Bhukhanda 104
Bhūkhaṇḍa 104
- Language
- Sanskrit
Contents
- 104.63 — 1 part
104.1
kuñjala uvāca —
praṇipatya mahātmānaṃ vasiṣṭhaṃ tapatāṃ varam | araṇyaṃ nirjagāmātha bāṇapāṇirdhanurdharaḥ
104.2
eṇasya māṃsaṃ suvipācya bhojitaṃ bālastayā rakṣita eva buddhyā
āyoḥ suputraḥ saguṇaḥ sarūpo devopamo devaguṇaiśca yuktaḥ
104.3
tenaiva māṃsena susaṃskṛtena mṛṣṭena pakena rasānugena
tameśa daityaṃ paribhāṣya sūdo duṣṭaṃ suharṣeṇa vyabhojayattadā
104.4
bubhuje dānavo māṃsaṃ rasenāktaṃ sucāṭunā | harṣeṇāpi samāviṣṭo jagāmāśokasundarīm
104.5
tāmuvāca tatastūrṇaṃ kāmopahatacetanaḥ | āyoḥ putro mayā bhadre bhakṣitaḥ patireva te
104.6
māmeva bhaja cārvaṅgi bhuṅkṣva bhogānmanogatān | kiṃ kariṣyasi tena tvaṃ mānuṣeṇa gatāyuṣā
104.7
uvāca tadvacaḥ śrutvā śivakanyā yaśasvinī | bhartā me daivavairdatto amaro doṣavarjitaḥ
104.8
tasya mṛtyurna vai dṛṣṭo devairapi mahātmabhiḥ | evamākarṇya tadvākyaṃ dānavo duṣṭaceṣṭitaḥ
104.9
tāmuvāca viśālākṣīṃ prahasyaiva punaḥ punaḥ | adyaiva bhakṣitaṃ māṃsamāyuputrasya sundari
104.10
jātamātrasya bālasya nahuṣasya durātmanaḥ | evaṃ tvākarṇya sā vākyaṃ kopaṃ cakre sudāruṇam
104.11
provāca satyasaṃsthā sā tapasā bhāvitā punaḥ | tapa eva mayā taptaṃ manasā niyamena vai
104.12
āyusūnuścirāyuśca sa satyena bhaviṣyati | ito gaccha durācāra yadi jīvitumicchasi
104.13
anyathā tvāmahaṃ śapsye punareva na saṃśayaḥ | evamākarṇitaṃ tasyāḥ sūdena nṛpatiṃ prati
104.14
parityajya mahārājannetāmanyāṃ samāśraya | sūdena preṣito daityaḥ sa hum̐ṇḍo dānavādhamaḥ
104.15
nirjagāma tvarāyuktaḥ sa svāṃ bhāryāṃ priyāṃ prati | ceṣṭitaṃ naiva jānāti dāsayā sudena yatkṛtam
tasyai niveditaṃ sarvaṃ priyāyai vṛttameva ca
104.16
sūta uvāca —
aśokasundarī sā ca mahatā tapasā kila
104.17
duḥkhaśokena saṃptā kṛśībhūtā tapasvinī | cintayantī priyaṃ kāntaṃ taṃ dhyāyati punaḥ punaḥ
104.18
kiṃ na kurvanti vai daityā upāyairvividhairapi | upāyajñāḥ sadā buddhyā hyupāyenāpi sarvadā
104.19
vartante danujaśreṣṭhā nānābhāvaiḥ susaṃpadā | yathopāyena vegena hṛtā'haṃ pāpinā purā
104.20
tathā sa ghātitaḥ putra āyodhścaiva bhaviṣyati | yaṃ dṛṣṭvā daivayogena bhavitāramanāmayam
104.21
udyamenāpi paśyeta kiṃvā naśyati vā na vā | kiṃvā sa udyamaḥ śreṣṭhaḥ kiṃvā tatkarmajaṃ phalam
104.22
bhāvibhāvaḥ kathaṃ naśyettato vedaḥ pratiṣṭhati | viśeṣo bhāvito devaiḥ sa kathaṃ cānyathā bhavet
104.23
evaṃ sā tu mahābhāgā cintayantī punaḥ punaḥ | vidyuddharaḥ kiṃnarastu bṛhaddaṃśo mahātanuḥ
104.24
etanmadhye mahākāyaḥ pakṣābhyāṃ hi vivarjitaḥ | dvibhujo vaṃśahastaśca hārakaṅkaṇaśobhitaḥ
104.25
divyagandhānuliptāṅgo bhāryayā saha cā''gataḥ | tāmuvāca nirānandāṃ sa sutāṃ śaṃkarasya hi
104.27
kiṃ tvaṃ cintayase devi viddhi vidyuddharaṃ hi mām | kiṃnaraṃ viṣṇubhaktaṃ tvāṃ preṣitaṃ devasattamaiḥ 26
duḥkhamevaṃ na kartavyaṃ bhavatyā nahuṣaṃ prati | huṇḍena pāpacoreṇa vadhārthaṃ tasya dhīmataḥ
104.28
kṛtamevākhilaṃ karma hataścā''yusutaḥ śubhe | sa tu vai rakṣito devairupāyairvividhairapi
104.29
huṇḍa evaṃ vijānāti āyuputro hato mayā | bhakṣitastu viśālākṣi iti jānāti suvrate
104.30
bhavatīṃ śrāvayitvā tu gato'sau dānavādhamaḥ | svena pūrvavipākena puṇyasyāpi mahāyaśāḥ
104.31
pūrvajanmārjitenaiva tava bhartā sa jīvati | puṇyasyāpi balenaiva yeṣāmāyurvinirmitam
104.32
svarjitasya mahābhāge nāśamicchati dhātukaḥ | hṛtamānā mahāpāpāḥ paratejovidūṣakāḥ
104.33
teṣāmatho vināśāya pravṛttaṃ hi dine dine | nānāvidhairupāyaiste viṣaśastrādibhistataḥ
104.34
hantumicchanti taṃ puṇyaṃ puṇyakarmābhirakṣitam | pāpinaścaiva huṇḍādyā mohanastambhanādibhiḥ
104.35
pīḍayanti durācārā nānābhedairbalābaleḥ | sukṛtasya prayogeṇa pūrvajanmārjitena vā
104.37
puṇyasyāpi mahābhāge puṇyavantaṃ ca rakṣitam | viphalatāṃ prayāntyeva upāyāḥ pāpibhiḥ kṛtāḥ 36
yantrāṇi mantrāśca śastrāgniviṣabandhanāḥ | rakṣayanti mahātmānaṃ devapuṇyaiḥ surakṣitam
104.38
kartāro bhasmasāṃ yānti sa vai tiṣṭhati puṇyabhāk | āyuputrasya vīrasya rakṣakā devatāḥ śubhe
104.39
puṇyasya saṃcayaṃ sarvaṃ tapasāṃ nidhimeva ca | tasmācca rakṣito vīro nahuṣo balināṃ varaḥ
104.40
satyena tapasā'nena puṇyaiśca saṃyamairdamaiḥ | mā kṛthā dāruṇaṃ duḥkhaṃ muñca śokamkāraṇam
104.41
sa hi jīvati dharmātmā mātrā pitrā vinā vane | tapovane vasatyekastapasvibhiralaṃkṛtaḥ
104.42
vedavedāṅgatattvajño dhanurvedasya pāragaḥ | virājate śaśī yadvatsvakalābhiḥ sutejasā
104.43
tathā virājate so'pi svakalābhiḥ sumadhyame | vidyābhiśca mahāpuṇyaistapobhirvividhaistathā
104.44
rājate paravīraghno ripuhā suravallabhaḥ | huṇḍaṃ nihatya daityendraṃ tvāmevaṃ hi pralapsyate
104.45
tvayā sārdhaṃ striyā caiva pṛthivyāmekabhūpatiḥ | bhaviṣyati mahāyogī yathā svarge tu vāsavaḥ
104.46
tvaṃ tasmātprāpsyase bhadre suputraṃ vāsavopamam | yayātiṃ nāma dharmajñaṃ prajāpālanatatparam
104.47
tathā kanyāśataṃ cāpi rūpaudāryaguṇānvitam | yāsāṃ puṇyairmahārāja indralokaṃ prayāsyati
104.48
indratvaṃ bhokṣyate devi nahuṣaḥ puṇyavikramaḥ | yayātirnāma dharmātmā ātmajaste bhaviṣyati
104.50
[ prajāpālo mahārājaḥ sarvajīvadayāparaḥ ] | tasya putrāstu catvāro bhaviṣyanti mahaujasaḥ 49
balavīryaguṇopetā dhanurvedasya pāragāḥ | prathamastuvasurnāma pururnāma dvitīyakaḥ
104.51
ururnāma tṛtīyastu caturtho vīryavānyaduḥ | evaṃ putrā mahāvīryāstejasvino mahābalāḥ
104.52
bhaviṣyanti mahātmānaḥ sarvatejaḥsamanvitāḥ | yadoścaiva sutā dhīrāḥ siṃhatulyaparākramāḥ
104.53
teṣāṃ nāmāni bhadre te śṛṇu me gadataḥ śubhe | bhojaśca bhīmakraścāpi andhakaḥ kukurastathā
104.54
vṛṣṇirnāma sudharmātmā satyādhāro bhaviṣyati | ṣaṣṭhastu śrutasenaśca śrutādhāraśca saptamaḥ
104.55
kāladaṃṣṭro mahāvīryaḥ samare kālajidvalī | yadoḥ putrā mahāvīryā yādavākhyā dhairātale
104.56
teṣāṃ putrāśca pautrāśca bhaviṣyanti dharātale | evaṃ nahuṣavaṃśo vai tava devi bhaviṣyati
104.57
duḥkhameva parityajya sthīyatāmadhunā sukham | sameṣyati mahāprājñastava bhartā śubhānane
104.59
nihatya dānavaṃ huṇḍaṃ tvāmevaṃ pariṇeṣyati | duḥkhajātāni soṣṇāni netrābhyāṃ hi patanti ca 58
aśrūṇi cendumatyaśca saṃmārjaṃyati mānadaḥ | āyodhva duḥkhamutsṛtya svakulaṃ tārayiṣyati
104.60
sukhinaṃ pitaraṃ kṛtvā prajāpālo bhaviṣyati | etatte sarvamākhyātaṃ devānāṃ kathanaṃ śubhe
duḥkhaśokaṃ parityajya sukhena parivartaya
104.61
aśokasundaryuvāca —
[ kadā hyeṣyati me bhartā vihito daivatairyadi | satyaṃ vadasva dharmajña mama saukhyaṃ pravardhaya
104.62
śīghraṃ drakṣyasi bhartāraṃ tvameva śṛṇu sundari] | evamuktvā jagāmātha gandharvo vibudhālayam
104.63
aśokasundarī cāpi tapastepe hi tatra vai | kāmaṃ krodhaṃ parityajya lobhaṃ cāpi śivātmajā
104.63.p1
iti śrīmahāpurāṇe pādme bhūmikhaṇḍe venopākhyāne gurutīrthe nahuṣe navādhikaśatatamo'dhyāyaḥ || 109
Linked texts (3)
- Padmapurāṇa — Vyāsa, Sanskrit
- Brahmāṇḍapurāṇa — Vyāsa, Sanskrit
- Bhūmikhaṇḍa — Sanskrit