
- Kāśīkhaṇḍa — Śivadāsa, Sanskrit