Pramāṇa · Search · About · API

Anvitarthaprakashika 47

Anvitārthaprakāśikā 47

Language
Sanskrit

Contents

47.1

brahmovāca || jñāto'si me'dya sucirānnanu dehabhājāṃ na jñāyate bhagavato gatirityavadyam || nānyattvadasti bhagavannapi tanna śuddhaṃ māyāguṇavyatikarādyadururvibhāsi

47.2

rūpaṃ yadetadavabodharasodayena śaśvannivṛttatamasaḥ sadanugrahāya || ādau gṛhītamavatāraśataikabījaṃ yannābhipadmabhavanādahamāvirāsam

47.3

nātaḥ paraṃ parama yadbhavataḥ svarūpamānandamātramavikalpamaviddhavarcaḥ || paśyāmi viśvasṛjamekamaviśvamātman bhūtendriyātmakamadasta
upāśrito'smi

47.4

tadvā idaṃ bhuvanamaṅgala maṅgalāya dhyāne sma no darśitaṃ ta upāsakānām || tasmai namo bhagavate'nuvidhema tubhyaṃ yo nādṛto narakabhāgbhirasatprasaṅgaiḥ

47.5

ye tu tvadīyacaraṇāmbujakośagandhaṃ jighranti karṇavivaraiḥ śrutivātanītam || bhaktyā gṛhītacaraṇaḥ parayā ca teṣāṃ nāpaiṣi
nātha hṛdayāmburuhātsvapuṃsām

47.6

tāvadbhayaṃ draviṇagehasuhṛnnimittaṃ śokaḥ spṛhā paribhavo vipulaśca lobhaḥ || tāvanmametyasadavagraha ārtimūlaṃ yāvanna
te'ṅghrimabhayaṃ pravṛṇīta lokaḥ

47.7

daivena te hatadhiyo bhavataḥ prasaṅgātsarvāśubhopaśamanādvimukhendriyā ye || kurvanti kāmasukhaleśalavāya dīnā lobhābhibhūtamanaso'kuśalāni śaśvat

47.8

kṣuttṛṭtridhātubhirimā muharadyamānāḥ śītoṣṇavātavarṣairitaretarācca || kāmāgninā'cyuta ruṣā sudurbhareṇa saṃpaśyato mana urukrama sīdate me

47.9

yāvatpṛthaktvamidamātmana indriyārthamāyābalaṃ bhagavato jana īśa paśyet || tāvanna saṃsṛtirasau pratisaṃkrameta
vyarthā'pi duḥkhani Marcel vahaṃ vahati kriyārthā

47.10

ahrayāpṛttārttakaraṇā niśi niḥśayānā nānāmanorathadhiyā kṣaṇabhagnanidrāḥ || daivāhatārtharacanā ṛṣayo'pi deva yuṣmatprasaṅgavimukhā iha saṃsaranti

47.11

tvaṃ bhāvayogaparibhāvitahṛtsaroja āsse śrutekṣitapatho nanu nātha puṃsām || yadyaddhiyā ta urugāya vibhāvayanti tattadvapuḥ praṇayase sadanugrahāya

47.12

nātiprasīdati tathopacitopacārairārādhitaḥ suragaṇairhṛdi baddhakāmaiḥ || yatsarvabhūtadayayā'sadalabhyayaiko nānājaneṣvavahitaḥ suhṛdantarātmā

47.13

puṃsāmato vividhakarmabhiradhvarādyairdānena cogratapasā vratacaryayā ca || ārādhanaṃ bhagavatastava
satkriyā'rtho dharmo'rpitaḥ karhicid dhriyate na yatra

47.14

śaśvat svarūpamahasaiva nipītabhedamohāya bodhadhiṣaṇāya namaḥ parasmai || viśvodbhavasthitilayeṣu nimittalīlārāsāya te nama idaṃ cakṛmeśvarāya

47.15

yasyāvatāraguṇakarmaviḍambanāni nāmāni ye'suvigame vivaśā gṛṇanti || te'nekajanmaśamalaṃ sahasaiva hitvā saṃyāntyapāvṛtamamṛtaṃ tamajaṃ prapadye

47.16

yo vā ahaṃ ca giriśaśca vibhuḥ svayaṃ ca sthityudbhavapralayahetava ātmamūlam
bhittvā tripādvavṛdha eka uruprarohastasmai namo bhagavate bhuvanadrumāya

47.17

loko vikarmanirataḥ kuśale pramattaḥ karmaṇyayaṃ tvadudite bhavadarcane sve
yastāvadasya balavāniha jīvitāśāṃ sadyaśchinattyanimiṣāya namo'stu tasmai

47.18

yasmādbibhemyahamapi dviparā‌rdhyadhiṣṇyamadhyāsitaḥ sakalalokanamaskṛtaṃ yat || tepe tapo bahasavo'varurutsamānastasmai namo bhagavate puruṣottamāya

47.19

tiryaṅmanuṣyavibudhādiṣu jīvayoniṣvātmecchayā''tmakṛtasetuparīpsayā yaḥ || reme nirastaratirapyavaruddhadehastasmai namo bhagavate puruṣottamāya

47.20

yo'vidyayānupahato'pi daśārdhavṛttyā nidrāmuvāha jaṭharīkṛtalokayātraḥ || antarjale hi kaśipūsparśānukūlāṃ bhīmormimālini janasya sukhaṃ vivṛṇvan

47.21

yannābhipadmabhavanādahamāsamīḍya lokatrayopakaraṇo
yadanugraheṇa || tasmai namasta udarasthabhavāya yoganidrā'vasānavikasannalinekṣaṇāya

47.22

so'yaṃ samastajagatāṃ suhṛdeka ātmā sattvena yanmṛḍayate
bhagavānbhagena || tenaiva me dṛśamanuspṛśatādyathā'haṃ srakṣyāmi pūrvavadidaṃ praṇatapriyo'sau

47.23

eṣa prapannavarado ramayā''tmaśaktyā yadyatkariṣyati gṛhītaguṇāvatāraḥ || tasminsvavikramamidaṃ sṛjato'pi ceto yuñjīta karmaśamalaṃ ca yathā vijahyām

47.24

nābhihradādiha sato'mbhasi yasya puṃso
vijñānaśaktirahamāsamanantaśakteḥ|| rūpaṃ vicitramidamasya vivṛṇvato me mārīriṣīṣṭa nigamasya girāṃ visargaḥ

47.25

so'sāvadabhrakaruṇo bhagavān
vivṛddhapremasmitena nayanāmburuhaṃ vijṛmbhan || utthāya viśvavijayāya ca no viṣādaṃ mādhvyā girā'panayatātpuruṣaḥ purāṇaḥ

47.26

maitreya uvāca
svasaṃbhavaṃ niśāmyaivaṃ tapovidyāsamādhibhiḥ|| yāvanmanovacaḥ stutvā virarāma saṃ khinnavat

47.27

athābhipretamanvīkṣya brahmaṇo madhusūdanaḥ
viṣaṇṇacetasaṃ tena kalpavyatikarāmbhasā

47.28

lokasaṃsthānavijñāna ātmanaḥ parikhidyataḥ || tamāhāgādhayā vācā kaśmalaṃ śamayanniva

47.29

śrībhagavānuvāca || mā vedagarbha gāstandrīṃ sarga udyamamāvaha || tanmayā''pāditaṃ hyagre yanmāṃ prārthayate bhavān

47.30

bhūyastvaṃ tapa ātiṣṭha vidyāṃ
caiva madāśrayām || tābhyāmantarhṛdi brahmanlokāndrakṣyasyapāvṛtān

47.31

tata ātmani loke ca bhaktiyuktaḥ samāhitaḥ || draṣṭā'si māṃ tataṃ brahmanmayi lokāṃstvamātmanaḥ

47.32

yadā tu sarvabhūteṣu dāruṣvagnimiva sthitam || praticakṣīta māṃ loko jahāttahyaiva kaśmalam

47.33

yadā rahitamātmānaṃ bhūtendriyaguṇāśayaiḥ || svarūpeṇa mayopetaṃ paśyansvārājyamṛcchati

47.34

nānākarmavitānena prajā bahvīḥ sisṛkṣataḥ || nātmā'vasīdatyasmiṃste varṣīyānmadanugrahaḥ

47.35

ṛṣimādyaṃ na badhnāti pāpīyāṃstvāṃ rajoguṇaḥ || yanmano mayi nirbaddhaṃ prajāḥ saṃsṛjato'pi te

47.36

jñāto'haṃ bhavatā tvadya durvijñeyo'pi dehinām || yanmāṃ tvaṃ manyase'yuktaṃ bhūtendriyaguṇātmabhiḥ

47.37

tubhyaṃ madvicikitsāyāmātmā me darśito'bahiḥ || nālena salile mūlaṃ puṣkarasya vicinvataḥ

47.38

yaccakarthāṅga matstotraṃ matkathā'bhyudayāṅkitam || yadvā tapasi te niṣṭhā sa eṣa madanugrahaḥ

47.39

prīto'hamastu bhadraṃ te lokānāṃ vijayecchayā || yadastoṣīrguṇamayaṃ nirguṇaṃ mā'nuvarṇayan

47.40

ya etena pumānnityaṃ stutvā
stotreṇa māṃ bhajet || tasyā''śu saṃprasīdeyaṃ sarvakāmavareśvaraḥ

47.41

pūrtena tapasā yajñairdānairyaugasamādhinā || rāddhaṃ niḥśreyasaṃ puṃsāṃ matprītistattvavinmatam

47.42

ahamātmā''tmanāṃ dhātaḥ preṣṭhaḥ sanpreyasāmapi || ato mayi ratiṃ kuryāddehādiryatkṛte priyaḥ

47.43

sarvavedamayenedamātmanā''tmātmayoninā || prajāḥ sṛja yathāpūrvaṃ yāśca mayyanuśerate

47.44

maitreya uvāca || tasmā evaṃ jagatsraṣṭre pradhānapuruṣeśvaraḥ || vyajyedaṃ svena rūpeṇa
kañjanābhastirodadhe

47.44.p1

iti śrībhāgavate mahāpurāṇe tṛtīyaskandhe bhagavadbrahmasaṃvāde bhagavadantardhānavarṇanaṃ nāma navamo'dhyāyaḥ

Linked texts (6)