Pramāṇa · Search · About · API

Anvitarthaprakashika 129

Anvitārthaprakāśikā 129

Language
Sanskrit

Contents

129.1

śrīśuka uvāca || adhastāt savituryojanāyute svarbhānurnakṣatravaccaratītyeke

129.2

yo'sāvamaratvaṃ grahatvaṃ cālabhata bhagavadanukampayā svayamasurāpasadaḥ saiṃhikeyo hyatadarhaḥ

129.3

tasya tāta janma karmāṇi copariṣṭād vakṣyāmaḥ

129.4

yadadastaraṇermaṇḍalaṃ pratapatastadvistarato yojanāyutamācakṣate dvādaśasahasraṃ somasya trayodaśasahasraṃ rāhorryaḥ parvāṇi

129.5

tadvyavadhānakṛdvairānubandhaḥ sūryācandramasāvabhidhāvati

129.6

tanniśamyobhayatrāpi bhagavatā rakṣaṇāya prayuktaṃ sudarśanaṃ nāma bhāgavataṃ dayitamastraṃ tattejasā durviṣahaṃ muhuḥ parivartamānamabhyavasthito muhūrttamudvijamānaścakitahṛdaya
ārādeva nivartate

129.7

taduparāgamivi vadanti lokāḥ

129.8

tato'dhastāt siddhacāraṇavidyādharāṇāṃ sadanāni tāvanmātra eva

129.9

tato'dhastāt yakṣarakṣaḥpiśācapretabhūtagaṇānāṃ vihārājiramantarikṣaṃ yāvadvāyuḥ pravāti yāvanmeghā upalabhyante

129.10

tato'dhastāllakṣayojanāntara
iyaṃ pṛthivī yāvaddhaṃsābhāsaśyenasuparṇādayaḥ patatripravarā utpatantīti

129.11

upavarṇitaṃ bhūmeryathā sanniveśāvasthānam

129.12

avanerapyadhastāt
sapta bhūvivarā ekaikaśo yojanāyutāntareṇāyāmavistāreṇopaklṛptāḥ

129.13

atalaṃ vitalaṃ sutalaṃ talātalaṃ mahātalaṃ rasātalaṃ pātālamiti

129.14

eteṣu hi bilasvargeṣu svargādapyadhikakāmabhogaiśvaryānandavibhūtibhiḥ susamṛddhabhavanodyānākrīḍavihāreṣu daityadānavakādraveyā nityapramuditānuraktakalatrāpatyabandhusuhṛdanucarā gṛhapataya īśvarādapyapratihatakāmā māyāvinodā nivasanti

129.15

yeṣu mahārāja mayena māyāvinā vinirmitāḥ puro
nānāmaṇipravarapravekaviracitavicitrabhavanaprākāragopurasabhā caityacatvarāyatanādibhirnāgāsuramithunapārāvataśukasārikākīrṇakṛtrimabhūmibhirvivareśvaragṛhottamaiḥ samalaṃkṛtāścakāsati

129.16

udyānāni cātitarāṃ manaindriyānandibhiḥ kusumaphalastabakasubhagakisalayāvanataruciraviṭapaviṭapināṃ
latā''liṅgitānāṃ śrībhiḥ samithunavividhavihaṅgamajalāśayānāmamalajalapūrṇānāṃ jhaṣakulollaṅghanakṣubhitanīranīrajakumudakuvalayakahāranīlotpalalohitaśatapatrādivaneṣu kṛtaniketanānāmekavihārākulamadhuravividhasvanādibhirindriyotsavairamaralokaśriyamatiśayitāni

129.17

yatra ha vāva na
bhayamahorātrādibhiḥ kālavibhāgairupalakṣyate

129.18

yatra hi mahāhipravaraśiromaṇayaḥ sarve tamaḥ prabādhante

129.19

na vā eteṣu vasatāṃ
divyauṣadhirasarasāyanānnapānasnānādibhirādhayo vyādhayo valīpalitajarādayaśca dehavaivarṇyadaurgandhyasvedaklamaglāniriti vayo'vasthāśca bhavanti

129.20

nahi teṣāṃ kalyāṇānāṃ prabhavati kutaśca na mṛtyurvinā bhagavattejaścakrāpadeśāt

129.21

yasminpraviṣṭe'suravadhūnāṃ prāyaḥ puṃsavanāni bhayādeva
sravanti patanti ca

129.22

athātale mayaputro'suro balo nivasati

129.23

yena ha vā iha sṛṣṭāḥ ṣaṇṇavatirmāyāḥ kāścanādyāpi māyāvino
dhārayanti

129.24

yasya ca jṛmbhamāṇasya mukhatastrayaḥ strīgaṇā udapadyanta

129.25

svairiṇyaḥ kāminyaḥ puṃścalya iti

129.26

yā vai bilāyanaṃ
praviṣṭaṃ puruṣaṃ rasena hāṭakākhyena sādhayitvā svavilāsāvalokanānurāgasmitasaṃlāpopagūhanādibhiḥ svairaṃ kila ramayanti

129.27

yasminnupayukte
puruṣa īśvaro'haṃ siddho'hamiti ayutamahāgajabala ātmānamabhimanyamānaḥ katthate madāndha iva

129.28

tato'dhastādvitale haro bhagavān hāṭakeśvaraḥ
svapārṣadabhūtagaṇāvṛtaḥ prajāpatisargopabṛṃhaṇāya bhavo bhavānyā saha mithunībhūta āste

129.29

yataḥ pravṛttā saritpravarā hāṭakī nāma bhavayorvīryeṇa

129.30

yantra citrabhānurmātariśvanā samidhyamāna ojasā pivati

129.31

tanniṣṭhyūtaṃ hāṭakākhyaṃ suvarṇaṃ bhūṣaṇenāsurendrāvarodheṣu puruṣāḥ saha
puruṣībhirdhārayanti

129.32

tato'stātsutala udāraśravāḥ puṇyaśloko virocanātmajo balirbhagavatā mahendrasya priyaṃ cikīrṣamāṇenāditerlabdhakāyo
bhūtvā vaṭuvāmanarūpeṇa parākṣiptasvalokatrayo bhagavadanukampayaiva punaḥ praveśita indrādiṣvavidyamānayā susamṛddhyā śriyā'bhijuṣṭaḥ svadharmeṇārādhayaṃstameva
bhagavantamārādhanīyamapagatasādhvasa āste'dhunāpi

129.33

no evaitatsākṣātkāroṃ bhūmidānasya yat tadbhagavatyaśeṣajīvanikāyānāṃ jīvabhūtātmabhūte paramātmani vāsudeve tīrthatame sarvajīvaniyantaryātmārāme pātra upapanne parayā śraddhayā paramādarasamāhitamanasā saṃpratipāditasya sākṣādapavargadvārasya yadvilanilayaiśvaryam

129.34

yasya ha vāva kṣutapatanapraskhalanādiṣu vivaśaḥ sakṛnnāmābhigṛṇan puruṣaḥ karmabandhanamañjasā vidhunoti

129.35

yasya haiva pratibādhanaṃ mumukṣavo'nyathaivopalabhante

129.36

tadbhaktānāmātmavatāṃ sarveṣāmātmanyātmada ātmatayaiva

129.37

na vai bhagavān nūnamamuṣyānujagrāha

129.38

yaduta punarātmānusmṛtimoṣaṇaṃ māyāmayabhogaiśvaryamevātanuteti

129.39

yadbhagavatā'nadhigatānyopāyena yācñācchalenāpahṛtasvaśarīrāvaśeṣitalokatrayo varuṇapāśaiśca saṃprati mukto giridaryā cāpaviddha iti hovāca

129.40

nūnaṃ batāyaṃ bhagavānartheṣu na niṣṇāto yo'sāvindro yasya sacivo mantrāya vṛta ekāntato bṛhaspatistamatihāya svayamupendreṇātmānamayācata || ātmanaścāśiṣo no eva taddāsyamiti gambhīravayasaḥ kālasya manvantaraparivṛtaṃ kiyallokatrayamidam

129.41

yasyānudāsyamevāsmatpitāmahaḥ kila vavre natu svapitryaṃ yadutākutobhayaṃ padaṃ dīyamānaṃ
bhagavataḥ paramiti bhagavatoparate khalu svapitari

129.42

tasya mahānubhāvasyānupathamamṛjitakaṣāyaḥ ko vā'smadvidhaḥ parihīṇabhagavadanugraha upajigamiṣatīti

129.43

tasyānucaritamuttarasmādvistariṣyate

129.44

yasya bhagavān svayamakhilajagadgururnārāyaṇo dvāri gadāpāṇiravatiṣṭhate
nijajanānukampitahṛdayo yenāṅguṣṭhena padā daśakandharo yojanāyutāyutaṃ digvijaya uccāṭitaḥ

129.45

tato'dhastāttalātale mayo nāma dānavendrastripurādhipatirbhagavatā purāriṇā trilokīśaṃ cikīrṣuṇā nirdagdhasvapuratrayastatprasādāllabdhapado māyāvināmācāryo mahādevena parirakṣito vigatasudarśanabhayo mahīyate

129.46

tato'dhastānmahātale kādraveyāṇāṃ sarpāṇāṃ naikaśirasāṃ krodhavaśo nāma gaṇaḥ

129.47

kuhakatakṣakakāliyasuṣeṇādipradhānā mahābhogavantaḥ patattrirājādhipateḥ || puruṣavāhādanavaratamudvijamānāḥ svakalatrāpatyasuhṛtkuṭumbasaṅgena kacit pramattā viharanti

129.48

tato'dhastādrasātale daiteyā dānavāḥ paṇayo nāma nivātakavacāḥ kāleyā hiraṇyapuravāsina iti vibudhapratyanīkā utpattyā mahaujaso mahāsāhasino
bhagavataḥ sakalalokānubhāvasya harereva tejasā pratihatabalāvalepā bileśayā iva vasanti

129.49

ye vai saramayendradūtyā vāgbhirmantravarṇābhirindrādvibhyati

129.50

tato'dhastāt pātāle nāgalokapatayo vāsukipramukhāḥ śaṅkhakulikamahāśaṅkhaśvetadhanaṃjayadhṛtarāṣṭraśaṅkhacūḍakambalāśvataradevadacādayo mahābhogino mahāmarṣā nivasanti teṣāmu ha vai pañcasaptadaśaśatasahasraśīrṣāṇām

129.51

phaṇāsu viracitā mahāmaṇayo rociṣṇavaḥ pātālavivaratimiranikaraṃ svarociṣā vidhamanti

129.51.p1

iti śrībhāgavate mahāpurāṇe pañcamaskandhe atalādivilavarṇanaṃ nāma caturviṃśatitamo'dhyāyaḥ

Linked texts (5)