[Pramāṇa](https://indike.org/pramana/) › [Indian literature](https://indike.org/pramana/in) › [Polity, Pleasure & Law](https://indike.org/pramana/in.niti) › [Erotics and the Art of Love](https://indike.org/pramana/in.niti.kama) › [Vātsyāyana's Kāmasūtra and its Tradition](https://indike.org/pramana/in.niti.kama.kamasutra-school) › [Kāmasūtra](https://indike.org/pramana/in.niti.kama.kamasutra-school.vatsyayana) › [Jayamangala](https://indike.org/pramana/in.niti.kama.kamasutra-school.vatsyayana!jayamangala) › 4 # Kamasutra 4 Jayamaṅgalā 4 - **Language:** Sanskrit ### [4.86](https://indike.org/pramana/in.niti.kama.kamasutra-school.vatsyayana!jayamangala.4.86) iyamiti vakṣyamāṇo granthaḥ | prakriyante prastūyante yeṣvarthā iti prakaraṇāni teṣāmadhikaraṇānāṃ ca samuddeśaḥ saṃkṣepeṇābhidhānam | śāstrasya saṃgrahaḥ, trivargapratipattiḥ, ityādaya uktārthāḥ tatsāhacaryād granthabhāgā api tatsaṃmākhyāḥ, yathā- kaṃsa(1)badhaṃ kāvyamiti, śāstraṃ cedaṃ tantramāvāpaśceti dvidhā sthitam , tatra tanyate janyate ratiryena tattantramāliṅganādi, tadupadiśyate yena tadapi tantraṃ sāṃprayogikamadhikaraṇam , samantādāvāpyante striyaḥ puruṣāśca yena sa āvāpaḥ samāgamopāya ityarthaḥ, sayenopadiśyate tadapyāvāpaḥ kanyāsaṃprayuktakādyadhikaraṇacatuṣṭayam , tatra tantrāvāpānuṣṭhānaṃ na sādhāraṇānuṣṭhānaṃ vineti prāksādhāraṇamucyate, aupaniṣadikaṃ tu tantrāvāpābhyāmasiddhe vyāpiyata ityante vakṣyati, tadubhayamapi tantrāvāpāntargatameva tadaṅgatvāt , tatra sādhāraṇe śāstrasaṃgrahaprakaraṇamādāvuktam, tatra śāstrasyaṃ saṃgṛhyamāṇatvāt || 20—86 || ṣaṭtriṃśadityādinā svaśāstrasyāvayavasamudāyābhyāṃ saṃkhyānamāhatatrādhyāyasaṃkhyānaṃ pūrvaśāstrebhya idaṃ stokamiti darśanārtham , prakara- ṇādhikaraṇasaṃkhyānamanyanirapekṣārtham, ślokasaṃkhyānamahīnādhikatvajñāpanārtham | uttaragranthasandhānāyāha— ### [4.87](https://indike.org/pramana/in.niti.kama.kamasutra-school.vatsyayana!jayamangala.4.87) saṃkṣepamiti | asyeti śāstrasya | vistaro'taḥ pravakṣyate saṃkṣepādūrdhvam | kimarthamevaṃ śāstravinyāsa ityata āha—iṣṭaṃ hīti | loke ye śāstre'dhikṛtāste vidvāṃsaḥ, teṣāṃ saṃkṣepavistarābhyāṃ śāstrasya manasi dhāraṇamiṣṭam, prajñātaprakaraṇārthakramatvādasaṃmoho yathā'bhilaṣitaprakaraṇārthapratyavamarśaśca syād | iti śāstrasaṃgrahaḥ prathamaṃ prakaraṇam | 1 || iti śrīvātsyānīyakāmasūtraṭīkāyāṃ yaśodhararacitāyāṃ jayamaṅgalāyāṃ sādhāraṇe prathame'dhikaraṇe śāstrasaṅgrahaḥ prathamo'dhyāyaḥ | 1 || dvitīyo'dhyāyaḥ | trivargapratipattiphalaṃ śāstram, tasminnapratipattau vipratipattau vā tadupāyaparyyeṣaṇamapi yuktam, tasmācchāstrasaṃgrahādanantaraṃ trivargapratipattirucyata iti prakaraṇasambandhaḥ | uddeśāpekṣayā ca sambandhitve kathamuddeśa iti cintyam, pratipattistrividhā-anuṣṭhāna, mavabodhaḥ, saṃpratipatti, śceti | tatra prādhānyādanuṣṭhānamadhikṛtyāha— ## Linked texts (1) - [Kāmasūtra](https://indike.org/pramana/in.niti.kama.kamasutra-school.vatsyayana.1.1.15) — Vātsyāyana Mallanāga, Sanskrit --- Source: [https://indike.org/pramana/in.niti.kama.kamasutra-school.vatsyayana!jayamangala.4](https://indike.org/pramana/in.niti.kama.kamasutra-school.vatsyayana!jayamangala.4) · Pramāṇa