Pramāṇa · Search · About · API

Tirthaprakasha 4.p171

Tīrthaprakāśa 4.p171

Language
Sanskrit

4.p171.1

tatra jāgaraṇaṃ kāryaṃ sarvasampatsamṛddhaye || jyeṣṭhāṃ gaurīṃ namaskṛtya jyeṣṭhavāpīpariplutā | saubhāgyabhājanaṃ bhūyādyoṣā saubhāgyabhāgapi || itivacanāt jyeṣṭhasitāṣṭamyāṃ strībhirjyeṣṭhāgaurīyātrā kāryā| jyeṣṭhā, jyeṣṭheśvarasamīpasthā gaurī| bhādraśuklāṣṭamyāṃ sūryakuṇḍasamīpasthamahālakṣmīyātrā | mahālakṣmyaṣṭamīṃ prāpya tatra yātrākṛtāṃ nṛṇām | sampūjiteha vidhivat padmā sadma na muñcati || itivacanāt | mahālakṣmyaṣṭamī bhādraśuklāṣṭamī | etāmaṣṭamīmārabhyāgrimakṛṣṇāṣṭamīparyantaṃ lakṣmīvratamācārādanutiṣṭhanti | āśvinaśuklāṣṭamyāṃ bhavānīyātrā | kuryājjāgaraṇaṃ rātrau mahāṣṭamyāṃ vratī naraḥ | prātarbhavānīmabhyarcya prāpnuyādvāñchitaṃ phalam || itivacanāt | vratī, upavāsī | mārgaśīrṣakṛṣṇāṣṭamī kālāṣṭamītiprasiddhā sā ca kārttikavyavahitāṣṭamī śiṣṭācārāt | mārgaśīrṣasitāṣṭamyāṃ kālabhairavasannidhau | upoṣyā jāgaraṃ kurvan sarvapāpaiḥ pramucyate || tathā, kṛtvā ca vividhāṃ pūjāṃ mahāsambhāravistaraiḥ | naro mārgasitāṣṭamyāṃ vārṣikaṃ vighnamutsṛjet || iti vacanāt | atra tithiyaidhe'stagāminyaṣṭamī grāhyā sāyaṃsamaye bhairavotpatterityāhuḥ | sarvāsu kṛṣṇāṣṭamīṣu vṛṣabhadhvajeśa-dharmeśa-lāṅgalīśayātrā kāryā caitrāditrayakṛṣṇasaptamīṣu vetyuktam | atha navamī | navamyāmathavāṣṭamyāṃ caṇḍīyātrā śubhāvahāṃ | itivacanāt sarvanavamīṣu caṇḍīyātrā praśastā | evaṃ kulastambhayātrā'pi | navamyāṃ pañcadaśyāṃ ca kulastambhaṃ samarcayet | duḥkhaṃ rudrapiśācatvaṃ na bhavettasya pūjanāt || itivacanāt | navamyāmasi saṅgamasthā svapneśvarī ca pūjyā |

4.p171.2

sarvāsu kṛṣṇanavamīṣu upaśāntaśiva – vīreśvara – vṛddhakāleśvarāṇāṃ yātrā kāryā krameṇa caitrādimāsatrayakṛṣṇanavamīṣu vā iti | atha daśamī | brahmavaivartte, jyeṣṭhasya śukladaśamī saṃvatsaramukhī smṛtā | tasyāṃ snānaṃ prakurvīta dānaṃ caiva viśeṣataḥ || yāṃ kāñcitsaritaṃ prāpya dadyādarbhaistilodakam | mucyate daśabhiḥ pāpaiḥ sumahāpātakopamaiḥ || harate daśa pāpāni tasmāddaśaharā smṛtā | eṣāṃ snānadānatarpaṇānāṃ phalasambandhe samuccayo bodhyate | na tu samuccitānāṃ phalasambandha iti | bhaviṣyottare, jyeṣṭhe māsi site pakṣe daśamī hastasaṃyutā | harate daśa pāpāni tasmāddaśaharā smṛtā || jyeṣṭhaśukladaśamyāṃ tu tatra bhaumadinaṃ yadi | jñeyā hastarkṣasaṃyuktā sarvapāpaharā tithiḥ || bhaviṣye, jyeṣṭhaśukladaśamyāṃ tu hastayogena jāhnavī | harate daśa pāpāni tasmāddaśaharā smṛtā || tasmājjyeṣṭhadaśamyāṃ tu kujahastasamāgame | gaṅgā svargādapāmṛṣṭā martyalokamavātarat || śatajanmakṛtaṃ pāpaṃ daśa pāpāni caiva hi | āvṛṇotyaprayatnena tasmāddaśaharā smṛtā || yadyapyetāni vacanāni jyeṣṭhaśukladaśamyāmeva yatra kvāpi gaṅgāyāḥ snāne phalavatvāṃ bodhayanti tathāpi kāśīkhaṇḍe dvipañcāśadadhyāye jyeṣṭhaśuklapratipadamārabhya daśamīparyyantaṃ daśāśvamedhe snānamuktam | tathāhijyeṣṭhe māsi site pakṣe prāpya pratipadaṃ tithim | daśāśvamedhike snātvā mucyate janmapātakaiḥ || jyeṣṭhaśukladvitīyāyāṃ snātvā rudrasarovare | janmādvayakṛtaṃ pāpaṃ tatkṣaṇādeva naśyati || evaṃ sarvāsu tithiṣu kramasnāyī narottamaḥ | āśuklapakṣadaśami pratijanmāghamutsṛjet ||

4.p171.3

tithiṃ daśaharāṃ prāpya daśajanmāghahāriṇīm | daśāśvamedhike snātvā yāmīṃ paśyenna yātanām || liṅgaṃ daśāśvamedheśaṃ dṛṣṭvā daśaharātithau | daśajanmārjitaiḥ pāpaistyajyate nātra saṃśayaḥ || snāto daśaharāyāṃ yaḥ pūjayelliṅgamuttamam | bhaktyā daśāśvamedheśaṃ na taṃ garbhadaśā spṛśet || jyeṣṭhe māsi site pakṣe snātvā rudrabhare naraḥ | kurvan vai vārṣikīṃ yātrāṃ na vighnairābhibhūyate || daśāśvamedhāvabhṛthairyatphalaṃ samyagāpyate | daśāśvamedhe tannūnaṃ snātvā daśaharātithau || tathā, jyeṣṭhe māsi site pakṣe daśamyāṃ hastasaṃyute | gaṅgātīre tu puruṣo nārī vā bhaktibhāvataḥ || niśāyāṃ jāgaraṃ kuryādgaṅgāṃ daśavidhairhare ! | puṣpaiḥ sugandhairnaivedyaiḥ phalairdaśadaśonmitaiḥ || pradīpairdaśabhirdhūpairdaśāṅgairurudhvaja ! | pūjayecchraddhayā dhīmān daśakṛtvo vidhānataḥ || sājyāṃstilān kṣipettoye gaṅgāyāḥ prasṛtīrdaśa | guḍasaktumayān piṇḍān dadyācca daśa mantrataḥ || namaḥ śivāyai prathamaṃ nārāyaṇyai padaṃ tataḥ | daśaharāyai padamiti gaṅgāyai mantra eṣa vai || svāhāntaḥ praṇavādiśca bhavedviṃśākṣaro manuḥ | pūjā dānaṃ japo homo'nenaiva manunā smṛtaḥ || hemnā rūpyeṇa vā śaktyā gaṅgāmūrtiṃ vidhāya ca | vastrācchāditavaktrasya pūrṇakumbhasya copari || pratiṣṭhāpyārcayeddevīṃ pañcāmṛtaviśodhitām | caturbhujāṃ trinetrāṃ ca nadīnadaniṣevitām || lāvaṇyāmṛtaniḥsyandasaṃśīlacchālabhañjikām | pūrṇakumbhasitāmbhojavaradābhayasatkarām || tato dhyāyetsusaumyāsyāṃ candrāyutasamaprabhām | cāmarairvījyamānāṃ ca śvetacchatrābhiśobhitām || sudhāplāvitabhūpṛṣṭhāṃ divyagandhānulepanām |

4.p171.4

trailokyapūjitapadāṃ devarṣibhirabhiṣṭutām || dhyātvā samarcya mantreṇa dhūpadīpopahārataḥ

Linked texts (3)