Pramāṇa · Search · About · API

Bhavishyapurana 3.121

Bhaviṣyapurāṇa 3.121

Language
Sanskrit

3.121.p1

viśvakarmakṛtasūryatejaḥ śātanavarṇanam

3.121.1

śatānīka uvāca
śarīralekhanaṃ1 bhānoruktaṃ saṃkṣepatastvayā .
vistarācchrotumicchāmi tanmamācakṣva suvrata . . 1

3.121.2

sumanturuvāca
piturgṛhaṃ tu yātāyāṃ saṃjñāyāṃ kurunaṃdana .
bhāskaraściṃtayāmāsa saṃjñā madrūpakāriṇī . . 2

3.121.3

etasminnaṃtare brahmā tatrāgatya divākaram .
avravīnmadhurāṃ vācaṃ raveḥ prītikarāṃ śubhām . . 3

3.121.4

ādidevo'si devānāṃ vyāptametattvayā jagat .
śvaśuro viśvakarmā te rūpaṃ nirvartayiṣyati . . 4

3.121.5

evamuktvā raviṃ brahmā viśvakarmāṇamabravīt .
nivartasya mārtaṇḍaṃ svarūpaṃ tatsuśobhanam . . 5

3.121.6

tato brahmasamādeśādbhra(bhū?)mimāropya bhāskaram .
rūpaṃ nirvartayāmāsa viśvakarmā śanaiḥśanaiḥ . . 6

3.121.7

tatastuṣṭāva taṃ brahmā sarvadevagaṇaiḥ saha .
guhyairnānāvidhaiḥ stotrairvedavedāṅgapāragaiḥ . . 7

3.121.8

svasti te'stu jagannātha dharmavarṣahimākara .
śāṃtiste sarvalokānāṃ devadeva divākara . . 8

3.121.9

tato rudraśca viṣṇvādyāḥ stuvaṃtastaṃ divākaram .
tejaste vardhatāṃ deva likhyate'pi divaspate . . 9

3.121.11

indraścāgatya taṃ devaṃ likhyamānamathāstuvat .
jaya deva jayasveti tattvado'si jagatpate .. 1.121.10
ṛṣayastu tataḥ sapta viśvāmitrapurogamāḥ .
tuṣṭuvurvividhaiḥ stotraiḥ svastisvastītivādinaḥ .. 11

3.121.12

vedoktābhirathāśīrbhirvālakhilyāśca tuṣṭuvuḥ .
tvaṃ nātha mokṣiṇāṃ mokṣo dhyeyastvaṃ dhyānināmapi .. 12

3.121.13

tvaṃ gatiḥ sarvabhūtānāṃ tvayi sarvaṃ pratiṣṭhitam .
prajābhyaścaiva deveśa śaṃ no'stu jagataḥ pate .. 13

3.121.14

tvatto bhavati vai nityaṃ jagatsaṃlīyate tvayi .
tvamekastvaṃ dvidhā caiva tridhā ca tvaṃ na saṃśayaḥ .. 14

3.121.15

tvayaikena jagatsṛṣṭaṃ tvayaikena prabodhitam .
tato vidyādharagaṇā yakṣarākṣasapannagāḥ .. 15

3.121.16

kṛtāñjalipuṭāḥ sarve śirobhiḥ praṇatā ravim .
ūcurevaṃvidhā vāco manaḥ śrotrasukhapradāḥ .. 16

3.121.17

sahyaṃ bhavatu te tejo bhūtānāṃ bhūtabhāvana .
hāhā hūhūstataścaiva tumbururnāradastathā .. 17

3.121.18

upagātuṃ samārabdhā gāmuccaiḥ kuśalā ravim .
ṣaḍjamadhyamagāṃdhāragrāmatrayaviśāradāḥ .. 18

3.121.19

mūrcchanābhistataścaiva tathā dhaivatapañcamaiḥ .
nānānubhāvamandraiśca ardhamandraistathaiva ca .. 19

3.121.20

trisādhanaiḥ prakāraistu vādyatālasamanvitaiḥ .
viśvācī ca ghṛtācī ca urvaśī ca tilottamā ..20

3.121.22

menakā sahajanyā ca rambhā cāpsarasāṃ varā .
hāvabhāvavilāsaiśca kurvatyo'bhinayānbahūn ..2 1
tato'tīva kalaṃ geyaṃ madhuraṃ ca pravartate .
sarveṣāṃ devasaṃghānāṃ manaḥ śrotrasukhapradam ..22

3.121.23

pravādyaṃ tu tatastatra vīṇāvaṃśādi suvrata .
paṇavāḥ puṣkarāścaiva mṛdaṅgāḥ paṭahāstathā . . 23

3.121.24

devadundubhayaḥ śaṃkhāḥ śataśo'tha sahasraśaḥ .
gāyadbhiścaiva gandharvairnṛtyadbhiścāpsarogaṇaiḥ . . 24

3.121.25

tūryavāditraghoṣaiśca sarvaṃ kolāhalīkṛtam .
tataḥ kṛtaiḥ karapuṭaiḥ padyakuḍmalasannibhaiḥ . . 25

3.121.26

lalāṭopari vinyastaiḥ praṇemuḥ sarvadevatāḥ .
tataḥ kolāhale tasminsarvadevasamāgame . . 26

3.121.27

tejasaḥ śātanaṃ cakre viśvakarmā śanaiḥ śanaiḥ . . 27

3.121.28

iti himajalagharmakālahetorharakamalāsanaviṣṇusaṃstutasya .
tadupari likhanaṃ niśamya bhānorvrajati divākaralokamāyuṣonte . . 28

3.121.121

iti śrībhaviṣye mahāpurāṇe brāhme parvaṇi saptamīkalpe viśvakarmakṛtasūryatejaḥ śātanaṃ
nāmaikaviṃśottaraśatatamo'dhyāyaḥ . 121 .

Linked texts (5)