Pramāṇa · Search · About · API

Tirthaprakasha 4.p149

Tīrthaprakāśa 4.p149

Language
Sanskrit

4.p149.1

jarādurgatirogaghnaṃ bahavaḥ siddhimāgatāḥ || vṛddhādityaṃ namaskṛtya vārāṇasyāṃ ravau naraḥ | labhedabhīpsitāṃ siddhiṃ na kvaciddurgatiṃ labhet || iti | atha keśavādityaḥ | kāśīkhaṇḍe, keśavādityamārādhya vārāṇasyāṃ narottamaḥ | paramaṃ jñānamāpnoti yena nirvāṇabhāgbhavet || iti | atha vimalādityaḥ | kāśīkhaṇḍe, vimalāditya ityākhyā bhaktānāṃ varadā sadā | sarvavyādhinihantrī ca sarvapāpakṣayaṅkarī || tathā, itthaṃ sa vimalādityo vārāṇasyāṃ śubhapradaḥ | tasya darśanamātreṇa kuṣṭharogaḥ praṇaśyati || iti | atha gaṅgādityaḥ | kāśīkhaṇḍe, gaṅgādityaśca tatrānyo viśveśāddakṣiṇena vai | tasya darśanamātreṇa naraḥ śuddhimiyādiha || tathā, gaṅgādityaṃ samārādhya vārāṇasyāṃ narottamaḥ | na jātu durgatiṃ kvāpi labhate na ca rogabhāk || iti | atha yamādityaḥ | kāśīkhaṇḍe, yamādityaṃ naro dṛṣṭvā yamalokaṃ na paśyati | yamatīrthe naraḥ snātvā bhūtāyāṃ bhaumavāsare || yameśvaraṃ vilokyāśu sarvaiḥ pāpaiḥ pramucyate | tathā, yamena sthāpito yasmādādityastatra kumbhaja ! | ataḥ sa hi yamādityo yāmīṃ harati yātanām || yameśaṃ ca yamādityaṃ yamena sthāpitaṃ naman | yamatīrthe caturdaśyāṃ bharaṇyāṃ bhaumavāsare || tarpaṇaṃ piṇḍadānaṃ ca kṛtvā pitranṛṇī bhavet | abhilaṣyanti satataṃ pitaro narakaukasaḥ || bhaume bharaṇyāṃ bhūtāyāṃ yadi yogo'yamuttamaḥ | kāśyāṃ kaścidyame tīrthe kṛtvā snānaṃ mahāmatiḥ || api yastarpaṇaṃ kuryāt satilaṃ no vimuktaye | kiṃ gayāgamanaiḥ puṃsāṃ kiṃ śrāddhairbhūridakṣiṇaiḥ || yadi kāśyāṃ yame tīrthe yoge'smin śrāddhamāpyate | iti | atha caṇḍikāḥ |

4.p149.2

tatra skānde, ataḥ paraṃ pravakṣyāmi caṇḍikāḥ kṣetrarakṣikāḥ | dakṣiṇe rakṣate durgā nairṛte cottareśvarī || oṅkāreśī paścime vai vāyavye bhadrakārikā | uttare bhīmacaṇḍī ca mahāmatteśeśānataḥ || ūrdhvakeśīsamāyuktā śāṅkarī pūrvataḥ sthitā | adhaḥkeśī tathāgneyyāṃ citraghaṇṭā ca madhyataḥ || etāstu caṇḍikā devīryo vai drakṣyati mānavaḥ | tasya tuṣṭāśca sarvāśca kṣetraṃ rakṣanti matparāḥ || vighnaṃ kurvanti satataṃ pāpānāṃ devi ! sarvadā | tasmāddevi ! sadā pūjyāścaṇḍikāḥ savināyakāḥ || yadi cetsasataṃ devi ! vārāṇasyāṃ śubhārthibhiḥ | iti | atha trikaṇṭakādyā yogāḥ | liṅgapurāṇe, avimuktaṃ ca svarlīnaṃ tathā madhyamakaṃ padam | etattrikaṇṭakaṃ devi mṛtyukāle'mṛtapradam || madhyamakaṃ padaṃ, madhyameśvaraḥ | catuṣkamapi tatraiva, śaileśaṃ saṅgameśaṃ ca svarlīnaṃ madhyameśvaram | dṛṣṭvā na jāyate martyaḥ saṃsāre duḥkhasāgare || pañcāyatanaṃ cakṛttivāso madhyameśa oṅkāreśaḥ kapardikaḥ || viśveśvara iti jñeyaṃ pañcāyatanamuttamam | ṣaḍāyatanamapi - viśveśvaro viśālākṣī dyunadī kālabhairavaḥ | śrīmān ḍhuṇḍhirdaṇḍapāṇiḥ ṣaḍaṅgo yoga ucyate || evaṃ ṣaḍaṅgayogaṃ yo nityaṃ kāśyāṃ niṣevate | samprāpya yoganidrāṃ sa dīrghāmamṛtamaśnute || tathā, oṅkāraḥ kṛttivāsaśca kedāraśca triviṣṭapaḥ | vīreśvaro'tha viśveśaḥ ṣaḍaṅgo'yamihāparaḥ || triviṣṭapo'tra trilocana iti vadanti | aṣṭāyatanamapilaiṅge, ataḥ paraṃ pravakṣyāmi aṣṭāyatanamuttamam | yena krameṇa karttavyaṃ tacchṛṇuṣva varānane ! || āgnīśāne ca karttavyaṃ snānaṃ vai dīrghikājale | dṛṣṭvā devaṃ tato gacchedurbaśīśvaramuttamam ||

4.p149.3

taṃ dṛṣṭvā manujo devi ! nakulīśaṃ tato vrajet | taṃ dṛṣṭvā manujo devi ! āṣāḍhīśaṃ tato vrajet || dṛṣṭvā cāṣāḍhinaṃ devaṃ bhārabhūtaṃ tato vrajet || taṃ dṛṣṭvā manujo devi ! gacchedvai tripurāntakam | taṃ dṛṣṭvā manujo devi lāṅgalīśaṃ tato vrajet || dakṣiṇe nakulīśasya tryambakaṃ ca tato vrajet | aṣṭāyatanametaddhi kariṣyanti ca ye narāḥ || te mṛtā abahiḥkṣetre rudralokasya bhājanāḥ | ekādaśāyatanamapi kāśīkhaṇḍe, anyā yātrā prakarttavyaikādaśāyatanodbhavā | āgnīdhrakuṇḍe susnātaḥ paśyedāgnīdhramīśvaram || urvaśīśaṃ tato gacchettatastu nakulīśvaram | āṣāḍhīśaṃ tato dṛṣṭvā bhārabhūteśvaraṃ tataḥ || lāṅgalīśamathālokya tatastu tripurāntakam | tato manaḥprakāmeśaṃ prītikeśamatho vrajet || madālaseśvaraṃ tasmāttilaparṇeśvaraṃ tataḥ | yātraikādaśaliṅgānāmeṣā kāryā prayatnataḥ || imāṃ yātrāṃ prakurvāṇo rudratvaṃ prāpnuyānnaraḥ | atha caturdaśaliṅgayātrā | tatra kāśīkhaṇḍe, oṅkāraṃ prathamaṃ paśyenmatsyodaryāṃ kṛtodakaḥ | triviṣṭapaṃ mahādevaṃ tato vai kṛttivāsasam || ratneśaṃ cātha candreśaṃ kedāraṃ ca tato vrajet | dharmeśvaraṃ ca vīreśaṃ gacchetkāmeśvaraṃ tataḥ || viśvakarmeśvaraṃ cātha maṇikarṇīśvaraṃ tataḥ | avimukteśvaraṃ dṛṣṭvā tato viśveśvaramarcayet || eṣā yātrā prayatnena karttavyā kṣetravāsinā | yastu kṣetramuṣitvā vai naitāṃ yātrāṃ samācaret || vighnāstasyopatiṣṭhante kṣetroccāṭanasūcakāḥ | tathā, aparāpi śubhā yātrā yogakṣemakarī sadā | sarvavighnopahantrī ca karttavyā kṣetravāsibhiḥ || śaileśaṃ prathamaṃ vīkṣya varaṇāsnānapūrvakam |

4.p149.4

snānaṃ tu saṅgame kṛtvā draṣṭavyaḥ saṅgameśvaraḥ || svarlīnatīrthe susnātaḥ paśyetsvarlīnamīśvaram | snātvā mandākinītīrthe draṣṭavyo madhyameśvaraḥ || paśyeddhiraṇayagarbheśaṃ tatra tīrthe kṛtodakaḥ | maṇikarṇyo tataḥ snātvā paśyedīśānamīśvaram || tataḥ kūpamupaspṛśya goprekṣamavalokayet | kāpileyahrade snātvā vīkṣeta vṛṣabhadhvajam || upaśāntaśivaṃ paśyet tatkūpe vihitodakaḥ | pañcacūḍāhrade snātvā jyeṣṭheśānaṃ tato'rcayet || catuḥsamudrakūpe tu snātvā devaṃ tamarcayet | devasyāgre tu yā vāpī tatropasparśane kṛte || śukreśvaraṃ tataḥ paśyettatkūpavihitodakaḥ | daṇḍakhāte tataḥ snātvā vyāghreśaṃ pūjayettataḥ || śaunakeśvarakuṇḍe tu snānaṃ kṛtvā tato'rcayet | jambukeśaṃ mahāliṅgaṃ kṛtvā yātrāmimāṃ naraḥ || kvacinna jāyate bhūyaḥ saṃsāre duḥkhasāgare | samārabhya pratipadaṃ yāvat kṛṣṇā caturdaśī || etatkrameṇa karttavyānyetānyāyatanāni vai | imāṃ yātrāṃ naraḥ kṛtvā na bhūyo'pyabhijāyate || iti

Linked texts (3)