Anvitarthaprakashika 261
Anvitārthaprakāśikā 261
- Language
- Sanskrit
Contents
- 261.38 — 1 part
261.1
śrīśuka uvāca || atha vrajannrājapathena mādhavaḥ striyaṃ gṛhītāṃgavilepabhājanām || vilokya kubjāṃ yuvatīṃ varānanāṃ papraccha yāntīṃ prahasannrasapradaḥ
261.2
kā tvaṃ varorvetaduhānulepanaṃ kasyāṅgane vā kathayasva sādhu naḥ || dehyāvayoraṅgavilepamuttamaṃ śreyastataste na cirādbhaviṣyati
261.3
sairandhryuvāca || dāsyasmyahaṃ suṃdara kaṃsasammatā trivakranāmā hyanulepakarmaṇi || madbhāvitaṃ bhojapateratipriyaṃ vinā yuvāṃ ko'nyatamastadarhati
261.4
rūpapeśalamādhuryahasitālāpavīkṣitaiḥ || dharṣitātmā dadau sāṃdramubhayoranulepanam
261.5
tatastāvaṅgarāgeṇa svavarṇaitaraśobhinā || samprāptaparabhāgena
śuśubhāte'nurāñjitau
261.6
prasanno bhagavānkubjāṃ trivakrāṃ rucirānanām || ṛjvīṃ kartuṃ manaścakre darśayandarśane phalam
261.7
padbhyāmākramya
prapade dvyaṅgulyuttānapāṇinā || pragṛhya cubuke'dhyātmamudanīnamadacyutaḥ
261.8
sā tadarjusamānāṅgī bṛhacchroṇipayodharā || mukundasparśanātsadyo
babhūva pramadottamā
261.9
tato rūpaguṇaudāryasampannā prāha keśavam || uttarīyāntamākṛṣya smayantī jātahṛcchayā
261.10
ehi vīra gṛhaṃ yāmo na
tvāṃ tyaktumihotsahe || tvayonmathitacittāyāḥ prasīda puruṣarṣabha
261.11
evaṃ striyā yācyamānaḥ kṛṣṇo rāmasya paśyataḥ || mukhaṃ vīkṣyānugānāṃ ca
prahasaṃstāmuvāca ha
261.12
eṣyāmi te gṛhaṃ subhrūḥ puṃsāmādhivikarśanam || sādhitārtho'gṛhāṇāṃ naḥ pānthānāṃ tvaṃ parāyaṇam
261.13
visṛjya
mādhvyā vāṇyā tāṃ vrajanmārge vaṇikpathaiḥ || nānopāyanatāmbūlasraggandhaiḥ sāgrajo'rcitaḥ
261.14
taddarśanasmarakṣobhādātmānaṃ nāvidanstriyaḥ
visrastavāsaḥkabaravalayālekhyamūrtayaḥ
261.15
tataḥ paurānapṛcchamāno dhanuṣaḥ sthānamacyutaḥ || tasminpraviṣṭo dadṛśe dhanūraindramivādbhutam
261.16
puruṣairbahubhirguptamarcitaṃ paramarddhimat || vāryamāṇo nṛbhiḥ kṛṣṇaḥ prasahya dhanurānade
261.17
kareṇa vāmena salīlamuddhataṃ sajyaṃ ca kṛtvā nimiṣeṇa
paśyatām || nṛṇāṃ vikṛṣya prababhañja madhyato yathekṣudaṇḍaṃ madakaryurukramaḥ
261.18
dhanuṣo bhajyamānasya śabdaḥ khaṃ rodasī diśaḥ || pūrayāmāsa yaṃ śrutvā
kaṃsastrāsamupāgamat
261.19
tadrakṣiṇaḥ sānucarāḥ kupitā ātatāyinaḥ || grahītukāmā āvṛtrurgṛhyatāṃ badhyatāmiti
261.20
atha tāndurabhiprāyānvilokya balakeśavau || kruddhau dhanvan ādāya śakale tāṃśca jaghnatuḥ
261.21
balaṃ ca kaṃsaprahitaṃ hatvā śālāmukhāttataḥ || niṣkramya ceratuṣṭa̍ṣṭau nirīkṣya purasampadaḥ
261.22
tayostadadbhutaṃ vīryaṃ niśamya puravāsinaḥ || tejaḥ prāgalbhyaṃ rūpaṃ ca menire vibudhottamau
261.23
tayorvicaratoḥ svairamādityo'stamupeyivān || kṛṣṇarāmau vṛtau gopaiḥ purājchakaṭamīyatuḥ
261.24
gopyo mukundavigame virahāturā yā āśāsatāśiṣa ṛtā madhupuryabhūvan || sampaśyatāṃ puruṣabhūṣaṇagātralakṣmīṃ hitvetarānnu bhajataścakame'yanaṃ śrīḥ
261.25
avaniktāṃghriyugalau bhuktvā kṣīropasecanam || uṣatustāṃ sukhaṃ rātriṃ jñātvā kaṃsacikīrṣitam
261.26
kaṃsastu dhanuṣo bhaṅgaṃ rakṣiṇāṃ svabalasya ca || vadhaṃ niśamya govindarāmavikrīḍitaṃ
param
261.27
dīrghaprajāgaro bhīto durnimittāni durmatiḥ || bahūnyacaṣṭobhayathā mṛtyordautyakarāṇi ca
261.28
adarśanaṃ svaśirasaḥ pratirūpe ca
satyapi || asatyapi dvitīye ca dvairūpyaṃ jyotiṣāṃ tathā
261.29
chidrapratītiśchāyāyāṃ prāṇaghoṣādyupaśrutiḥ || svarṇapratītirvṛkṣeṣu svapadānā madarśanam
261.30
svapne pretapariṣvaṅgaḥ kharayānaṃ viṣādanam || yāyānnaladamālyekastailābhyakto digambaraḥ
261.31
anyāni cetthaṃbhūtāni svapnajāgaritāni ca || paśyanmaraṇasantrasto nidrāṃ lebhe na cintayā
261.32
vyuṣṭāyāṃ niśi kauravya sūrye cāṅkacaḥ samutthite || kārayāmāsa vai kaṃso
mallakrīḍāmahotsavam
261.33
ānarcuḥ puruṣā raṅgaṃ tūryabheryaśca jaghnire || mañcāścālaṃkṛtāḥ sragbhiḥ patākācailatoraṇaiḥ
261.34
teṣu paurā jānapadā brahmakṣatrapurogamāḥ || yathopajoṣaṃ viviśu rājānaśca kṛtāsanāḥ
261.35
kaṃsaḥ parivṛto'mātyai rājamañca upāviśat || maṇḍaleśvaramadhyastho
hṛdayena vidūyatā
261.36
vādyamāneṣu tūryeṣu mallatālottareṣu ca || mallāḥ svalaṃkṛtā dṛptāḥ sopādhyāyāḥ samāgatāḥ
261.37
cāṇūro muṣṭikaḥ
kūṭaḥ śalastośala eva ca || ta āsedurupasthānaṃ valguvādyapraharṣitāḥ
261.38
nandagopādayo gopā bhojarājasamāhutāḥ || niveditopāyanāste
ekasminmañca āviśan
261.38.p1
iti śrīmadbhāgavate mahāpurāṇe daśamaskandhe pūrvārdhe mallaraṅgopavarṇanaṃ nāma dvicatvāriṃśo'dhyāyaḥ
Linked texts (9)
- Bhāgavatapurāṇa — Vyāsa, Sanskrit
- Critical edition (BORI) — Sanskrit
- Daśamaskandha — Sanskrit
- Toḍararāja — Nīlakaṇṭha Dīkṣita, Sanskrit
- Ṭoḍarānanda — Ṭoḍaramalla 1564, Sanskrit
- Bhāgavatapurāṇa daśamaskandha — Sanskrit
- Bhāgavatamāhātmya — Kṛṣṇacandra, Sanskrit
- Bhāgavatakathāsāptāhika — Śrīrāmamūrti Śāstrī Paurāṇika, Sanskrit
- Vṛndāvanakhaṇḍe Gargasahhitā — Sanskrit