Bhukhanda 116: atha caturviṃśatyadhikaśatatamo'dhyāyaḥ
Bhūkhaṇḍa 116
- Language
- Sanskrit
Contents
- 116.26 — 1 part
atha caturviṃśatyadhikaśatatamo'dhyāyaḥ
116.1
sūta uvāca —
antardhānaṃ gate viṣṇau veno rājā mahāmatiḥ | kva gato devadeveśa iticintāparo'bhavat
116.2
harṣeṇa mahatā''viṣṭaścintayitvā nṛpottamaḥ | samāhūya pṛthuṃ caiva svaputraṃ madhurākṣaraiḥ
116.3
uvāca ca mahābhāgo harṣeṇa mahatā''vṛtaḥ | tvayā putreṇa bhūrloke tārito'smi supātakāt
116.4
nīta ujjvalatāṃ vatsa vaṃśo me sāṃprataṃ pṛtho | mayā vināśito doṣaistvayā caiva prakāśitaḥ
116.5
yaje'haṃ cāśvamedhena dāsye dānānyanekaṃśaḥ | viṣṇulokaṃ prayāsyāmi sakāyastvatprasādataḥ
116.6
saṃbharasva mahābhāga saṃbhārāṃścāpyanuttamān | āmantraya mahābhāgānbrāhmaṇānvedapāragān
116.7
evaṃ pṛthuḥ samādiṣṭo venenāpi mahātmanā | pratyuvāca mahātmā sa venaṃ pitaramādarāt
116.8
kuru rājyaṃ mahābhāga bhuṅkṣva bhogānmanogatān | sudivyānmānuṣānpuṇyānyairjayja janārdanam
116.9
[+evamuktvā praṇamyainaṃ pitaraṃ jñānatatparam ] | dhanurādāya sa pṛthuḥ savāṇaṃ yatnapūrvakam
116.10
ādideśa varānsarvānyotsyadhvaṃ bhūtale mama | pāpamevaṃ na kartavyaṃ karmaṇā niyamena vai
116.11
kariṣyati ca yaḥ pāpamājñāṃ venasya bhūpate | ullaṅghya vadhyatāṃ so'pi yāsyate nātra saṃśayaḥ
116.12
dānamevaṃ pradātavyaṃ yajñaiścaiva janārdanam | yajadhvaṃ mānavāḥ sarve tanmanaskā vimatsarāḥ
116.14
evaṃ śikṣāṃ tu dattvā ca rājyaṃ bhṛtyeṣu venajaḥ | nikṣipya sa gato viprāstapaso'rthe tapovanam 13
sarvāndoṣānaparityajya saṃyamya viṣayendriyān | śatavarṣapramāṇaṃ vai nirāhāro babhūva ha
116.15
tapasā tasya vai tuṣṭo brahmā pṛthumuvāca ha | tapastapasi kasmāttvaṃ tanmamā''cakṣva suvrata
116.16
pṛthuruvāca —
aho veno mahāprājñaḥ pitā me kīrtivardhanaḥ | [ samācarati yaḥ pāpamasya rājye narādhamaḥ
116.17
śiraśchettā bhavettaiṣa tasya devo janārdanaḥ] | adṛṣṭaiśca mahācakrairhariḥ śāstā bhavetsvayam
116.18
manasā karmaṇā vācā kartuṃ vāñchanti pātakam | teṣāṃ śirāṃsi trucyantu śaṅkhavṛkṣaphalaṃ yathā
116.19
etadeva varaṃ manye śṛṇu svattaḥ sureśvara | prajānāṃ doṣabhāvaiśca na lipyati pitā mama
116.20
tathā kuruṣva deveśa yadi bhadramihecchasi | dadasva uttamaṃ kāmaṃ caturmukha namo'stu te
116.21
brahmovācaevamastu mahābhāga pitā te pūtatāṃ gataḥ | viṣṇunā śāsito vatsa putreṇāpi tvayā pṛtho
116.22
evaṃ pṛthuṃ samuddiśya varaṃ dattvā gato vibhuḥ | pṛthuścāpi mahāprājño rājyakarmāṇi saṃsthitaḥ
116.24
vainyasya rājye viprendrāḥ pāpaṃ kaścinna cā''caret | yastu cintayate pāpaṃ trividhenāpi karmaṇā23
śiraśchedo bhavettasya yathā cakrairnikṛntitaḥ | tadāprabhṛti vai pāpaṃ naiva ko'pi samācaret
116.25
ityājñā vartate tasya vainyasyāpi mahātmanaḥ | sarvalokāḥ samācāraiḥ parivartanti nityaśaḥ
116.26
dānabhogaiḥ pravartante sarvadharmaparāyaṇāḥ | sarvasaukhyaiḥ pravardhante prasādāttasya bhūpateḥ
116.26.p1
iti śrīmahāpurāṇe pādme bhūmikhaṇḍe venopākhyāne caturviṃśātyadhikaśatatamo'dhyāyaḥ || 124
Linked texts (2)
- Padmapurāṇa — Vyāsa, Sanskrit
- Bhūmikhaṇḍa — Sanskrit