Bhukhanda 103: athāṣṭottaraśatatamo'dhyāyaḥ
Bhūkhaṇḍa 103
- Language
- Sanskrit
Contents
- 103.34 — 1 part
athāṣṭottaraśatatamo'dhyāyaḥ
103.1
kuñjala uvāca —
brahmaputro mahātejā vasiṣṭhastapatāṃ varaḥ | nahuṣaṃ taṃ samāhūya idaṃ vacanamabravīt
103.2
vanaṃ gacchasva śīghraṃ tvaṃ vanyamānaya puṣkalam | sa munervākyamākarṇya nahuṣastu vanaṃ yayau
103.3
ayameṣa mahāprājño nahuṣo nāma vīryavān | āyuputraḥ sudharmātmā bālyānmātrā viyojitaḥ
103.4
asyaivātiviyogena āyubhāryā praroditi | aśokasundarī cāpi tapastepe suduśvaram
103.5
kadā paśyati sā devī putramindumatī śubham | nahuṣaṃ nāma dharmajñaṃ hṛtaṃ pūrvaṃ tu dānavaiḥ
103.6
tannāśāya nirālambā śivasya tanayā varā | aśokasundarī bālā'pyāyuputrasya kāraṇāt
103.7
sā saṃgatā hyanenāpi kadā caiva bhaviṣyati | evaṃ sāṃsārikaṃ vākyaṃ divi cāraṇabhāṣitam
103.8
śuśrāva sa hi dharmātmā nahuṣo vikramānvitaḥ | sa gatvā vanyamādāya vasiṣṭhasyā''śramaṃ prati
103.9
vanyaṃ nivedya puṇyātmā vasiṣṭhāya mahātmane | baddhāñjalipuṭo bhūtvā bhaktyā namitakaṃdharaḥ
103.10
tamuvāca mahāprājñaṃ vasiṣṭhaṃ tapatāṃ varam | bhagavanme śrutaṃ vākyamapūrvaṃ cāraṇairitam
103.11
eṣa vai nahuṣo nāmnā āyuputro viyojitaḥ | mātrā saha suduḥkhaistu indumatyā hi dānavaiḥ
103.12
śivasya tanayā bālā tapastepe suduśvaram | nimittamasya dhīrasya nahuṣasyeti vai guro
103.13
evamābhāṣitaṃ tatra tatsarvaṃ ca śrutaṃ mayā | ko'sāvāyuḥ sa dharmātmā kā sā cendumatī śubhā
103.14
aśokasundarī kā sā nahuṣaśceti kaḥ prabho | etanme saṃśayaṃ jātaṃ tadbhavāṃśchettumarhati
103.15
anyaḥ ko'pi mahārbhājñaḥ kutrāsau nahuṣeti ca | tacca sarvaṃ mama brūhi kāraṇāntarameva ca
103.16
vasiṣṭha uvāca —
āyū rājā sa dharmātmā saptadvīpādhipo balī | bhāryā cendumatī tasya satyarūpā tapasvinī
103.17
tasyāmutpāditaḥ putro bhavānvai guṇamandiram | āyunā rājarājena somavaṃśasya bhūṣaṇam
103.18
harasya kanyā suśroṇī guṇarūpairaṃlaṃkṛtā | aśokasundarī nāmnā subhagā cāruhāsinī
103.19
tvadarthe sā tapastepe nirālambā tu yauvane | tasyā bhartā bhavānsṛṣṭo dhātrā yogena niścitaḥ
103.21
gaṅgāyāstīramāsādya dhyānayogasamanvitām | huṇḍastu dānavendro yo dṛṣṭvā caikākinīṃ sa tām 20
tapasā prajvalantīṃ ca subhagāṃ kamalekṣaṇām | rūpaudāryaguṇopetāṃ kāmabāṇaiḥ prapīḍitaḥ
103.22
tāṃ babhāṣe'ntikaṃ gatvā mama bhāryā bhaveti ca | evaṃ sā tadvacaḥ śrutvā tamuvāca yaśasvinī
103.23
mā huṇḍa sāhasaṃ kārṣīrmā jalpasva punaḥ punaḥ | aprāpyā'haṃ tvayā daitya parabhāryā viśeṣataḥ
103.24
devena me purā sṛṣṭa āyuputro mahābalaḥ | nahuṣo nāma medhāvī bhaviṣyati patirmama
103.25
devairdatto mahātejā maraṇaṃ tvaṃ parīpsasi | [ tataḥ śāpaṃ pradāsyāmi yena bhasmī bhaviṣyasi]
103.26
evamākarṇya tadvākyaṃ kāmabāṇaprapīḍitaḥ | māyayā ca hṛtā tena praṇītā nijamandiram
103.27
jñātvā tayā mahābhāga śapto'sau dānavādhamaḥ | nahuṣasyaiva hastena tava mṛtyurbhaviṣyati
103.28
ajāte tvayi saṃjātā vadase tvaṃ yathaiva tat | sa tvamāyusuto vīra hṛto huṇḍena pāpinā
103.29
sūdena rakṣito dāsyā preṣito mama cā''śramam | evaṃ tvaṃ vanamadhye ca dṛṣṭaścāraṇakiṃnaraiḥ
103.30
yatta vai smāritaṃ vatsa mayā tatkathitaṃ punaḥ | jahi taṃ pāpakartāraṃ huṇḍākhyaṃ dānavādhamam
103.31
netrābhyāṃ hi pramuñcantīmaśrūṇi parimārjaya | ito gatvā prapaśya tvaṃ gaṅgātīraṃ mahābalam
103.32
nipātya dānavendraṃ tvaṃ kārāgṛhātsamānaya | aśokasundarī yā hi tasyā bhartā bhavasva hi
103.33
etatte sarvamākhyātaṃ praśnasyāpi hi kāraṇam | ābhāvya nahuṣaṃ vipro virarāma mahāmatiḥ
103.34
ākarṇya sarvaṃ muninā niyuktamāścaryarūpaṃ pravicintya bhūyaḥ
tasyāntamekaḥ parikartukāma āyoḥ sutaḥ kopamatho cakāra
103.34.p1
iti śrīmadbhāpurāṇe pādme bhūmikhaṇḍe venopākhyāne gurutīrthe nāhuṣe'ṣṭottaraśatatamo'dhyāyaḥ || 108
Linked texts (2)
- Padmapurāṇa — Vyāsa, Sanskrit
- Bhūmikhaṇḍa — Sanskrit