[Pramāṇa](https://indike.org/pramana/) › [Indian literature](https://indike.org/pramana/in) › [Polity, Pleasure & Law](https://indike.org/pramana/in.niti) › [Law and Social-Religious Duty](https://indike.org/pramana/in.niti.dharma) › [Pilgrimage](https://indike.org/pramana/in.niti.dharma.tirtha) › [Tirthaprakasha](https://indike.org/pramana/in.niti.dharma.tirtha.tirthaprakasa) › 4.p248 # Tirthaprakasha 4.p248 Tīrthaprakāśa 4.p248 - **Language:** Sanskrit ### [4.p248](https://indike.org/pramana/in.niti.dharma.tirtha.tirthaprakasa.4.p248) tīrthānāṃ samānāṃ krameṇa gamanaṃ kāryamiti praghaṭṭakārthaḥ | tathā dhaumyatīrthayātrāyām, pūrvaṃ prācīṃ diśaṃ rājan rājarṣigaṇasevitām | ramyāṃ te kīrttayiṣyāmi yudhiṣṭhira yathāmati || yasyāṃ girivaraḥ puṇyo gayo rājarṣisatkṛtaḥ | śivaṃ brahmasaro yatra sevitaṃ tridaśarṣibhiḥ || yadarthaṃ puruṣavyāghra kīrttayanti purātanāḥ | eṣṭavyā bahavaḥ putrā yadyeko'pi gayāṃ vrajet || uttārayati santatyā daśa pūrvān daśāparān | mahānadī ca tatraiva tathā gayāśiro nṛpa || yatrāsau kīrtyate viprairakṣayyakaraṇo vaṭaḥ | yatra dattaṃ pitṛbhyo'nnamakṣayyaṃ bhavati prabho || sā ca puṇyajalā yatra phalgunāmā mahānadī | bahumūlaphalā cāpi kauśikī bharatarṣabha || iti | tathā āṅgirasatīrthayātrāyām, muṇḍapṛṣṭhaṃ gayāṃ caiva nairṛtaṃ devaparvatam | tṛtīyāṃ krauñcapādīṃ ca brahmahatyā vimucyate || iti | vāmanapurāṇe prahlādatīrthayātrāyām, gayāyāṃ gopatiṃ draṣṭuṃ jagāma sa mahāsuraḥ | sarasi brahmaṇaḥ snātvā kṛtvā cāsya pradakṣiṇam || piṇḍanirvapaṇaṃ puṇyaṃ pitṝṇāṃ sa cakāra ha | iti | narasiṃhapurāṇe, śivanadyāṃ śivakaraṃ gayāyāṃ ca janārdanam | sarvatra paramātmānaṃ yaḥ paśyati sa mucyate || iti | śivanadī vihāranagareāpakaṇṭhe'sti | matsyapurāṇe gaurīsthānaprastāve, vārāṇasyāṃ viśālākṣī prayāge lalitā tathā | gayāyāṃ maṅgalānāmā kṛtaśauce tu siṃhikā || iti | bṛhaspatiḥ, kāṅkṣanti pitaraḥ putrānnārakādbhayabhīravaḥ | gayāṃ yāsyati yaḥ kaścitso'smān santārayiṣyati || gayāyāṃ dharmapṛṣṭhe ca sadasi brahmaṇastathā | gayāśīrṣe'kṣayavaṭe pitṝṇāṃ dattamakṣayam || dharmāraṇyaṃ dharmapṛṣṭhaṃ dhenukāraṇayameva ca | dṛṣṭvaitāni pitṛṃścārcya vaṃśān viṃśatimuddharet || iti | vāyupurāṇe, gayāyāṃ dharmapṛṣṭhe ca sadasi brahmaṇastathā | gavāṃ gṛdhravaṭe caiva śrāddhaṃ dattaṃ mahāphalam || bharatasyāśrame puṇye nityaṃ puṇyatamairvṛte | mataṅgasya padaṃ tatra dṛśyate sarvamānavaiḥ || khyāpitaṃ dharmasarvasvaṃ lokasyāsya nidarśanāt | yaccampakavanaṃ puṇyaṃ puṇyakṛdbhirniṣevitam || tasmin pāṇḍuviśalyeti tīrthaṃ sadyonidarśanam | tṛtīyāyāṃ tathā pāde niṣṭhīvāyāśca maṇḍale || mahāhrade ca kauśikāṃ dattaṃ śrāddhaṃ mahāphalam | muṇḍapṛṣṭhe padaṃ nyastaṃ mahādevena dhīmatā || bahūn varṣagaṇāṃstaptvā tapastīvraṃ suduścaram | alpenāpyatra kālena naro dharmaparāyaṇaḥ || pāpmānamutsṛjatyāśu jīrṇāṃ tvacamivoragaḥ | nāmnā kanakhalaṃ vipra tīrthaṃ jagati viśrutam || udīcyāṃ muṇḍapṛṣṭhasya brahmarṣigaṇasevitam | tatra snātvā divaṃ yānti svaśarīreṇa mānavāḥ || dattaṃ cāpi sadā śrāddhamakṣayaṃ samudāhṛtam | snātvā ṛṇatrayaṃ tatra niṣkrīṇāti narottamaḥ || mānase sarasi snātvā śrāddhaṃ nirvarttayettataḥ | uttaraṃ mānasaṃ gatvā siddhiṃ prāpnotyanuttamām || tasminnirvarttayet śrāddhaṃ yathāśakti yathābalam | kāmān sa labhate divyān mokṣopāyāṃśca kṛtsnaśaḥ || iti | atha prathamadinakṛtyam | vāyupurāṇe, ācchāditaḥ śilāpādaḥ prabhāsenādriṇā tataḥ | prabhāso munibhiḥ spṛṣṭaḥ śilāṅguṣṭho vinirgataḥ || aṅguṣṭhasthita īśo'pi prabhāseśaḥ prakīrttitaḥ | śilāṅguṣṭhaikadeśo yaḥ sā ca pretaśilā smṛtā || piṇḍadānādva yatastasmāt pretatvānmucyate naraḥ | mahānadīprabhāsākhyoḥ saṅgame snānakṛnnaraḥ || rāmo devaiḥ saha snāto rāmatīrthaṃ tataḥ smṛtam | prārthito'tha mahānadyā rāma snāto bhavānyadi || rāmatīrthaṃ bhavedatra sarvalokeṣu pāvanam | janmāntaraśataṃ sāgraṃ yatkṛtaṃ duṣkṛtaṃ mayā || tatsarvaṃ vilayaṃ yātu rāmatīrthābhiṣecanāt | mantreṇānena yaḥ snātvā śrāddhaṃ kurvīta mānavaḥ || rāmatīrthe piṇḍadasta viṣṇuloke prayātyasau | tathetyuktvā sthitau rāmaḥ sītayā bharatāśrame || rāmatīrthe naraḥ snātvā mantraiḥ piṇḍaprado bhavet - [Previous: 4.p247.3](https://indike.org/pramana/in.niti.dharma.tirtha.tirthaprakasa.4.p247.3) - [Next: 4.p249](https://indike.org/pramana/in.niti.dharma.tirtha.tirthaprakasa.4.p249) - [Up: 4](https://indike.org/pramana/in.niti.dharma.tirtha.tirthaprakasa.4) ## Linked texts (4) - [Brahmāṇḍapurāṇa](https://indike.org/pramana/in.purana.brahmanda.2.13.114) — Vyāsa, Sanskrit - [Garuḍapurāṇa](https://indike.org/pramana/in.purana.garuda.1.83.43) — Vyāsa, Sanskrit - [Nirṇayasindhu](https://indike.org/pramana/in.niti.dharma.nibandha.nirnaya.nirnayasindhu.52.2-3) — Kamalākarabhaṭṭa 1612, Sanskrit - [Tīrthacintāmaṇi](https://indike.org/pramana/in.niti.dharma.tirtha.tirthacintamani.10.p17) — Vācaspatimiśra, Sanskrit --- Source: [https://indike.org/pramana/in.niti.dharma.tirtha.tirthaprakasa.4.p248](https://indike.org/pramana/in.niti.dharma.tirtha.tirthaprakasa.4.p248) · Pramāṇa