Tirthaprakasha 4.p334
Tīrthaprakāśa 4.p334
- Language
- Sanskrit
4.p334.1
kadā me narake vāsaḥ kadā svarge jagatpate | kadā manuṣyalokeṣu kadā tiryyaggateṣu ca || jalayantre yathā cakre ghaṭī rajjuvilambinī | yāti cordhvamadhaścaiva kadā madhye ca tiṣṭhati || tathā cāhaṃ suraśreṣṭha karmarajjumapāśritaḥ | adhaścordhvaṃ tathā madhye gacchāmi kramayogataḥ || evaṃ saṃsāracakre'smin bhairave romaharṣaṇe | bhramāmi suciraṃ kālaṃ nāntaṃ paśyāmi karhicit || na jāne kiṃ karomyadya hare vyākulitendriyaḥ | śokakṛṣṇābhibhūtaśca kāndiśīko vicetanaḥ || idānīṃ tvāmahaṃ deva vihvalaḥ śaraṇaṃ gataḥ | trāhi māṃ duḥkhitaṃ kṛṣṇa magnaṃ saṃsārasāgare || kṛpāṃ kuru jagannātha bhaktaṃ māṃ yadi manyase | tvadṛte nāsti me bandhuryo'sau cintāṃ kariṣyati || deva tvāṃ nāthamāsādya na bhayaṃ me'sti kutracit | jīvite maraṇe caiva yogakṣeme tathā prabho || ye tu tvāṃ vidhivaddeva nārcayanti narādhamāḥ | sugatistu kathaṃ teṣāṃ bhavet saṃsārabandhanāt || kiṃ teṣāṃ kulaśīlena vidyayā jīvitena ca | yeṣāṃ na jāyate bhaktirjagaddhātari keśave || prakṛtiṃ tvāsurīṃ prāpya ye tvāṃ nindanti mohitāḥ | patanti narake ghore jāyamānāḥ punaḥ punaḥ || na teṣāṃ niṣkṛtistasmādvidyate narakārṇavāt | ye dūṣayanti durvṛttāstvāṃ deva puruṣādhamāḥ || yatra yatra bhavejjanma mama karmanibandhanāt | tatra tava hare bhaktistvayi tāta dṛḍhā sadā || ārādhya tvāṃ sarvadaityā narāścānye'pi saṃyatāḥ| avāpuḥ paramāṃ siddhiṃ kastavāṃ. deva na pūjayet || na śaknuvanti brahmādyāḥ stotuṃ tvāṃ prakṛteḥ param | tathā cājñānabhāvena saṃstuto'si mayā prabho || tat kṣamasvāparādhaṃ me yadi te'sti dayā mayi |
4.p334.2
kṛtāparādhe'pi hare kṣamāṃ kurvvanti sādhavaḥ || tasmātprasīda deveśa bhaktaste'haṃ samāśritaḥ | stuto'si yanmayā deva bhaktibhāvena cetasā || sāṅgaṃ bhavatu tatsarvaṃ vāsudeva namo'stu te | brahmovāca | itthaṃ stutastadā tena prasanno garuḍadhvajaḥ | dadau tasmai muniśreṣṭhāḥ sakalaṃ manasepsitam || yaḥ sampūjya jagannāthaṃ pratyahaṃ stauti mānavaḥ | stotreṇānena matimān sa mokṣaṃ labhate dhruvam || trisandhyaṃ yo japedvidvānimaṃ stotravaraṃ śuciḥ | dharmaṃ cārthaṃ ca kāmaṃ ca mokṣaṃ ca labhate naraḥ || yaḥ paṭhecchṛṇuyādvāpi śrāvayedvā samāhitaḥ | sa lokaṃ śāśvataṃ viṣṇoryāti nirddhautakalmaṣaḥ || dhanyaṃ pāpaharaṃ cedaṃ bhuktimuktipradaṃ śivam | guhyaṃ sudurllabhaṃ puṇyaṃ na deyaṃ yasya kasya cit || na nāstikāya mūrkhāya na kṛtaghnāya mānine | na duṣṭamataye dadyānnābhaktāya kadācana || dātavyaṃ bhaktiyuktāya guṇaśilānvitāya ca | viṣṇubhaktāya śāntāya śraddhānuṣṭhānaśāline || 'idaṃ samastāghāvināśahetu kāruṇyasaṃjñaṃ sukhamokṣadaṃ ca | aśeṣavāñchāphaladaṃ variṣṭhaṃ stotraṃ mayoktaṃ puruṣottamasya || ye taṃ susūkṣmaṃ vimalāmbarābhaṃ dhyāyanti nityaṃ puruṣaṃ purāṇam | kiṃ vidyayā kiṃ suguṇaiśca teṣāṃ yajñaiśca dānaiśca tapobhirugraiḥ || yeṣāṃ tu bhaktirbhavatīha kṛṣṇe jagadgurau mokṣasukhaprade ca | loke sa dhanyaḥ sa śuciḥ sa vidvān makhaistapobhiḥ sa guṇairvariṣṭhaḥ jñātā sa dātā sa tu satyavaktā yasyāsti bhaktiḥ puruṣottamākhye stutvaivaṃ muniśārdūlāḥ praṇamya ca sanātanam | vāsudevaṃ jagannāthaṃ sarvakāmaphalapradam || cintāviṣṭo mahīpālaḥ kuśānāstīrya bhūtale ||
4.p334.3
vastraṃ ca tanmanā bhūtvā suṣuptāpa dharaṇītale | kathaṃ pratyakṣamabhyeti devadevo janārddanaḥ || mama cārttiharo devastadāsāviti cintayan | suptasya tasya nṛpatervāsudevo jagadguruḥ || ātmānaṃ darśayāmāsa svapne tasmai sa cakradhṛk | sa dadarśa tu svapne vai devadevaṃ jagadgurum || śaṅkhacakradharaṃ devaṃ gadāpadmāgrapāṇinam | śārṅgabāṇāsiyuktaṃ ca jvalattejogramaṇḍalam || yugāntādityavarṇābhaṃ nīlavaidūryasannibham | suparṇapṛṣṭhamāsīnaṃ ṣoḍaśārddhabhujaṃ śivam || sa cāsmai prābravīdvīrāḥ sādhu rājanmahāmate | kratunānena divyena tathā bhaktyā ca śraddhayā || tuṣṭo'smi te mahīpāla vṛthā kimanuśocasi | yadatra pratimā rājan rājapūjyā sanātanī || yathā tāṃ prāpsyase bhūpa tadupāyaṃ bravīmi te | gatāyāmadya śarvaryāṃ nirmale bhāskarodaye || sāgarasya jalasyānte nānādrumavibhūṣite | jalaṃ tathaiva velāyāṃ dṛśyate yatra vai mahat || lavaṇasyodadhe rājaṃstaraṅgairabhipūjitam | kūlālambī mahāvṛkṣaḥ sthitaḥ sthalajaleṣu ca || velābhirhanyamānaśca na cāsau kampate dhruvam | paraśumādāya hastena ūrmerantastato vraja || ekākī viharanrājan yattvaṃ paśyasi pādapam | idaṃ cihnaṃ samālokya chedaya tvamaśaṅkitam || śātyamānaṃ tu taṃ vṛkṣaṃ prāṃśumadbhutadarśanam | dṛṣṭvā tenaiva sannintsa tadā bhūpāla darśanāt || kuru me pratimāṃ divyāṃ jahi cintāṃ vimohinīm | brahmovāca | evamuktvā mahābhāgo jagāmādarśanaṃ hariḥ | sa cāpi svapnamālokya paraṃ vismayamāgataḥ || tāṃ niśāṃ samudīkṣan sa sthitastadgatamānasaḥ | vyāharan vaiṣṇavān mantrān sūktaṃ caiva tadātmakam ||
4.p334.4
prabhātāyāṃ rajanyāṃ tu tadgato nānyamānasaḥ | sa snātvā sāgare samyak yathāvadvidhinā tataḥ || dattvā dānaṃ ca viprebhyo grāmāṃśca nagarāṇi ca | kṛtvā paurvāhnikaṃ karma jagāma sa nṛpottamaḥ || na ratho na padātiśca na gajo na ca sārathiḥ | ekākī sa mahāvelāṃ praviveśa mahīpatiḥ || taṃ dadarśa mahāvṛkṣaṃ tejasvantaṃ mahādrumam | mahāntikaṃ mahārohaṃ puṇyaṃ vipulameva ca || mahotsedhaṃ mahākāyaṃ praguṇaṃ ca jalāntike | sāndrāñjiṣṭhavarṇabhaṃ nāmajātivivarjitam || naranāthastadā viṣṇordumaṃ dṛṣṭvā mudānvitaḥ | paraśunā śātayāmāsa śitena ca dṛḍhena ca || dvaidhībhūtā matistatra babhūvendrasakhasya ca | nirīkṣyamāṇe kāṣṭhe tu babhūvādbhutadarśanam || viśvakarmā ca viṣṇuśca viprarūpadharāvubhau | ājagmaturmahātmānau tadā tulyāgrajanmanau || jvalamānau svatejobhirdivyasraggandhalepanau | atha tau taṃ samāgamya nṛpamindrasakhaṃ tadā || tāvabrūtāṃ mahārāja kimatra tvaṃ kariṣyasi | kimarthaṃ ca mahābāho śātitaśca vanaspatiḥ || asahāyo mahādurge nirjane gahane vane | mahāsandhutaṭe caiva kathaṃ vai śātito drumaḥ || tayoḥ śrutvā vaco viprāḥ sa tu rājā mudānvitaḥ | babhāṣe vacanaṃ tābhyāṃ mṛdu vai madhuraṃ tathā || dṛṣṭvā tau brāhmaṇau tatra candrasūryāvivāgatau | namaskṛtya jagannāthāmanāṅmukhamavasthitaḥ || rājovāca | devadevamanādyantamamantaṃ jagataḥ patim | ārādhanātha pratimāṃ karomīti matirmama || ahaṃ sa devadevena parameṇa mahātmanā | svapnānte ca samuddiṣṭo bhavadbhyāṃ śrāvito mayā || rājñastu vacanaṃ śrutvā devendrapratimasya ca |
4.p334.5
prahasya tasmai deveśastuṣṭo vacanamabravīt || sādhu sādhu mahīpāla yadetanmatamuttamam | saṃsārasāgare ghore kadalīdalasannibhe || yataste matirutpannā viṣṇorārādhanāya vai | dhanyastvaṃ nṛpaśārdūla guṇaiḥ sarvairalaṅkṛtaḥ || saprajā pṛthivī dhanyā saśailavanakānanā | sapuragrāmanagarā caturvarṇairalaṅkṛtā || yatra tvaṃ nṛpaśārdūla prajāpālayitā prabhuḥ | ehohi sumahābhāga drume'smin sukhaśītale || āvābhyāṃ saha tiṣṭha tvaṃ kathābhirdharmasaṃsthitaḥ | ayaṃ. mama sahāyastu svāgataḥ śilpināṃ varaḥ || viśvakarmasamaḥ sākṣānnipuṇaḥ sarvakarmasu | mayoddiṣṭāṃ tu pratimāṃ karotyeṣa taṭaṃ tyaja || śrutvaivaṃ vacanaṃ tasya tadā rājā dvijanmanaḥ | sāgarasya taṭaṃ tyaktvā gatvā tasya samīpataḥ || tasthau sa nṛpatiśreṣṭho vṛkṣacchāyāṃ suśītalām | tatastasmai sa viśvātmā tadākārāṃ tadākṛtim || śilpimukhyāya viprendrāḥ kuruṣva pratimā iti | kṛṣṇarūpaṃ paraṃ śāntaṃ padmapatrāyatekṣaṇam || śrīvatsakaustubhadharaṃ śaṅkhacakragadādharam | gauraṃ gokṣīravarṇābhaṃ dvitīyaṃ svastikāṅkitam || lāṅgalāstradharaṃ devamanantākhyaṃ mahābalam | devadānavagandharvayakṣāvidyādharoragaiḥ || na vijñātaṃ hi tasyāntaṃ tenānanta iti smṛtaḥ | bhaginīṃ vāsudevasya rukmavarṇāṃ suśobhanām
Linked texts (2)
- Yoginītantra — Sanskrit
- Skandapurāṇa (early; "Ambikākhaṇḍa") (ed. Bakker) — Sanskrit