Pramāṇa · Search · About · API

Ashtamaskandha 27

Aṣṭamaskandha 27

Language
Sanskrit

Contents

27.1

aṣṭādaśo'dhyāyaḥ
śrīśuka uvāca
itthaṃ viriñcistutakarmavīryaḥ prādurbabhūvāmṛtabhūradityām
caturbhujaḥ śaṅkhagadābjacakraḥ piśaṅgavāsā nalināyatekṣaṇaḥ

27.2

śyāmāvadāto jhaṣarājakuṇḍalatviṣollasacchrīvadanāmbujaḥ pumān
śrīvatsavakṣā valayāṅgadollasatkirīṭakāñcīguṇahāranūpuraḥ

27.3

madhuvratavrātavighuṣṭayā svayā virājitaḥ śrīvanamālayā hariḥ
prajāpaterveśmatamaḥ svarociṣā vināśayan kaṇṭhaniviṣṭakaustubhaḥ

27.4

diśaḥ praseduḥ salilāśayāstadā prajāḥ prahṛṣṭā ṛtavo guṇānvitāḥ
dyaurantarikṣaṃ kṣitiragnirujihā gāvo dvijāḥ saṃjahaṣurnagāśca

27.5

śroṇāyāṃ bhādradvādaśyāṃ muhūrte'bhijiti prabhuḥ
sarve nakṣatratārādyāścakrustajjanma dakṣiṇam

27.6

dvādaśyāṃ savitātiṣṭhanmadhyandinagato'hani
vijayā nāma sā proktā yasyāṃ janma vidurhareḥ

27.7

śaṅkhadundubhayo neduḥ mṛdaṅga paṇavānaka
citravāditra tūryāṇāṃ nirghoṣastumulò'bhavat

27.8

prītāścāpsaraso'nṛtyangandharvapravarā jaguḥ
tuṣṭuvurmunayo devā manavaḥ pitaro'gnayaḥ

27.9

siddhavidyādharagaṇāḥ sakimpuruṣakinnarāḥ
cāraṇā yakṣarakṣāṃsi suparṇabhujagottamāḥ

27.10

gāyanto'tipraśaṃsanto nṛtyanto vibudhānugāḥ
adityā āśramapadaṃ kusumaiḥ samavākiran

27.11

dṛṣṭvā'ditistaṃ nijagarbhasambhavaṃ paraṃ pumāṃsaṃ mudamāpa vismitā
gṛhītadehaṃ nijayogamāyayā prajāpatiścāha jayeti vismitaḥ

27.12

yat tadvapurbhāti vibhūṣaṇāyudhai ravyaktacidvyaktamadhārayaddhariḥ
babhūva tenaiva sa vāmano vaṭuḥ saṃpaśyatordivyagatiryathā naṭaḥ

27.13

taṃ vaṭuṃ vāmanaṃ dṛṣṭvā modamānā maharṣayaḥ
karmāṇi kārayāmāsuḥ puraskṛtya prajāpatim

27.14

tasyopanīyamānasya sāvitrīṃ savitābravīt
bṛhaspatirbrahmasūtraṃ mekhalāṃ kaśyapo dadau

27.15

dadau kṛṣṇājinaṃ bhūmiḥ daṇḍaṃ somo vanaspatiḥ
kaupīnācchādanaṃ mātā dyauśchatraṃ jagataḥ pateḥ

27.16

kamaṇḍaluṃ vedagarbhaḥ kuśānsaptarṣayo daduḥ
akṣamālāṃ mahārāja sarasvatyavyayātmanaḥ

27.17

vija0 suparṇaḥ bhujagottamaśca ||9-11
tasmā ityupanītāya yakṣarāṭ pātrikāmadāt
bhikṣāṃ bhagavatī sākṣāt umādādambikā satī

27.18

sa brahma varcasenevaṃ sabhāṃ sambhāvito vaṭuḥ
brahmarṣigaṇasaṅkīrṇāmatyarocata māriṣaḥ

27.19

samiddhamāhitaṃ vahniṃ kṛtvā pari samūhanam
paristīrya samabhyarcya samidbhirjuhodvibhuḥ

27.20

śrutvā'śvamedhairyajamānamūrjitaṃ baliṃ bhṛgūṇāmupakalpitaistataḥ
jagāma tatrā'khilasārasambhṛto bhāreṇa gāṃ sannamayan pade pade

27.21

taṃ narmadāyāstaṭa uttare baleḥ ye̍ ṛtvijaste bhṛguvatsasaṃjñike
pravartayanto bhṛgavaḥ kratūttamaṃ vyacakṣatā''rāduditaṃ yathā ravim

27.22

te̍ ṛtvijo yajamānaḥ sadasyāḥ hatatviṣo vāmanatejasā nṛpa!
sūryaḥ kilāyātyuta vā vibhāvasuḥ sanatkumāro'tha didṛkṣayā kratoḥ

27.23

itthaṃ saśiṣyeṣu bhṛguṣvanekadhā vitarkyamāṇe bhagavānsa vāmanaḥ
sadaṇḍachatraṃ sajalaṃ kamaṇḍaluṃ viveśa bibhraddhayamedhavāṭam

27.24

mauñjyā mekhalayā vītamupavītājinottaram
jaṭilaṃ vāmanaṃ vipraṃ māyāmāṇavakaṃ harim

27.25

praviṣṭaṃ vīkṣya bhṛgavaḥ saśiṣyāste sahāgnibhiḥ
pratyagṛhṇansamutthāya saṃkṣiptastasya tejasā

27.26

yajamānaḥ pramudito darśanīyaṃ manoramam
rūpānurūpāvayavaṃ tasmā āsanamāharat

27.27

svāgatenābhivandyātha pādau bhagavato baliḥ
avaniñyārcayāmāsa muktasaṅgaṃ manoramam

27.28

tatpādaśaucaṃ kalikalmaṣāpahaṃ sa dharmavinmūrdhnyadadhāt sumaṅgalam
yad devadevo giriśaścandramauliḥ dadhāra mūrdhnā parayā ca bhaktyā

27.29

baliruvāca
svāgataṃ te namastubhyaṃ brahman kiṃ karavāma te
brahmarṣīṇāṃ tapassākṣāt manye tvā''ryavapurdharam

27.30

adya naḥ pitarastṛptā adya naḥ pāvitaṃ kulam
adya sviṣṭaḥ kraturayaṃ yadbhavānāgato gṛhān

27.31

adyāgnayo me suhutā yathāvidhi dvijātmaja! tvaccaraṇāvanejanaiḥ
hatāṃhaso vārbhiriyaṃ ca bhūrbhūt tathā punītā tanubhiḥ padaistava

27.32

yadyadbrahman vāñchasi tatpratīccha me tvāmarthinaṃ viprasutānutarkaye
gāṃ kāñcanaṃ guṇavadveśma bhṛṣṭaṃ tathānnaṃmathavā vipra kanyām
grāmān samṛddhāṃsturagān gajān vā rathottamānarhatama pratīccha me

27.32.p1

iti śrīmadbhāgavate mahāpurāṇe śrīvaiyāsikyāṃ aṣṭādaśasāhasryāṃ śrīhayagrīvabrahmavidyāyāṃ pāramahaṃsyāṃ saṃhitāyāṃ aṣṭamaskandhe aṣṭādaśo'dhyāyaḥ

Linked texts (4)