[Pramāṇa](https://indike.org/pramana/) › [Indian literature](https://indike.org/pramana/in) › [Polity, Pleasure & Law](https://indike.org/pramana/in.niti) › [Erotics and the Art of Love](https://indike.org/pramana/in.niti.kama) › [Vātsyāyana's Kāmasūtra and its Tradition](https://indike.org/pramana/in.niti.kama.kamasutra-school) › [Kāmasūtra](https://indike.org/pramana/in.niti.kama.kamasutra-school.vatsyayana) › [Jayamangala](https://indike.org/pramana/in.niti.kama.kamasutra-school.vatsyayana!jayamangala) › 31 # Kamasutra 31 Jayamaṅgalā 31 - **Language:** Sanskrit ### [31.p1](https://indike.org/pramana/in.niti.kama.kamasutra-school.vatsyayana!jayamangala.31.p1) satyapyabhiyoge dhīrāḥ pragalbhāḥ parīkṣipyo yāḥ striyastā na nirbhinnasadbhāvāstataśca na tāsu viśeṣābhiyoga iti bhāvaparīkṣocyate-- ### [31.1](https://indike.org/pramana/in.niti.kama.kamasutra-school.vatsyayana!jayamangala.31.1) kanyāmivābhiyuñjānaḥ, pravṛttiṃ = ceṣṭāṃ, parīkṣeta, anayā hi parīkṣikṣatayā bhāvaḥ parīkṣito bhavati | kathaṃ sādhayetyāha- ### [31.2](https://indike.org/pramana/in.niti.kama.kamasutra-school.vatsyayana!jayamangala.31.2) mantramavṛṇvānāmiti | sāṃprayogikaṃ bhāvamaprakāśayantīṃ, dūtyā sādhayed apragalbhatvāt | ### [31.3](https://indike.org/pramana/in.niti.kama.kamasutra-school.vatsyayana!jayamangala.31.3) apratigṛhṇāmiyogaṃ nāyakena kriyamāṇaṃ pratyākhyāya, punarapi kiyatodivasānsthitvā; saṃsṛjyamānāṃ nāyakena saṃsargaṃ yātāṃ, dvidhābhūtamānasāṃ. vidyāt , parīkṣaṇīyatvāt, kiṃ kuryāmahaṃ na vedmīti, tāṃ krameṇa sādhayed na sahasā parityajet | atra viśeṣamāha- ### [31.4](https://indike.org/pramana/in.niti.kama.kamasutra-school.vatsyayana!jayamangala.31.4) saviśeṣamiti | yathā pūrvamalaṃkriyamāṇā tataḥ saviśeṣamalaṃkṛtā, punarnāyakena dṛśyeta, tathaiva cābhigacchennāyakaṃ, nāyikāṃ vivikte sthitāṃ, balād grahaṇīyāṃ = haṭhād grāhyāṃ, vidyād dhīrātvāt | ### [31.5](https://indike.org/pramana/in.niti.kama.kamasutra-school.vatsyayana!jayamangala.31.5) bahūnapi viṣahate ye ye kriyante, na ca cireṇāpīti | bahubhirapi divasaiḥ, śuṣkapratigrāhiṇīti | arthaśūnyānabhiyogānpratigrahītuṃ śīlamasyāḥ, atiparokṣaṇīyatvāt , paricayavighaṭanasādhyeti| paricayāpanayasādhyā | kathaṃ tadapanayanātsidhyatītyāha- ### [31.6](https://indike.org/pramana/in.niti.kama.kamasutra-school.vatsyayana!jayamangala.31.6) manuṣyajāteriti | tadgato'bhidhānaṃ, cittānityatvāditi | manasaścalatvād, yato vicchinne paricaye punaḥ svayaṃ saṃdhatte | ### [31.7](https://indike.org/pramana/in.niti.kama.kamasutra-school.vatsyayana!jayamangala.31.7) abhiyuktā'pi pariharati, abhiyuktaṃ parihṛtyāpi kā cittasaṃsargaṃ yāsyatītyāha-na ca saṃsṛjyata iti | tasyā ātmanyabhimānād, na ca pratyācaṣṭe, nāya kamekāntena, tasminnāyake ca gauravābhimānāt, sā'tiparicayātkṛcchreṇa sādhyā tasyā hyatidhīrāyā atiparicayena gauravābhimānau kṛcchreṇa sphuṭataḥ, marmajñayā vā dūtyā sādhyā tadvaśatvāt | tatra viśeṣamāha- ### [31.8](https://indike.org/pramana/in.niti.kama.kamasutra-school.vatsyayana!jayamangala.31.8) sā cediti | pāruṣyeṇa pratyādiśati, niṣṭhuravākyena nāyakaṃ pratyācaṣṭe, upekṣeta nābhiyuñjīta | atrāpi viśeṣamāha- ### [31.9](https://indike.org/pramana/in.niti.kama.kamasutra-school.vatsyayana!jayamangala.31.9) paruṣayitvā'pi tviti | paruṣamuktvā'pi, prītiyojanaśīlāṃ, sādhayetpunarabhiyuñjīta, tasyā jātavipratipattisāratvāt | ### [31.10](https://indike.org/pramana/in.niti.kama.kamasutra-school.vatsyayana!jayamangala.31.10) kāraṇāditi | kutaścinnimittātsaṃsparśanamabhiyogaṃ sahate na śuṣkapratigrāhiṇītyarthaḥ, nāvabudhyate nāmeti| nāyakābhiprāyamajānatīva saṃsparśanaṃ sahate saivambhūtā dvidhābhūtamānasā parīkṣaṇīyatvāt, sātatyena kṣāntyā vā sādhyeti | avicchedena saṃsparśasya kṣamaṇaṃ kāryamityarthaḥ | ### [31.11](https://indike.org/pramana/in.niti.kama.kamasutra-school.vatsyayana!jayamangala.31.11) samīpe śayānāyā āntarābhiyogena pravṛttiṃ parīkṣeta, suptā nāmeti | kṛtakasuptaḥ karamupari vinyasyennāyikāyāḥ, suptā nāmeti | kṛtakasuptopekṣate hastaṃ nāpanudati, jāgratī tviti | punarjāgaraṇamapadiśyāpanayati, kimarthamityāha-bhūyo'bhiyogākāṅkṣiṇīti | anyathā kiṃ suptenaiva nyastaḥ kiṃvā'bhiyogārthaṃ kṛtakasupteneti sandehaḥ | ### [31.12](https://indike.org/pramana/in.niti.kama.kamasutra-school.vatsyayana!jayamangala.31.12) etena hastanyāsena | ### [31.13](https://indike.org/pramana/in.niti.kama.kamasutra-school.vatsyayana!jayamangala.31.13) tasminniti | hastanyāse pādanyāse ca, prasṛte nirbandhena pravṛtte, suptasaṃśleṣaṇamiti | kṛtakasuptāyā āliṅganamevopakrameta na cumbanādikam | ### [31.14](https://indike.org/pramana/in.niti.kama.kamasutra-school.vatsyayana!jayamangala.31.14) taditi saṃśleṣaṇam, utthitāṃ śayanāt, prakṛtivartinīmakupitām, abhiyogārthinīṃ vidyād, dṛśyamānāṃ punarabhiyuñjītetyarthaḥ, asyā apragalbhatvād, adṛśyamānāṃ tu prakṛtivartinīṃ dūtīsādhyāṃ vidyāt, tadviṣayatvāt | ### [31.15](https://indike.org/pramana/in.niti.kama.kamasutra-school.vatsyayana!jayamangala.31.15) yadā tu tadasahamānotthitā ciraṃ bahūnidivasāndṛṣṭā satī punarapi prakṛtisthaivākupitā saṃsṛjyate saṃsargaṃ karotīti, yadyapyevaṃ tathā'pi, kṛtalakṣaṇāṃ tāmiti | jātāvasarā darśitakārāmupakrametābhiyuñjīta, tasyāatiśayenāpragalbhatvāt | ### [31.16](https://indike.org/pramana/in.niti.kama.kamasutra-school.vatsyayana!jayamangala.31.16) anabhiyukteti | abhiyuktā sutarāṃ tāvadbhāvasūcakamākāraṃ darśayatyeva | ### [31.17](https://indike.org/pramana/in.niti.kama.kamasutra-school.vatsyayana!jayamangala.31.17) tatra ca yadi vadati savepathu sagadgadam | ### [31.18](https://indike.org/pramana/in.niti.kama.kamasutra-school.vatsyayana!jayamangala.31.18) svinnakaracaraṇāṅguliḥ svinnamukhī ca bhavatyekāntenā''hatabhāvatvāt | ### [31.20](https://indike.org/pramana/in.niti.kama.kamasutra-school.vatsyayana!jayamangala.31.20) ātureti | kāmāturaikāntena pragalbhā, evamavasthā'pi vivikte, saṃvāhikā ceti | kadā cidapragalbhasaṃvāhanadvāreṇa pravṛttiṃ darśayati, sparśamāvedayatītyātmīyaṃ nāyakaṃ jñāpayati | ### [31.21](https://indike.org/pramana/in.niti.kama.kamasutra-school.vatsyayana!jayamangala.31.21) vismitabhāveti | vismitākhyo bhāvo yasyāḥ, sparśaṃ nivedayamānā tatsparśasukhājjātavismayā satī tenaiva dvitīyabāhunā śleṣaṃ karoti, nidrā'ndhā veti | vā śabdo bhinnakramaḥ, ubhābhyāṃ bāhubhyāṃ kṛtakanidrā parispṛśyāpyūrubhyāṃ tiṣṭhati | ### [31.22](https://indike.org/pramana/in.niti.kama.kamasutra-school.vatsyayana!jayamangala.31.22) alikaikadeśamagrabhāgaṃ pātayati | ### [31.23](https://indike.org/pramana/in.niti.kama.kamasutra-school.vatsyayana!jayamangala.31.23) saṃvāhayantī na pratilomayati, tatsaṃvāhanasyeṣṭatvāt | ### [31.24](https://indike.org/pramana/in.niti.kama.kamasutra-school.vatsyayana!jayamangala.31.24) tatraiveti | ūrumūle, avicalaṃ, nyasyati lajjayā na vyāpārayati, mā bhūjjaghanapārśvasaṃsparśa iti | ### [31.25](https://indike.org/pramana/in.niti.kama.kamasutra-school.vatsyayana!jayamangala.31.25) aṅgasandaṃśena ceti | ūrudvayasaṃdaṃśena nāyakena pīḍitaṃ cirādapanayati, mā bhūdicchāvighāto'syeti | ### [31.26](https://indike.org/pramana/in.niti.kama.kamasutra-school.vatsyayana!jayamangala.31.26) nāyakābhiyogāniti | tasyāmavasthāyāmanyadā vā nāyakābhiyogāndṛṣṭvā; tadīyaṃ bhāvaṃ pratigṛhya punaḥsaṃvāhanāyopagacchati kāryasyāniṣpannatvāt | ### [31.27](https://indike.org/pramana/in.niti.kama.kamasutra-school.vatsyayana!jayamangala.31.27) nātyarthamiti | kadā cidatidhairyād gūḍhabhāvaiva pravṛttiṃ darśayati, svayaṃ nātyantaṃ saṃsṛjyate, na ca pariharati saṃsṛjyamānā | ### [31.28](https://indike.org/pramana/in.niti.kama.kamasutra-school.vatsyayana!jayamangala.31.28) vivikte bhāvaṃ darśayati, mā'nyo jñāsīditi, anyatra pracchannapradeśāditi | janasaṃbādhe gūḍha ityāha-niṣkāraṇamiti | kāraṇaṃ binā, gūḍhatvāditi | pracchannatvāt | ### [31.29](https://indike.org/pramana/in.niti.kama.kamasutra-school.vatsyayana!jayamangala.31.29) gūḍhabhāvatvenaiva; yaḥ saṃnikṛṣṭaḥ paricārakastenopasṛjyate, tenaiva tiṣṭhatīti jñātavyā, kathaṃ tarhi ? tasyāṃ nāyakasya pratipattirityāha-sā cediti| yathoktā, ākāritā'pi nāyakena punarākāraṃ grāhitā'pi, tathaiva syādyathaiva prāguktā, marmajñayā dūtyā sādhyā tadvaśatvād | ### [31.30](https://indike.org/pramana/in.niti.kama.kamasutra-school.vatsyayana!jayamangala.31.30) vyāvarttamānā dūtyā sādhyamānā mā bhūvamiti, sadbhūtaṃ vyāvarttanakāraṇamupanyasyati, kiṃ vā savyājamiti | iti bhāvaparīkṣā pañcacatvāriṃśaṃ prakaraṇam || ### [31.31](https://indike.org/pramana/in.niti.kama.kamasutra-school.vatsyayana!jayamangala.31.31) ādāviti | darśanānantaraṃ prathamaṃ paricayaḥ, tata iti | prakṛtāt paricayānnyāsanikṣepādinā, paribhāṣaṇasaṃmiśramiti | paribhāṣaṇakāla evākāravedanaṃ bhāvasūcakopalakṣṇatvād, itīṅgitavedanaṃ ca, yamadhikṛtyoktaṃkṛtaparicayād darśiteṅgitākārāmiti | ### [31.32](https://indike.org/pramana/in.niti.kama.kamasutra-school.vatsyayana!jayamangala.31.32) pratyuttareṇeti | nāyakena darśitasyākārasya parigrahaṃ nāyikayā pratyuttareṇa pratyākāreṇa prakriyamāṇaṃ paśyet, tata iti | dṛṣṭāt parigrahād, vigatasādhvasa iti| niḥśaṅkaḥ, kiṃ setsyati na veti śaṅkāśūnyaḥ | dvividhāḥ-striyaḥ, sphuṭā asphuṭāśca, tatra sphuṭāsu nāyaṃ vidhiriti darśayannāha- ### [31.33](https://indike.org/pramana/in.niti.kama.kamasutra-school.vatsyayana!jayamangala.31.33) ākāreṇeti | nārī yā'nyadṛṣṭapūrvā, prāk pradarśayed bhāvam, prathame tveva darśane, na dvitīyādidarśanamapekṣate | ### [31.34](https://indike.org/pramana/in.niti.kama.kamasutra-school.vatsyayana!jayamangala.31.34) ślakṣṇamākāriteti | asphuṭamākāraṃ grāhitā, sphuṭamuttaraṃ pratyākāram, ratilālaseti | ratiśraddhā | asphuṭāsu vidhimāha- ### [31.35](https://indike.org/pramana/in.niti.kama.kamasutra-school.vatsyayana!jayamangala.31.35) dhīrāyāmiti | dhīrāyāṃ śanaiḥ pravarttate, apragalbhā na śanairapi parīkṣaṇīyā vimṛṣya sphuṭā iti, anantarokte dve, yāścābhiyogamātrasādhyā uktāstāḥ sphuṭāḥ siddhā eva | ## Linked texts (1) - [Kāmasūtra](https://indike.org/pramana/in.niti.kama.kamasutra-school.vatsyayana.5.3) — Vātsyāyana Mallanāga, Sanskrit --- Source: [https://indike.org/pramana/in.niti.kama.kamasutra-school.vatsyayana!jayamangala.31](https://indike.org/pramana/in.niti.kama.kamasutra-school.vatsyayana!jayamangala.31) · Pramāṇa