Kamasutra 30

Jayamaṅgalā 30

Language: Sanskrit

30.17

kṛtaparicayāmiti | kanyāmiveti | tasyā api darśiteṅgitākārāyāevābhiyoga upāyat ityupāyā abhiyogāḥ, abhiyujyanta ebhiriti kṛtvā ta evātrāpi draṣṭavyāḥ ye kanyāsaṃprayuktake'bhihitāḥ |
viśeṣamāha—

30.18

prāyeṇeti | tatreti | kanyāyāṃ, sūkṣmā ityanabhivyaktabhāvāḥ, asamprayuktatvādavyutpannatvādityarthaḥ |

itarāsu tu parastrīṣu, tāneva ye kanyāsūktāḥ, sphuṭamiti | kriyāviśeṣaṇam , abhivyaktabhāvaṃ prayuñjītetyarthaḥ, tāsāṃ saṃprayoge pravṛttatvād, ye tu tāsveva viśeṣeṇa yujyante, te dvividhāḥ-bāhyā ābhyantarāśca, |
tatra pūrvānadhikṛtyāha—

30.20

saṃdarśitākārāyāmiti | nirbhinnasadbhāvāyāmiti | prakaṭitasadbhāvāyāṃ satyāṃ, samupabhogavyatikare tadīyānīti | nāyikāvastūni svayamupayuñjyātsvāni ca svamiva tāmupayojayet |

30.21

tatreti|parivartamāne,mahārhagandham = atyantasurabhi, uttarīya kusumaṃ ca, ātmīyaṃ syāt = svīkuryādityarthaḥ, aṅguloyakaṃ ca mahārhaṃ syāt, taddhastānnāyakahastādyadi tayā tāmbūlaṃ gṛhīta, goṣṭhīgamanodyatasyeti | kartari ṣaṣṭhī, keśahastaḥ = keśakalāpaḥ, tatratyapuṣpayācanaṃ, siddhikarametaditi |

30.22

svayaṃ tu dadannāyako yanmahārhagandhaṃ spṛhaṇīyaṃ lokasya, tadanyahastena yadā dadyāttadā svanakhadaśanapadacihnitaṃ, yadā svahastena tadā sākāraṃ, kriyāviśeṣaṇametad , evaṃ prakāradvaye'pi bhāvaḥ sūcito bhavati |

30.23

adhikairadhikaiḥ pūrvapūrvebhyaḥ, sādhvasavicchedanam, prāyeṇa parayoṣitparapuruṣeṣu sasādhvasā bhavati |
ābhyantarānadhikṛtyāha--

30.24

krameṇa ceti | yadaikāntena gatasādhvasā, tadā viviktadeśagamanaṃyasminpracchanne deśe tiṣṭhati, tatra cāliṅganādayaḥ prayoktavyāḥ, guhyadeśābhimarśanaṃ = kakṣorumūlajaghane vimardanam , utkṣiptakena |
abhiyogasyāviṣayamāha-

30.25

yatra ceti | gṛhe, parāmiti | dvitīyāṃ nābhiyuñjīta, parasparakalahād vigopanaṃ syād, yatra vā gṛhe vṛddhā strī, anubhūtaviṣayā pravṛttaparapuruṣasaṃprayuktatvād, na tatra striyamabhiyuñjītetyeva, priyopagrahaiśceti | priyaṃ yadā svasukhakāraṇaṃ tadaivopagrahaḥ, upagṛhyate'neneti, upagṛhya svīkṛtyopanyasyāt |
ślokāvatra bhavataḥ-

30.26

yatreti | yasmingṛhe nāyikāyā bhartā, anyasyāṃ yoṣiti dṛṣṭasaṃcāro dṛṣṭābhigamo na tatra gṛhe, suprāpāmapi = sulabhāmapi, laṅghayedadhigacchedityarthaḥ |

30.27

śaṅkitāmabhiyoktari jātāśaṅkāṃ, rakṣitāṃ rakṣibhiḥ, bhītāṃ patyuḥ, saśvaśrūkāṃ śvaśrūvadhiṣṭhitāṃ, na tarkayeta = nābhilaṣed, jānanpratyayamiti | ahamatrāśakta iti niścayamadhagacchan |
iti śrīvātsyāyanīyakāmasūtraṭīkāyāṃ yaśodhararacitāyāṃ jayamaṅgalā''khyāyāṃ pāradārike pañcame'dhikaraṇe paricayakāraṇānyabhiyogā dvitīyo'dhyāyaḥ |

Linked texts (1)

Kāmasūtra — Vātsyāyana Mallanāga, Sanskrit