Ashtamaskandha 7
Aṣṭamaskandha 7
- Language
- Sanskrit
Contents
- 7.26 — 1 part
7.1
caturtho'dhyāyaḥ
śrīśuka uvāca
tadā devarṣigāndharvā brahmeśānapurogamāḥ
mumucuḥ kusumā''sāraṃ śaṃsantaḥ karma taddhareḥ
7.2
nedurdundubhayo divyā gandharvā nanṛturjaguḥ
ṛṣayaścāraṇāḥ siddhāḥ tuṣṭuvuḥ puruṣottamam
7.3
yo'sau grāhaḥ savai sadyaḥ paramāścaryarūpadhṛt
mukto devalaśāpena hūhū rgandharvasattamaḥ
7.4
praṇamya śirasā'dhīśamuttamaślokamavyayam
agāyata yaśodhāma kīrttangya guṇasatkatham
7.5
so'nukampita īśena parikramya praṇamya tam
lokasya paśyato lokaṃ svamagānmūktakilbiṣaḥ
7.6
gajendro bhagavatsparśāt vimukto'jñānabandhanāt
prāpto bhagavato rūpaṃ pītavāsāścaturbhujaḥ
7.7
sa vai pūrvamabhūdrājā pāṇḍayo draviḍasattamaḥ
indradyumna iti khyāto viṣṇūvrata parāyaṇaḥ
7.8
sa ekadā''rādhanakāla ātmavān gṛhītamānavrata īśvaraṃ harim
jaṭādharastāpasa āpluto'cyutaṃ taimarcayāmāsa kulācalāśramaḥ
7.9
yadṛcchayā tatra mahāyaśā muniḥ samāgamacchiṣyagaṇaiḥ pariśritaḥ
taṃ vīkṣya tūṣṇīmakṛtārhaṇādikaṃ rahasyupāsīnamṛṣiśśukopa ha
7.10
tasmā imaṃ śāpamadādasādhu rayaṃ durātmā'kṛtabuddhiratra̍
viprāvamantā viśatāṃ tamo'ndhaṃ yathā gajaḥstabdhamatiḥ saṃ eva
7.11
śrīśuka uvāca
evaṃ śaptvā gato'gastyo bhagavān nṛpa sānugaḥ
indradyumno'pi rājarṣiḥ diṣṭaṃ tadupadhārayan
7.12
āpannaḥ kauñjarīṃ yoniṃ ātmasmṛtivināśinīm
haryarca̍nānubhāvena yadgajatve'pyanusmṛtiḥ
7.13
evaṃ vimokṣya gajayūthapamabjanābhaḥ tenāpi pārṣadagatiṃ gamitena yuktaḥ
gandharvasiddha vibudhairanugīyamāna karmādbhutaṃ svabhavanaṃ garuḍāsano'gāt
7.14
evaṃ mahārāja taverito mayā kṛṣṇānubhāvo gajarājamokṣaṇam
svargyaṃ yaśasyaṃ kalikalmaṣāpahaṃ dussvapnanāśaṃ kuruvarya śṛṇvatām
7.15
yathānukīrtayantyetacchreyaskāmā dvijātayaḥ
śucayaḥ prātarutthāya duḥsvapnādyupaśāntaye
7.16
idamāha hariḥ prīto gajendraṃ kurusattama
śṛṇvatāṃ sarvabhūtānāṃ sarvabhūtamayo vibhuḥ
7.17
śrībhagavānuvāca
ye māṃ tvāṃ ca saraścedaṃ girikandarakānanam
vetra kīcakaveṇūnāṃ gulmāni surapādapān
7.18
śṛṅgāṇīmāni dhiṣṇyāni brahmaṇo me śivasya ca
kṣīrodaṃ me priyaṃ dhāma śvetadvīpaṃ ca bhāsvaram
7.19
śrīvatsaṃ kaustubhaṃ mālāṃ gadāṃ kaumodakīṃ mama
sudarśanaṃ pāñcajanyaṃ suparṇaṃ patageśvaram
7.20
śeṣaṃ ca matkalāṃ sūkṣmāṃ śriyaṃ devīṃ madāśrayam
brahmāṇaṃ nāradamṛṣiṃ bhavaṃ prahlādameva ca
7.21
matsyakūrmavarāhādyairavatāraiḥ kṛtāni me
karmāṇyanantapuṇyāni sūrya somaṃ hutāśanam
7.22
praṇavaṃ satyamavyaktaṃ goviprān dharmamavyayam
dākṣāyaṇī dharmapatnīḥ somakāśyapayorapi
7.23
gaṅgāṃ sarasvatīṃ nandāṃ kalindīṃ sitavāraṇam
dhruvaṃ brahma ṛṣīnsapta puṇyaślokāṃśca mānavān
7.24
utthāyāpararātrānte prayatāḥ susamāhitāḥ
smaranti mama rūpāṇi mucyante te'haso'khilāt
7.25
ye māṃ stuvantyanenā'ṅga! pratibudhya niśālyaye
teṣāṃ prāṇātyaye cāhaṃ dadāmi vipulāṃ matim
7.26
śrīśuka uvāca
ityādiśya hṛṣīkeśaḥ prādhmāya jalajottamam
harṣayanvibudhānīkamaruroha khagādhipam
7.26.p1
iti śrīmadbhāgavate mahāpurāṇe śrīvaiyāsikyāṃ aṣṭādaśasāhasryāṃ śrīhayagrīvabrahmavidyāyāṃ pāramahaṃsyāṃ saṃhitāyāṃ aṣṭamaskandhe caturtho'dhyāyaḥ
Linked texts (1)
- Bhāgavatamāhātmya — Kṛṣṇacandra, Sanskrit