Pramāṇa · Search · About · API

Ashtamaskandha 26

Aṣṭamaskandha 26

Language
Sanskrit

Contents

26.1

saptadaśo'dhyāyaḥ
śrīśuka uvāca
ityuktā sā'ditī rājan ! svabhartrā kaśyapena vai
anvatiṣṭha dvratamidaṃ dvādaśāhamatandritā

26.2

cintayantyekayā buddhyā mahāpuruṣa mīśvaram
pragṛhyendriyaduṣṭāśvān manasā buddhisārathiḥ

26.3

manaścaikāgrayā buddhyā bhagavatyakhilātmani
vāsudeve samādhāya cacāra ha payovratam

26.4

tasyāḥ prādurabhūttāta ! bhagavānādipūruṣaḥ
pītavāsāścaturbāhuḥ śaṅkhacakragadādharaḥ

26.5

taṃ netragocaraṃ vīkṣya sahasotthāya sādaram
nanāma bhuvi kāyena daṇḍavatprītivihvalā

26.6

sotthāya baddhāñjali rīḍituṃ sthitā notsehe ānandajalākulekṣaṇā
babhūva tūṣṇīṃ pulakākulākṛti staddarśanātyutsavagātravepathuḥ

26.7

prītyā śanairgadgadayā girā hariṃ tuṣṭāva sā devyaditiḥ kurudvaha
udvīkṣatī sā pibatīva cakṣuṣā ramāpatiṃ yajñapatiṃ jagatpatim

26.8

aditi ruvāca
yajñeśa ! yajñapuruṣācyuta ! tīrthapāda ! tīrthaśravaḥ śravaṇamaṅgala nāmadheya
āpannalokavṛjinopaśamodayā''dya śaṃ naḥ kṛdhīśa ! bhagavannasi dīnanāthaḥ

26.9

viśvāya viśvabhavanasthitisaṃyamārthaṃ svairaṃ gṛhītapuruśaktiguṇāya bhūmne
svasthāya śaśvadupabṛṃhitapūrṇabodhavyāpāditātmatamase haraye namaste

26.10

āyuḥ paraṃ vapurabhīṣṭa matulyalakṣmī dyām̐bhūrasāḥ sakalayoga guṇāstrivargaḥ
jñānañca kevala mananta bhavanti tuṣṭāt tvattonnṛṇāṃ kimu sapatnajayādi rāśīḥ

26.11

adityevaṃ stuto rājan ! bhagavān puṣkarekṣaṇaḥ
kṣetrajñassarvabhūtānā miti hovāca bhārata !

26.12

devamāta rbhavatyā me vijñātaṃ cirakāṅkṣitam
yatsapatnrai hṛtaśrīṇāṃ cyāvitānāṃ svadhāmataḥ

26.13

tānvirnirjitya samare durmadā nasurarṣabhān
pratilabdhajayaśrībhiḥ putrai ricchasyupāsitum

26.14

indrajyeṣṭhaiḥ svatanayaiḥ hatānāṃ yudhi vidviṣām
striyo rudantī rāsādya draṣṭu micchasi duḥkhitāḥ

26.15

ātmajānsusamṛddhāṃstvaṃ pratyāhṛtayaśaśriyaḥ
nākapṛṣṭha madhiṣṭhāya krīḍato draṣṭumicchasi

26.16

prāyo'dhunā te'surayūthanāthā avāraṇīyā iti devi ! me matiḥ
yatte'nukūleśvaravipraguptā na vikramastatra sukhaṃ dadāti

26.17

tathāpyupāyo mama devi ! cintyaḥ santoṣitasya vratacaryayā te
mamārcanaṃ nārhati gantumanyathā śraddhānurūpaṃ phalahetukatvāt

26.18

tvayārcitaścāhamapatyaguptaye payovratenānuguṇaṃ samīḍitaḥ
svāṃśena putratvamupetya te sutān goptāsmi mārīcatapasyavasthitaḥ

26.19

upadhāva patiṃ bhadre ! prajāpatimakalmaṣam
māṃ ca bhāvayatī patyāvevaṃ rūpamavasthitam

26.20

naitat parasmāt ākhyeyaṃ devaguhyaṃ kathañcana
sarvaṃ sampadyate devi ! devaguhyaṃ susaṃvṛtam

26.21

śrīśuka uvāca
etāvaduktvā bhagavān tatraivā'ntaradhīyata
aditirdurlabhaṃ labdhvā harerjanmātmani prabhoḥ

26.22

upādhāvat patiṃ bhaktyā parayā kṛtakṛtyavat
sa vai samādhiyogena kaśyapastadabudhyata

26.23

praviṣṭamātmani hareraṃśaṃ hyavitathekṣaṇaḥ
so'dityāṃ vīrya mādhatta tapasā cirasambhṛtam
samāhitamanā rājan dāruṇyagniṃ yathā'nilaḥ

26.24

aditerdhiṣṭhitaṃ garbhaṃ bhagavantaṃ sanātanam
hiraṇyagarbho vijñāya samīḍe brahyanāmabhiḥ

26.25

brahmovāca
jayorugāya bhagavan! urukrama! namo'stu te
namo brahmaṇyadevāya triguṇāya namo namaḥ

26.26

namaste pṛśnigarbhāya vedagarbhāya vedhase
trinābhāya tripṛṣṭhāya śipiviṣṭāya viṣṇave

26.27

tvamādiranto bhuvanasya madhyamanantaśaktiṃ puruṣaṃ yamāhuḥ
kālo bhavānākṣipatīśa viśvaṃ sroto yathā'ntaḥ patitaṃ gabhīram

26.28

tvaṃ vai prajānāṃ sthirajaṅgamānāṃ prajāpatīnāmapi sambhaviṣṇuḥ
divaukasāṃ deva divaścyutānāṃ parāyaṇaṃ nauriva majjato'psu

26.28.p1

iti śrīmadbhāgavate mahāpurāṇe śrīvaiyāsikyāṃ aṣṭādaśasāhasryāṃ śrīhayagrīvabrahmavidyāyāṃ pāramahaṃsyāṃ saṃhitāyāṃ aṣṭamaskandhe saptadaśodhyāyaḥ

Linked texts (3)