Bhukhanda 105
Bhūkhaṇḍa 105
- Language
- Sanskrit
105.1
kuñjala uvāca —
āmantrya ca munīnsarvānvasiṣṭhaṃ tapatāṃ varam | samutsuko gantukāmo nahuṣo dānavaṃ prati
105.2
tataste munayaḥ sarve vasiṣṭhādyāstapodhanāḥ | āśīrbhirbhinanandyainamāyoḥ putraṃ mahābalam
105.3
ākāśe devatāḥ sarvā jahṛṣe dundubhīnmudā | puṣpavṛṣṭiṃ pracakruśca nahuṣasyāpi mūrdhani
105.4
atha devaḥ sahasrākṣaḥ suraiḥ sārdhaṃ samāgataḥ | dadau śastrāṇi cāstrāṇi [+sūryatejopamāni ca
105.5
devebhyo nṛpaśārdūlo jagṛhe dvijasattamāḥ | tāni divyāni cāstrāṇi divyarūpopamo'bhavat]
105.6
atha te munayaḥ sarve sahasrākṣamathābruvan | syandano dīyatāmasmai nahuṣāya sureśvara
105.7
munīnāṃ matamājñāya vajrapāṇiḥ sa sārathim | āhūya mātaliṃ cāpi hyādideśa surādhipaḥ
105.8
enaṃ gaccha mahātmānaṃ yujyatāṃ syandanena vai | sadhvajena mahātmānaṃ samare nṛpanandanam
105.9
sa covāca sahasrākṣaṃ kariṣye tava śāsanam | evamuktvā jagāmā''śu hyāyuputraṃ raṇodyatam
105.10
rājānaṃ pratyuvācātha devarājena bhāṣitam | vijayī bhava dharmajña rathenānena saṃgare
105.11
ityuvāca sahasrākṣastvāmeva nṛpatīśvara | jahi tvaṃ dānavaṃ saṃkhye huṇḍaṃ vai pāpacetanam
105.12
evamākarṇya rājendraḥ sānandapulakodgamaḥ | prasādāddevarājasya vasiṣṭhasya mahātmanaḥ
105.13
dānavaṃ sūdayiṣyāmi samare pāpacetasam | devānāṃ ca viśeṣeṇa mama māyāpracāriṇam
105.14
evamukte śubhe vākye nahuṣeṇa mahātmanā | athā''yātaḥ svayaṃ viṣṇuḥ śaṅkhacakragadādharaḥ
105.15
svacakrāccakramutpādya sūryabimbopamaṃ mahat | jvalatā tejasā dīptaṃ suvṛttāntaṃ śubhāvaham
105.16
nahuṣāya dadau devo harṣeṇa mahatā kila | tasmai śūlaṃ dadau śaṃbhuḥ sutīkṣṇaṃ tejasā'nvitam
105.17
tena śūlavareṇāsau śobhate samarodyataḥ | [ dvitīyaḥ śaṃkaraścāyaṃ tripuraghno yathā prabhuḥ]
105.18
brahmāstraṃ dattavānbrahmā varuṇaḥ pāśamuttamam | [+candratejaḥpratīkāśaṃ jalajaṃ nālasaṃgatam ]
105.19
vajramindrastathā śaktiṃ vāyuścāpaṃ samāṇam | āgneyāstraṃ tathā vahnirdadau tasmai mahātmane
105.20
śastrāṇyastrāṇi sarvāṇi divyāni vividhāni ca | dadurdaivā mahātmānastasmai rājñe mahaujase
105.22
kuñjala uvāca—
atha āyusuto vīro daivataiḥ parimānitaḥ
āśīrbhirnanditaścāpi munibhistattvadarśibhiḥ | āruroha rathaṃ divyaṃ bhāskaraṃ ratnabhūṣitam
105.24
[ ghaṇṭāravaiḥ praṇadantaṃ kṣudraghaṇṭāsamākulam ] | rathena tena divyena śuśubhe nṛpanandanaḥ
divi mārge yathā sūryyastejasā svena vai kila | [†pratapaṃstejasā tadvaddaityānāṃ mastakeṣu saḥ]
Linked texts (2)
- Padmapurāṇa — Vyāsa, Sanskrit
- Bhūmikhaṇḍa — Sanskrit