Bhukhanda 17: athāṣṭādaśo'dhyāyaḥ
Bhūkhaṇḍa 17
- Language
- Sanskrit
Contents
- 17.70 — 1 part
athāṣṭādaśo'dhyāyaḥ
17.p1
sūta uvāca —
somaśarmā mahāprājñaḥ sumanayā saha sattamaḥ | kapilāsaṅgame puṇye revātīre supuṇyade
snātvā tatra sa medhāvī tarpayitvā surānṛṣīn | tapastepe suśāntātmā japannārāyaṇaṃ śivam
dvādaśākṣaramantreṇa dhyānayukto mahāmanāḥ | tasyaiva devadevasya vāsudevasya suvrataḥ
āsane śayane yāne svapne paśyati keśavam | sadaiva niścito bhūtvā kāmakrodhavivarjitaḥ
sā ca sādhvī mahābhāgā pativrataparāyaṇā | sumanā kāntamevāpi śuśrūṣati tapodhanitam
dhyāyamānasya tasyāpi vighnaiḥ saṃdarśitaṃ bhayam | sarpā viṣolbaṇāḥ kṛṣṇāstatra yānti mahātmanaḥ
pārśvatastapyamānasya tasya te somaśarmaṇaḥ | siṃhavyāghragajā dṛṣṭvā bhayameva pracakrire
vetālā rākṣasā bhūtvā kūṣmāṇḍāḥ pretabhairavāḥ | bhayaṃ pradarśayantyete dāruṇāḥ prāṇināmalam
nānāvidhā mahābhīmāḥ siṃhāstatra samāgatāḥ | daṃṣṭrākarālavaktrāśca jagarjuratibhairavam
viṣṇodhyānātsa dharmātmā na cacāla mahāmatiḥ | mahāvighnaiḥ sa saṃmūḍhairvyāpito munipuṅgava
evaṃ na calate dhyānātsomaśarmā dvijottamaiḥ | bhambhārāvamahābhīmaḥ siṃhastatra samāgataḥ
17.p2
[ taṃ dṛṣṭvā bhayavitrastaḥ sasmāra nṛhariṃ dvijaḥ ]
17.20
indranīlapratīkāśaṃ pītavastraṃ mahaujasam | śaṅkhacakradharaṃ devaṃ gadāpaṅkajadhāriṇam
mahāmauktikahāreṇa induvarṇānukāriṇā | kaustubhenāpi ratnena dyotamānaṃ janārdanam
śrīvatsāṅkena divyena hṛdayaṃ yasya rājate | sarvābharaṇaśobhāḍhyaṃ śatapatranibhekṣaṇam
susmitāsyaṃ suprasannaṃ ratnahārābhiśobhitam | rājamānaṃ hṛṣīkeśaṃ dhyānaṃ tena kṛtaṃ dhruvam
tvameva śaraṇaṃ kṛṣṇa śaraṇāgatavatsala | namaste devadeveśa kiṃ bhayaṃ me kariṣyati
yasyodare trayo lokāḥ sapta cānye mahātmanaḥ | śaraṇaṃ taṃ prapanno'smi kiṃ bhayaṃ me kariṣyati
yasmādbhayaṃ prapadyante kṛtyādikamahābalāḥ | yo hi sarvaprahartā ca tamasmi śaraṇaṃ gataḥ
vṛndārakāṇāṃ sarveṣāṃ dānavānāṃ mahātmanām | yo gatiḥ kliṣṭabhaktānāṃ tamasmi śaraṇaṃ gataḥ
abhayo bhayanāśāya pāpanāśāya jñānavān | ekaśca brahmarūpeṇa tamasmi śaraṇaṃ gataḥ
17.21
vyādhīnāṃ nāśanāyaiva ya auṣadhasvarūpavān | nirāmayo nirānandastamasmi śaraṇaṃ gataḥ
17.22
acalāṃścālayellokānpāpo jñānameva ca | tamasmi śaraṇaṃ prāptaḥ kiṃ bhayaṃ me kariṣyati
17.23
sādhūnāmapi sarveṣāṃ pālakaḥ padmanābhakaḥ | pāti viśvaṃ ca viśvātmā tamasmi śaraṇaṃ gataḥ
17.24
yo me mṛgendrarūpeṇa bhayaṃ darśayate'grataḥ | tamahaṃ śaraṇaṃ prāpto narasiṃhaṃ bhayāpaham
17.25
yamāpanno mahākāyo raṇe hastī samāgataḥ | gajalīlāgataṃ devaṃ śaraṇāgatavatsalam
17.26
gaiṇapaṃ jñānasaṃpannaṃ supāśāṅkuśadhāriṇam | kālāsyaṃ gajatuṇḍaṃ ca śaraṇaṃ sugato'smyaham
17.27
hiraṇyākṣamahartāraṃ vārāhaṃ śaraṇaṃ gataḥ | hrasvāstu vāmanāḥ krūrāḥ pretāḥ kūṣmāṇḍakādayaḥ
vāmanaṃ taṃ prapanno'smi śaraṇāgatavatsalam
17.28
mṛtyūrupadharāḥ sarve darśayanti bhayaṃ mama | amṛtaṃ taṃ prapanno'smi kiṃ bhayaṃ me kariṣyati
17.30
[ brahmaṇyo brahmado brahmā brahmajñānamayo hariḥ| śaraṇaṃ taṃ prapanno'smi kiṃ bhayaṃ me kariṣyati] 29
abhayo yo hi jagato bhītighno bhītidāyakaḥ| [†bhayarūpaṃ prapanno'smi kiṃ bhayaṃ me kariṣyati]
17.31
tārakaḥ sarvapuṇyānāṃ nāśakaḥ sarvapāpinām | tamahaṃ śaraṇaṃ prāpto dharmarūpaṃ janārdanam
17.32
jhañjhāvāto mahācaṇḍo vapurdhūnoti me bhṛśam | śaraṇaṃ tasya gantā'smi sadā gatirayaṃ mama
17.33
atiśītaṃ cātivarṣamātapastāpadāyakaḥ | eṣāṃ rūpeṇa yo devastasyāhaṃ śaraṇaṃ gataḥ
17.34
kālarūpā amī prāptā bhayadā mama cālukāḥ | harik͟harūpiṇāmeṣāṃ pragataḥ śaraṇaṃ sadā
17.35
ya sarvadevaṃ parameśvaraṃ hi niṣkevalaṃ jñānamayaṃ pradhānam
vadanti nārāyaṇamādisiddhaṃ siddheśvaraṃ taṃ śaraṇaṃ prapadye
17.36
iti dhyāyam̐stuvannityaṃ keśavaṃ kleśanāśanam | bhaktyā tena samānītastadā''tmahṛdaye hariḥ
17.37
udyamaṃ vikramaṃ tasya sa dṛṣṭvā somaśarmaṇaḥ | āvirbhūya hṛṣīkeśastamuvāca praharṣayan
17.38
somaśarmanmahāprājña śrūyatāṃ bhāryayā saha | vāsudevo'smi viprendra varaṃ varaya suvrata
17.39
śrutvoditaṃ sa viprendra unmīlya nayanadvayam | dṛṣṭvā viśveśvaraṃ devaṃ ghanaśyāmaṃ mahodayam
17.40
sarvābharaṇaśobhāḍhyaṃ sarvāyudhasamanvitam | divyalakṣaṇasaṃpannaṃ puṇḍarīkanibhekṣaṇam
17.41
pītena vāsasā yuktaṃ rājamānaṃ sureśvaram | [ vainateyasamārūḍhaṃ śaṅkhacakragadādharam
17.42
brahmādīnāṃ sudhātāraṃ jagato'sya mahāyaśāḥ] | viśvarūpaṃ sadārūpaṃ rūpātītaṃ janārdanam
17.43
harṣeṇa mahatā''viṣṭo daṇḍavatpraṇipatya ca | śriyā yuktaṃ bhāsamānaṃ sūryakoṭisamaprabham
17.44
baddhāñjalipuṭo bhūtvā tayā sumanayā saha | jayaṃ deva jagannātha jaya mānada mādhava
17.45
jaya yogīśa yogīndra jaya yajñapate hare | jaya yajñeśa yajñaghna jaya śāśvata sarvaga
17.46
jaya sarveśvarānanta jayarūpa namo'stu te | jaya jñānavatāṃ śreṣṭha jaya tvaṃ jñānanāyaka
17.47
jaya sarvada sarvajña jaya sattvavibhāvana | jaya jīvasvarūpeśa mahājīva namo'stu te
17.48
jaya yajña prajñāṅga jaya prāṇapradāyaka | jaya pāpaghna puṇyeśa jaya puṇyapate hare
17.49
jaya jñānasvarūpeśa jñānagamyāya te namaḥ | jaya padmapalāśākṣa padmanābhāya te namaḥ
17.50
jaya govinda gopāla jaya śaṅkhadharāmala | jaya cakradharāvyakta vyaktarūpāya te namaḥ
17.51
jaya vikramaśobhāṅga jaya vikramanāyaka | [ jaya vidyāvilāsāṅga namo vedamayāya te
17.52
jaya vikramaśobhāṅga jaya udyamadāyaka] | jaya udyarmakālāya udyamāya namo namaḥ
17.53
jaya udyamaśaktāya jaya udyamakāraka | yuddhodyamapravṛttāya tasmai sarvātmane namaḥ
17.54
namo hiraṇyatejaska tubhyaṃ te jayate namaḥ | atitejaḥsvarūpāya sarvatejomayāya ca
17.55
daityatejovināśāya pāpatejoharāya ca | gobrāhmaṇahitārthāya namo'stu paramātmane
17.56
namo'stu huṃtabhuktāya namo havyakahāya te | namaḥ kavyakahāyaiva svadhārūpāya te namaḥ
17.57
svāhārūpāya yajñāya yogabījāya te namaḥ | namaste śārṅgahastāya haraye pāpahāriṇe
17.58
sadasaccodanāyaiva namo vijñānaśāline | namo vedasvarūpāya pāvanāya namo namaḥ
17.59
namo'stu harikeśāya sarvakleśaharāya ca | keśavāya parāyaiva namaste viśvadhāriṇe
17.60
namaḥ kṛpāmayāyaiva namo harṣamayāya ca | anantāya namo nityaṃ śuddhāya kleśanāśine
17.61
ānandāya namo nityaṃ divyāya divyarūpiṇe | rudrairnamitapādāya viriścinamitāya te
17.62
surāsurendranamitapādapadmāya te namaḥ | namo namaḥ sureśāya cāmṛtāyāmṛtātmane
17.63
kṣīrasāgaravāsāya namaḥ padmāniyāya te | oṃkārāya viśuddhāya hyacalāya namo namaḥ
17.64
vyāpine vyāpakāyaiva sarvavyasanahāriṇe | namo namo varāhāya mahākūrmāya te namaḥ
17.65
namo vāmanarūpāya nṛsiṃhāya parāya te | namo rāmāya divyāya sarvakṣatravadhāya ca
17.66
sarvajñānāya matsyāya [†namo rāmāya te namaḥ | namaḥ kṛṣṇāya buddhāya namo mlecchapraṇāśine
17.67
namaḥ kapilaviprāya hayagrīvāya te namaḥ | namo vyāsasvarūpāya] namaḥ sarvamayāya te
17.68
evaṃ stutvā hṛṣīkeśaṃ punarāha janārdanam | [†guṇānāṃ tu paraṃ pāraṃ brahmā vetti na pāvanam ]
17.69
na caiva stotuṃ sarveśa tathā rudraḥ sahasradṛk | vaktuṃ ko hi samarthastu kīdṛśī me matiḥ prabho
17.70
[※nirguṇaṃ saguṇaṃ stotraṃ mayaiva tava keśava̍] | viprabhaktasya sarveśa tava dāso'smi suvrata
janmajanmani lokeśa dayāṃ me kuru pāvana
17.70.p1
iti śrīmahāpurāṇe pādme bhūmikhaṇḍe sumanopākhyāne'ṣṭādaśo'dhyāyaḥ || 18
Linked texts (2)
- Padmapurāṇa — Vyāsa, Sanskrit
- Bhūmikhaṇḍa — Sanskrit