Bhavishyapurana 3.129

Bhaviṣyapurāṇa 3.129

Language: Sanskrit

3.129.1

sumanturuvāca
atha labdhavaraḥ sāmbo varaṃ prāpya purātanam .
manyamānastadāścaryaṃ prahṛṣṭenāntarātmanā . . 1

3.129.2

pūrvābhyāsena tenaiva sārdhamanyaistapasvibhiḥ .
snāpanārthaṃ nātidūraṃ candrabhāgāṃ nadīṃ yayau . . 2

3.129.3

kṛtvātmamaṇḍalākāraṃ śraddadhāno dinedine .
sasnau sañcintayāmāsa kiṃ rūpaṃ sthāpayāmyaham . . 3

3.129.4

sa snātaḥ sahasaivātha praṇamya1 tu prabhāvatīm .
uhyamānāṃ jalaughena pratimāṃ sammukhīṃ raveḥ . . 4

3.129.5

tāṃ dṛṣṭvā tasya vīrasya samutpannamidaṃ yathā .
devena yattadājñaptaṃ tadidaṃ nātra saṃśayaḥ . . 5

3.129.6

sa tāmuttārya salilādānīya ca mahīpate .
tasminmitravanoddeśe sthāpayāmāsa tāṃ tadā . . 6

3.129.7

nidhāya pratimām̐lloke sāmbastasya mahātmanaḥ .
mitraṃ mitravane ramye sthāpayitvā vidhānataḥ . . 7

3.129.8

tatastāmeva papraccha praṇamya pratimāṃ raveḥ .
keneyaṃ nirmitā nātha bhavato hyākṛtiḥ śubhā . . 8

3.129.9

pratimā tamuvācātha śṛṇu sāmba bruve svayam .
nirmitā yena cāpyeṣā madīyā puruṣākṛtiḥ . . 9

mamātitejasāviṣṭaṃ rūpamāsītpurātanam .
asahyaṃ sarvabhūtānāṃ tato'smyabhyarcitaḥ suraiḥ . .
sahyaṃ bhavatu te rūpaṃ sarvaprāṇabhṛtāmiti . . 1.129.10
tato mayā samādiṣṭo viśvakarmā mahātapāḥ .
tejasāṃ śātanaṃ kurvanrūpaṃ nirvartayasva me . . 11

3.129.12

tatastu matsamādeśāttenaiva nipuṇaṃ tadā .
śākadvīpe bhramiṃ kṛtvā rūpaṃ nirvartitaṃ mama . . 12

3.129.13

prītyā teṣāṃ prapañco'yaṃ sa mayā kāritaḥ punaḥ .
teneyaṃ kalpavṛkṣāttu nirmitā viśvakarmaṇā . . 13

3.129.14

kṛtvā himavataḥ pṛṣṭhe purā siddhaniṣevite .
tvadarthaṃ candrabhāgāyāṃ tatastenāvatāritā . . 14

3.129.15

bhavatastāraṇārthaṃ hi tataḥ sthānamidaṃ śubham .
ruciraṃ sarvadā sāmba sānnidhyaṃ me'tra yāsyati . . 15

3.129.16

sānnidhyaṃ mama pūrvāhṇe sutīre drakṣyate janaiḥ .
kālapriye ca madhyāhne'parāhṇe cātra nityaśaḥ . . 16

3.129.17

pūrvāhṇe pūjayed brahmā madhyāhne cakradhṛtsvayam .
śaṅkaraścāparāhṇe tu māṃ pūjayati sarvadā . . 17

3.129.18

ityukto'sau bhagavatā bhāskareṇa sa yādavaḥ .
harṣamāpa mahābāho bhāskaro'ntardadhe tataḥ . . 18

3.129.129

iti śrībhaviṣye mahāpurāṇe brāhme parvaṇi saptamīkalpe sāmbopākhyāne
sāmbakṛtādityamūrtisthāpanaṃ nāmaikonatriṃśadadhikaśatatamo'dhyāyaḥ . . 129 .

Linked texts (1)

Sāmbapurāṇa — Sanskrit