Pramāṇa · Search · About · API

Anvitarthaprakashika 40

Anvitārthaprakāśikā 40

Language
Sanskrit

Contents

40.1

śrīśuka uvāca || iti bhāgavataḥ pṛṣṭaḥ kṣatrā vārtāṃ priyāśrayām || prativaktuṃ na cotsehe autkaṇṭhyāt smāriteśvaraḥ

40.2

yaḥ pañcahāyano mātrā prātarāśāya yācitaḥ || tannaicchadracayan yasya saparyāṃ bālalīlayā

40.3

sa kathaṃ sevayā tasya kālena jarasaṃ gataḥ || pṛṣṭo vārtāṃ pratibrūyāt bhartuḥ pādāvanusmaran

40.4

sa muhūrtamabhūt tūṣṇīṃ kṛṣṇāṅghrisudhayā bhṛśam || tīvreṇa bhaktiyogena nimagnaḥ sādhu nirvṛtaḥ

40.5

pulakodbhidyasarvāṅgo
muñcan mīladdṛśā śucaḥ || pūrṇārtho lakṣitastena snehaprasarasaṃplutaḥ

40.6

śanairbhagavallokānnṛlokaṃ punarāgataḥ || vimṛjya netre viduraṃ pratyāhoddhava
utsmayan

40.7

uddhava uvāca || kṛṣṇadyumaṇinimloce gīrṇeṣvajagareṇa ha || kiṃ punaḥ kuśalaṃ brūyāṃ gataśrīṣu gṛheṣvaham

40.8

durbhago bata loko'yaṃ
yadavo nitarāmapi || ye saṃvasanto na vidurhariṃ mīnā ivoḍupam

40.9

iṅgitajñāḥ puruprauḍhā ekārāmāśca sāttvatāḥ || sāttvatāmṛṣabhaṃ sarve bhūtāvāsamamaṃsata

40.10

devasya māyayā spṛṣṭā ye cānyadasadāśritāḥ || bhrāmyate dhīrna tadvākyairātmanyutsātmano harau

40.11

pradarśyātaptatapasāmavitṛptadṛśāṃ
nṛṇām || ādāyāntaradhādvaste svabimbaṃ lokalocanam

40.12

yanmartyalīlaupayikaṃ svayogamāyābalaṃ darśayatā gṛhītam || vismāpanaṃ svasya ca
saubhagarddheḥ paraṃ padaṃ bhūṣaṇabhūṣaṇāṅgam

40.13

yaddharmasūnorbata rājasūye nirīkṣya dṛksvastyayanaṃ trilokaḥ || kātsnryena cādyeha gataṃ vidhāturvāk
sṛtau kauśalamityamanyata

40.14

yasyāsurāgaplutahāsarāsalīlāvalokapratilabdhamānāḥ || brajastriyo dṛgbhiranupravṛttadhiyo'vatasthuḥ kila kṛtyaśeṣāḥ

40.15

svaśāntarūpeṣvitaraiḥ svarūpairabhyarthyamāneṣvanukampitātmā || parāvareśo mahadaṃśayukto hyajo'pi jāto bhagavān yathāgniḥ

40.16

māṃ khedayatyetadajasya janmaviḍambanaṃ yad vasudevagehe || braje ca vāso'ribhayādiva svayaṃ purādbhavatsātsīd yadanantavīryaḥ

40.17

dunoti cetaḥ smarato mamaitad yadāha pādāvabhivandya pitroḥ || tātāmba kaṃsāduruśaṅkitānāṃ prasīdataṃ no'kṛtaniṣkṛtīnām

40.18

ko vā amuṣyāṅghrisarojareṇuṃ vismartumīśīta pumān vijighran || yo visphuradbhrūviṭapena bhūmerbhāraṃ kṛtāntena tiraścakāra

40.19

dṛṣṭā bhavadbhirnanu rājasūye caidyasya kṛṣṇaṃ dviṣato'pi
siddhiḥ || yāṃ yoginaḥ saṃspṛhayanti samyag yogena kastadvirahaṃ saheta

40.20

tathaiva cānye naralokavīrā ya āhave kṛṣṇamukhāravindam || netraiḥ
pibanto nayanābhirāmaṃ pārthāstrapūtāḥ padamāpurasya

40.21

svayaṃ tvasāmyātiśayastryadhīśaḥ svārājyalakṣmyāptasamastakāmaḥ || baliṃ haradbhiściralokapālaiḥ kirīṭakoṭyeḍitapādapīṭhaḥ

40.22

tat tasya kaiṅkaryamalaṃ bhṛtān no viglāpayatyaṅga yadugrasenam || tiṣṭhan niṣaṇṇaṃ parameṣṭhidhiṣṇye nyabodhayad deva
nidhārayeti

40.23

aho bakī yaṃ stanakālakūṭaṃ jighāṃsayā'pāyayadapyasādhvī || lebhe gatiṃ dhātryucitāṃ tato'nyaṃ kaṃ vā dayāluṃ śaraṇaṃ vrajema

40.24

manye'surān bhāgavatāṃstrayadhīśe saṃrambhamārgābhiniviṣṭacittān || yaṃ saṃyuge'cakṣata tārkṣyaputramaṃse sunābhāyudhamāpatantam

40.25

vasudevasya
devakyāṃ jāto bhojendrabandhane || cikīrṣurbhagavānasyāḥ śamajenābhiyācitaḥ

40.26

tato nandavrajamitaḥ pitrā kaṃsādvibibhyatā || ekādaśa
samāstatra gūḍhārciḥ sabalo'vasat

40.27

parīto vatsaparvatsāṃścārayanvyāharadvibhuḥ || yamunopavane kūjaddvijasaṃkulitāṃghripe

40.28

kaumārīṃ
darśayaṃśceṣṭāṃ prekṣaṇīyāṃ vrajaukasām || rudanniva hasan mugdhabālasiṃhāvalokanaḥ

40.29

sa eva godhanaṃ lakṣmyā niketaṃ sitagovṛṣam || cārayannanugān gopān raṇadveṇurarīramat

40.30

prayuktān bhojarājena māyinaḥ kāmarūpiṇaḥ || līlayā vyanudat tāṃstān bālaḥ krīḍanakāniva

40.31

vipannān viṣapānena nigṛhya bhujagādhipam || utthāpyāpāyayad gāvastattoyaṃ prakṛtisthitam

40.32

ayājayad gosavena goparājaṃ dvijottamaiḥ
vittasya corubhārasya cikīrṣan sadvyayaṃ vibhuḥ

40.33

varṣatīndre vrajaḥ kopāt bhagnamāne'tivihvalaḥ || gotralīlātapatreṇa trāto bhadrānugṛhyatā

40.34

śaracchaśikarairmṛṣṭaṃ mānayan rajanīmukham || gāyan kalapadaṃ reme strīṇāṃ maṇḍalamaṇḍanaḥ

40.34.p1

iti śrībhāgavate tṛtīyaskandhe śrīkṛṣṇacaritavarṇanaṃ nāma dvitīyo'dhyāyaḥ

Linked texts (4)