Bhukhanda 117
Bhūkhaṇḍa 117
- Language
- Sanskrit
117.1
sūta uvāca —
venasyā''jñāṃ samāprāpya pūtaḥ paramadhārmikaḥ | saṃbabhāra sa saṃbhārānnānāpuṇyānnṛpātmajaḥ
117.2
nimantrya brāhmaṇānsarvānānādeśodbhavānatha | atha vena iyājāsāvaśvamedhena bhūpatiḥ
117.3
dānānyadādbrāhmaṇebhyo nānārūpāṇyanekaṃśaḥ | jagāma vaiṣṇavaṃ lokaṃ sakāyo jagatīpatiḥ
117.4
viṣṇunā saha dharmātmā nityameva pravartate | etadvaḥ sarvamākhyātaṃ caritaṃ tasya bhūpateḥ
117.5
sarvapāpopaśamanaṃ sarvaduḥkhavināśanam | pṛthurevaṃ sa dharmātmā rājyaṃ pṛthvyāścakāra ha
117.6
trailokyena samaṃ pṛthvīṃ dudoha nṛpasattamaḥ | prajā'nurañjitā tena puṇyadharmānukarmābhiḥ
117.7
etatte sarvamākhyātaṃ bhūmikhaṇḍamanuttamam | prathamaṃ sṛṣṭikhaṇḍaṃ hi bhūmikhaṇḍaṃ dvitīyakam
117.8
bhūmikhaṇḍasya māhātmyaṃ kathayiṣyāmyahaṃ punaḥ | asya khaṇḍasya vai ślokaṃ yaḥ śṛṇoti narottamaḥ
117.9
dinasyaikasya vai pāpaṃ tasya caiva praṇaśyati | yo naro bhāvasaṃyukto hyadhyāyaṃ śṛṇute sudhīḥ
117.10
tasya puṇyaṃ pravakṣyāmi śrūyatāṃ dvijasattamāḥ | dattasya gosahasrasya brāhmaṇebhyaḥ suparvaṇi
117.11
yatphalaṃ tatprajāyeta viṣṇuścaiva prasīdati | asya padmapurāṇasya paṭhamānasya nityaśaḥ
117.12
kalau yuge suvighnāśca jāyante tasya no kadā
117.14
vyāsa uvāca—
kasmātkalau pra(na)jāyante śṛṇvānasya ca padmaja | narasya puṇyapakvasya nānā vighnāḥ sudāruṇāḥ
brahmovāca—
makhasyāpyaśvamedhasya yatphalaṃ parikathyate | tatphalaṃ dṛśyate viprāḥ purāṇe padmasaṃjñake
117.15
aśvamedhamakhaḥ puṇyaḥ kalau naiva pravartate | purāṇaṃ cāpi yattadvadaśvamedhasamaṃ kila
117.16
aśvamedhasya yatpuṇyaṃ svargamokṣaphalapradam | na bhuñjanti narāḥ pāpāḥ pāpamārgeṣu saṃsthitāḥ
117.17
purāṇasyāsya ca phalaṃ padmasaṃjñasya sattamāḥ | aśvamedhasya yatpuṇyaṃ [ svargamokṣaphalapradam
117.18
na bhuñjanti narāḥ pāpāḥ pāpamārgeṣu saṃsthitāḥ | purāṇasyāsya puṇyasya padmasaṃjñasya sattama
117.19
kalau yuge naraiḥ pāpairgantavyaṃ narakārṇavam | tasmācchroṣyanti tatpuṇyaṃ] caturvargaprasādhakam
117.20
yena śrutamidaṃ puṇyaṃ purāṇaṃ padmasaṃjñakam | sarvaṃ hi sādhitaṃ tena caturvargasya kāraṇam
117.21
aśvamedhasya yajñasya phalaṃ tasya prajāyate† | śṛṇvānasya narasyāpi mahāvighno na saṃcaret
117.22
aśraddhā jāyate cāpi pāṭhakasya narasya ca | lobhaśca jāyate tasya śrāvakasya dvijottamāḥ
117.23
preṣitā devadevena mahāmohāḥ sudāruṇāḥ | akarotsa vināśaṃ tu śṛṇvataścāsya nityaśaḥ
117.24
dūṣakāḥ kutsakāḥ pāpāḥ saṃbhavanti dine dine | jñātavyaṃ tu suśuddhena vighnarūpaṃ mamādhunā
117.26
[ saṃjātaṃ dṛśyate vyāsa tathā homaṃ samācaret | ] vaiṣṇavaiśca mahāmantrairviṣṇusūktaiḥ supuṇyadaiḥ 25
viṣṇvārādhanamantreṇa sahasraśīrṣakeṇa ca | idaṃ viṣṇurityanena ābrahmaṇena punaḥ punaḥ
117.27
tryambakeṇa ca mantreṇa [+homameva samācaret | bṛhatsāmnā sumantreṇa ] dvādaśākṣarakeṇa vā
117.28
yasya devasya yo homastasya mantreṇa homayet | aṣṭottaratilājyaiśca pālāśaiḥ samidhairapi
117.29
vighneśaṃ pūjayetpūrvaṃ śāradāṃ ca sureśvarīm | grahāṇāmapi kartavyaṃ sthāpanaṃ pūjanaṃ dvijāḥ
117.30
jātavedomahāmāyāṃ caṇḍikāṃ kṣetranāyakam | tilaiśca taṇḍulairājyaisteṣāmannasamudbhavaiḥ
117.31
evaṃ homaḥ prakartavyo brāhmaṇebhyo dhanārpaṇam | yathāsāmarthyamevāpi dakṣiṇā dhenusaṃyutāḥ
117.33
tato vighnāḥ praṇaśyanti purāṇaṃ siddhimāpnuyāt | evaṃ na kurute yastu tasya vighnaṃ vadāmyaham 32
tasyāṅge jāyate rogo bahupīḍāpradāyakaḥ | bhāryāśokaḥ putraśoko dhanahāniḥ prajāyate
117.34
nānāvidhānmahārogānbhuñjate nātra saṃśayaḥ | yasya gehe nāsti vittamupavāsaṃ samācaret
117.35
ekādaśīṃ sa saṃprāpya pūjayenmadhusūdanam | upacāraiḥ ṣoḍaśabhirbhāvayuktena cetasā
117.36
brāhmaṇānbhojayedyastu yathāvittānusārataḥ | keśavāya tato dattvā saṃkalpya haviṣā'nvitam
117.37
svayaṃ kuryāttataḥ prājño bhojanaṃ saha bāndhavaiḥ | putraiśca bhāryayā yuktastataḥ siddhimavāpnuyāt
117.38
purāṇasaṃhitā pūrṇā śrotavyā dharmatatparaiḥ | caturvargasya vai siddhirjāyate tasya nānyathā
117.39
sapādaṃ lakṣamekaṃ tu brāhmākhyaṃ puṣkaraṃ śṛṇu | kṛte yuge tu niṣpāpāḥ śṛṇvanti manujā dvijāḥ
117.40
lakṣasyārdhaṃ tataḥ kṛtsnaṃ purāṇaṃ padmasaṃjñakam | ślokānāṃ tu sahasrābhyāṃ dvābhyāmeva tathā'dhikam
117.41
tretāyuge tathā prāpte śṛṇvanti manujā dvijāḥ | caturvargaphalaṃ bhuktvā te yāsyanti hariṃ punaḥ
117.42
dvāviṃśatisahasrāṇāṃ saṃhitā padmasaṃjñakām̐ | dvāpare kathitā vipra brahmaṇā paramātmanā
117.43
dvādaśaiva sahasrāṇāṃ padmākhyāṃ ca susaṃhitām | kalau yuge paṭhiṣyanti mānuṣā viṣṇutatparāḥ
117.44
eko'rthaścaikabhāvaśca caturṣvapi pravartitaḥ | saṃhitāsvapi viprendrāḥ śeṣākhyānapravistaraḥ
117.45
dvādaśaiva sahasrāṇi nāśaṃ yāsyanti sattamāḥ | kalau yuge tu saṃprāpte prathamaṃ hi bhaviṣyati
117.46
bhūmikhaṇḍaṃ naraḥ śrutvā sarvapāpaiḥ pramucyate | rogairduḥkhaiḥ śatrubhiśca vimuktaḥ sukhamāpnuyāt
117.47
anyatsarvaṃ parityajya japaṃ dānaṃ tathā śrutam | śrotavyaṃ hi prayatnena padmākhyaṃ pāpanāśanam
117.48
prathamaṃ sṛṣṭikhaṇḍaṃ hi bhūmikhaṇḍaṃ dvitīyakam | tṛtīyaṃ svargakhaṇḍaṃ ca pātālaṃ tu caturthakam
117.49
pañcamaṃ cottaraṃ khaṇḍaṃ sarvapāpapraṇāśanam | yaḥ śṛṇoti naro bhaktyā pañca khaṇḍānyanukramāt
117.50
sahasragopradānasya mānavo labhate phalam | mahābhāgyena labhyante pañca khaṇḍāni bhūsurāḥ
śrutāni mokṣadāni syuḥ satyaṃ satyaṃ na saṃśayaḥ
Linked texts (2)
- Padmapurāṇa — Vyāsa, Sanskrit
- Bhūmikhaṇḍa — Sanskrit