Tirthaprakasha 4.p79
Tīrthaprakāśa 4.p79
- Language
- Sanskrit
4.p79.1
nyūnānāmagnipraveśādinā vipannānāṃ sāyujyaṃ, tiryakprabhṛtīnāṃ ca pāpānāṃ sārūpyam atyantādhamānāṃ patitānāṃ sālokyam | anyathā niṣpāpānāmeva sadyaḥparamamuktisambhave nirjharanimnagādinimajjananirastapāpānāṃ paramaśiṣṭānāṃ tadananuṣṭhānaprasaṅgāt | iyān viśeṣaḥ | kāśīkṛtapāpānāmantargṛhe vipannānāṃ bhairavīyayātanānte paramamuktirniṣpāpānāṃ tu sadya eva | evamavimuktādauvipannānāṃ bhogāvasāne tattanmuktiriti | tatrāpi niṣpāpānāmanaśanādinā kāśīkṣetre yatra kvāpi mṛtānāṃ sadya eva paramamuktiḥ | kāśīmṛtānāṃ sarveṣāmevāpavarga ityavivādam | sa ca sadyaḥ krameṇa veti viśeṣaḥ | taduktampādame, bhūmau jale viyati vā'śucimadhyato vā sarpāgnidasyupavibhirnihatasya jantoḥ | sūcyagramātramapi nāsti mamāspade'smin sthānaṃ sureśvari na yatra mṛtasya mokṣaḥ || iti | nāvimukte mṛtaḥ kaścinnarakaṃ yāti kilviṣī | īśvarānugṛhītā hi sarve yānti parāṃ gatim || iti vacanācca | kūrmapurāṇe, gaṅgāyāṃ ca jale mokṣo vārāṇasyāṃ jale sthale | jale sthale cāntarikṣe gaṅgāsāgarasaṅgame || iti | kāśyāṃ maraṇe kālakṛto'pi viśeṣo nāsti | uttaraṃ dakṣiṇaṃ vāpi ayanaṃ na vikalpayet | sarvo'pyasya śubhaḥ kālo avimukte mriyeta yaḥ || iti kāśīkhaṇḍāt | nāpyatra deśakṛto viśeṣaḥ | rathyāntare mūtrapurīṣamadhye caṇḍālaveśmanyatha vā śmaśāne | kṛtaprayatno'pyakṛtaprayatno dehāvasāne labhate'tra mokṣam || iti sanatkumārasaṃhitāvacanāt | yadyapyatrāntargṛhādikṛto viśeṣo'styeva tathāpyantargṛhādau tattanmuktau cāṇḍālāṅgaṇādiprayukto na viśeṣa iti bhāvaḥ |
4.p79.2
kṣetracāturvidhyena caturdhā muktiḥ spaṣṭamabhihitā— pādme, caturvidhe'pi kṣetre'smin pramīto garbhayātanām | naivāpnoti muniśreṣṭhā viśeṣo'yaṃ bravīmi vaḥ || kāśyāṃ mṛtastu sālokyaṃ sākṣātprāpnoti sattamaḥ | tataḥ sarūpatāṃ yāti tataḥ sānnidhyamaśnute || tato brahmaikatāṃ yāti na parāvartate punaḥ | vārāṇasyāṃ mṛto jantuḥ sākṣātsārūpyamaśnute || tataḥ sānnidhyamāyāti tato brahmaikatāmiyāt | avimuktavipannastu sākṣāt sānnidhyamāpnuyāt || tataścidānandamaye brahmaṇyeva vilīyate | antargehe vipannastu sākṣātkaivalyamāpnuyāt || tathā, salokatāṃ ca sārūpyaṃ sānnidhyenāpi saptamāḥ | kalpaṃ kalpamavāpnoti tato brahmātmako bhavet || iti | atha śrīviśveśvaraprādurbhāvaḥ | kalpatarau liṅgapurāṇe, devadeva uvāca | ruciraṃ sthānamāsādya avimuktaṃ tu me gṛham | na kadācinmayā muktamavimuktaṃ tataḥ smṛtam || ityādyabhidhāyapūrvottare digvibhāge tasmin kṣetre tu sundari | surāsuraiḥ stutaścāhaṃ tatra sthāne yaśasvini || divyaṃ varṣasahasraṃ tu stuto'haṃ vividhaiḥ stavaiḥ | utpannaṃ mama liṅgaṃ tu bhittvā bhūmiṃ yaśasvini || teṣāmanugrahārthāya lokānāṃ bhaktibhāvataḥ | vārāṇasyāṃ mahādevi tatra sthāne sthito hyaham || taṃ dṛṣṭvā manujo devi paśupārśairvimucyate | paśupārśaiḥ saṃsārabandhaiḥ | pādme tu kalpādau ahaṃ pūrvamahaṃ pūrvamiti vāgyuddhaṃ vidhāya śastrāstrairyuddhyamānayorbrahmaviṣṇorna ko'pi parājīyata | tatastu apaśyatāmathābhyāse liṅgaṃ tejomayaṃ param | śaraccandrāyutasamaprabhābhāsuramaiśvaram || vīkṣya tadvyāpakaṃ jyotirniṣprabhau hi sthitau ca tau |
4.p79.3
karttavyaṃ nānupadyetāmīṣadāmatasādhvasau || saumyametanmahājyotiḥ saumyamagre sthitaṃ kutaḥ | tarkayantau vidhiharī dadṛśāte tadantarā || puruṣaṃ piṅga jaṭilaṃ digvāsasamalaṅkṛtam | bhujagairnṛkapālaiśca kundenduvimalayutim || taṃ dṛṣṭvaiva tayorāsīdayameva paraḥ pumān | iti buddhistatastābhyāṃ saṃstuto vaidikaiḥ stavaiḥ || sadāśiva uvāca | bhavadbhyāmidamullāsi maliṅgaṃ dṛṣṭamadbhutam | stutaṃ ca tena prīto'haṃ vṛṇītāṃ varamādijau || tāvūcatuḥ | sadāśiva prasannaścettvayi nau niścalā matiḥ | sadā bhavatu bhūteśa varaṃ nānyaṃ vṛṇīvahe || ekaṃ parākuru vibho saṃśayaṃ ca hṛdi sthitam | yadbhavavāṃstejasā liṅgamadhitiṣṭhati nityaśaḥ || tat kiṃsamākhyaṃ kiṃrūpaṃ kiṃprabhāvaṃ kimāśrayam | etatsarvaṃ maheśāna vaktumarhasyaśeṣataḥ || śiva uvāca | yadetat paramaṃ liṅgaṃ paśyataṃ purataḥ sphurat | tadviśveśvarasaṃjñaṃ hi saccidānandavigraham || layaṃ liṅgaśarīrasya viśleṣaṃ gamayetparam | tena liṅgamitikhyātamapavargaikasādhanam || vyāpakatve'pi caitasya nirvikārasya tattvataḥ | paricchinnatayā'vasthā sādhāraṇyāpanuttaye || yathā vyomāparicchinnaṃ śabdahetutayā samam | svayameva paricchedaṃ prāpnotīdamapīdṛśam || prabhāvaḥ śrūyatāmasya nityānandasvarūpiṇaḥ | atra saktāsavaḥ santaḥ saccidānandarūpatām || yathāyogyaṃ labhante hi nātra kāryyā vicāraṇā | kāśīkhaṇḍe, kāśyāṃ liṅgānyanekāni kāśyāṃ tīrthānyanekaṃśaḥ | tathāpi sevyo viśveśaḥ snātavyā maṇikarṇikā || tathā, sarvaliṅgārccanātpuṇyaṃ yāvajjanma yadarccane | sakṛdviśveśamabhyarcya śraddhayā tadavāpyate ||
4.p79.4
yajjanmanāṃ sahasreṇa nirmalaṃ puṇyamarjitam | tatpuṇyaparivarttena bhavedviśveśadarśanam || gavāṃ koṭipradānena samyagdattena yatphalam | tatphalaṃ samyagāpnota viśveśvaravilocanāt || tathā, yena liṅgamidaṃ dṛṣṭaṃ śraddhayā śuddhacakṣuṣā | sākṣātkāreṇa tenāhaṃ dṛṣṭa eva na saṃśayaḥ || śravaṇādasya liṅgasya pātakaṃ janmasañcitam | kṣaṇāt kṣayati śṛṇvantu devā ṛṣigaṇaiḥ saha || smaraṇādasya liṅgasya pāpaṃ janmadvayārjitam | avaśyaṃ naśyati kṣipraṃ mama vākyānna saṃśayaḥ || etalliṅgaṃ samuddiśya gṛhānniṣkramaṇakṣaṇāt | vilīyate mahāpāpamapi janmatrayārjitam || darśanādasya liṅgasya hayamedhaśatodbhavam | puṇyaṃ labheta niyataṃ mamānugrahato'marāḥ || svayaṃbhuvo'sya liṅgasya mama viśveśituḥ surāḥ | rājasūyasahasrasya phalaṃ syāt sparśamātrataḥ || puṣpamātrapradānācca culukodakapūrvakam | śatasauvarṇikaṃ puṇyaṃ labhate bhaktiyogataḥ || pūjāmātraṃ vidhāyāsya liṅgarājasya bhaktitaḥ | sahasrahemakamalapūjāphalamavāpyate || vidhāya mahatīṃ pūjāṃ pañcāmṛtapuraḥsarām | asya liṅgasya labhate puruṣārthacatuṣṭayam | liṅgapurāṇe, bilvapatrātparaṃ nāsti yena tuṣyati śaṅkaraḥ | kāśīkhaṇḍe, vastrapūtajalairliṅgaṃ snāpayitvā mamāmarāḥ | lakṣāśvamedhajaṃ puṇyaṃ nityaṃ prāpnoti sattamaḥ || sugandhacandanarasairliṅgamālipya bhaktitaḥ | ālipyate surastrībhiḥ sugandhiyakṣakardamaiḥ || sāmodadhūpadānaiśca divyagandhāśrayo bhavet | ghṛtadīpaprarodhaiśca jyotīrūpavimānagaḥ || karpūragauradehaśrīrbhavedbhālavilocanaḥ | tathā, viśveśe paramānnaṃ yo dadyāt sājyaṃ saśarkaram |
4.p79.5
trailokyaṃ tarpitaṃ tena sadevapitṛmānavam || mukhavāsaṃ tu yo dadyāddarpaṇaṃ cāru cāmaram | ullocaṃ sukhaparyyaṅkaṃ tasya puṇyaphalaṃ mahat || mukhavāsaḥ tāmbūlādiḥ | ulloco vitānam | pūjopakaraṇaṃ dravyaṃ yo ghaṇṭāmaḍḍukādikam || bhaktyā me bhavane dadyāt sa vasedatra me'ntike | citralekhanakarmādi prāsāde me'tra kārayet || yaḥ sa citrānmahābhogān bhuṅkte matpurataḥ sthitaḥ | tathā, yastu viśveśvaraṃ dṛṣṭvā hyanyatrāpi vipadyate | tasya janmāntare mokṣo bhavatyeva na saṃśayaḥ || viśveśākhyā tu jihvāgre viśvanāthakathā śrutau | viśveśaśīlanaṃ citte yasya tasya janiḥ kutaḥ || tathā, liṅgaṃ me viśvanāthasya dṛṣṭvā yaścānumodate
Linked texts (1)
- Tīrthakāṇḍa — Lakṣmīdhara, Sanskrit