Tirthaprakasha 4.p282
Tīrthaprakāśa 4.p282
- Language
- Sanskrit
4.p282.1
yeṣāṃ nāmāni puṇyāni sarvapāpaharāṇi ca | kāmyakaṃ ca vanaṃ puṇyaṃ tathā'ditivanaṃ mahat || vyāsasya ca vanaṃ puṇyaṃ phalakīvanameva ca | tatra sūryavanaṃ sthānaṃ tathā madhuvanaṃ mahat || puṇyaṃ sītāvanaṃ nāma sarvakalmaṣanāśanam | vanānyetāni vai sapta nadīḥ śṛṇuta me dvijāḥ || sarasvatī nadī puṇyā tathā vaitaraṇī nadī || aparṇā ca tathā puṇyā gaṅgā mandākinī nadī | dṛṣadvatī mahāpuṇyā tathā hiraṇvatī nadī || varṣākālavahāḥ sarvā varjayitvā sarasvatīm | etāsāmudakaṃ puṇyaṃ prāvṛṭkāle prakīrtitam || rajasvalatvametāsāṃ vidyate na kadācana | tīrthasya ca prabhāvena puṇyā hyetāḥ saridvarāḥ || iti | tatraiva kururuvāca | yāvadetanmayā kṛṣṭaṃ dharmakṣetraṃ tadastu ca | snātānāṃ ca mṛtānāṃ ca mahāpuṇyaphalaṃ tviha || upavāsaṃ ca dānaṃ snānaṃ japyaṃ ca mādhava | homo yajñādikaṃ cānyacchubhaṃ vāpyaśubhaṃ vibho || tvatprasādādṛṣīkeśa śaṅkhacakragadādhara | akṣayaṃ pravare kṣetre bhavatvetanmahatphalam || tathā tvaṃ ca suraiḥ sārddhaṃ saha devena śūlinā | vasātra puṇḍarīkākṣa mannāmnā cedamucyate || ityevamuktastenāhaṃ rājñā vai dattavān varam | tathāca tvaṃ divyavapurbhave bhūyo mahīpate || tathāntakāle mayyeva layameṣyasi suvrata | kīrttiśca śāśvatī tubhyaṃ bhaviṣyati na saṃśayaḥ || kalidvāparayormadhye vyāsena ca mahātmanā | saraḥpramāṇaṃ yatproktaṃ tacchṛṇudhvaṃ dvijottamāḥ || viśveśarādasti purā tathā kanyā jaradgavī | yāvadvaurjaratī proktā tāvat sannihitaṃ saraḥ || mayā śrutaṃ pramāṇaṃ tu paṭhyamānaṃ tu vāmane | tacchṛṇudhvaṃ dvijaśreṣṭhāḥ puṇyavṛddhikaraṃ mahat ||
4.p282.2
viśveśvarādekarātriryāvaccātha sarasvatī | saraḥ sannihitaṃ jñeyaṃ samantādarddhayojanam || etadāśritya devāśca ṛṣayaśca samāgatāḥ | sevante muktikāmāśca gandharvāpsarasaḥ sthitāḥ || yadā sūryyasya grahaṇaṃ kālena bhavitā kacit | sannihatyāṃ tadā snātvā pūtāḥ svargaṃ gamiṣyatha || ye tu siddhā mahātmānaste liṅgasparśanena ca | sṛjanti paramāṃ siddhiṃ punarāvṛttidurlabhām || evaṃ jñātvā tato brahmā devānāṃ hitakāmyayā | uparyupari liṅgāni sapta tatra cakāra ha || tato ye muktikāmāśca siddhā yajñaparāyaṇāḥ | saṃsevya saṃprayatnena prayātāḥ paramaṃ padam || pāṃśavo'pi kurukṣetrādvāyunā samudīritāḥ | api duṣkṛtakarmmāṇaṃ nayanti paramāṃ gatim || tato'haṃ tāḥ prajā dṛṣṭvā pihitāstena tejasā | krodhena mahatā yukto liṅgamutpāṭya cākṣipam || sa kṣiptaḥ saraso madhye ūrdhvameva punaḥ sthitaḥ | tadāprabhṛti lokeṣu sthāṇurityeva viśrutaḥ || sakṛddarśanamātreṇa vimuktaḥ sarvakilbiṣaiḥ | prayāti mokṣaṃ paramaṃ yasmānnāvartate punaḥ || yaśceha tīrthe nivaset kṛṣṇāṣṭamyāṃ samāhitaḥ | sa muktaḥ pātakaiḥ sarvairagamyāgamanodbhavaiḥ || mahābhārate, tato gaccheta rājendra kurukṣetramabhiṣṭutam | pāpebhyo vipramucyante tadgatāḥ sarvajantavaḥ || kurukṣetraṃ gamiṣyāmi kurukṣetre vasāmyaham | ya evaṃ satataṃ brūyāt so'pi pāpāt pramucyate || tatra vai saṃvasedvīraḥ sarasvatyāṃ yudhiṣṭhira | yatra brahmādayo devā ṛṣayaḥ siddhacāraṇāḥ || gandharvāpsaraso yakṣāḥ pannagāśca mahīpate | brahmakṣetre mahāpuṇyamabhigacchanti bhārata || manasāpyābhikāmasya kurukṣetraṃ yudhiṣṭhira |
4.p282.3
pāpāni ca vinaśyanti svargalokaṃ sa gacchati || gatvā hi śraddhayā yuktaḥ kurukṣetre kurudvaha | phalaṃ prāpnoti ca tadā rājasūyāśvamedhayoḥ || tathā, tato gacchecca dharmajña tīrthaṃ sannihitāmapi | yatra brahmādayo devā ṛṣayaśca tapodhanāḥ || māsi māsi sameṣyanti puṇyena mahatānvitāḥ | sannihatyāmupaspṛśya rāhugraste divākare || aśvamedhaśataṃ tatra teneṣṭaṃ śāśvataṃ bhavet | pṛthivyāṃ yāni tīrthāni antarikṣacarāṇi ca || nadyo nadāstaḍāgāśca sarvaprasravaṇāni ca | māsi māsi sameṣyanti sannihatyāṃ na saṃśayaḥ || tīrthasannayanādeva sannihatyeti viśrutā | yatkiñcidduṣkṛtaṃ karma striyā vā puruṣasya vā || snātamātrasya tatsarvaṃ naśyate nātra saṃśayaḥ | padmavarṇena yānena brahmalokaṃ prapadyate || praṇipatya tato yakṣaṃ dvārapālamavarṇakam | koṭikūṭamupaspṛśya labhedvahusuvarṇakam || gaṅgāhnadaśca tatraiva tīrthe bharatasattama | tatra snāyīta dharmajña brahmacārī samāhitaḥ || rājasūyāśvamedhābhyāṃ phalaṃ vindati mānavaḥ | pṛthivyāṃ naimiṣaṃ puṇyamantarikṣe ca puṣkaram || trayāṇāmapi lokānāṃ kurukṣetraṃ viśiṣyate | pāṃśavo'pi kurukṣetre vāyunā samudīritāḥ || api duṣkṛtakarmāṇaṃ nayanti paramāṃ gatim | uttareṇa dṛṣadvatyā dakṣiṇena sarasvatīm || ye vasanti kurukṣetre te vasanti triviṣṭape | kurukṣetraṃ gamiṣyāmi kurukṣetre vasāmyaham || apyetāṃ vācamutsṛjya svargaloke mahīyate | brahmavediṃ kurukṣetraṃ puṇyaṃ brahmarṣisevitam || tatrāvasanti ye rājan na te śocyāḥ kathañcana | iti
Linked texts (2)
- Saromāhātmya — Sanskrit
- Matsyapurāṇa — Vyāsa, Sanskrit