Pramāṇa · Search · About · API

Ashtamaskandha 31

Aṣṭamaskandha 31

Language
Sanskrit

Contents

31.1

ekaviṃśo'dhyāyaḥ
śrīśuka uvāca
satyaṃ samīkṣyābjabhavo nakhendubhiḥ hatasvadhāmadyutirāvṛto'bhyagāt
marīcimiśrā ṛṣayo bṛhadvratāḥ sanandanādyā naradeva yoginaḥ

31.2

vedopavedāniyamairnayānvitāḥ tarketihāsāṅgapurāṇasaṃhitāḥ
ye cāpare yogasamīradīpitajñānāgninā randhitakarmakalmaṣāḥ

31.3

vavandire yatsmaraṇānubhāvataḥ svāyambhuvaṃ dhāma gatā akarmakam
athāṅghraye pronnamitāya viṣṇoḥ upāharatpadmabhavo'rhaṇodakam
samarcya bhaktyā'bhyaguṇācchuciśravā yannābhipaṅkeruhasambhavaḥ svayaṃm

31.4

dhātuḥ kamaṇḍalujalaṃ tadurukramasya pādāvanejanapavitratayā narendra
svardhundyabhūnnabhasi sā patatī nimārṣṭi lokatrayaṃ bhagavato viśadevakīrtiḥ

31.5

brahmādayo lokanāthāḥ svanāthāya samādṛtāḥ
sānugā balimājahruḥ saṃkṣiptātmavibhūtaye

31.6

toyaiḥ samarhaṇaiḥ sragbhirdivyagandhānulepanaiḥ
dhūpadīpaissurabhibhirlājākṣataphalottamaiḥ

31.7

stavanairjayaśabdaiśca tadvīryamahimoṅkitaiḥ
nṛttavāditragītaiśca śaṅkhadundubhinissvanaiḥ

31.8

jāmbavānṛkṣarājastu bherīśabdairmanojavaḥ
vijayaṃ dikṣu sarvāsu mahotsvamaghoṣayat

31.9

mahīṃ sarvāṃ hṛtāṃ dṛṣṭvā tripadvyājayayācñayā
ūcuḥ svabharturasurā dīkṣitasyātyamarṣitāḥ

31.10

daityā ūcuḥ
na vā ayaṃ brahmabandhuḥ viṣṇurmāyāvināṃ varaḥ
dvijrarūpapraticchanno devakāryaṃ cikīrṣati

31.10-2

ayaṃ brahmabandhuḥ na vai kiṃsvidviṣṇuḥ

31.11

anena yācamānena śatruṇā baṭurūpiṇā
sarvasvaṃ no hṛtaṃ bharturnyastadaṇḍasya barhiṣi

31.12

satyavratasya satataṃ dīkṣitasya viśeṣataḥ
nānṛtaṃ bhāṣituṃ śakyaṃ brahmaṇyasya dayāvataḥ

31.13

tasmādasya vadho dharmo bhartuḥ śuśrūṣaṇaṃ ca naḥ
śrīśuka uvāca
ityāyudhāni jagṛhurbaleranucarā'surāḥ

31.14

te sarve vāmanaṃ hantuṃ śūlapaṭṭiśapāṇayaḥ
anicchanto balerājñāṃ prādravañjātamanyavaḥ

31.15

tānabhidravato dṛṣṭvā ditijānīkapānnṛpa
prahasyānucarā viṣṇoḥ pratyaṣedhannudāyudhāḥ

31.16

nandaḥ sunando'tha jayo vijayaḥ prabalorddhalo
kumudaḥ kumudākṣaśca viṣvaksenaḥ patattrirāṭ

31.17

jayantaḥ śrutadevaśca puṣpadanto'tha sātvataḥ
sarve nāgāyutaprāṇāḥ camūṃste jaghnurāsurīḥ

31.18

hanyamānānrasvakāndṛṣṭvā puruṣānucarairbaliḥ
vārayāmāsa saṃrabdhānkāvyaśāpamanusmaran

31.19

he vipracitte ! he rāho ! he hete śrūyatāṃ vacaḥ
mā yudhyata nivarttadhvaṃ na naḥ kālo'yamarthakṛt

31.20

yaḥ prabhuḥ sarvabhūtānāṃ sukhaduḥkhopapattaye
taṃ nātivartituṃ daityāḥ pauruṣairīśvaraḥ pumān

31.21

yo no bhavāya prāgāsīdabhavāya divaukasām
sa eṣa bhagavānadya vartate tadviparyayam

31.22

balena sacivairbuddhyā durgairmantrauṣadhādibhiḥ
sāmādibhirupāyaiśca kālaṃ nātyeti vai janaḥ

31.23

bhavadbhirnirjitā hyete bahuśo'nucarā hareḥ
daivenarddhaista evādya yudhi jitvā nadanti naḥ

31.24

etānvayaṃ vijeṣyāmo yadi daivaṃ prasīdati
tasmātkālaṃ pratīkṣadhvaṃ yo no'rthatvāya kalpate

31.25

śrīśuka uvāca
patyurnigaditaṃ śrutvā daityadānavayūthapāḥ
rasāṃ niviviśū rājanviṣṇupāriṣadārditāḥ

31.26

atha tārkṣyasuto jñātvā virād prabhucikīrṣitam
babandha vāruṇaiḥ pāśairbaliṃ sautye'hani kratau

31.27

hāhākāro mahānāsīdrodasyoḥ sarvatodiśam
gṛhyamāṇe'surapatau viṣṇunā prabhaviṣṇunā

31.28

taṃ baddhaṃ vāruṇaiḥ pāśairbhagavān grāha vāmanaḥ
naṣṭaśriyaṃ sthiraṃ prājñamudārayaśasaṃ nṛpa

31.29

padāni trīṇi dattāni bhūmermahyaṃ tvayā'sura
dvābhyāṃ krāntā mahī sarvā tṛtīyamupakalpaya

31.30

yāvattapatyasau gobhiryāvadinduḥ sahoḍubhiḥ
yāvadvarṣatiḥ saparjanyaḥ tāvatī bhūriyaṃ tava

31.29-2

dāsyāmīti pratiśrutāni, tatra dvābhyāṃ padābhyāṃ sarvā dyulokādisahitā bhūmiḥ krāntā paricchidya pratigṛhītā| adhunā
tṛtīyaṃ padaṃ upakalpaya dehi

31.30-2

yāvadasau sūryaḥ kiraṇaistapati tathenduryāvaduḍubhiḥ nakṣatraissaha prakāśate tathā saṃparjanyo agniḥ yāvadāste
tāvatyeva hi tvatsambandhinīyaṃ bhūmiḥ

31.31

padaikena mayā krānto bhūrlokaḥ khaṃ diśastanoḥ
svarlokastu dvitīyena paśyataste svamātmanā

31.32

pratiśrutamadātuste niraye vāsa iṣyate
viśa tvaṃ nirayaṃ tasmādguruṇā cānumoditaḥ

31.33

vṛthā manorathastasya dūraḥ svargaḥ patatyadhaḥ
yo'rthine'rthaṃ pratiśrutya nā'laṃ tadupapādane

31.34

vipralabdho dadānīti tvayā'haṃ cāḍhyamāninā
tadalīkaphalaṃ bhuṅkṣva nirayaṃ katicitsamāḥ

31.34.p1

iti śrīmadbhāgavate mahāpurāṇe śrīvaiyāsikyāṃ aṣṭādaśasāhasryāṃ śrīhayagrīvabrahmavidyāyāṃ pāramahaṃsyāṃ saṃhitāyāṃ aṣṭamaskandhe balinigraho nāma ekaviṃśo'dhyāyaḥ

Linked texts (3)