Pramāṇa · Search · About · API

Anvitarthaprakashika 32

Anvitārthaprakāśikā 32

Language
Sanskrit

Contents

32.1

sūta uvāca || vaiyāsakeriti vacastattvaniścayamātmanaḥ || upadhārya matiṃ kṛṣṇe auttareyaḥ satīṃ vyadhāt

32.2

ātmajāyāsutāgārapaśudraviṇabandhuṣu || rājye cāvikale nityaṃ nirūḍhāṃ mamatāṃ jahau

32.3

papraccha cemamevārthaṃ yanmāṃ pṛcchatha sattamāḥ || kṛṣṇānubhāvaśravaṇe śraddadhāno mahāmanāḥ

32.4

saṃsthāṃ vijñāya saṃnyasya karma traivargikaṃ ca yat || vāsudeve bhagavati ātmabhāvaṃ dṛḍhaṃ gataḥ

32.5

rājovāca || samīcīnaṃ vaco brahmansarvajñasya tavānagha || tamo viśīryate mahyaṃ hareḥ kathayataḥ kathām

32.6

bhūya eva vivitsāmi bhagavānātmamāyayā || yathedaṃ sṛjate viśvaṃ durvibhāvyamanīśvaraiḥ || yathā
gopāyati viśvaṃ yathā saṃyacchate punaḥ

32.7

yāṃ yāṃ śaktimupāśritya puruśaktiḥ paraḥ pumān || ātmānaṃ krīḍayankrīḍankaroti vikaroti ca

32.8

nūnaṃ bhagavato brahmanhareradbhutakarmaṇaḥ || durvibhāvyamivābhāti kavibhiścāpi ceṣṭitam

32.9

yathā guṇāṃstu prakṛteryugapatkramaśo'pi vā || bibharti
bhūriśastvekaḥ kurvankarmāṇi janmabhiḥ

32.10

vicikitsitametanme bravītu bhagavānyathā || śabde brahmaṇi niṣṇātaḥ parasmiṃśca bhavānkhalu

32.11

sūta uvāca || ityupāmantrito rājñā guṇānukathane hareḥ || hṛṣīkeśamanusmṛtya prativaktuṃ pracakrame

32.12

śrīśuka uvāca || namaḥ parasmai puruṣāya
bhūyase sadbhavasthānanirodhalīlayā || gṛhītaśaktitritayāya dehināmantarbhavāyānupalakṣyavartmane

32.13

bhūyo namaḥ saddvṛjinacchide'satāmasambhavāyākhilasattvamūrtaye || puṃsāṃ punaḥ pāramahaṃsya āśrame vyavasthitānāmanumṛgyadāśuṣe

32.14

namo namaste'stvṛṣabhāya sātvatāṃ vidūrakāṣṭhāya muhuḥ
kuyoginām || nirastasāmyātiśayena rādhasā svadhāmani brahmaṇi raṃsyate namaḥ

32.15

yatkīrtanaṃ yatsmaraṇaṃ yadīkṣaṇaṃ yadvandanaṃ yacchravaṇaṃ yadarhaṇam
lokasya sadyo vidhunoti kalmaṣaṃ tasmai subhadraśravase namo namaḥ

32.16

vicakṣaṇā yaccaraṇopasādanātsaṅgaṃ vyudasyobhayato'ntarātmanaḥ || vindanti hi
brahmagatiṃ gataklamāstasmai subhadraśravase namo namaḥ

32.17

tapasvino dānaparā yaśasvino manasvino mantravidaḥ sumaṅgalāḥ || kṣemaṃ na vindanti vinā
yadaparṇaṃ tasmai subhadraśravase namo namaḥ

32.18

kirātahūnāndhrapulindapulakasā ābhīrakaṅkā yavanāḥ khasādayaḥ || ye'nye ca pāpā yadupāśrayāśrayāḥ
śudhyanti tasmai prabhaviṣṇave namaḥ

32.19

sa eṣa ātmā''tmavatāmadhīśvarastrayīmayo dharmamayastapomayaḥ || gatavyalīkairajaśaṃkarādibhirvitarkyaliṅgo bhagavānprasīdatām

32.20

śriyaḥ patiryajñapatiḥ prajāpatirdhiyāṃ patirlokapatirdharāpatiḥ || patirgatiścāndhakavṛṣṇisātvatāṃ prasīdatāṃ me bhagavānsatāṃ patiḥ

32.21

yadaṅghyanudhyānasamādhidhautayā dhiyā'nupaśyanti hi tattvamātmanaḥ || vadanti caitatkavayo yathārucaṃ sa me mukundo bhagavānprasīdatām

32.22

pracoditā yena purā sarasvatī vitanvatā'jasya satīṃ smṛtiṃ hṛdi || svalakṣaṇā prādurabhūtkilā''syataḥ sa me ṛṣīṇāmṛṣabhaḥ prasīdatām

32.23

bhūtairmahadbhirya imāḥ puro vibhurnirmāya śete yadamūṣu pūruṣaḥ || bhuṅkte guṇānṣoḍaśa ṣoḍaśātmakaḥ so'laṃkṛṣīṣṭa bhagavānvacāṃsi me

32.24

namastasma
bhagavate vāsudevāya vedhase || papurjñānamayaṃ saumyā yanmukhāmburuhāsavam

32.25

etadevātmabhū rājannāradāya vipṛcchate || vedagarbho'bhyadhātsākṣādyadāha hariātmanaḥ

32.25.p1

iti śrīmadbhāgavate mahāpurāṇe dvitīyaskandhe caturtho'dhyāyaḥ

Linked texts (4)