[Pramāṇa](https://indike.org/pramana/) › [Indian literature](https://indike.org/pramana/in) › [Polity, Pleasure & Law](https://indike.org/pramana/in.niti) › [Erotics and the Art of Love](https://indike.org/pramana/in.niti.kama) › [Vātsyāyana's Kāmasūtra and its Tradition](https://indike.org/pramana/in.niti.kama.kamasutra-school) › [Kāmasūtra](https://indike.org/pramana/in.niti.kama.kamasutra-school.vatsyayana) › [Jayamangala](https://indike.org/pramana/in.niti.kama.kamasutra-school.vatsyayana!jayamangala) › 38 # Kamasutra 38 Jayamaṅgalā 38 - **Language:** Sanskrit ### [38.1](https://indike.org/pramana/in.niti.kama.kamasutra-school.vatsyayana!jayamangala.38.1) vartamānamiti | tasyāṃ yo vartate tamalaktakavaniṣpīḍitārthamutsṛjantī yadā tyaktukāmā tadā, viśīrṇeneti | pūrvasaṃsṛṣṭena niṣkāsitena saṃdhitsunā saha saṃdadhyād, evaṃ sati 'apavāhayedanyamavaṣṭabhya' ityanugataṃ bhavatīti viśīrṇapratisaṃdhānamucyate | viśīrṇasyālaktakavadutsṛṣṭasya kiṃ saṃdhāneneti cedāha- ### [38.2](https://indike.org/pramana/in.niti.kama.kamasutra-school.vatsyayana!jayamangala.38.2) seti | vittavānapi yadā'vasitārtho'vaśyaṃ dāsyatīta, sānurāgaśca, anyathā viśvasanārthaṃ yatkiṃciddattvā'pi niṣkāsito'hamanayeti virakto'pakuryāt, tata iti | tasmātkāraṇātsaṃdheyaḥ, so'pyanyayā yadi na saṃsṛṣṭaḥ | yastu saṃsṛṣṭastatra vidhānāntaramāha- ### [38.3](https://indike.org/pramana/in.niti.kama.kamasutra-school.vatsyayana!jayamangala.38.3) anyatra gata ityanena ṣaḍvidho viśīrṇa iti, tarkayitavya iti | nirūpyo vakṣyamāṇena nyāyena sahasā na saṃdheyaḥ, sa iti | yo'nyatra gataḥ, kāryayuktyeti | kāryayogāt ṣaḍvidhaḥ, asaṃsṛṣṭastvekavidhaḥ | kāryayuktimāha- ### [38.4](https://indike.org/pramana/in.niti.kama.kamasutra-school.vatsyayana!jayamangala.38.4) ita iti | svadoṣa evāsya, yadasyā nāyikātaḥ svayamevāpasṛtyānyatra gataḥ, yatrāpi gatastatrāpi svayamevāpasṛta ityekaḥ | ### [38.5](https://indike.org/pramana/in.niti.kama.kamasutra-school.vatsyayana!jayamangala.38.5) itastataśceti | atrāśrayayordoṣo nāśritasya doṣaḥ, yasmādito niṣkāsito'pasṛtastatra gatastato'pi niṣkāsita evāpasṛta iti dvitīyaḥ | ### [38.6](https://indike.org/pramana/in.niti.kama.kamasutra-school.vatsyayana!jayamangala.38.6) itaḥ svayamapasṛta iti | āśratasya doṣaḥ, tato'pi niṣkāsito'pasṛta ityāśrayasya ceti tṛtīyaḥ | ### [38.7](https://indike.org/pramana/in.niti.kama.kamasutra-school.vatsyayana!jayamangala.38.7) itaḥ svayamapasṛta ityāśritasya doṣaḥ, tatra sthita iti | nobhayoriti caturthaḥ | ### [38.8](https://indike.org/pramana/in.niti.kama.kamasutra-school.vatsyayana!jayamangala.38.8) ito niṣkāsitāpasṛta iti | ubhayasya doṣaḥ, tataḥ svayamapasṛtaityāśritasyeti pañcamaḥ | ### [38.9](https://indike.org/pramana/in.niti.kama.kamasutra-school.vatsyayana!jayamangala.38.9) ito niṣkāsitaḥ sannapasṛta ityāśrayadoṣaḥ, tatra sthita iti | nobhayorapīti ṣaṣṭhaḥ | eṣu saṃdheyāsaṃdheyatayā tarkamāha- ### [38.10](https://indike.org/pramana/in.niti.kama.kamasutra-school.vatsyayana!jayamangala.38.10) upajapati cediti | yadi saṃdhātuṃ pīṭhamardādimukhenopasṛtya bhaṇatītyarthaḥ, tatra dvitīyapakṣābhāvāttarkayitavya iti noktaṃ, yadāha-ubhayoriti | tasyāstasyāśca, tābhyāmaniṣkāsitatvāt, sato'pi guṇānanapekṣya calabuddhitvātsvadoṣeṇaivāpasṛtaḥ, sa saṃhito'pi na sthāyī na ca tasmādarthena yoga ityasaṃdheyaḥ | ### [38.11](https://indike.org/pramana/in.niti.kama.kamasutra-school.vatsyayana!jayamangala.38.11) itastataśca niṣkāsiteti | upajapati cediti vartate, sthirabuddhiḥsvayamanapasṛtatvād , atra pakṣadvayamapyasti, yadāha-sa cediti | atra tarkayitavya iti noktaṃ, cecchabdenaiva yadyarthena tadarthasyoktatvād , anyataiti | anyasmādramyādāhūhu labhamānayā niṣkāsitaḥ, sasāro'pi saddvyo'pi, tataśca tayā saroṣito janitaroṣo'marṣādbahu dāsyatīti jñātvā; tadānīmeva saṃdheyastayaiva roṣitatvāt , tasyāmanuśayaṃ badhnāti | ### [38.12](https://indike.org/pramana/in.niti.kama.kamasutra-school.vatsyayana!jayamangala.38.12) niḥsāratayā nirdravyatayā sasāraśca kadaryatayā'vadānyatayā, tyakto niṣkāsitaḥ, na śreyān saṃdhātumihāpi tulyatvāt | ### [38.13](https://indike.org/pramana/in.niti.kama.kamasutra-school.vatsyayana!jayamangala.38.13) itaḥ svayamapasṛtastato niṣkāsitāpasṛta iti?| atrāpyupajapediti vartate, atrāpi yadi śabdāttarkayitavya iti noktam , atiriktaṃ pūrvasmāddānād, ādau ca yāvanna saṃprayogaḥ, kṛtakṛtyasya hi svayamapasarpaṇasaṃbhavāt , pratigrāhyaḥ, saṃdheyaḥ atra viparyayeṇāpratigrāhya ityarthokto dvitīyapakṣaḥ | ### [38.14](https://indike.org/pramana/in.niti.kama.kamasutra-school.vatsyayana!jayamangala.38.14) atra saṃdheyapakṣamāha- ### [38.15](https://indike.org/pramana/in.niti.kama.kamasutra-school.vatsyayana!jayamangala.38.15) viśeṣārthitayā yatra gatastatra viśeṣaṃ suratagatamapaśyaṃstasyā avidagdhatvāt , tata iti | tasyāḥ sakāśād, asmanmūlamāgantukāmomayi dṛṣṭaviśeṣatvād , māṃ jijñāsitukāma iti | tatratya eva mayi jijñāsāṃ kartumicchuḥ, kimiyaṃ māṃ svayamapasṛtamicchati na veti, sānurāgatvāddāsyati dṛṣṭaviśeṣatvāt | ### [38.16](https://indike.org/pramana/in.niti.kama.kamasutra-school.vatsyayana!jayamangala.38.16) tasyāṃ vā doṣānguṇaviparyayāndṛṣṭavān , āgantukāma iti yojyaṃ, satsu vā guṇeṣu mayi bhūyiṣṭhānprabhūtatamānguṇānadhunā paśyati, tadguṇānstokāndṛṣṭvā, sa ubhayasminnapi pakṣe mayi guṇadarśī, bhūyiṣṭhaṃ = prabhūtaṃ, dāsyati | ### [38.17](https://indike.org/pramana/in.niti.kama.kamasutra-school.vatsyayana!jayamangala.38.17) bālo veti | ārohadyauvanatvād, naikatradṛṣṭistatrānyatra vā'bhiprāyo'sya sa kākākṣivad varttamānaḥ kiṃ dāsyati, atisaṃdhānapradhāno vā, vañcanaivaniṣṭhaḥ, haridrārāgo veti | haridrārāga iva rāgo yasya, na cirasthāyī, mayi virakto yatra gatastatrāpi viraktaḥ punarā gantukāmaḥ kiṃdāsyati, yātkacanakārī vā so'narthamapi kuryād, ityevamavekṣya jñātvā saṃdadhyāt prathame pakṣe, na veti | naiva saṃdadhyāditi dvitīye | ### [38.18](https://indike.org/pramana/in.niti.kama.kamasutra-school.vatsyayana!jayamangala.38.18) tarkayitavya ityupakārāpakārābhyām | ### [38.19](https://indike.org/pramana/in.niti.kama.kamasutra-school.vatsyayana!jayamangala.38.19) anurāgādāgamtukāmaḥ, tatrāniṣkāsitatvād, mama guṇairbhāvito'nurañjito'yaṃ, yo'nyasyāṃ na ramate, yena tato'pi svayamevāpasṛtaḥ | ### [38.20](https://indike.org/pramana/in.niti.kama.kamasutra-school.vatsyayana!jayamangala.38.20) pūrvamayogeneti | anyāyena niṣkāsitaḥ, sa māṃ śolayitveti | anurāgapradarśanenānupraviśya, vairaṃ niryātayitukāmaḥ prayacchannapyahama nayā haṭhānniṣkāsita iti, dhanamabhiyogādveti | asyābhiyogameva kurvatyā mayā dhanaṃ bahupahṛtamākṛṣṭaṃ, saṃprayogaśca kādācitkaḥ kṛtaḥ, taddhanaṃ snehopadarśanena māṃ viśvāsya pratīpamādātukāmaḥ, nirveṣṭukāmo veti | niṣpūrvo viśatirnirvero bhṛtau vartate, idānīṃtanasaṃprayoge tadeva dhanaṃ nirveśaṃ kartukāmonānyadvātukāmaḥ, māṃ vā vartamānāditi | niṣkāsyainaṃ yena saha varte'haṃtasmādvartamānādvātukāmāt saṃdhānena māṃ bhedayati, mā bhūdasyā lābhena yoga iti, svayaṃ dāsyatīti cedāha-tyaktukāma iti | akalyāṇabuddhirvairaniryātanādyabhiprāyaḥ | ### [38.21](https://indike.org/pramana/in.niti.kama.kamasutra-school.vatsyayana!jayamangala.38.21) anyathābuddhī rāgād dātukāmaḥ kālena, na tadānīmeva tasya niṣkāsanenāpāditavaikṛtyatvād, lambhayitavya iti | prāpayitavyo na tu prāpyaḥsvātantryeṇa lāghavāt | ### [38.22](https://indike.org/pramana/in.niti.kama.kamasutra-school.vatsyayana!jayamangala.38.22) eteneti | anantaroktena viśīrṇena vyākhyātaḥ, ayamapi tathaiva tarkayitvā; akalyāṇabuddhirasaṃgheyo'nyathābuddhiḥ kālena, na tadānīmeva lambhayitavya iti | ### [38.23](https://indike.org/pramana/in.niti.kama.kamasutra-school.vatsyayana!jayamangala.38.23) ye'nyatra ye ca na gatāḥ saṃdheyāsteṣūpajapatsu, na tvanupajapatsu lāghavād, anyatra sthiteti | dvidhā-vartamānā, tyājya itarasmiṃśca, kāraṇāpekṣayā svayamupajapet | bahūni kāraṇānyāha- ### [38.24](https://indike.org/pramana/in.niti.kama.kamasutra-school.vatsyayana!jayamangala.38.24) vyalīkārthamiti | vyalīkamaparādho yadanyasyābhigamanaṃ tannimittaṃmayā niṣkāsitaḥ sa punardādātīti, yatnādānetavyaḥ, tato'pi phalena yogāt | ### [38.25](https://indike.org/pramana/in.niti.kama.kamasutra-school.vatsyayana!jayamangala.38.25) itaḥ pravṛttasambhāṣo veti | māmuddiśya pravṛttasambhāṣaḥ, idaṃ te dāsyāmīti, tata iti | yatra gatastasyāḥ sakāśād bhedamavāpsyatīti | ### [38.26](https://indike.org/pramana/in.niti.kama.kamasutra-school.vatsyayana!jayamangala.38.26) kimamyasyā dadāsīti taddarpavighātaṃ kariṣyāmi, yena taddarpo vartamāno vilakṣībhūto niṣkrāmati | ### [38.27](https://indike.org/pramana/in.niti.kama.kamasutra-school.vatsyayana!jayamangala.38.27) arthāgamakālo vā'sya, vaṇijyayā sevayā vā, sthānavṛddhirvā, grāmāderadhikasya lābhād, labdhaṃ vā'nenādhikaraṇamakṣapaṭalādikaṃ, dārairviyuktaḥ, mamedānīmavasaraḥ prāptaḥ, pāratantryādvyāvṛttaḥ, karmasthāneṣu gṛhe vā svatantraḥ sukhaṃ dāsyati, pitrā jīvataiva vibhaktaḥ, bhrātrā pitari mṛte | ### [38.28](https://indike.org/pramana/in.niti.kama.kamasutra-school.vatsyayana!jayamangala.38.28) anena vā pratibaddhamiti | tasya mitratvād, anena saṃdhiṃ kṛtvā saṃkramasthānīyena | ### [38.29](https://indike.org/pramana/in.niti.kama.kamasutra-school.vatsyayana!jayamangala.38.29) vimānito veti | matto viśīrṇaḥ svabhāryayā saṃsṛṣṭaḥ, tayā cāsmadamarṣādavamānito'haṃ cākruṣṭā tameva saṃdhāya, tasyāṃ vikramayiṣyāmi = vigrahaṃ kārayiṣyāmi, ākrośasya niryātanārtham | ### [38.30](https://indike.org/pramana/in.niti.kama.kamasutra-school.vatsyayana!jayamangala.38.30) asya vā viśīrṇasya mitraṃ śaktidravyasaṃpannaṃ maddreṣiṇīmapakartukāmāmama sapatnīṃ vartamānāṃ bhūtapūrvāṃ vā kāmayate, tanmitramadhunā viśīrṇena bhedayiṣyāmi, yena sā lābhena na yokṣyate, māṃ copakariṣyati | ### [38.31](https://indike.org/pramana/in.niti.kama.kamasutra-school.vatsyayana!jayamangala.38.31) calacittatayā veti | ito'nyatra gatastato'nyatra gatastamapi calacittatayā lāghavamāpādayiṣyāmi | svayamupajapedityuktaṃ tasya svarūpamāha— ### [38.32](https://indike.org/pramana/in.niti.kama.kamasutra-school.vatsyayana!jayamangala.38.32) tasyeti | viśīrṇasya, māturdauḥśīlyeneti | mātaivāsyā duḥśīlā, tayā'rthaparatayā tvaṃ niṣkāsitaḥ, nāyikā tvayyanuraktaiva | ### [38.33](https://indike.org/pramana/in.niti.kama.kamasutra-school.vatsyayana!jayamangala.38.33) kevalaṃ paravaśā vartamānena gamyena yaḥ saṃsargaḥ samprayogo nāyikāyāanicchantyā akāmāyā auṣadhapānavad vidveṣaḥ paramārthato yasya darśanapathe'pi na tiṣṭhatīti varṇayeyuḥ | ### [38.34](https://indike.org/pramana/in.niti.kama.kamasutra-school.vatsyayana!jayamangala.38.34) tasyāśceti | nāyikāyāḥ, sābhijñānairiti | abhijñānaṃ vakṣyati, pūrvānurāgairiti | pūrvamaviśīrṇe ye'nurāgā āsaṃstaenaṃ pratyāyayeyurnāyakaṃ· bodhayeyuḥ, tathaiva pratipadyate | ### [38.35](https://indike.org/pramana/in.niti.kama.kamasutra-school.vatsyayana!jayamangala.38.35) tatkṛtopakārasaṃbaddhamiti | nāyakena yaḥ kṛta upakāro'rthenānarthapratīkāreṇa vā tena yuktaṃ syāt kṛtajñatāsūcanārtham | apūrvasyāsambhave viśīrṇapratisaṃdhānamuktaṃ, sambhavati cāpūrve, viśīrṇe copajapati sati, kena saṃdhānaṃ yuktamityāha— ### [38.36](https://indike.org/pramana/in.niti.kama.kamasutra-school.vatsyayana!jayamangala.38.36) apūrveti | viditaśīla iti | saṃvāsena jñātasvabhāvaḥ, dṛṣṭānurāgaśca pūrvamāsaktatvāt, sa hyubhayadharmādhyāsitatvātkāntānuvṛttyā sukhainopacaryata iti sūpacaro na tvapūrvaḥ | ### [38.37](https://indike.org/pramana/in.niti.kama.kamasutra-school.vatsyayana!jayamangala.38.37) nātyarthamarthada iti | arthārthe sandhīyate sa cenna yathāvat kiṃ tena saṃhitena, duḥkhaṃ ca punarviśvāsayituṃ tasya satyapi viditaśīlatve dṛṣṭānurāgattve ca niṣkāsanenotpāditavairūpyāt, sukhenonurajyata iti | taddoṣasyādṛṣṭatvāt, tasya vā niṣpīḍitārthatvāttyarthamarthada ityarthoktam, apūrvo dvividhaḥ—anyaveśyāṃsaṃsṛṣṭo'saṃsṛṣṭaśceti, saṃsṛṣṭo'pi dvividhaḥ—niṣkāsito'niṣkāsitaśca, teṣāṃ sandhānopāyo gamyopavartane draṣṭavyaḥ | ### [38.38](https://indike.org/pramana/in.niti.kama.kamasutra-school.vatsyayana!jayamangala.38.38) puruṣaprakṛtita iti | puruṣasvabhāvāt, kaścidapūrvo'pi durupacaraḥkadaryaśca bhavati, pūrvasaṃsṛṣṭaśca niṣpīḍitārtho'pi dātā, niṣkāsito'pi saviśvāsa iti | saṃkṣepeṇa sandhāne kāraṇaṃ trividhaṃ-nāyikāntarasthaṃ viśīrṇasthaṃ vartamānasthaṃ ceti, tadeva darśayannāha— ### [38.39](https://indike.org/pramana/in.niti.kama.kamasutra-school.vatsyayana!jayamangala.38.39) anyāmiti | bhedayituṃ viśīrṇāt, 'tadanena vimānito vā bhāryayā tameva tasyāṃ vikramayiṣyāmi', 'asya vā mitraṃ madudveṣiṇīṃ kāmayate tadamunā bhedayiṣyāmi' ityubhayamuktaṃ veditavyaṃ, sthitasyopaghātārthamityanena 'varttamānasya vā darpavighātaṃ kariṣyāmi' ityetaduktam, anyato gamyameva veti | anyasyā nāyikāto viśīrṇaṃ bhedayitumityanena ca viśīrṇasthaṃ kāraṇamuktam | saṃprayogārthaṃ viśīrṇaḥ saṃghatte, tādṛśamasti saṃdhānaṃ yatra varttamānamatisaktaṃ viśīrṇaṃ vā'nuraktamapekṣya tadaiva samprayoga iti darśannāha- ### [38.40](https://indike.org/pramana/in.niti.kama.kamasutra-school.vatsyayana!jayamangala.38.40) bibhetīti | yatra yasminsaṃdhidhāne vartamāne'tisaṃsakto'pyanyasya saṃyogādvibheti, saṃyukto'yaṃ kadā- cidapakariṣyatīti, vyalīkāni ca nāyikākṛtānaparādhānnekṣate'vadhīrayatyatisaktatvādeva, bhayāditi | parityāgabhayād bahu dadāti | ### [38.41](https://indike.org/pramana/in.niti.kama.kamasutra-school.vatsyayana!jayamangala.38.41) asaktamiti | yo viśīrṇo'pyanuraktatvādvartamānamasaktamabhinandedvijñātabhāvatvād, yadasyāṃ na rakta iti, saktaṃ paribhaved, alaktakāvasthāṃprāpsyasyacireṇeti, anyadūtānupāte ceti | anyasya sambandhinyāyāti dūte'tiviśārado'tyarthamarthado mā bhūdanyena sandhānamiti | ### [38.42](https://indike.org/pramana/in.niti.kama.kamasutra-school.vatsyayana!jayamangala.38.42) tatreti | tasminsaṃdhāne, pūrvamiti | pūrvasaṃsṛṣṭaṃ viśīrṇamupajāpinaṃ, nārīti | sāmānyābhidhāne'pi prakaraṇādveśyaiva draṣṭavyā, kālena yojayed, na tadaiva samprayojayed, anyathā tadātva eva vartamānenātisaktena phalavatāṃ viśleṣaḥ syād, viśīrṇo'pyatiraktatvāt pratyāśayā kālāntaramapekṣata eva, yadāha- 'bhaveccācchinnasaṃdhāneti | viśorṇena sahetyarthaḥ, na ca saktaṃ parityajet, tadātva eva tasya saphalatvāt | ### [38.43](https://indike.org/pramana/in.niti.kama.kamasutra-school.vatsyayana!jayamangala.38.43) yasya tadātve'nyasmāllābho mahān; na ca samprayogaṃ vinā tatra kiṃpratipattavyamityāha-saktaṃ tviti | vaśinaṃ yathoktakāriṇam, anyataiti | anyamuddiśya, tataśceti | yatra vrajitā saktamevānurañjayet kāntānuvṛttyā tatra sthitatvād, nānyam | pratisandhānāt prāk catuṣṭayaṃ nirūpyamityāha- ### [38.44](https://indike.org/pramana/in.niti.kama.kamasutra-school.vatsyayana!jayamangala.38.44) iti śrīvātsyāyanīye kāmasūtre vaiśike ṣaṣṭhe'dhikaraṇe viśīrṇapratisaṃdhānaṃ caturtho'dhyāyaḥ | āyatimiti | prabhāvaṃ, lābhamāyatyāṃ, tadātve prītiṃ puṣkalāṃ nirvyājaṃtasyātmaviṣaye, sauhṛdamātmanastasmin viṣaye, vicakṣaṇeti | parīkṣaṇe vicakṣaṇā = kuśalā | iti śrīvātsyāyanīyakāmasūtraṭīkāyāṃ yaśodhararacitāyāṃ jayamaṅgalā''khyāyāṃ vaiśike ṣaṣṭhe'dhikaraṇe viśīrṇapratisandhānaṃ caturtho'dhyāyaḥ | ## Linked texts (1) - [Kāmasūtra](https://indike.org/pramana/in.niti.kama.kamasutra-school.vatsyayana.6.4) — Vātsyāyana Mallanāga, Sanskrit --- Source: [https://indike.org/pramana/in.niti.kama.kamasutra-school.vatsyayana!jayamangala.38](https://indike.org/pramana/in.niti.kama.kamasutra-school.vatsyayana!jayamangala.38) · Pramāṇa