[Pramāṇa](https://indike.org/pramana/) › [Indian literature](https://indike.org/pramana/in) › [Polity, Pleasure & Law](https://indike.org/pramana/in.niti) › [Law and Social-Religious Duty](https://indike.org/pramana/in.niti.dharma) › [Pilgrimage](https://indike.org/pramana/in.niti.dharma.tirtha) › [Tirthaprakasha](https://indike.org/pramana/in.niti.dharma.tirtha.tirthaprakasa) › 4.p247 # Tirthaprakasha 4.p247 Tīrthaprakāśa 4.p247 - **Language:** Sanskrit ### [4.p247.1](https://indike.org/pramana/in.niti.dharma.tirtha.tirthaprakasa.4.p247.1) pretatvanivṛttibrahmalokāvāptirbhavatīti | vāyupurāṇe, ānantyāya bhaveddattaṃ khaḍgamāṃsaṃ pitṛkṣaye | kṛṣṇo lohastathā chāga ānantyāya prakalpayet || gayāyāmakṣayaṃ śrāddhaṃ japahomatapāṃsi ca | pitṛkṣaye hi tat putra tena tatrākṣayaṃ bhavet || iti | pitṛkṣaye, gayāyām | tat, gayāsthānam | atha gayāvāsaphalam | bhārate, śuklakṛṣṇāvubhau pakṣau gayāyāṃ yo vasennaraḥ | punātyāsaptamaṃ caiva kulaṃ nāstyatra saṃśayaḥ || iti | vāyavīye gayāṃ prakramya— pakṣatrayanivāsī ca punātyāsaptamaṃ kulam | iti | atra pakṣaḥ sāvanaḥ | atha yāvajjīvasthitiphalam | vārāhe, sakṛdgayābhigamanaṃ sakṛtpiṇḍapradāpanam | durlabhaṃ tvaṃ punārnityamasminneva vyavasthitaḥ || kimatra procyate raibhya tava puṇyamiha prabho | yena śārṅgagadāpāṇirdṛṣṭo nārāyaṇaḥ svayam || yato gadādharaḥ sākṣādasmiṃstīrthe vyavasthitaḥ | tato hi vikhyātatamaṃ tīrthametaddvijottama || iti | atha gadādharamāhātmyam | agnipurāṇe, ye drakṣyanti sadā bhaktyā devamādigadādharam | te prāpsyanti dhanaṃ dhānyamāyurārogyameva ca || kalatraputrapautrādiguṇakīrtisukhādikam | śraddhayā yo namasyeta nityaṃ viṣṇupure vaset || gandhadānena gandhāḍhyaḥ saubhāgyaṃ puṣpadānataḥ | ityādi | atha phalgumāhātmyam | vāyupurāṇe, aśvamedhasahasrāṇāṃ sahasraṃ yaḥ samācaret | nāsau tatphalamāpnoti phalgutīrthe yadāpnuyāt || iti | snānaprakaraṇāt snānaphalamidam | atha padāni | vāyupurāṇe, viṣṇoḥ padaṃ rudrapadaṃ brahmaṇaḥ padamuttamam | kaśyapasya padaṃ divyaṃ dvau hastau yatra nirgatau || pañcāgnīnāṃ padānyatra indrāgastyapade pare | ### [4.p247.2](https://indike.org/pramana/in.niti.dharma.tirtha.tirthaprakasa.4.p247.2) raveśca kārtikeyasya krauñcamātaṅgakasya ca || sukhaliṅgāni sarvāṇi padānīti nibodhata | iti | padānāṃ mahimā'gre vakṣyate | atha gadālolopākhyānam | viṣṇunā hetināmno'surasya gadayā śiro'bhinirbhidya prakṣālanāya yatra gadā lolitā tadgadālolatīrthamāsīditi | hetyasurasya yacchiro gadayā tadvidhākṛtam | yataḥ prakṣālitā tīrthe gadā lolastadā'bhavat || iti vāyupurāṇāt | atha gayāsthabrāhmaṇapraśaṃsā | āgneye brahmavākyam | ye yuṣmān pūjayiṣyanti gayāyāmāgatā narāḥ | havyakavyairddanaiḥ śrāddhaisteṣāṃ kulaśataṃ vrajet | narakātsvargalokaṃ ca svargalokātparāṃ gatim || iti | atha gayāyāṃ nānātīrthāni | mahābhārate pulastyatīrthayātrāyām | tato gayāṃ samāsādya brahmacārī jitendriyaḥ | aśvamedhamavāpnoti gamanādeva bhārata || yatrākṣayavaṭo nāma triṣu lokeṣu viśrutaḥ | yatra dattaṃ pitṛbhyastu bhavatyakṣayamityuta || mahānadyāmupaspṛśya tarpayet pitṛdevatāḥ | mahānadī, phalguḥ | akṣayān prāpnuyāllokān kulaṃ caiva samuddharet || tato brahmasaro gacchedvrahmāraṇyopaśobhitam | brahmalokamavāpnoti prabhātāmeva śarvarīm || brahmaṇā tatra sarasi yūpaḥ puṇyaḥ prakalpitaḥ | yūpaṃ pradakṣiṇaṃ kṛtvā vājapeyaphalaṃ labhet || tato gacchettu rājendra dhenukaṃ lokaviśrutam | ekarātroṣito yatra prayacchettiladhenukam || sarvapāpaviśuddhātmā somalokaṃ vrajeddhruvam | tatra cihnaṃ mahārāja adyāpi sumahadbhutam || kapilā sahavatsā vai pūrvameva caratyuta | savatsāyāḥ padāni sma dṛśyante'dyāpi tatra vai || teṣūpaspṛśya rājendra padeṣu nṛpasattama | yatkiñcidaśubhaṃ karma tat praṇaśyati bhārata || ### [4.p247.3](https://indike.org/pramana/in.niti.dharma.tirtha.tirthaprakasa.4.p247.3) tato gṛdhravaṭaṃ gacchet sthānaṃ devasya dhīmataḥ | snāyīta bhasmanā tatra abhigamya vṛṣadhvajam || brāhmaṇena bhaveccīrṇaṃ vrataṃ dvādaśavārṣikam | itareṣāṃ tu varṇānāṃ sarvaṃ pāpaṃ praṇaśyati || udyantaṃ ca tato gacchet parvataṃ gītanāditam | sāvitryāstu padaṃ tatra dṛśyate bharatarṣabha || tatra sandhyāmupāsīta brāhmaṇaḥ saṃśitavrataḥ | upāsitā bhavet sandhyā tena dvādaśavārṣikī || yonidvāraṃ ca tatraiva dṛśyate bharatarṣabha | tatrābhigamya mucyeta puruṣo yonisaṅkarāt || kṛṣṇaśuklāvubhau pakṣau gayāyāṃ yo vasennaraḥ | punātyāsaptamaṃ caiva kulaṃ nāstyatra saṃśayaḥ || eṣṭavyā bahavaḥ putrā yadyeko'pi gayāṃ vrajet | yajeta vāśvamedhena nīlaṃ vā vṛṣamutsṛjet || tataḥ phalguṃ vrajedrājaṃstīrthasevī narādhipa | aśvamedhamavāpnoti siddhiṃ ca paramāṃ labhet | tato gaccheta rājendra dharmapṛṣṭhaṃ mahāphalam | tatra dharmo mahārāja nityamāste yudhiṣṭhira || abhigamya tatastatra vājimedhaphalaṃ labhet | tato gaccheta rājendra brahmaṇastīrthamuttamam || tatrābhigamya rājendra brahmāṇaṃ bharatarṣabha | rājasūyāśvamedhābhyāṃ phalamāpnoti mānavaḥ ## Linked texts (2) - [Agnipurāṇa](https://indike.org/pramana/in.purana.agni.115.8) — Vyāsa, Sanskrit - [Tīrthacintāmaṇi](https://indike.org/pramana/in.niti.dharma.tirtha.tirthacintamani.10.p12) — Vācaspatimiśra, Sanskrit --- Source: [https://indike.org/pramana/in.niti.dharma.tirtha.tirthaprakasa.4.p247](https://indike.org/pramana/in.niti.dharma.tirtha.tirthaprakasa.4.p247) · Pramāṇa