Pramāṇa · Search · About · API

Anvitarthaprakashika 296

Anvitārthaprakāśikā 296

Language
Sanskrit

Contents

296.1

rājovāca || ajātaśatrostaṃ dṛṣṭvā rājasūyamahodayam || sarve mumudire brahmannṛdevā ye samāgatāḥ

296.2

duryodhanaṃ varjayitvā rājānaḥ
sarṣayaḥ surāḥ || iti śrutaṃ no bhagavaṃstatra kāraṇamucyatām

296.3

ṛṣiruvāca || pitāmahasya te yajñe rājasūye mahātmanaḥ || bāndhavāḥ paricaryāyāṃ
tasyāsanpremabandhanāḥ

296.4

bhīmo mahānasādhyakṣo dhanādhyakṣaḥ suyodhanaḥ || sahadevastu pūjāyāṃ nakulo dravyasādhane

296.5

guruśuśrūṣaṇe jiṣṇuḥ
kṛṣṇaḥ pādāvanejane || pariveṣaṇe drupadajā karṇo dāne mahāmanāḥ

296.6

yuyudhāno vikarṇaśca hārdikyo vidurādayaḥ || bāhlīkaputrā bhūryādyā ye ca
santardanādayaḥ

296.7

nirūpitā mahāyajñe nānākarmasu te tadā || pravartante sma rājendra rājñaḥ priyacikīrṣavaḥ

296.8

ṛtviksadasyabahuvitsu sumahattameṣu sviṣṭeṣu sūnṛtasamarhaṇadakṣiṇābhiḥ || caidye ca sātvatapateścaraṇaṃ praviṣṭe cakrustatastavabhṛthasnapanaṃ dhunadyām

296.9

mṛdaṅgaśaṅkhapaṇavadhundhuryānakagomukhāḥ || vāditrāṇi vicitrāṇi nedurāvabhṛthotsave

296.10

nartakyo nanṛtuhṛṣṭā gāyakā yūthaśo jaguḥ || vīṇāveṇuttalonnādasteśāṃ sa divamaspṛśat

296.11

citradhvajapatākāgrairibhendrasyandanāśvabhiḥ || svalaṃkṛtairbhaṭairbhūpā niryayū rukmamālinaḥ

296.12

yadusṛñjayakāmbojakurukekayakosalāḥ
kampayanto bhuvaṃ sainyairyajamānapuraḥsarāḥ

296.13

sadasyartvigdvijaśreṣṭhā brahmaghoṣeṇa bhūyasā || devarṣipitṛgandharvāstuṣṭuvuḥ puṣpavarṣiṇaḥ

296.14

svalaṃkṛtā
narā nāryo gandhasragbhūṣaṇāvaraiḥ || vilimpantyo'bhiṣiñcantyo vijahurvividhai rasaiḥ

296.15

tailagorasagandhodaharidraiḥ sāndrakuṅkumaiḥ || pumbhirliptāḥ
pralimpantyo vijahurvārayoṣitaḥ

296.16

guptā nṛbhirnirgamannupalabdhumetaddevyo yathā divi vimānavarairnṛ devyaḥ || tā mātulaiyasakhibhiḥ pariṣiktyamānāḥ savrīḍahāsavikasadvadanā virejuḥ

296.17

tā devarānuta sakhīnasiṣicurdatībhiḥ klinnāmbarā vivṛtagātrakucorumadhyāḥ || autsukyamuktakavarāccyavamānamālyāḥ kṣobhaṃ dadhurmaladhiyāṃ rucirairvihāraiḥ

296.18

sa samrāḍrathamārūḍhaḥ sadaśvaṃ rukmamālinam || vyarocata svapatnībhiḥ kriyābhiḥ
kraturāḍiva

296.19

patnīsaṃyājāvabhṛthyaiścaritvā te tamṛtvijaḥ || ācāntaṃ snāpayāñcakrurgaṅgāyāṃ saha kṛṣṇayā

296.20

devadundubhayo nedurnaradundubhibhiḥ samam || mumucuḥ puṣpavarṣāṇi devarṣipitṛmānavāḥ

296.21

sasnustatra tataḥ sarve varṇāśramayutā narāḥ || mahāpātakyapi yataḥ sadyo mucyeta
kilbiṣāt

296.22

atha rājā'hate kṣaume paridhāya svalaṅkṛtaḥ || ṛtviksadasyaviprādīnānarccābharaṇāmbaraiḥ

296.23

bandhujñātinṛpānmitrasuhṛdo'nyāṃśca sarvaśaḥ || abhīkṣṇaṃ pūjayāmāsa nārāyaṇaparo nṛpa

296.24

sarve janāḥ suraruco maṇikuṇḍalasraguṣṇīṣakañcukadukūlamahārghahārāḥ || nāryaśca
kuṇḍalayugālakavṛndajuṣṭavaktraśriyaḥ kanakamekhalayā virejuḥ

296.25

athartvijo mahāśīlāḥ sadasyā brahmavādinaḥ || brahmakṣatriyaviṭśūdrā rājāno
ye samāgatāḥ

296.26

devarṣipitṛbhūtāni lokapālāḥ sahānugāḥ || pūjitāstamanujñāpya svadhāmāni yayurnṛpa

296.27

haridāsasya rājarṣe rājasūyamahodayam || naivātṛpyanpraśaṃsantaḥ pibanmartyo'mṛtaṃ yathā

296.28

tato yudhiṣṭhiro rājā suhṛtsambandhibāndhavān || premṇā nivāsayāmāsa kṛṣṇaṃ
ca tyāgakātaraḥ

296.29

bhagavānapi tatrāṅga nyavātsīttatpriyaṅkaraḥ || prasthāpya yaduvīrām̐śca sāmbādīṃśca kuśasthalīm

296.30

itthaṃ rājā dharmasuto
manorathamahārṇavam || sudustaraṃ samuttīrya vṛṣṇīnāsīdgatajvaraḥ

296.31

ekadā'ntaḥpuraṃ tasya vīkṣya duryodhanaḥ śriyam || atapyadrājasūyasya mahitvaṃ
cācyutātmanaḥ

296.32

yasminnarendraditijendrasurendralakṣmīrnānā vibhānti kila viśvasṛjopaklṛptāḥ || tābhiḥ patīndrupadarājasutopatasthe yasyāṃ
viṣaktahṛdayaḥ kururāḍatapyat

296.33

yasmiṃstadā madhupatermahiṣīsahasraṃ śroṇībhareṇa śanakaiḥ kvaṇadaṅghriśobham || madhye sucārukucakuṃkumaśoṇahāraṃ
śrīmanmukhaṃ pracalakuṇḍalakuntalāḍhyam

296.34

sabhāyāṃ mayaklṛptāyāṃ kvāpi dharmasuto'dhirāṭ || vṛto'nujairbandhubhiśca kṛṣṇenāpi svacakṣuṣā

296.35

āsīnaḥ kāñcane sākṣādāsane maghavāniva || pārameṣṭhyaśriyā juṣṭaḥ stūyamānaśca bandibhiḥ

296.36

tatra duryodhano mānī parīto bhrātṛbhirnṛpa
kirīṭamālī nyaviśadasihastaḥ kṣipannuruṣā

296.37

sthale'bhyagṛhṇādvastrāntaṃ jalaṃ matvā sthale'patat || jale ca sthalavadbhrāntyā mayamāyāvimohitaḥ

296.38

jahās bhīmastaṃ dṛṣṭvā striyo nṛpatayo'pare || nivāryamāṇā apyaṅga rājñā kṛṣṇānumoditāḥ

296.39

sa vrīḍito'vāgvadano ruṣā jvalanniṣkramya tūṣṇīṃ prayayau gajāhvayam || hāheti śabdaḥ sumahānabhūtsatāmajātaśatrurvimanā ivābhavat

296.40

babhūva tūṣṇīṃ bhagavānbhuvo bharaṃ samujjihīrṣurbhramati sma yadṛdṛśā

296.41

etatte'bhihitaṃ rājanyatpṛṣṭo'hamiha tvayā || suyodhanasya daurātmyaṃ rājasūye mahākratau

296.41.p1

iti śrīmadbhāgavate mahāpurāṇe daśamaskandhe uttarārdhe duryodhanamānabhaṅgo nāma pañcasaptatitamo'dhyāyaḥ

Linked texts (6)