Pramāṇa · Search · About · API

Anvitarthaprakashika 320

Anvitārthaprakāśikā 320

Language
Sanskrit

Contents

320.1

brāhmaṇa uvāca || parigraho hi duḥkhāya yadyatpriyatamaṃ nṛṇām || anantaṃ sukhamāpnoti tadvidvānyastvakiñcanaḥ

320.2

sāmiṣaṃ kuraraṃ jaghnurbalino ye nirāmiṣāḥ || tadāmiṣaṃ parityajya sa sukhaṃ samavindata

320.3

na me mānāpamānau sto na cintā gehaputriṇām || ātmakrīḍa ātmaratirvicarāmīha bālavat

320.4

dvāveva cintayā muktau paramānanda āplutau || yo vimugdho jaḍo bālo yo guṇebhyaḥ paraṃ gataḥ

320.5

kvacitkumārī
tvātmānaṃ vṛṇānāngṛhamāgatān || svayaṃ tānarhayāmāsa kvāpi yāteṣu bandhuṣu

320.6

teṣāmabhyavahārārthaṃ śālīnrahasi pārthiva || avaghnantyāḥ prakoṣṭhasthāścakruḥ śaṅkhāḥ svanaṃ mahat

320.7

sā tajjugupsitaṃ matvā mahatī vrīḍitā tataḥ || babhañjaikaikaśaḥ śaṅkhāndvau dvau pāṇyoraśeṣayat

320.8

ubhayorapyabhūddhoṣo hyavaghnantyāḥ sma saṃkhayoḥ || tatrāpyekaṃ nirabhidekasmānnābhavaddhvaniḥ

320.9

anvaśikṣamimaṃ tasyā upadeśamarindama || lokānanucarannetāṃllokatattvavivitsayā

320.10

vāse bahūnāṃ kalaho bhavedvārtā dvayorapi || eka eva carettasmātkumāryā iva kaṅkaṇaḥ

320.11

mana ekatra saṃyuñjyājjitaśvāso
jitāsanaḥ || vairāgyābhyāsayogena dhriyamāṇamatandritaḥ

320.12

yasminmano labdhapadaṃ yadetacchanaiḥ śanairmuñcati karmareṇūn || sattvena vṛddhena rajastamaśca
vidhūya nirvāṇamupaityanindhanam

320.13

tadaivamātmanyavaruddhacitto na veda kiñcidvahirantaraṃ vā || yatheṣukāro nṛpatiṃ vrajantamiṣau gatātmā na dadarśa
pārśve

320.14

ekacaryāniketaḥ syādapramatto guhāśayaḥ || alakṣyamāṇa ācārairmunireko'lpabhāṣaṇaḥ

320.15

gṛhārambho hi duḥkhāya viphalaścādhruvātmanaḥ || sarpaḥ parakṛtaṃ veśma praviśya sukhamedhate

320.16

eko nārāyaṇo devaḥ pūrvasṛṣṭaṃ svamāyayā || saṃhṛtya kālakalayā kalpānta idamīśvaraḥ
eka evādvitīyo'bhūdātmādhāro'khilāśrayaḥ

320.17

kālenātmānubhāvena sāmyaṃ nītāsu śaktiṣu || sattvādiṣvādipuruṣaḥ pradhānapuruṣeśvaraḥ

320.18

parāvarāṇāṃ parama āste kaivalyasaṃjñitaḥ || kevalānubhavānandasandoho nirūpādhikaḥ

320.19

kevalātmānubhāvena svamāyāṃ triguṇātmikām || saṃkṣobhayansṛjatyādau tayā sūtramarindama

320.20

tāmāhustriguṇavyaktiṃ sṛjantīṃ viśvatomukham || yasminprotamidaṃ viśvaṃ yena saṃsarate pumān

320.21

yathorṇanābhirhṛdayādūrṇāṃ santatya vaktrataḥ || tayā vihṛtya bhūyastāṃ grasatyevaṃ maheśvaraḥ

320.22

yatra yatra mano dehī dhārayetsakalaṃ dhiyā
snehāddveṣādbhayādvāpi yāti tattatsvarūpatām

320.23

kīṭaḥ peśaskṛtaṃ dhyāyankuḍyāṃ tena praveśitaḥ || yāti tatsātmatāṃ rājanpūrvarūpamasantyajan

320.24

evaṃ gurubhya etebhya eṣā me śikṣitā matiḥ || svātmopaśikṣitāṃ buddhiṃ śṛṇu me vadataḥ prabho

320.25

deho gururmama viraktivivekaheturviansma sattvanidhanaṃ satatārtyudarkam || tattvānyanena vimṛśāmi yathā tathāpi pārakyamityavasito vicarāmyasaṅgaḥ

320.26

jāyātmajārthapaśubhṛtyagṛhāptavargān puṣṇāti yatpriyacikīrṣutayā vitanvan || svānte sakṛcchramavaruddhadhanaḥ sadehaḥ sṛṣṭvā'sya bījamavasīdati vṛkṣadharmā

320.27

jihvaikato'mumapakarṣati karhi tarṣā śiśno'nyatastvagudaraṃ śravaṇaṃ kutaścit || ghrāṇo'nyataścapaladṛk kva ca karmaśaktirbahvyaḥ sapatnya iva gehapatiṃ lunanti

320.28

sṛṣṭvā purāṇi vividhānyajayā''tmaśaktyā vṛkṣānsarīsṛpapaśūnkhagadaṃśamatsyān || taistairatuṣṭahṛdayaḥ puruṣaṃ vidhāya brahmāvalokadhiṣaṇaṃ mudamāpa devaḥ

320.29

labdhvā sudurlabhamidaṃ bahusambhavānte mānuṣyamarthadamanityamapīha dhīraḥ || tūrṇaṃ yateta na patedanumṛtyu yāvanniḥśreyasāya viṣayaḥ khalu sarvataḥ
syāt

320.30

evaṃ sañjātavairāgyo vijñānāloka ātmani || vicarāmi mahīmetāṃ muktasaṅgo'nahaṃkṛtiḥ

320.31

na hyekasmādgurorjñānaṃ susthiraṃ
syātsupuṣka lam || brahmaitadadvitīyaṃ hi gīyate bahudharṣibhiḥ

320.32

śrībhagavānuvāca || ityuktvā sa yaduṃ viprastamāmantrya gabhīradhīḥ || vandito'bhyarcito rājñā yayau prīto yathāgatam

320.33

avadhūtavacaḥ śrutvā pūrveṣāṃ naḥ sa pūrvajaḥ || sarvasaṅgavinirmuktaḥ samacitto babhūva ha

320.33.p1

iti śrīmadbhāgavate mahāpurāṇe ekādaśaskandhe bhagavaduddhavasaṃvāde navamo'dhyāyaḥ

Linked texts (10)