Tirthaprakasha 4.p44
Tīrthaprakāśa 4.p44
- Language
- Sanskrit
4.p44.1
nirdahantī tadātmānaṃ sadevāsurakinnaraiḥ || kimetaditi proktā sā gandharvagaṇaguhyakaiḥ | upagamyābravīddakṣaḥ praṇipatyātha duḥkhitaḥ || tvamasya jagato mātā janasaubhāgyadevatā | duhitṛtvaṃ gatā devi mamānugrahakāmyayā || na tvayā rahitaṃ kiñcidbrahmāṇḍe'sti carācaram | prasādaṃ kuru dharmajñe na māṃ tyaktumihārhasi || prāha devī yadārabdhaṃ tatkāryaṃ me na saṃśayaḥ | kintvavaśyaṃ tvayā martye hatayajñena śūlinā || prasādalokatṛptyarthaṃ tapaḥ kāryaṃ mamāntike | prajāpatistvaṃ bhavitā daśānāmaṅgajo'pyalam || madaṃśenāṅganāḥ ṣaṣṭirbhaviṣyantyaṅgajāstava | matsannidhau tapaḥ kurvan prāpsyase yogamuttamam || evamukto'bravīddakṣaḥ keṣu keṣu mayā'naghe | tīrtheṣu cāsi draṣṭavyā stotavyā kaiśca nāmabhiḥ || devyuvāca | sarvagā sarvabhūteṣu draṣṭavyā sarvato bhuvi | sarvalokeṣu yatkiñcidrahitaṃ na mayā vinā || tathāpi yeṣu sthāneṣu draṣṭavyā siddhimīpsubhiḥ | smarttavyā bhūtikāmena tāni vakṣyāmi tattvataḥ || vārāṇasyāṃ viśālākṣī naimiṣe liṅgadhāriṇī | prayāge lalitādevī kāmukī gandhamādane || mānase kumudānāma viśvakāmā tatheśvare | gomante gomatīnāma mandāre kāmacāriṇī || madotkaṭā caitrarathe jayantī hastināpure | kānyakubje tathā gaurī rambhā malayaparvate || sthāneśvare bhavānī tu viśvāṃ viśveśvare viduḥ | puṣkare puruhūteti kedāre mārgadāyinī || nandā himavataḥ pṛṣṭhe gokarṇe bhadrakarṇikā | sthāneśvare bhavānī tu bilvake bilvapatrikā || śrīśaile mādhavīnāma bhadrā bhadreśvare tathā | jayā varāhaśaile tu kamalā kamalālaye || rudrakoṭyāṃ tu rudrāṇī kālī kālañjare tathā |
4.p44.2
mahāliṅge tu kapilā sākoṭe kapilāmbarā || śālagrāme mahādevī śivaliṅge janapriyā | māyāpuryāṃ kumārī tu santāne lalitā tathā || utpalākṣī sahasrākṣe kanakākṣe tathotpalā | gayāyāṃ maṅgalānāmā vimalā puruṣottame || vipāśāyāmamoghākṣī piṅgalā puṇḍravarddhane | nārāyaṇī supārśve tu trikūṭe rudrasundarī || vipule vipulānāma kalyāṇī malayācale | koṭarā koṭitīrtheṣu sugandhā māgadhe vane || godāśraye trisandhyā tu gaṅgādvāre ratipriyā | śivakuṇḍe śivānandā nandinī devikātaṭe || rukmiṇī dvāravatyāṃ tu rādhā vṛndāvane vane | devakī mathurāyāṃ tu pātāle parameśvarī || citrakūṭe tathā sītā vindhye vindhyādhivāsinī sahyādrāvekavīrā tu hariścandre tu caṇḍikā || ramaṇā rāmatīrthe tu yamunāyāṃ mṛgāvatī | karavīre mahālakṣmī ramādevī vināyake || arascreenoga? Wait: arogā vaidyanāthe tu mahākāle maheśvarī | abhayā dvandvatīrthe tu mūkā vā vindhyakandare || māṇḍavye maṇḍukānāma svāhā māheśvare pure | chāgalaṇḍe pracaṇḍā tu caṇḍikā'marakaṇṭake || someśvare varārohā prabhāse puṣkarāvatī | devamātā sarasvatyāṃ pārā pārāttaṭe matā || mahālaye mahābhāgā payoṣṇyāṃ piṅgaleśvarī | siṃhikā kṛtaśauce tu kārtikeye tu śāṅkarī || utpalāvarttake lolā subhadrā śoṇasaṅgame | mātā siddhavane lakṣmīranaṅgā bharatāśrame || jaleśvare viśvamukhī tārā kiṣkindhyaparvate | devadāruvane sṛṣṭirmedhyā kāśmīramaṇḍale || bhīmādevī himādrau tu tuṣṭirvastreśvare tathā | kapālamocane śuddhirmātā kāyāvarohaṇe || śaṅkhojjvale dhūlirnāma dhṛtiḥ piṇḍārake tathā | kālī tu candrabhāgāyāmacchode śivacāriṇī ||
4.p44.3
veṇāyāmamṛtānāma badaryāmurvaśī tathā | oṣadhī cottarakurau kuśadvīpe kuśodakā || manmathā hemakūṭe tu kumude satyavādinī | aśvatthe badarikā tu nidhirvaiśravaṇālaye || gāyatrī vedavadane pārvatī śivasannidhau | devaloke tathandrāṇī brahmāsyeṣu sarasvatī || sūryyavimbe prabhānāma mātṛṇāṃ vaiṣṇavī tathā | arundhatī satīnāṃ tu rāmāsu ca tilottamā || citte brahmakalānāma śaktiḥ sarvaśarīriṇām | etaduddeśataḥ proktaṃ nāmāṣṭaśatamuttamam || aṣṭottaraṃ ca tīrthānāṃ śatametadudāhṛtam | yaḥ paṭhecchṛṇuyādvāpi sarvapāpaiḥ pramucyate | eṣu tīrtheṣu yaḥ kṛtvā snānaṃ paśyati mānavaḥ || sarvapāpavinirmuktaḥ kalpaṃ śivapure vaset | yastu matparamaḥ sthānaṃ karotyeteṣu mānavaḥ || sa bhittvā brahmasadanaṃ padamabhyeti śāṅkaram | mannāmāṣṭaśataṃ yastu śrāvayecchivasannidhau || tṛtīyāyāmathāṣṭamyāṃ bahuputro bhavennaraḥ | godāne śrāddhadāne vā ahanyahani vā punaḥ || devārcanavidhau vidvān paṭhan brahmādhigacchati | evaṃ vadantī sā tatra dadāhātmānamātmanā || svāyambhuvo'pi kālena dakṣaḥ prācetaso'bhavat | pārvatī cābhavaddevī śivadehārddhadhāriṇī || menāgarbhe samutpannā bhuktimuktiphalapradā | arundhatī jayantyetat tadāptā yogamuttamam || purūravāśca rājarṣiloṃkeṣu jayatāmagāt | yayātiḥ putralābhaṃ ca dharmalābhaṃ ca bhārgavaḥ || tathānye devadaityāśca brāhmaṇāḥ kṣatriyāstathā | vaiśyāḥ śūdrāśca bahavaḥ siddhimīyaryathepsitam || yatraitallikhitaṃ tiṣṭhet pūjyate devasannidhau | na tatra śoko daurgatyaṃ kadācidapi jāyate || iti